Jo-Rumi
3 To kare, Ja-Yahudi oloyo jomamoko gang’o, kata ere ber ma nyangu kelo? 2 Nitie ber mang’eny. Mokwongo, gin e ma ne omigi weche maler mag Nyasaye. 3 Ang’o kare minyalo wach? Ka jomoko ne onge gi yie, be bedogi ma onge yie biro mono Nyasaye doko ja adier? 4 Ooyo ngang’! To Nyasaye e ma mondo osik ka en ja adier, to dhano duto obed jomiriambo, mana kaka ondik niya: “Mondo oyud ni in ng’at makare e wecheni, kendo mondo ilo bura sama iyali.” 5 Kata kamano, ka bedowa joma ok kare miyo tim makare mar Nyasaye nenore ayanga, wanawach ang’o? Be Nyasaye timo gima ok kare sama onyiso mirimbe? (Awuoyo mana kaka dhano.) 6 Ooyo ngang’! Ka ok kamano, kare ere kaka Nyasaye biro ng’ado bura ne piny?
7 To ka miriambo ma awacho osemiyo adiera mar Nyasaye onenore ayanga mondo oyudgo duong’, kare ang’o momiyo pod ing’adona bura kaka jaricho? 8 To ang’o momiyo ok wawach kaka jomoko ma riambo kuomwa wacho ni, “Watimuru gik maricho mondo eka gik mabeyo obi”? Bura mibiro ng’ad ne jogo en bura mowinjore kodgi.
9 To kare wawach ang’o? Be waloyo jomoko? Ooyo ngang’! Nimar wasewacho ni Jo-Yahudi kaachiel gi Jo-Grik, giduto gin e bwo richo; 10 mana kaka ondik niya: “Onge dhano moro amora makare, kata mana achiel; 11 onge ng’at ma wach donjone; onge ng’at ma manyo Nyasaye. 12 Ji duto osebayo yo, giduto gisebedo joma nono; onge ng’at ma nyiso ng’wono, onge kata mana ng’ato achiel.” 13 “Dhogi* en liel moyawore; gisewuondo ji gi lewgi.” “Sum mar thuonde ni e dhogi.” 14 “Kendo dhogi opong’ gi kuong’ruok kod sigu.” 15 “Tiendegi reto ka dhi chuero remo.” 16 “Kethruok gi masiche malit ni e yoregi, 17 kendo pok ging’eyo yor kuwe.” 18 “Onge luoro Nyasaye e nyim wang’gi.”
19 Koro wang’eyo ni gik moko duto ma Chik wacho, owachogi kuom joma ni e bwo Chik, mondo eka dho ji duto oling’, kendo mondo piny duto obi ochung’ e kom-bura mar Nyasaye mondo okumgi. 20 Omiyo, onge ng’at ma ibiro kwan ni en ng’at makare e nyime kokalo kuom timbe mag luwo chik, nimar chik miyo wang’eyo richo e yo malong’o.
21 To koro tim makare mar Nyasaye osefwenyore mana kaka Chik kod weche Jonabi osenyiso, ok kokalo kuom rito chik, 22 to kokalo kuom yie kuom Yesu Kristo, tim makare mar Nyasaye chopo ne ji duto ma nigi yie. Nikech e kind ji duto, onge pogruok. 23 Nikech ji duto osetimo richo kendo girem kuom duong’ mar Nyasaye, 24 kendo kuom ng’wonone mogundho ikwanogi ni gin joma kare, ma en kaka mich ma giyudo nono kokalo kuom rawar ma Kristo Yesu nochulo mondo ogonygi. 25 Nyasaye ne ochiwe kaka misango mar pwodho joma keto yie kuom rembe. Notimo mano mondo onyisgo owuon timne makare, nimar Nyasaye ne nyiso horuok kuom weyo richo ma ji notimo e ndalo machon. 26 Mano ne en ni mondo onyisgo timne makare e ndalo ma sani, mondo eka en owuon obed makare kata mana e sama okwano ni ng’at ma keto yie kuom Yesu en ng’at makare.
27 To kara sunga en mar ang’o? Oonge gi kare. En kokalo kuom chik mane? Be en kuom timo gik ma chik dwaro? Ooyo ngang’, to en kokalo kuom chik mar yie. 28 Nimar waneno ni ikwano ng’ato ni en ng’at makare kokalo kuom yie, to ok kuom timbe mag luwo chik. 29 Be Nyasaye en Nyasach Jo-Yahudi kende? Donge en Nyasach joma oa e ogendni mamoko bende? Ee, en Nyasach joma oa e ogendni bende. 30 Nikech Nyasaye en achiel, obiro kwano joma oter nyangu ni gin joma kare nikech yie, kendo obiro kwano joma ok oter nyangu ni gin joma kare kokalo kuom yiegi. 31 Ka en kamano, be mano nyiso ni chik ok ti nikech yiewa? Ooyo ngang’! Kar mano, wasiro chik.