Fweny

21 Eka ne aneno polo manyien gi piny manyien; nimar polo machon gi piny machon kargi ne oselal nono, bende nam koro ne onge. 2 Ne aneno bende dala malerno, ma en Jerusalem Manyien, ka lor piny koa e polo ir Nyasaye, kendo noseikore kaka miaha mobidhore ne chwore. 3 Eka gikanyono ne awinjo dwol moro maduong’ moa e kom-lojno ka wacho niya: “Neuru! Hema mar Nyasaye koro nigi dhano, kendo obiro dak kodgi, mi ginibed joge. Mi Nyasaye owuon nobed kodgi. 4 Kendo obiro yweyo pi wang’ duto oa e wengegi, mi tho ok nobedie kendo, kata kuyo, kata nduru, kata rem ok nobedie kendo. Gik machon osekadho.”

5 To Jal mobet e kom-lojno nowacho kama: “Neuru! Aloso gik moko duto obed manyien.” Bende owacho niya: “Ndik, nikech wechegi gin migeno kendo madier.” 6 Mi nowachona niya: “Wechego koro osetimore! An e Alfa kendo an e Omega,* chakruok kendo giko. Ng’ato ang’ata ma nigi riyo, abiro miyo pi ngima nono, pi moa e soko. 7 Ng’ato ang’ata molocho, obiro yudo gigo kaka pok mare, mi anabed Nyasache to en nobed wuoda. 8 To ngoche, gi joma onge yie, gi joma odwanyore e timbegi mochido, gi jonek, gi joterruok, gi joma timo timbe-juok, gi joma lamo sanamu, kod jomiriambo duto, kargi nobed e ataro ma liel gi mach kod salfa.* Mani en tho mar ariyo.”

9 Achiel kuom malaike abiriyo ma ne nigi bakunde abiriyo ma ne opong’ gi masiche mogik abiriyoka, nobiro mowachona niya: “Bi ane, to ananyisi miaha ma en chi Nyarombo.” 10 Eka ne oting’a ka en e bwo teko mar roho maler mi otera nyaka e got moro maduong’ kendo mabor, kae to nonyisa dala malerno, ma en Jerusalem, ka lor piny koa e polo ir Nyasaye, 11 kendo ka en gi duong’ mar Nyasaye. Rienyne ne chalo gi mar kidi ma nengone tek ahinya, kaka kidi mar jaspa, ma rieny maler ahinya ka kidi mar kristol. 12 Dalano ne nigi ohinga maduong’ kendo modhi malo ahinya, bende ne en gi rangeye 12, gi malaike 12 e rangeyego, kendo e rangeyego ne ondikie nying dhoudi 12 mag nyithind Israel. 13 Yo wuok chieng’ ne nitiere rangeye adek, to yo nyandwat rangeye adek, kendo yo milambo rangeye adek, kendo yo podho chieng’ rangeye adek. 14 Ohinga mag dalano bende ne nigi kite 12 mag mise, kendo kuomgi ne ondikie nyinge 12 mag joote 12 mag Nyarombono.

15 Koro ng’at ma ne wuoyo kodano noting’o odundu mar dhahabu kaka gir pim, mondo opimgo dalano gi rangeyene kod ohingane. 16 To dalano ne nigi bethene ang’wen ma romre, kendo duong’ mar borne ariwa romre gi lachne. Eka nopimo dalano kotiyo gi odunduno, to ne en chiegni kilomita 2,220; borne ariwa gi lachne kod borne ka dhi malo, duto romre. 17 Ne opimo bende ohinga mar dalano, ne en bede 144* ka luwore gi pimo mar dhano, kanyachiel gi pimo mar malaika bende. 18 Koro ohingano ne olos gi kite mag jaspa, kendo dalano ne en dhahabu lilo, ma chal gi kio ma rieny maler. 19 Mise mag ohinga mag dalano ne obidh gi kit kite duto ma nengogi tek: mise mokwongo ne en kidi mar jaspa, mar ariyo safir, mar adek kalkedon, mar ang’wen zumaridi, 20 mar abich sadoniks, mar auchiel sardias, mar abiriyo krisolait, mar aboro beril, mar ochiko topaz, mar apar krisopras, mar apar gachiel hayasinth, mar apar gariyo amethist. 21 Bende, rangeye apar gariyogo ne gin kite 12 mag lulu; rangach ka rangach ne olos gi kidi mar lulu achiel. Kendo ndara maduong’ mar dalano ne en dhahabu lilo, ma chal gi kio ma rieny maler.

22 Ne ok aneno hekalu e iye, nimar Jehova Nyasaye Manyalo Duto e hekalu mare, kod Nyarombo bende. 23 To dalano ok dwar ler mar wang’-chieng’ kata dwe mondo orienyne, nimar duong’ mar Nyasaye e ma rienyne, kendo taya mare en Nyarombo. 24 Kendo ler mare biro rieny e ndara ma ogendni wuothoe, kendo ruodhi mag piny nokel duong’gi nyaka e iye. 25 Ok bi lor rangeyene ngang’ godiechieng’, nimar kanyo otieno ok nobedie. 26 Kendo ginikel duong’ kod luor mag ogendni nyaka e iye. 27 To gimoro amora mochido kata ng’ato ang’ata ma timo gik modwanyore kod mag wuond ok bi yiene donjo e iye ngang’, to mana joma ondik nyinggi e bug* ngima mar Nyarombo.