Tich Joote
3 Koro Petro gi Johana ne idho malo e hekalu e sa lemo, ma ne en sa ochiko odiechieng’, 2 kendo noyudo oting’ ng’at moro ma nosebedo puth chakre nyuolne. Ji ne ohero kete machiegni gi ranga hekalu kama ne iluongo ni Rangach Malong’o, mondo eka ng’atno onwang’ kaka okwayo mich mag konyo jochan kuom joma donjo e hekalu. 3 Ka noneno ka Petro gi Johana chiegni donjo e hekalu, nochako kwayogi mich. 4 To Petro gi Johana nong’iyo wang’e tir kendo ne giwachone niya: “Ng’iwa ane.” 5 Omiyo, nochomo wang’e kuomgi kogeno yudo gimoro kuomgi. 6 To Petro nowachone kama: “Fedha gi dhahabu aongego, kata kamano we amiyi gima an-go. E nying Yesu Kristo Ja-Nazareth, chung’ mondo iwuoth!” 7 Eka gikanyono nomako lwet ng’atno ma korachwich mi nochunge malo. Gikanyono, tiendene gi ombong’ne nobedo motegno; 8 mi nochikore mochako wuotho, kendo nodhi kodgi ei hekalu kowuotho, kochikore, kendo kopako Nyasaye. 9 Mi ji duto ne onene kowuotho kendo kopako Nyasaye. 10 Kendo ne gichako fwenyo ni kare ne en ng’at ma ne jabetga e Rangach Malong’o mar hekalu ka okuecho, mi ne giwuoro ahinya kendo ne gipong’ gi ilo nikech gima nosetimore ne ng’atno.
11 Sama ng’atno ne pod omako lwet Petro gi Johana, ji duto noringo kanyachiel nyaka irgi e agola* ma ne iluongo ni Agoch Solomon, ka giwuoro ahinya gima ne oa timoreno. 12 Ka Petro noneno mano, nowacho ne ji niya: “Un Jo-Israel, marang’o uwuoro mae, kendo marang’o ung’iyowa ahinya ka gima wamiyo ng’atni owuotho kuom tekowa wawegi kata nikech wan joma ochiwore ahinya ne Nyasaye? 13 Nyasach Ibrahim, gi Isaka, kod Jakobo, Nyasach kwerewa, osemiyo Jatichne Yesu duong’, jal ma ne uchiwo kendo ne undhogo e lwet Pilato, kata obedo ni noseng’ado mar gonye. 14 Ne ukwedo jal maler kendo makareno, mi ne ukwayo mondo ogonynu ng’at ma ne en janek, 15 mi ne unego Jatelo Maduong’ moseket mondo ochiw ngima. To Nyasaye ne ochiere oa kuom joma otho, kendo wan joneno mag wachno. 16 Kendo kokalo kuom nyinge, bende nikech yiewa kuom nyinge, ng’at ma sani uneno kendo ung’eyoni, osemi nyalo mar wuotho. Yie ma wan-go kokalo kuome osemiyo ng’atni ochango chuth e nyimu duto. 17 Kuom mano, owetena, ang’eyo ni ne utimo mano nikech ne ukia, mana kaka jotendu bende ne kia. 18 To mano e yo ma Nyasaye osechopogo weche ma nokoro motelo kokalo kuom dho jonabi duto, ni Kristone ne dhi yudo sand.
19 “Omiyo, lokuru chunyu ua e richo, kendo ulokru ir Nyasaye eka richou oruch, mondo Jehova owuon omiu kinde mar duogo tekou 20 kendo mondo oornu Kristo moseketo, ma en Yesu. 21 Jalni nyaka rit mondi e polo nyaka chop kindego mar duoko gik moko duto obed kaka ne gin, ma Nyasaye nowacho kokalo kuom dho jonabine maler mag ndalo machon. 22 Kuom adier, Musa nowacho kama: ‘Jehova Nyasaye biro ketonu janabi ma chal koda koa kuom oweteu. Nyaka to uwinj gimoro amora mowachonu. 23 Kuom adier, ng’ato ang’ata ma ok winj Janabino, ibiro kethe chuth oa e dier oganda.’ 24 To jonabi duto kochakore gi Samuel kod joma noluwo bang’e, mana kaka giduto ne gisekoro, gin bende ne gisehulo wach kindewagi ayanga. 25 Un e nyithind jonabi kod nyithind singruok ma Nyasaye notimo gi kwereu ka nowacho ne Ibrahim niya: ‘Kendo dhoudi duto mag piny ibiro guedh kokalo kuom kothi.’ 26 Bang’ ka Nyasaye noseketo Jatichne, ne okwongo oore iru mondo oguedhu ka omiyo ng’ato ka ng’ato kuomu olokre oa e timbeu maricho.”