1 Petro

4 Nikech Kristo noyudo sand e ringruok, un bende ikreuru gi paro ma kamano; nikech ng’at moseyudo sand e ringruok koro oseweyo richo 2 mondo odag kuom ndalone modong’ ka en e ringruok, ok kochopo gombo mag dhano, to koro nikech timo dwaro mar Nyasaye. 3 Nimar ndalo mosekadho ne oromou timo dwaro mar ogendni kane udonjo e timbe mag wang’-teko, owruok gi gombo, metho mokalo tong’, nyasi mochochni gi koko mokalo tong’ kod mer, metho ma ji piemie kod lamo mag sanamu, ma en gima chik okwero. 4 Giwuoro gimomiyo ok udhi nyime wuotho kodgi e timbegi modwanyore mag anjawo, omiyo giwuoyo kuomu e yor achaya. 5 To jogo biro dwoko wach e nyim jal moseikore ng’ado bura ne joma ngima kod joma osetho. 6 Kuom adier, mano e momiyo ne oyal wach maber bende ne joma otho, mondo kata obedo ni ing’adonegi bura e ringruok ka luwore gi kaka dhano neno, to e wang’ Nyasaye gibed mangima ka luwore gi kaka roho maler chiko.

7 To giko mar weche duto osekayo machiegni. Kuom mano, beduru joma pachgi long’o, kendo kinde duto beduru moikore* wuoyo gi Nyasaye e lamo. 8 To moloyo duto, beduru gi hera matut e kindu, nikech hera umo richo mogundho. 9 Beduru joma rwako joweteu ma ok ung’ur. 10 E okang’ ma ng’ato ka ng’ato oseyudogo mich moro, oti kode e konyo jowetene, nikech un jorit mabeyo mochung’ ne mwandu Nyasaye, ma en ng’wonone ogundho ma onyiso e yore mopogore opogore. 11 Kapo ni ng’ato wuoyo, otim kamano kaka ng’at ma hulo weche moa kuom Nyasaye; ka ng’ato tiyo ne jomamoko, otim kamano ka luwore gi teko ma Nyasaye chiwo; mondo e gik moko duto Nyasaye oyud duong’ kokalo kuom Yesu Kristo. Duong’ kod nyalo gin mage mochwere nyaka chieng’. Amin.

12 Un joma ahero, kik uwuor wach tembe mager ka mach ma sani uyudo ka gima nitie gimoro ma wendo ma timorenu. 13 Kar mano, dhiuru nyime bedo mamor nikech usebedo joma yudo sand ma Kristo bende noyudo, mondo ubi ubed gi mor kendo gi ilo mogundho e kinde ma ibiro elie duong’ mare bende. 14 Ka ichayou nikech nying Kristo, un joma mor, nikech roho mar duong’, ee, roho mar Nyasaye, ni kuomu.

15 Kata kamano, kik ng’ato ang’ata kuomu yud sand nikech en janek, kata nikech en jakuo, kata nikech en jaketho, kata nikech odonjore e weche mag jomamoko. 16 To ka ng’ato yudo sand nikech en Jakristo, kik obed gi wich-kuot, kar mano to odhi nyime miyo Nyasaye duong’ kuom ting’o nyingno. 17 Nimar ma e kinde moket ma ng’ado bura onego ochakree gi e od Nyasaye. Koro ka wan e ma ichako kodwa, nobed nade ne joma ok luw wach maber mar Nyasaye? 18 “To ka ireso ng’at makare e yo matek kamano, nobed nade ne ng’at ma ok oluoro Nyasaye kod jaricho?” 19 Kuom mano, joma yudo sand nikech giluwo dwaro mar Nyasaye, gidhi nyime chiwore giwegi e lwet Jachuech migeno sama gitimo gik mabeyo.