1 Jo-Korintho

9 Donge an thuolo, koso? Donge an jaote? Donge aseneno Yesu Ruodhwa? Donge un e tich ma asetiyo kuom Ruoth, koso? 2 To kata ka ok an jaote ne jomamoko, adier an jaote ne un! Nikech un e gima chalo alama ma nyiso gadier ni an jaote kuom Ruodhwa.

3 Dwoko ma achiwo ne joma nona en ma: 4 Donge wan gi ratiro mar chiemo kendo metho, koso? 5 Donge wan gi ratiro mar donjo e kend kendo wuotho gi mondewa manie yie, mana kaka joote mamoko, gi owete Ruodhwa, kod Kefa, koso? 6 Koso en mana Barnaba kod an kende e ma waonge ratiro mar weyo timo tije ma wakonyorego e ngima? 7 En askach lweny manade ma tiyo to ochulore owuon? En ng’at manade ma pidho puoth mzabibu to ok ocham olembe? Kata, en ng’a ma rito kweth to ok omadh moko kuom chak ma kwethno golo?

8 Be awacho wechegi ka luwore gi pach dhano, koso? Donge Chik bende wacho wechego? 9 Nimar ondik e Chik Musa kama: “Kik itue dho ruath sama itiyo kode e dino cham.” Be Nyasaye dewo mana ruedhi? 10 Koso adier owacho kamano nikech wan? Adier wachno ne ondik nikech wan, nimar ng’at ma puro gi kwe dhiang’ kod ng’at ma dino cham, gitimo kamano ka gigeno chamo moko kuomgi.

11 Ka wasechuoyo weche motudore gi Nyasaye e kindu, be en gima lich ahinya ka wakayo kony mag ringruok koa kuomu? 12 Ka jomamoko nigi ratiro ma chal kamano kuomu, wan donge wan gi ratirono moloyo, koso? Kata kamano, pok watiyo gi ratirono, to wanano e gik moko duto mondo kik wageng’ ne wach maber e wi Kristo e yo moro amora. 13 Donge ung’eyo ni joma tiyo ne Nyasaye e hekalu chamo gik man kuno, kendo ni joma pile tiyo e kendo mar misango yudo pok moro koa e kendono, koso? 14 Kamano bende, Ruodhwa nochiko ni mondo joma lando wach maber oyud kony mag ngima kokalo kuom wach maber.

15 To pok atiyo kata gi achiel kuom chenrogo. Kuom adier, ok andik wechegi ni mondo utimna kamano. Dine obedo maberna moloyo ka atho. Onge ng’ato ang’ata ma biro maya gik ma miyo apakora! 16 Omiyo, koro ka ayalo wach maber, mano ok onego omi apakra, nimar ochuno ni nyaka ayale. Adier, nobedna malit ka ok ayalo wach maberno! 17 Ka atimo kamano gi chuny moikore, abiro yudo pok; to kata ka atimo to chunya ok dwar, pod an gi tich mosemiya mar bedo jarit.* 18 Kare pokna en mane? Ni sama ayalo wach maber, to mondo ayale ma ok akaw chudo, mondo kik ati marach gi ratiro ma an-go kuom wach maberno.

19 Nimar, kata obedo ni an thuolo kuom ji duto, asetimora misumba ne ji duto mondo aywa ji mang’eny kaka nyalore. 20 Kuom Jo-Yahudi ne atimora kaka Ja-Yahudi mondo aywa Jo-Yahudi; kuom joma ni e bwo chik ne atimora ng’at manie bwo chik, kata obedo ni an awuon to ok an e bwo chik, mondo aywa joma ni e bwo chik. 21 Kuom joma onge chik ne atimora ka ng’at ma onge chik, mondo aywa joma onge chik, kata obedo ni an gi chik kuom Nyasaye kendo an e bwo chik kuom Kristo. 22 Kuom joma nyap ne atimora ma nyap, mondo aywa joma nyap. Asetimora gimoro amora ma dwarore ne ji mopogore opogore duto mondo ka nyalore to aresie jomoko kuomgi. 23 To atimo gik moko duto nikech wach maber mondo ayale ne jomoko.

24 Donge ung’eyo ni kuom jong’wech ma piem, giduto giringo to mana ng’ato achiel kuomgi e ma yudo mich? Ringuru e yo ma biro miyo uyud michno. 25 Koro ng’ato ka ng’ato manie piem nyiso kido mar ritruok e gik moko duto. En adier ni gitimo kamano mondo giyud osimbo ma nyalo kethore, wan to watimo mano mondo wayud osimbo ma ok nyal kethore. 26 Kuom mano, yo ma aringogo ok en ka ng’at ma riwo gi kiawa; yo ma agoyogo ngum ok en ni mondo ago yamo; 27 to asiko ka agoyo ringra kendo chike kaka misumba, mondo bang’ ka aseyalo ne jomamoko, an awuon kik yud ni ok awinjora e yo moro amora.