Tito
3 Dhi nyime paronegi mondo giyie bolore e bwo loje kod joma nigi teko mag telo, kendo mondo giwinjgi, gibed joma oikore ne timo gik mabeyo duto, 2 mondo kik giwach weche ma nyalo ketho nying ng’ato, kik gibed joma ohero ywaruok, to gibed joma tur, kendo joma nyiso muolo chuth ne ji duto. 3 Nimar nitie kinde ma wan bende ne wan gi paro ma ok ni kare, ne ok waluw kaka ne ichikowa, ne ji miyo walal, ne wan wasumbni mag gombo kod mor mopogore opogore, ka wasiko e gik maricho kod ich-lit, e gik modwanyore, kendo ka wan gi sigu e kindwa ng’ato gi ng’ato.
4 Kata kamano, ka ng’wono mar Jawarwa ma en Nyasaye, kod hera moherogo dhano nonyisore ayanga, 5 (ok nikech gimoro amora makare ma ne wasetimo, to en nikech nokechowa) nomiyowa warruok kuom lwokowa gi lwok ma nokelowa e ngima kendo kuom miyowa bedo manyien kokalo kuom roho maler. 6 Ne oolonwa rohono e yo mogundho kokalo kuom Yesu Kristo Jawarwa, 7 eka ka osekwanwa kaka joma kare kokalo kuom ng’wonone mogundho, wabed bende gi geno mar yudo ngima mochwere kaka pok marwa.
8 Wechegi gin migeno chuth, kendo adwaro ni isik kijiwo wechegi eka mondo jogo moseyie kuom Nyasaye oket pachgi kuom siko ka gitimo gik mabeyo. Gigi gin gik malong’o kendo ma konyo ji.
9 To kik idonj e mbaka mofuwo mag mino wach gi nonro e wi anyuola kod ywaruok gi dhawo e wi Chik, nimar gigo ok kony kendo gin gik manono. 10 To ng’at ma kelo pogruok kuom loso kidienje, tamreuru ng’atno bang’ miye siem mokwongo kendo mar ariyo, 11 kung’eyo ni ng’at ma kamano osebaro moweyo yo kendo otimo richo; bende oseketo buch kum kuome owuon.
12 Ka aoro Atema kata Tikiko iri, tem matek kar nyaloni mondo ibi ira Nikapoli, nimar kanyo e kama aseng’ado ni abiro bedoe e ndalo koyo. 13 Tim duto minyalo mondo ikony Zena, ma en jal molony e Chik, kod Apolo, mondo kik gichand gik ma dwarore e wuodhgi. 14 To jowa bende opuonjre siko ka gin joma timo gik mabeyo mondo konyruok obedie e kindego ma dwarore ahinya, eka gibed gi nyak.
15 Jogo duto man koda ooronu mos. Mosnauru jogo moherowa e yie.
Ng’wono mogundho mar Nyasaye mondo obed kodu uduto.