Luka

7 Ka nosetieko weche ma nodwaro wacho ne ji, nodonjo Kapernaum. 2 Koro misumba moro mar jatend-askeche,* ma jatelono nohero, ne tuo ahinya kendo nochiegni tho. 3 Ka jatelono nowinjo humb Yesu, nooro jodongo moko mag Jo-Yahudi ire ni gikwaye mondo obi ochangne misumbane. 4 Ne gibiro ir Yesu mi ne gichako saye gi sinani kama: “Jalo en ng’at mowinjore mondo itimne kamano 5 nikech ohero ogandawa kendo en owuon nogeronwa sunagogi.” 6 Omiyo, Yesu nowuok mi odhi kodgi. To ka nochiegni chopo e odno, jatend-askecheno* noyudo oseoro osiepene mondo owachne niya: “Ruoth, kik ichandri nimar ok an ng’at mowinjore ma inyalo donjo e bwo tat oda. 7 Nikech mano, ne aneno ni ok awinjora biro iri. Kata kamano, wach awacha gimoro mondo imi jatijano ochang. 8 Nimar an bende an ng’at manie bwo teko mar jomamoko, bende an gi askeche moko e bwoya, kendo anyalo wacho ne moro ni, ‘Dhi!’ to odhi, kendo wacho ne machielo ni, ‘Bi!’ to obiro, kendo wacho ne misumbana ni, ‘Tim mae!’ to otimo.” 9 Kane Yesu owinjo wechego, nohum gi ng’atno, mi nolokore kong’iyo oganda ma ne luwe mowachonegi niya: “Awachonu ni, kata mana e Israel pok ayudoe yie maduong’ ma chal kama.” 10 Kendo ka joma ne oorgo nodok e odno, ne giyudo misumbano ka ngima maber.

11 Mapiyo bang’ mano, nodhi nyaka e taon miluongo ni Nain to jopuonjrene kod oganda maduong’ ne ni e wuoth kode. 12 Ka nochiegni gi dho ranga taondno, ne! ne nitie ng’at motho ma ne oting’ kitero oko. Ne en wuowi achiel kende mar min mare. To dhakono bende ne en chi liel. Oganda moro buora moa e taondno bende ne ni kode. 13 Ka Ruoth noneno dhakono, ne okeche mi nowachone niya: “We ywak.” 14 Bang’ mano, nosudo momulo gir ting’o ringre joma otho, mi joting’o ne ochung’ kar tiendgi. Eka nowacho kama: “Rawera, awachoni ni, a malo!” 15 Eka ng’at ma nothono nobet mi ochako wuoyo, kendo Yesu ne ochiwe ne min mare. 16 Koro luoro nomako ogandano duto kendo ne gichako miyo Nyasaye duong’ ka giwacho niya: “Osechung janabi maduong’ e dierwa,” kendo ni, “Nyasaye oseparo joge.” 17 Kendo wach gima notimono nolandore e Judea duto kod alwora duto mar pinyno.

18 Koro jopuonjre mag Johana nodhi mowacho ne Johana wechego duto. 19 Omiyo, Johana noluongo ariyo kuomgi mi noorogi ir Ruoth mondo gidhi gipenje niya: “Be in e Jal Mabiro, koso onego warit ng’at machielo mopogore?” 20 Kane gibiro ire, jogo nowachone kama: “Johana Jabatiso oseorowa iri mondo wapenji kama, ‘Be in e Jal Mabiro, koso onego warit ng’at machielo mopogore?’” 21 E sanogo, nochango ji mang’eny kuom tuoche, gi midekre malich, kendo nogolo jochiende, kendo noyawo wenge muofni mang’eny. 22 Kae to nodwokogi niya: “Dhiuru mondo unyis Johana gik ma useneno kendo ma usewinjo: Muofni koro neno, pudhe wuotho, jodhoho bedo maler, joma itgi odino winjo, joma otho ichiero, kendo joma odhier iwachonegi wach maber. 23 Ng’at mamor en ng’atno ma ok chwanyre nikech an.”

