1 Timotheo

4 Kata kamano, wach mokudh gi much Nyasaye nyiso maler ni e ndalo ma nobi bang’e, nitie jomoko ma biro lwar a e yie ka gichiko itgi ne weche ma lalo ji ma nenore ka gima wechego oa kuom much Nyasaye, kod puonj moa kuom jochiende, 2 kokalo kuom wuondruok mag joma wacho miriambo ma nyalo ma gin-go mar pogo ber gi rach osetho mana kaka kama chuma maliet owang’o e ringruok bende tho. 3 Gibiro mono ji donjo e kend, kendo ginichik ji mondo owere gi chiemo ma Nyasaye nochueyo mondo joma nigi yie kendo mong’eyo adiera e yo malong’o ocham gi erokamano. 4 Nimar chuech duto mag Nyasaye beyo kendo ok onego watamre gimoro ka wachame gi erokamano, 5 nikech osepwodhe modoko maler kokalo kuom wach Nyasaye kod lamo mochiw kuome.

6 Ka ichiwo puonjno ne owete, ibiro bedo jatich mowinjore mar Kristo Yesu, kendo ibiro bedo jal ma osepidhore gi weche mag yie kod mag puonj malong’o ma isebedo ka iluworigo machiegni. 7 To tamri sigendni mag miriambo ma nyiso achaya kaka mago ma mon moti gano. Kar mano, tiegri iwuon ka dwachi maduong’ en chiwruok chuth ne Nyasaye. 8 Nimar tiego del mondo obed mojing’ en gima konyo mana kuom ndalo matin, to bedo ng’at mochiwore chuth ne Nyasaye konyo e weche duto, nikech oting’o singo mar ngima ma sani kod mar ngima ma biro. 9 Wachno en wach migeno kendo ma ji onego oyiego chuth. 10 Mano e momiyo wan wawegi watiyo matek kendo wakedo, nimar waseketo genowa kuom Nyasaye mangima, ma en Jawar mar ji mopogore opogore duto, to moloyo, mar joma omakore gi yie.

11 Dhi nyime kichiko kendo puonjo wechego. 12 Kik iwe ngang’ mondo ng’ato ochayi nikech pod itin. Kar mano, ket ranyisi maber ne joma omakore gi yie, kuom wuoyo, kuom tim, kuom hera, kuom yie, kod kuom timbe maler. 13 Nyaka chop abi, dhi nyime keto chunyi kuom somo weche ne ji e lela, kuom sayo ji, kod kuom puonjo. 14 Kik ijwang’ mich man kuomi ma ne omiyi kokalo kuom wach ma ne osekor ka bura mar jodongo noketo lwetgi kuomi. 15 Par matut kuom wechegi; ket chunyi duto kuomgi, mondo dongruok mari onenre ayanga ne ji duto. 16 Sik ka inonori iwuon kendo ka inono weche ma ipuonjo. Nan kuom wechegi, nimar kuom timo kamano, iniresri iwuon kendo inires joma winjo weche mipuonjo.