2 Jo-Korintho

12 An nyaka apakra. En gima ok konya, kata kamano koro abiro wuoyo e wi fweny kod weche ma Ruodhwa elo. 2 Ang’eyo ng’at moro manie winjruok gi Kristo, ma higni 14 mokalo—ok ang’eyo kata kane en e del mar ringruok kata ok ne en kamano; Nyasaye e ma ong’eyo—ne oter nyaka e polo mar adek. 3 Ee, ang’eyo ng’at ma kamano—kata kane en e del mar ringruok kata ok ne en kamano, ok ang’eyo; Nyasaye e ma ong’eyo— 4 ma noter e paradiso, mi nowinjo weche ma ok nyal hul, kendo gin gik ma ok oyie ne dhano wacho. 5 Abiro pakora nikech ng’at ma kamano, ok abi pakora kuoma awuon, to mak mana kuom nyawo ma an-go. 6 Nimar kata ka adwaro pakora, ok abi bedo ka ng’at ma pache ok ni kare, nikech abiro wacho adier. To ok atim kamano mondo kik ng’ato miya pak mokalo gik moneno kuoma kata mowinjo kuoma, 7 mana nikech aseyudo fweny malich kamano.

Mondo kik abed gi sunga ahinya, ne omiya kudho moro ma chwowo ringrena, malaika mar Satan, mondo osik ka sanda mondo kik asungra ahinya. 8 Ne asayo Ruodhwa nyadidek kuom wachno ni mondo gino oweya. 9 To nodwoka kama: “Ng’wonona mogundho oromi, nimar tekona nyisore e yo malong’o chuth e nyawo.” Omiyo, anabed mamor ahinya ka apakora kuom nyawo ma an-go, mondo teko mar Kristo osik kuoma kaka hema mouma. 10 Omiyo, nikech Kristo, abedo mamor e nyawo, e ayany, sama achando, e sand, kod chandruoge. Nikech sama anyap, eka abedo gi teko.

11 Asebedo ng’at ma pache ok ni kare. Ne uchuna bedo kamano, nimar un e ma ne onego upwoya. Nikech kata ka ok an gimoro e wang’u, pod jooteu mudhialo ni long’o ahinyago chutho ok giloya gi gimoro amora. 12 Kuom adier, ne anano ahinya ka amiyo gik ma nyiso ni an jaote onenre e kindu, kokalo kuom ranyisi madongo gi tije miwuoro kod tije madongo. 13 Nimar ere kaka dibed ni un ne ok odhialu kaka kanyakla mamoko? En mana ni an awuon ne ok abedonu ting’. Akwayou ng’wono ni uwena kuom kethono.

14 Neuru! Koro en kinde mar adek ma aikora biro iru, to e ma pod ok abi bedonu ting’. Nikech un e ma adwarou, to ok giu; nimar nyithindo ok onego oken ne jonyuolgi, to jonyuol e ma onego oken ne nyithindgi. 15 To an abiro mor chiwora kendo tiyo nyaka arum chuth nikech un. Ka aherou ahinya kamano, be an onego uhera matin? 16 Kata kamano, ne ok abedonu ting’. Un to uwacho ni, ne an gi riekni mopondo kendo ni ne amakou gi riekni mag wuond. 17 Be dibed ni ne amayoue giru moro kokalo kuom joma ne aoro iru? 18 Ne ajiwo Tito mi ne aore gi owadwa moro. Tito ne ok omayou giru moro ngang’, koso? Donge ne wawuotho gi chuny achiel? Donge ne waluwo yo machal, koso?

19 Dibed ni kinde duto usebedo ka uparo ni watemo nyiso ni wan kare e nyimu? E nyim Nyasaye e ma wawuoyoe kaka joma ni e achiel gi Kristo. Kata kamano, joherana, duto ma watimo gin mag gerou. 20 Nikech aluor ni po nono ka asechopo, ok abi nwang’ou ka uchal gi kaka ageno, kendo ok abi chalonu kaka ugeno, to kar mano, anyalo yudo ka nitie dhawo, gi nyiego, gi timbe mag mirima, gi pogruok, gi ketho nying, gi kuoth, gi joma opong’ gi sunga mar ng’ayi, kod koko. 21 Nenore ni ka abiro kendo, Nyasacha nyalo kuodo wiya e nyimu, kendo dipo ka akuyo nikech thoth joma chon notimo richo to pok giloko chunygi a e richogi ma gisebedo ka gitimo, kaka tim ma ok ler, gi terruok,* kod tim wang’-teko.