24 Ka joma Johana nooro ne osea, Yesu nochako penjo oganda e wi Johana niya: “Ang’o ma ne udhi neno e thim? Odundu ma yamo yiengo, koso? 25 Kare ang’o ma nudhi neno? Ng’at morwako lewni mayom, koso? Joma rwako lewni mabeyo ahinya kendo modak e ngima mayom yudore e ute ruodhi. 26 Kuom adier, kare ang’o ma ne udhi neno oko? Janabi? Ee, akonu ni, en janabi kendo oduong’ moloyo kata mana janabi. 27 En e ma ne ondik wachne niya: ‘Ne! Aoro jaotena e nyimi ma biro ikoni yo motelo.’ 28 Akonu ni, kuom joma mon onyuolo, onge ng’at maduong’ moloyo Johana, to ng’at matinie mogik e Pinyruodh Nyasaye duong’ moloye.” 29 (Ka ji duto kod josol osuru nowinjo mano, ne giwacho ni, Nyasaye en ng’at makare, nimar noyudo osebatisgi gi batiso mar Johana. 30 To Jo-Farisai kod joma ne olony gi Chik nochayo dwaro mar Nyasaye, nikech Johana ne ok obatisogi.)

31 “Kuom mano, anapim tieng’ni gi ng’a, to gichal gi ng’a? 32 Gichal gi nyithindo matindo mobet e chiro to giluongore ka giwacho niya: ‘Nende wagoyonu asili to ne ok umiel; ne wagoyo nduru to ne ok uywak.’ 33 Kamano bende, Johana Jabatiso osebiro ka ok ochiem kendo ka ok omadh divai, to uwacho kama: ‘En gi jachien.’ 34 Wuod dhano osebiro kochiemo kendo kometho, to uwacho ni: ‘Neuru! Ng’at ma iye lach kendo ma jamadh divai, osiep josol osuru gi joricho!’ 35 Kata kamano, rieko nyisore ni en kare kokalo kuom nyithinde duto.”

36 Koro, achiel kuom Jo-Farisai nosiko ka kwaye mondo odhi ochiem kode. Omiyo, nodonjo e od Ja-Farisaino mi nobet piny e mesa.’ 37 To ne! dhako moro ma ne ong’ere e taondno kaka jaricho nowinjo ni Yesu ne chiemo e od Ja-Farisaino, mi nokelo chupa molos gi kidi mar alabasta moting’o mo ma nigi suya mamit. 38 Eka bang’ dhi gi ka ng’e Yesu but tiende, noywak mi nomiyo pi wang’e oton e tiend Yesu, kendo noyweyogi gi yie wiye. Bende, nonyodho tiendene mi noolo mo ma nigi suya mamitno kuomgi. 39 Bang’ neno mano, Ja-Farisai ma noyudo ogwele nowacho e chunye kama: “Ka da bed ni ng’atni en janabi adier, da ong’eyo ni dhako momuleno en dhako manade, ni en jaricho.” 40 To Yesu nodwoke niya: “Simon, an gi wach moro ma adwaro wachoni.” Nokone kama: “Japuonj, wachnago!”

41 “Nitie ji ariyo ma ne nigi gop jaholo moro; achiel ne nigi gowi mar dinari* 500, to machielo dinari 50. 42 Kane gionge gi gima digichulego, noweyonegi giduto ma onge wach moro. Kuom mano, en ng’ano kuomgi ma biro here moloyo?” 43 Simon nodwoke kama: “Aparo ni en jalno ma noweyone gowi mang’eny.” Yesu nowachone niya: “Ing’ado wach kare.” 44 Bang’ mano, nolokore ir dhakono mowacho ne Simon kama: “Ineno dhakoni? Sama nende adonjo e odi, ne ok imiya pi mar lwoko tiendena. To dhakoni osetono pi wang’e e tiendena kendo oseyweyogi gi yie wiye. 45 In ne ok inyodha, to dhakoni, chakre sama nende adonjo ka, pok oweyo nyodho tiendena. 46 In a ok iolo mo e wiya, to dhakoni oseolo mo ma nigi suya mamit e tiendena. 47 Nikech mano awachoni ni, kata obedo ni richone ng’eny, osewene nikech herane mogundho. To ng’at ma iwene manok, e ma herane nok.” 48 Eka nowacho ne dhakono niya: “Richoni oweni.” 49 Joma nobet kode e mesa nochako wacho e kindgi giwegi niya: “Mae ng’at manade ma weyo ne ji kata mana richo?” 50 To nowacho ne dhakono kama: “Yieni oseresi; dhi gi kuwe.”