Jo-Efeso
3 Ma e momiyo an Paulo jal manie jela nikech bedo ng’at Kristo Yesu kendo nikech un joma oa e ogendni mamoko— 2 kuom adier usewinjo wach ting’ ma ne omiya mar bedo jarit* mar ng’wono mogundho mar Nyasaye mondo uyud ber, 3 ni Nyasaye ne oelona wach maler moum, mana kaka ne andiko motelo e yo machuok. 4 Omiyo, sama usomo wechegi, unyalo fwenyo kaka ng’eyo ma an-go e wi wach maler moum mar Kristo chal. 5 E tienge mamoko, wach moumno ne ok ong’ere ne ji kaka sani ma koro oseele ne jootene maler kod jonabi kokalo kuom roho maler, 6 wach moumno en ni, joma oa e ogendni mamoko bende onego oyud pok kanyachiel kodwa, ka wabedo jokanyo mar ringruok achiel, kendo waduto wayud singo mar Nyasaye e winjruok achiel gi Kristo Yesu kendo kokalo kuom wach maber. 7 Ne abedo jatich ma konyou ng’eyo wachno nikech ng’wono mogundho mar Nyasaye ma en mich mochiwo nono, ma ne omiya kaka yo monyisogo tekone.
8 An, ma ok arom kata gi ng’at matinie mogik kuom joma ler duto, Nyasaye ne onyisa ng’wono mogundhono ni mondo ayal ne ogendni mamoko wach maber e wi mwandu ma ok nyal pim mag Kristo 9 kendo mondo ami ji one kaka weche motudore gi wach maler moumno chopo, ma Nyasaye ma nochueyo gik moko duto osebedo koumo kuom higni mathoth ahinya. 10 Mano notimore eka mondo sani kokalo kuom kanyakla, sirkande kod loje man kuonde ma malo kaka polo, ong’e kaka rieko mar Nyasaye opogore opogore e yore madongo. 11 Mani en ka luwore gi dwarone mochwere ma noseyango kuom wach Kristo Yesu Ruodhwa, 12 ma kokalo kuome koro wan gi chir mar wuoyo ka wan thuolo kendo mar chopo ir Nyasaye nikech geno kuom yie ma wan-go kuom Kristo. 13 Omiyo, akwayou ni kik uol nikech masiche ma ayudo nikech un, nimar mago timore mondo uyud duong’.
14 Mano e momiyo agoyo chonga piny ne Nyasaye Wuonwa 15 ma joot duto e polo gi piny yudo nying kuome. 16 Alamo ni mondo kokalo kuom duong’ne mogundho, omi ubed motegno e dhano ma un gi ka iye, komiyou teko kuom rohone, 17 kendo ni kokalo kuom yieu, Kristo odag ei chunyu kuom hera. Gurreuru motegno e mise, 18 eka mondo kanyachiel gi joma ler duto, ubed gi nyalo chuth mar ng’eyo e yo malong’o lach gi bor ma ariwa gi bor modhi malo kod tut, 19 kendo ung’e hera mar Kristo mokalo ang’eya, mondo opong’u chuth gi kido duto mag Nyasaye.
20 Koro ka luwore gi teko ma Nyasaye nyiso kokalo kuomwa, kuom adier onyalo timo weche duto mokadho ma wakwayo kata ma waparo. 21 Duong’ mondo obedne kokalo kuom kanyakla kendo kuom Kristo Yesu e tienge duto mochwere ma nyaka chieng’. Amin.