2 Petro

3 Un joma ahero, mani koro en barua mar ariyo ma andikonu, to mana kaka e mokwongocha, daher paronu wechegi mondo achiewgo nyalou mar paro malong’o, 2 mondo upar weche ma jonabi maler nokoro chon kod chik ma Ruodhwa kendo Jawarwa nochiwo kokalo kuom jooteu. 3 Mokwongo tiktik, ng’euru ni e ndalo mag giko, jojar ji nobinu gi wechegi mag jero, ka gitimo ka luwore gi gombogi giwegi 4 kendo giniwach niya: “Ere wach ma ne osing e wi kinde ma biro yudo ka entie?* Nimar nyaka ne kwerewa nind e tho, gik moko duto dhi nyime mana kaka gisebedo a chakruok mar chuech.”

5 Gitamore goyiem wach mong’ere, ni chakre chon ne nitiere polo kod piny ma ne ochung’ motegno koa ei pi kendo e dier pi, kokalo kuom wach moa e dho Nyasaye. 6 Gigo e ma ne okethgo piny ma ndalono. Mano ne otimore kane ataro mar pi opong’o piny. 7 To kokalo kuom wach achielno, polo kod piny ma nitiere sanigi osekan ne mach, kendo okan-gi nyaka chop chieng’ bura kendo nyaka chieng’ mibiro kethie joma ok oluoro Nyasaye.

8 Kata kamano, un joma ahero, kik ubed ma ok ung’eyo wachni, ni e wang’ Jehova, odiechieng’ achiel chalre gi higni aluf achiel, to higni aluf achiel gin kaka odiechieng’ achiel. 9 Jehova ok dhi mos kuom wach chopo singone kaka jomoko paro ni odhi mos, to ohore kodu nikech ok odwar ni oketh ng’ato ang’ata, to odwaro ni ji duto ochop kama gilokoe chunygi gia e richo. 10 To e ma chieng’no mar Jehova nobi kaka jakuo, kendo polo nokadh gi koko ma riadore, to gik manie polo gi piny nobed maliet ahinya mi ginileny nono, kendo piny kod tije man e iye ibiro el.

11 To nikech ibiro leny gigo duto e yo ma kamano, koro uparo ni onego ubed joma chalo nade? Onego ubed gi timbe maler kod timbe ma nyiso ni uluoro Nyasaye, 12 ka urito kendo uketo pachu kuom kinde ma biro yudo ka chieng’no mar Jehova nitie, ma polo ibiro keth gi mach, kendo gik manie polo gi piny biro leny nono nikech liet mager! 13 To nitie polo manyien gi piny manyien ma warito ka luwore gi kaka nosesingo, kendo ma tim makare nobedie.

14 Kuom mano, un joma ahero, nikech sani urito gigo, timuru kar nyalou mondo gikone jalo onwang’u ka uonge chilo kata ketho, kendo onwang’u ka un gi kuwe kode. 15 E wi mano, kwanuru horuok mar Ruodhwa kaka gima kelonu warruok, mana kaka Paulo owadwa ma wahero bende nondikonu ka luwore gi rieko ma nomiye, 16 kowuoyo e wi wechego mana kaka ojatimo e barupene duto. Kata kamano, nitie weche moko e barupego ma winjo tiendgi tek, kendo joma kia gi joma ok ochung’ motegno gwenyo wechego mana kaka gitimo bende gi Ndiko mamoko, ka mano kelonegi kethruok giwegi.

17 Kuom mano, un joma ahero, nikech koro useng’eyo mano motelo, beduru motang’ mondo ketho mar joma ok luw chik kik mi ulal kodgi mi un bende uwe chung’ motegno. 18 Ooyo, to kar mano dhiuru nyime dongo kumedo yudo ng’wono mogundho mar Nyasaye kod ng’eyo e wi Ruodhwa kendo Jawarwa Yesu Kristo. Duong’ mondo obedne sani kendo nyaka chieng’no mochwere. Amin.