Fweny
5 Eka e lwedo korachwich mar Jal mobet e kom-lojno, ne anenoe buk* moro ma koni gi koni ondikie weche, to ne olor bugno gi kido moko abiriyo ma dine matek. 2 Kendo ne aneno malaika moro ma ratego ka lando gi dwol maduong’ niya: “En ng’a mowinjore elo bugno kendo gonyo kido modinego?” 3 To ne onge ng’ato e polo, kata e piny, kata e bwo piny ma ne nyalo elo bugno kata ng’iyo iye. 4 Ne aywak malit ahinya nikech ne ok oyud ng’ato ang’ata mowinjore elo bugno kata ng’iyo iye. 5 To achiel kuom jodongogo nowachona niya: “We ywak. Ne! Sibuor moa e dhood Juda, ma en koth Daudi, oselocho kendo owinjore elo bugno kod kido abiriyo moket kuomego.”
6 Eka ne aneno nyarombo moro ma nenore ka gima ne oseyang’ kaka misango kochung’ e dier kama kom-lojno ne nitie, e dier chuech mangima ang’wen-go, kendo e dier jodongogo. Nyarombono ne nigi tunge abiriyo gi wenge abiriyo, to wengego gin roho abiriyo* mag Nyasaye ma oseor e piny mangima. 7 Eka gikanyono nobiro nyime mokawo bugno e lwedo ma korachwich mar Jal mobet e kom-lojno. 8 To ka nosekawo bugno, chuech ang’wen-go gi jodongo piero ariyo gang’wen-go nopodho piny e nyim Nyarombono, kendo moro ka moro kuomgi ne nigi gir goyo thum kod bakunde mag dhahabu ma ne opong’ gi ubani e igi. (Ubanino en lamo mag joma ler.) 9 Kendo ne giwero wer manyien ka giwacho niya: “In e ma iwinjori kawo bugno kendo gonyo kido modinego, nikech ne onegi kaka misango, kendo kuom rembi ne ing’iewo ne Nyasaye ji koa e dhoudi duto, gi dhok duto, gi dhano mopogore opogore duto, kod ogendni duto, 10 mi ne imiyo gibedo pinyruoth gi jodolo ne Nyasachwa, kendo giniloch kaka ruodhi e wi piny.”
11 Kendo ne aneno, mi ne awinjo dwol mar malaike mang’eny molworo kom-lojno kod mar chuech mangimago gi mar jodongogo, kendo kwan-gi ne en tara gi tara, kendo gana gi gana, 12 kendo ne giwacho gi dwol maduong’ niya: “Nyarombo ma ne onegno e ma owinjore yudo teko, gi mwandu, kod rieko, gi nyalo, gi luor, gi duong’, kod gueth.”
13 Kendo ne awinjo chuech duto manie polo, gi manie piny, gi manie bwo piny, gi manie nam kod gik moko duto manie igi ka giwacho niya: “Gueth, gi luor, gi duong’, kod nyalo mondo obed ne Jal mobet e kom-lojno kendo ne Nyarombo, mochwere nyaka chieng’.” 14 Chuech mangima ang’wen-go ne wacho kama: “Amin!” kendo jodongogo nopodho piny mi gilamo Nyasaye.