Jo-Galatia

5 Omiyo, Kristo osegonyowa mondo wayud thuolo ma kamano. Kuom mano, chung’uru motegno, kendo kik uwe mondo otueu e jok mar wasumbni kendo.

2 Neuru! An Paulo, awachonu ni, ka oteru nyangu, onge ber mubiro yudo kuom gima Kristo osetimo. 3 Awacho kendo ka an gadier ni, ng’ato ang’ata ma oter nyangu nigi ting’ mar timo duto ma Chik dwaro. 4 Usepogoru gi Kristo, un ma utemo ni okwanu joma kare kokalo kuom chik; useweyoru mabor gi ng’wonone mogundho. 5 Wan to warito gi siso bedo joma kare, ma en gima nyalore mana kokalo kuom roho maler kod yiewa. 6 Nimar kuom joma ni e winjruok achiel gi Kristo Yesu, bedo ng’at moter nyangu kata ng’at ma ok oter nyangu ok en gimoro, to yie e ma konyo kotiyo kuom hera.

7 Ne oyudo uringo maber. En ng’a ma nogeng’ou dhi nyime luwo adiera? 8 Jal ma noluongou ok e ma ne oloko pachu kamano. 9 Thowi matin yienyo mogo midwalo duto. 10 An gadier chuth ni un, ma un e winjruok achiel gi Ruodhwa, ok ubi bedo gi paro mopogore; to ng’at ma wuondouno, kata bed ni en ng’a, enoyud kum mowinjore kode. 11 Owetena, an to ka dibed ni pod ayalo wach tero nyangu, kare ang’o momiyo pod isanda? Ka pod ayalo wach tero nyangu, kare koro wach yadh-sand ma ayalo ok bed gima kelo chwanyruok. 12 Daher ni joma temo chandou kamano orore* giwegi.

13 Owetena, ne oluongu mondo ubed thuolo; kata kamano, kik uti gi thuolono kaka yo mar luwo gombo mag ringruok, to kokalo kuom hera, tiuru ne joweteu. 14 Nimar Chik duto osechopo e wach achiel ma chiko niya: “Nyaka iher wadu kaka iherori iwuon.” 15 Kata kamano, ka usiko ukayoru kendo ukidhoru e kindu uwegi, nonreuru ahinya mondo kik utiekru chuth.

16 To awachonu ni, Dhiuru nyime wuotho ka roho chikou to ok ubi timo timbe ma luwore gi gombo mag ringruok ngang’. 17 Nimar ringruok gi gombone kedo gi roho, to roho kedo gi ringruok; bende, gik moko ariyogi kwedore, kendo mano miyo ok utim gik moko sie mudwaro timo. 18 E wi mano, ka roho e ma tayou, koro ok un e bwo chik.

19 Koro timbe mag ringruok nenore ratiro, kendo gin terruok,* tim ma ok ler, tim wang’-teko, 20 lamo mar sanamu, timbe-juok, sigu, dhawo, nyiego, mirima mager, ywaruok, pogruok, kidienje, 21 ich-lit, mer, nyasi mochochni gi koko mokalo tong’, kod gik ma kamago. Asiemou motelo kuom wechego, mana kaka ne asesiemou ni joma ong’iyo gi timo gik ma kamago ok bi yudo pok e Pinyruodh Nyasaye.

22 Mopogore gi mano, olembe ma roho nyago gin hera, mor, kuwe, horuok, ng’wono, ber, yie, 23 muolo, kod ritruok. Onge chik ma kwedo gik ma kamago. 24 E wi mano, joma gin mag Kristo Yesu oseguro ringruok e yath kanyachiel gi gombone kod dwache.

25 Ka wadak ka roho chikowa, wadhiuru nyime wuotho bende e yo mowinjore gi kaka roho chikowa. 26 Kik wabed joma ketore ni wabeyo moloyo jomamoko, ka wajiwo piem e kind ji, kendo ka wabedo gi ich-lit gi jowetewa.