1 Jo-Korintho

15 Owetena, koro aparonu kuom wach maber ma ne alandonu ma bende ne urwako kendo ma uchung’ie motegno. 2 Kokalo kuom wachno, sani iresou ka umakoru motegno gi wach maber ma ne alandonuno, mak mana kapo ni ne urwako yie kayiem nono.

3 Nimar achiel kuom gik ma ne akwongo puonjou gin gik ma an bende ne omiya, ni Kristo ne otho ne richowa kaka Ndiko nokoro; 4 kendo ni ne oyike, ee, mi ne ochiere e odiechieng’ mar adek kaka Ndiko nokoro; 5 kendo ni nofwenyore ne Kefa, eka bang’e ne ji Apar Gariyoka. 6 Bang’ mano, nofwenyore ne owete mokalo 500 ma nochokore kamoro achiel, ma thothgi pod ni kodwa, kata obedo ni moko kuomgi osenindo e tho. 7 Bang’e, nofwenyore ne Jakobo eka ne joote duto. 8 To mogik chuth, nofwenyorena an bende mana ka ng’at ma nonyuol bogno.

9 Nimar an e ma atinie mogik kuom joote, kendo ok awinjora mondo oluonga ni jaote nikech ne asando kanyakla mar Nyasaye. 10 Kata kamano, ng’wono mogundho mar Nyasaye osemiyo an gi migawo ma atimo sanini. Kendo ng’wonone mogundho ma nonyisa ok nobedo kayiem nono, to ne atiyo matek moloyogi giduto; to ok kuom tekrena awuon, to kuom ng’wono mogundho mar Nyasaye man kuoma. 11 Kare kata bed ni en an kata gin, mano e kaka wayalo kendo mano e kaka nubedo joma oyie.

12 Koro ka wayalo ni Kristo osechier oa kuom joma otho, obet nade ni jomoko kuomu wacho ni joma otho ok bi chier? 13 Ka kuom adier joma otho ok bi chier, to kare Kristo bende ne ok ochier. 14 To ka dibed ni Kristo ne ok ochier, kuom adier yalo ma watimo en kayiem nono, kendo yieu bende en kayiem nono. 15 E wi mano, wabedo bende joneno mag miriambo kuom Nyasaye nikech wasechiwo neno mar miriambo e wi Nyasaye kuom wacho ni nochiero Kristo, to kare ne ok ochiere, ka dipo ni adier joma otho ok chier. 16 Nimar ka ok bi chier joma otho, Kristo bende ne ok ochier. 17 E wi mano, ka Kristo ne ok ochier, yieu en kayiem nono; usiko e richou. 18 Kare joma nonindo e tho ka gin e winjruok achiel gi Kristo bende kargi oselal nono. 19 Ka genowa kuom Kristo en mana mar ngimani kende, wan e joma onego onenwa lit moloyo ji duto.

20 To koro Kristo osechier oa kuom joma otho, en e nyak mokwongo kuom joma osenindo e tho. 21 Nimar ka tho nobiro kokalo kuom ng’ato achiel, joma otho bende ibiro chier kokalo kuom ng’ato achiel. 22 Nimar mana kaka kuom Adam dhano duto tho, e kaka bende kuom Kristo dhano duto biro bedo mangima. 23 To mana ka luwore gi kar ng’ato ka ng’ato: Kristo e nyak mokwongo, bang’ mano, joma gin mag Kristo e ndalo ma biro yudo ka entie.* 24 Kae to gikone, obiro duoko Pinyruoth ne Nyasache kendo Wuon mare bang’ kosegolo oko loje duto gi telo duto kod teko. 25 Nimar nyaka oloch ka en ruoth nyaka chop kama Nyasaye biro keto wasike duto e bwo tiende. 26 Kendo jasigu mogik ma en tho, ibiro tiek chuth. 27 Nimar Nyasaye “noketo gik moko duto e bwo tiend Kristo.” To sama owacho ni ‘gik moko duto oseket e bwo Kristo,’ nenore maler ni mano ok oriwo Jalno ma noketo gik moko duto e bwo Kristo. 28 To bang’ ka gik moko duto oseket e bwo Wuowi, eka Wuowi bende biro bolore e bwo Jalo ma noketo gik moko duto e bwo Kristo, mondo Nyasaye obed gik moko duto ne ji duto.

