1 Jo-Thesalonika

1 An Paulo, gi Silvano, kod Timotheo, wandikonu un kanyakla mar Jo-Thesalonika, manie winjruok achiel gi Nyasaye Wuonwa kod Ruodhwa Yesu Kristo:

Ng’wono mogundho kod kuwe mondo obed kodu.

2 Kinde duto wagoyo ne Nyasaye erokamano sama wahulo nyingu uduto e lamowa, 3 nimar wiwa ok wil ngang’ gi tiju ma nyiso yie kod tiju matek mar hera, kendo kuom sinani maru nikech geno ma un-go kuom Ruodhwa Yesu Kristo e nyim Nyasachwa kendo Wuonwa. 4 Nimar un owete ma Nyasaye ohero, wang’eyo ni ne oyierou, 5 nikech wach maber ma wayalo ok nochoponu gi wach kende, to bende gi teko kod roho maler kendo gi adiera chuth, mana kaka ung’eyo gik ma ne watimo kane wan kodu mondo okonyu. 6 Kendo ne ubedo joma luwo timwa kod mar Ruodhwa, nimar ne urwako wach Nyasaye ka un e masiche mang’eny kendo ka un gi mor ma roho maler chiwo, 7 mi ne uketo ranyisi maber ne ji duto manie yie e Makedonia kod Akaya.

8 Adiera en ni ok wach Jehova kende e ma oselandore koa kuomu e Makedonia kod Akaya, to bende yieu kuom Nyasaye oselandore kuonde duto, ma koro ok ochuno ni wawach gimoro. 9 Nimar gin giwegi gisiko ka giwacho kaka ne wakwongo romo kodu kendo kaka ne ulokoru mi uyie kuom Nyasaye ka uweyo sanamu magu mondo ubed wasumbni mag Nyasaye mangima kendo madier, 10 bende mondo urit Wuode koa e polo, ma nochiero koa kuom joma otho, ma en Yesu, jal ma resowa kuom mirima ma biro.