Jo-Filipi
2 Omiyo, ka e kindu nitie jip moro amora e Kristo, gi hoch mar hera, gi chuny mar dewo jomamoko, gi hera kod kech, 2 miuru morna opong’ chuth ka ubedo gi paro achiel kendo gi hera achiel, ka ubedo e winjruok achiel chuth kuom paro achiel. 3 Kik utim gimoro amora nikech chuny mar himruok kata nikech paro ni ubeyo moloyo jomamoko, to bolreuru ka ukwano ni jomamoko oloyou gi ber. 4 Kik ung’i mana gik ma kelonu ber un uwegi, to ung’i bende gik ma kelo ber ne jomamoko.
5 Sikuru ka un gi paroni kuomu, ma e paro ma bende ne ni kuom Kristo Yesu, 6 jal ma kata obedo ni ne en e kit Nyasaye, ne ok oparo mar mecho, tiende ni, mondo obed ma romre gi Nyasaye. 7 Ooyo, noweyo duto ma ne en-go kendo nokawo kit misumba mi obedo dhano. 8 E wi mano, ka nobiro kaka dhano, nobolore mi noluwo kaka Nyasaye ne chike nyaka e tho, ee, tho e yadh-sand. 9 Mano e momiyo Nyasaye ne omiye migawo ma malo moloyo, kendo nomiye nying moloyo nyinge mamoko duto, 10 mondo e nying Yesu, ji duto ogo chonggi piny—joma ni e polo gi joma ni e piny kod joma ni e bwo lowo— 11 kendo lep ka lep onego ohul ayanga ni Yesu Kristo en Ruoth, mondo Nyasaye Wuonwa oyud duong’.
12 Nikech mano, un joma ahero, mana kaka kinde duto usebedo ka uluwo weche michikou, ok mana ka antiere kodu kende, to sani ma koro utimo moloyo ka aonge kodu, sikuru ka utiyo matek ne warruok maru uwegi, kutimo kamano gi luoro kod kirni. 13 Nimar Nyasaye e ma tegou komiyou teko kod gombo mar timo duto mohero. 14 Sikuru kutimo gik moko duto ma onge ng’ur kod mino wach 15 mondo ubed maler kendo ma onge bura, kubedo kaka nyithind Nyasaye ma onge ketho e kind tieng’ morochore kendo mobam, ma urienyie kaka ler e piny, 16 kumako motegno wach mar ngima. Eka abedie gi gima dimiya mor chieng’no mar Kristo, ka ang’eyo ni ng’wech ma ne aringo kata tichna matek ne ok en kayiem nono. 17 To kata ka iola piny mana kaka chiwo miolo e wi misango mag konyo ji ma yieu osejiwou mondo utim, ail kendo amor kodu uduto. 18 E yo ma kamano, un bende onego ubed moil kendo mamor kanyachiel koda.
19 Koro an gi geno kuom Ruodhwa Yesu ni achiegni oronu Timotheo mondo ayud jip sama okelna wach moa kuomu. 20 Nimar aonge gi ng’at machielo ma nigi chuny kaka ma en-go kendo ma biro dewo wecheu gadier. 21 Nikech jomamokogo duto manyo mana dwachgi giwegi, to ok mag Yesu Kristo. 22 To ung’eyo kaka en owuon nosenyiso kite, ni kaka nyathi ma tiyo gi wuon mare, notiyo koda matek e miyo wach maber olandre. 23 Kuom mano, en e jal ma ageno oro iru mapiyo bang’ ka aseneno kaka weche biro bet koda. 24 Adier, an gi geno motegno kuom Ruodhwa ni an bende achiegni biro.
25 To gie sani, aneno ni ber mondo aornu Epafrodito ma en owadwa ma jatich kendo jalweny wadwa, to en jal ma ne uoro, kendo en jatich ma konya e gik ma achando, 26 nimar en gi siso mar nenou uduto, kendo en gi parruok mang’eny nikech ne uwinjo ni ne otuo. 27 En adier ni ne otuo mi both kotho; to Nyasaye ne okeche, to ok mana en kende, to an bende, mondo kik abed gi kuyo moro bang’ machielo. 28 Kuom mano, aore mapiyo ahinya mondo ka unene ubedie mamor kendo, mondo an bende kik abed gi parruok ahinya. 29 Omiyo, rwakeuru kaka itimoga ne jotich Ruodhwa gi mor duto, kendo usik ka unyiso ni ugeno joma kamago ahinya, 30 nimar ne ochiegni tho nikech tich mar Kristo, koketo ngimane machiegni gi tho mondo opong’ karu nikech uonge kae ma dutina ka ukonya.