1 Timotheo
1 An Paulo ma jaote Kristo Yesu kokalo kuom chik Nyasaye Jawarwa kod mar Kristo Yesu ma en genowa, 2 andikoni in Timotheo, in ma in nyathina gadier kuom yie:
Ng’wono mogundho gi kech kod kuwe moa kuom Nyasaye Wuonwa kod Kristo Yesu Ruodhwa mondo obed kodi.
3 Mana kaka ne ajiwi mondo idong’ Efeso sama ne achiegni dhi Makedonia, e kaka atimo sani bende mondo ichik jomoko kanyo ni kik gipuonj puonj moro mopogore, 4 bende, kik giket chunygi kuom sigendni mag miriambo kod sigendni mag nonro mag anyuola. Gikone, weche kaka mago ok kony gimoro, to gikelo mana penjo ma miyo ji timo nonro to ok gichiw ne ji gimoro moa kuom Nyasaye ma nyalo gero yie. 5 Kuom adier, gima duong’ momiyo wachiko kamano en ni mondo wabed gi hera ma wuok e chuny maler, chuny ma ok ketnwa bura, kod yie ma onge wuondruok. 6 Jomoko osebaro moweyo wechego kendo oselokgi mi gidonjo e mbekni manono. 7 Gidwaro bedo jopuonj mag chik to ok ging’eyo tiend gik ma giwacho kata tiend gik ma giramogo matek.
8 Koro wang’eyo ni Chik long’o ka ng’ato tiyo kode e yo makare, 9 kendo wang’eyo ni chik ok olos ne ng’at makare, to olose ne joma gin joketh-chik, gi jong’anjo, gi joma ok oluoro Nyasaye kod joma richo, gi joma ok ochung’ motegno kod joma ochayo gik maler, gi joma nego wuone kod joma nego mine, gi joma nego jomamoko, 10 gi joterruok, gi chwo ma terore gi chwo wetegi, gi joma mako ji mondo gilornegi gi thwon, gi joma riambo gi joma kuong’ore gi miriambo, kod gik moko duto ma kwedo puonj mangima 11 mar wach maber ma nigi duong’ moa kuom Nyasaye mamor, ma ne omiya migawo mar yalo.
12 Agoyo erokamano ne Kristo Yesu Ruodhwa ma nomiya teko, nikech nokwana kaka ng’at migeno kuom miya migawo e tij Nyasaye, 13 kata obedo ni chon ne achayo Nyasaye kendo ne asando joge, kendo ne an ng’at ma ne timo ne ji timbe mag achaya. Kata kamano, ne okecha nimar ne ajatimo gigo ka akia, kendo nikech ne aonge gi yie. 14 To ng’wono mogundho mar Ruodhwa nomedore ahinya mokadho kaachiel gi yie kod hera moa kuom Kristo Yesu. 15 Wachni en wach migeno kendo ma ji onego oyiego chuth niya: Kristo Yesu nobiro e piny mondo ores joricho. To kuomgi, an e jaricho ma rachie moloyo. 16 Kata kamano, ne okecha mondo kokalo kuoma, an ma an jaricho ma rachie moloyo, Kristo Yesu onyis horuokne duto kuoma kaka ranyisi ne joma biro keto yiegi kuome mondo gibi giyud ngima ma nyaka chieng’.
17 To koro kuom Ruodhwa mochwere, ma ok nyal kethore, ma ok ne, ma en kende e Nyasaye, luor kod duong’ obedne mochwere nyaka chieng’. Amin.
18 In Timotheo nyathina, in e ma achiki wachni ka luwore gi weche ma ne okor chon kuomi mondo kokalo kuom wechego, idhi nyime kedo e lweny maberno, 19 ka imakori gi yie kendo ka in gi chuny ma ok ketni bura ma jomoko osewito tenge, kendo mano osemiyo yiegi okethore mana kaka meli mokethore e nam. 20 Himenayo kod Aleksanda gin moko kuom joma kamago, kendo asechiwogi e lwet Satan mondo giyud puonj kokalo kuom kum mondo kik gicha Nyasaye.