Fweny
1 Mae en fweny mar Yesu Kristo ma Nyasaye nomiye mondo onyis wasumbnine gik ma nyaka timre e kinde mokayo machiegni. Kendo nooro malaikane ma ne ochiwo fwenyno kotiyo gi ranyisi ne misumbane ma Johana, 2 jal ma nochiwo neno e wi wach ma Nyasaye nochiwo kod neno ma Yesu Kristo nochiwo, ee, jalo nochiwo neno e wi gik moko duto ma noneno. 3 Ng’at mamor en ng’at ma somo weche mokorgi gi dwol maduong’, kod joma winjogi, kendo ma timo ka luwore gi weche mondik e iye, nimar kinde ma ne oseket chiegni.
4 An Johana, andikonu, un kanyakla abiriyo manie alwora mar Asia kama:
Beduru gi ng’wono mogundho kod kuwe moa kuom “Jalno ma nitie, kendo ma ne nitie, kendo ma biro,” kod moa kuom roho abiriyo* man e nyim kom-lochne, 5 kendo moa kuom Yesu Kristo ma en “Janeno Migeno,” “jal ma e kayo koa kuom joma otho,” kendo “jal ma e Jaloch e wi ruodhi mag piny.”
Ne jalno moherowa kendo ma nogonyowa waa e richo kokalo kuom rembe owuon— 6 kendo ne omiyo wabedo pinyruoth kendo jodolo ma tiyo ne Nyasache kendo Wuon mare—ee, duong’ kod nyalo obedne nyaka chieng’. Amin.
7 Neuru! Obiro e boche polo, kendo wenge duto biro nene, kod joma ne ochwowe; kendo dhoudi duto mag piny biro goyo korgi gi kuyo maduong’ nikech en. Ee, Amin.
8 Jehova Nyasaye wacho kama: “An e Alfa kendo an e Omega,* Jal ma nitie, kendo ma ne nitie, kendo ma biro, Jal Manyalo Duto.”
9 An Johana owadu kendo jal ma riwore kodu e masiche kendo e pinyruoth kendo e nano, ka wan e winjruok achiel gi Yesu, ne oyudo an e chula miluongo ni Patmo nikech ne ayalo wach Nyasaye kendo chiwo neno kuom Yesu. 10 Roho maler ne omiyo abedo e ndalo mar Ruoth e yor fweny, kendo ne awinjo dwol moro maduong’ ka mar turmbeta ka wuok gi ka ng’eya, 11 ka wacho kama: “Ndik ei buk* gik ma sani ineno kendo iore ne kanyakla abiriyo: man Efeso, Smirna, Pagamam, Thiatira, Sadis, Filadelfia, kod Laodikia.”
12 Ne alokora mondo ane ni en ng’a ma ne wuoyo koda, to kane aselokora, ne aneno gige chungo teyni abiriyo mag dhahabu, 13 to e dier gige chungo teynigo ne nitie ng’at moro ma chal gi wuod dhano, morwakore gi nanga ma chopo nyaka piny e tiendene, kendo notueyo nanga moro mar dhahabu kolworo kore. 14 E wi mano, wi ng’atno kod yie wiye ne rachar ka yie rombo ma rachar kendo kaka pe, kendo wengene ne chal kaka ligek mach ma liel, 15 kendo tiendene ne chal gi mula mosepwodh maler, ma rieny e kendo mar mach mager, kendo dwonde ne chal gi mor mar pige mang’eny. 16 To e bade korachwich ne nitie sulwe abiriyo; bende, ligangla mabith kendo mabor ma dhoge ariyo ne wuok koa e dhoge, kendo rieny mar lela wang’e ne chalo gi wang’-chieng’ sama chieng’ rienyie ahinya moloyo. 17 Sama ne anene, ne apodho piny e tiendene mi nabedo ka ng’at motho.
Eka noketo lwete korachwich kuoma, mi nowachona kama: “Kik ibed maluor. An e jal Mokwongo kendo an e jal Mogik, 18 bende an e jal mangima; kendo ne atho, to koro ne! sani angima mochwere nyaka chieng’, kendo an gi ofungu mag tho kod mag Liel.* 19 Omiyo, ndik piny gik miseneno, gi gik ma nitie, kod ma biro timore bang’ mago. 20 To ma e tiend wach maler moum e wi sulwe abiriyo ma iseneno e bada korachwich kod gige chungo teyni abiriyo mag dhahabu: Sulwe abiriyogo gin malaike mag kanyakla abiriyogo, to gige chungo teyni abiriyogo, gin kanyakla abiriyogo.