Tito
1 An Paulo, misumba Nyasaye kendo jaote mar Yesu Kristo. Yie ma an-go kod tija kaka jaote luwore gi yie mar jogo ma Nyasaye oseyiero kendo luwore gi ng’eyo malong’o e wi adiera kaka chiwruok chuth ne Nyasaye dwaro, 2 kendo ka luwore gi geno mar ngima ma nyaka chieng’ ma Nyasaye ma ok nyal riambo nosingo chon ahinya; 3 to kane ndalo moketo owuon nosechopo, nomiyo wachne ong’ere kokalo kuom tij yalo ma nomiya ka luwore gi chik mar Jawarwa, ma en Nyasaye. 4 Andikoni in Tito, nyathina madier nikech yie ma wan-go ma chal, ka awacho kama:
Ng’wono mogundho kod kuwe moa kuom Nyasaye Wuonwa kod Kristo Yesu Jawarwa mondo obed kodu.
5 Ne aweyi Krete mondo irie weche mobam kendo mondo iket owete obed jodong-kanyakla, kitimo kamano e dala ka dala mana kaka ne achiki: 6 iket ng’ato ang’ata ma onge wach minyalo donjnego, ng’at ma en chwor dhako achiel, ng’at ma nyithinde ni e yie to gionge bura nikech tim anjawo kata mar ng’anjo. 7 Nimar kaka jarit mochung’ ne mwandu Nyasaye, jarit mar kanyakla nyaka bed ng’at ma onge wach moro minyalo donjnego. Kik obed ng’at ma wiye tek, kata ng’at ma iye wang’ piyo, kata jamer, kata ng’at mohero tim gero, kata ng’at ma nigi ich-lach mar yudo ohala e yor mibadhi, 8 to obed ng’at mohero rwako ji, mohero timbe mabeyo, ma pache long’o, ng’at makare, ma makore motegno gi jomoko, ma nigi ritruok, 9 ma makore motegno gi wach migeno e lonyne mar puonjo, eka obed gi nyalo mar jiwo ji gi puonj mangima, kendo kwero jogo ma kwedo puonjno.
10 Nimar nitie jong’anjo mang’eny, jowach weche manono, kendo jowuond, to moloyo, jogo ma makore gi wach nyangu. 11 Dwarore ni imi dho jogo, nimar jogo bende e ma siko ka loko ute ji ka giketho joot duto kuom puonjo gik ma ok onego gipuonj, nikech gidwaro yudo ohala e yor mibadhi. 12 Nitie achiel kuomgi ma en janabi margi, ma nowacho kama: “Kinde duto Jo-Krete gin jo miriambo, ondiegi ma kelo hinyruok, kendo joma igi lach ma budho abudha nono.”
13 Mano en neno madier. Kendo mano e momiyo sik kikwerogi matek ahinya eka mondo gibed joma yiegi ngima, 14 ma ok gichik itgi ne sigendni mochuogi mag Jo-Yahudi kod chike jogo ma weyo adiera. 15 Kuom joma ler, gik moko duto ler; to kuom joma ochido kendo ma onge yie, onge gima lernegi, nimar pachgi kod nyalogi mar pogo ber gi rach, ochido. 16 Gihulo e lela ni ging’eyo Nyasaye to koni gikwede kuom timbegi, nikech gidwanyore kendo ok giluw kaka ichikogi. Bende, ok giwinjore ne tich moro amora maber.