2 Timotheo

4 Achiki matek e nyim Nyasaye kod Kristo Yesu ma biro ng’ado bura ne joma ngima gi joma otho, kendo kokalo kuom fwenyruokne kod Pinyruodhe: 2 Yal wach; sik kitime e okang’ mapiyo ahinya, e kinde ma weche beyo kata e kinde ma weche tek; kwer ji, siem ji matek, ka isayo ji gi horuok duto kod lony e puonjo. 3 Nimar kinde nobi ma ji biro tamore winjo puonj mangima, to ka luwore gi gombogi giwegi, ginibed gi jopuonj mathoth ma miyogi weche ma moro mana itgi. 4 Ginilokre mi giwe winjo adiera kendo ginichik itgi ne sigendni mag miriambo. 5 In to sik ka pachi ni kare e weche duto, nan e bwo chandruok, ti tij jayal-injili, tim tich mosemiyi e yo maber chuth.

6 Nimar sani koro iola piny kaka chiwo miolo e kendo mar misango, kendo ndalo mibiro gonyae osekayo. 7 Asekedo lweny maber, asetieko ng’weya, aserito yie. 8 Chakre sani ka dhi nyime, nitie osimbo mosekanna mimiyo joma kare, ma Ruodhwa ma en jang’ad-bura makare biro miya kaka pokna e chieng’no, ok mana an kenda, to bende ne ji duto mosehero fwenyruokne.

9 Tem matek kar nyaloni mondo ibi ira mapiyo. 10 Nikech Dema oseringo moweya nimar nohero kinde ma ndalogi kendo osedhi Thesalonika; Krese to osedhi Galatia; to Tito osedhi Dalmatia. 11 Luka kende e ma ni koda. Kaw Mariko ibigo nimar en jal ma konya e tij Nyasaye. 12 To aseoro Tikiko mondo odhi Efeso. 13 Sama ibiro, ikelna kandho ma ne aweyo Troa ir Karpo kod buge,* to moloyo, buge mag piende.

14 Aleksanda ma jathedh mula ne otimona gik malit mang’eny. Jehova biro chule ka luwore gi gik mosetimogo. 15 In bende nyaka itang’ kode nikech ne okwedo wach ma ne wayalo, ka okwedo wachno e okang’ maduong’ ahinya.

16 Ka natemo chiwo dwoko kuom weche ma nodonjnago, onge ng’at ma nodokna, to ji duto noringo moweya—Nyasaye mondo kik kwan wachno e wigi. 17 To Ruodhwa ne ochung’ buta kendo nomiya teko mondo kokalo kuoma, tij yalo wach otimre chuth kendo ogendni duto owinj wachno; bende, ne oresa a e dho sibuor. 18 Ruodhwa biro resa kuom gik moko duto maricho kendo obiro resa mondo orwaka e Pinyruodhe mar polo. Duong’ mondo obedne mochwere nyaka chieng’. Amin.

19 Mosnauru Priska gi Akwila kod joma ni e od Onesifora.

20 Erasto ne odong’ Korintho, to Trofimo ne aweyo Mileto ka otuo. 21 Tim matek kar nyaloni mondo ichop ka ndalo koyo pok ochopo.

Yubulo ooroni mosne, Puden gi Linus gi Klaudia kod owete duto bende otimo kamano.

22 Ruodhwa mondo obed gi chuny minyiso. Ng’wono mogundho mar Nyasaye mondo obed kodu.