29 Ka ok kamano, kare joma ibatis mondo gibed joma otho biro timo nang’o? Ka ok chier joma otho ngang’, kare ang’o momiyo ibatisgi mondo gibed kamano? 30 Ang’o momiyo seche duto waketo ngimawa e bwo gik ma nyalo hinyowa kata kelonwa tho? 31 Tho ochoma pile. Owetena, mano en gima an-go gadier mana kaka sunga ma an-go nikech un, ma bende an-go kuom Kristo Yesu Ruodhwa. 32 Ka asekedo gi ondiegi e Efeso mana kaka jomamoko, mano konya nade? Ka kare ok chier joma otho, “wachiemuru kendo wameth nimar kiny wanatho.” 33 Kik wuondu. Bedo osiepe joma richo ketho timbe mabeyo. 34 Pachu mondo ochiew e yo makare kendo kik ubed gi kido mar timo richo, nimar jomoko onge gi ng’eyo mar Nyasaye. Awacho mae mondo akuod wiu.

35 Kata kamano, ng’ato nyalo penjore niya: “Ere kaka ibiro chier joma otho? Ee, en kit del mane ma ibiro chiergigo?” 36 In ng’at ma parone ok ni kare! Gima ichuoyo ok nyal bedo mangima mak mana ka osetho mondi. 37 Kendo kuom gima ichuoyo, ichuoye, ok ka en del* mosedongo, to mana kodhi matin, bed ni en mar ngano kata mar kit cham moro amora; 38 to Nyasaye miyo kodhino del mana kaka en owuon ohero, kendo omiyo kodhi ka kodhi del mar kodhino owuon. 39 Ringruok duto ok chalre, to nitie mar dhano, nitie mar jamni, nitie mar winy, kendo nitie mar rech. 40 Bende, nitie del mag polo gi del mag piny; to ber ma del mag polo nigo opogore gi ber ma del mag piny nigo kuom duong’ ma gin-go. 41 Rieny mar wang’-chieng’ opogore e duong’ne, bende, rieny mar dwe opogore, kendo mar sulwe bende opogore; to kuom adier, rieny mar sulwe ka sulwe opogore e duong’gi.

42 Kamano bende e kaka ichiero joma otho. Ichuoye e del ma tow; to ichiere gi del ma ok tow. 43 Ichuoye ka oonge gi duong’; to ichiere gi duong’. Ichuoye ka onyap; to ichiere ka en gi teko. 44 Ichuoye ka en del mar ringruok; to ichiere gi del mar polo. Ka nitie del mar ringruok, nitie bende del mar polo. 45 Ondik kamano niya: “Adam dhano mokwongo nodoko chuny mangima.” Adam mogik nobedo gi del mar polo ma chiwo ngima. 46 Kata kamano, del mar polo ok e ma kwong. To mar ringruok e ma kwongo, eka bang’e, mar polo. 47 Dhano mokwongo en moa e piny kendo mochue gi buru; to dhano mar ariyo en moa e polo. 48 Mana kaka jal ma ochue gi buruno chalo, e kaka joma ochue gi buru bende chalo; kendo mana kaka jal moa e polono chalo, e kaka joma gin mag polo bende chalo. 49 Mana kaka wasebedo e kit jal mochue gi buru, wanabed bende e kit jalo moa e polo.

50 To awachonu owetena ni ringruok gi remo ok nyal yudo pok e Pinyruodh Nyasaye, kendo gima tow ok nyal yudo pok mar gima ok tow. 51 Neuru! anyisou wach moro maler moum, niya: Ok waduto ma wananind e tho, to waduto ibiro lokwa 52 mapiyo ka diemo wang’ e kinde ywak mar turmbeta mogik. Nikech turmbeta noywagi, kendo joma otho ibiro chier gi del ma ok tow, mi nolokwa. 53 Nimar del ma towni nyaka rwak del ma ok tow, kendo del ma tho nyaka rwak del ma ok tho. 54 To ka del ma towni oserwako del ma ok tow kendo ka del ma tho oserwako del ma ok tho, eka wach biro timore ma ne ondik niya: “Oselo tho motieke chuth nyaka chieng’.” 55 “In tho, ere lochoni? In tho, lit ma ikelo ni kanye?” 56 Richo e lit ma kelo tho, to teko mar richo en Chik. 57 To agoyo ne Nyasaye erokamano nimar omiyo walocho kokalo kuom Ruodhwa Yesu Kristo!

58 Kuom mano, owetena ma ahero, chung’uru motegno ma ok uyiengni, ka kinde duto ubedo modich e tij Ruodhwa, ka ung’eyo ni tich matek mutiyo ne Ruodhwa ok en kayiem nono.