1 Jo-Korintho

7 Koro ka luwore gi weche ma nundikona, ber mondo dichwo kik mul* dhako; 2 to nikech tim terruok* onya, ber mondo dichwo ka dichwo obed gi chiege owuon kendo dhako ka dhako obed gi chwore owuon. 3 Dichwo mondo omi chiege gima owinjore chiege oyud, to dhako bende mondo otim kamano ne chwore. 4 Dhako onge gi teko kuom ringre owuon, to chwore e ma nigo; kamano bende, dichwo onge gi teko kuom ringre owuon, to chiege e ma nigo. 5 Kik utuonru, mak mana ka uwinjoru e kindu mar tuonruok kuom kinde, mondo ubed gi thuolo mar lamo eka bang’e uriwru kendo, mondo Satan kik dhi nyime temou nikech bedou ma onge ritruok. 6 Kata kamano, gima asewachono en gima unyalo timo, to ok en chik. 7 To daher ni ji duto obed kaka an. Mak mana ni ng’ato ka ng’ato nigi michne owuon ma Nyasaye osemiye, moro e yo ma kama, to machielo e yo mopogore.

8 Koro awacho ne joma ok ni e kend kod mond liete ni ber mondo gisik kaka an. 9 To kapo ni gionge gi ritruok, gidonj e kend nimar ber donjo e kend kar owruok gi gombo.

10 To kuom joma ni e kend, achikogi, ok an, to mana Ruodhwa e ma chikogi, ni dhako kik pog dak gi chwore. 11 To ka opogo dak gi chwore, osik ma ok okende, ka ok kamano to odog olos winjruok gi chwore; bende, dichwo ok onego owe chiege.

12 To kuom jomamoko, awachonegi, to ok an, to mana Ruodhwa e ma chikogi niya: Ka nitie owadwa ma nigi chiege ma ok ni e yie, to chiegeno oyie dak kode, kik oweye; 13 to ka nitie dhako ma nigi chwore ma ok ni e yie, to chworeno oyie dak kode, kik oweye. 14 Nimar dichwo ma ok ni e yie ikwano ni oler nikech chiege, kendo dhako ma ok ni e yie ikwano ni oler nikech owadwa ma en chworeno; ka da ok kamano, to nyithindu dine obedo ma ok ler, to koro giler e wang’ Nyasaye. 15 To ka jal ma ok ni e yie oyiero mar pogo dak gi jaode manie yie, we otim kamano; owadwa kata nyaminwa ok otue sama gima kamano otimore, to Nyasaye oseluongou mondo uyud kuwe. 16 Nimar in dhako, ere kaka ding’e kabe nires chwori? To in dichwo, ere kaka ding’e kabe nires chiegi?

17 Kata kamano, mana kaka Jehova osemiyo ng’ato ka ng’ato pok, ng’ato ka ng’ato mondo owuoth ka luwore gi kaka Nyasaye oseluonge. Mano e momiyo achiko kamano e kanyakla duto. 18 Be nitie ng’at ma ne oluong kosetere nyangu? Osik kamano. Be nitie ng’at ma ne oluong ka pok otere nyangu? Kik tere nyangu. 19 Bedo ni oter ng’ato nyangu ok en gimoro, bende, bedo ma ok oter ng’ato nyangu ok en gimoro; to gima duong’ en rito chike Nyasaye. 20 Ka luwore gi kaka ng’ato ne chalo kane oluonge, osik mana kamano. 21 Be ne oluongi ka in misumba? Kik iwe mano ochandi; to ka inyalo yudo yor bedo thuolo, to ber itim kamano. 22 Nikech ng’ato ang’ata ma Ruodhwa noluongo ka en misumba, koro en ng’at moseket thuolo; kamano bende, ng’at ma noluong ka en thuolo, koro en misumba Kristo. 23 Ne ong’iewu gi nengo, omiyo weuru bedo wasumbni mag dhano. 24 Owetena, kaka ng’ato ka ng’ato ne chalo kane oluonge, osik mana kamano e nyim Nyasaye.

25 Koro kuom wach joma silili,* aonge chik moro amora moa kuom Ruodhwa, to achiwo pacha kaka ng’at ma Ruoth nokecho kokwana kaka ng’at minyalo gen. 26 Kuom mano, aneno ni ber mondo ng’at ma dichwo odhi nyime bedo kaka en ka luwore gi kaka piny tinde tek. 27 Be in ng’at ma chik otueyo kuom chiege? Kik imany kaka diweye. Be in ng’at ma chik ogonyo kuom chiege? Kik imany dhako mondo ikend. 28 To kata ka dipo ni ikendo, ok itimo richo. Kendo ka ng’at ma silili* odonjo e kend, ng’at ma kamano ok otimo richo. To joma odonjo e kend nobed gi masira e ringregi. An atemo mana geng’ou kuom mano.

29 E wi mano, owetena, awacho mano nikech ndalo modong’ nok. Chakre sani ka dhi nyime, joma nigi mon mondo obed ka joma ongego, 30 kendo joma ywak mondo obed ka joma ok ywag; bende, joma nigi mor obed ka joma onge gi mor; kendo joma ng’iepo obed ka joma onge gimoro. 31 Bende, joma tiyo gi piny kik gibed ka joma tiyo kode ahinya; nimar kit pinyni lokore. 32 Kuom adier, daher mondo kik ubed gi parruok. Dichwo ma ok okendo nigi parruok kuom weche mag Ruoth, kaka onyalo bedo malong’o e wang’ Ruoth. 33 To dichwo mokendo nigi parruok kuom weche mag piny, kaka onyalo bedo malong’o e wang’ chiege, 34 kendo pache opogore diriyo. Bende, dhako ma ok okend kata nyako ma silili nigi parruok kuom weche mag Ruoth, mondo obed maler e ringre kendo e pache. To dhako ma okend nigi parruok kuom weche mag piny, kaka onyalo bedo malong’o e wang’ chwore. 35 To awacho mae mondo un uwegi uyud ber, ok ni mondo atueu, to mondo ajiwu ne gima owinjore, kendo mondo usik ka uchiworu ne tij Ruodhwa ma onge gima galo pachu.

36 To ka ng’ato neno ni ok owuoth mowinjore nikech pok odonjo e kend,* kendo ka osekalo higni ma rowere thiewoe, koro ma e gima onego otimre: Otim gima odwaro; ok otimo richo. Odonj e kend. 37 To ka ng’ato oseng’ado e chunye ni mano ok ochuno, to en gi teko mar chiko dwache owuon, kendo oseng’ado e chunye mar siko ma ok odonjo e kend,* obiro timo maber. 38 Kamano bende, ng’at ma donjo e kend timo maber, to ng’at ma ok odonjo e kend biro timo maber moloyo.

39 Chik otueyo dhako ka pod chwore ngima. To kapo ni chwore onindo e tho, en thuolo mondo ng’ato ang’ata modwaro okende, to mana kuom Ruoth. 40 Ka luwore gi pacha, dhakono biro bedo mamor moloyo kosiko ma ok okende; to adier aparo ni an bende an gi roho mar Nyasaye.