Ayub
5 “Luong ane! Be iparo ni nitie ng’at ma biro dwoki?
En ng’at maler mane mibiro luongo mondo okonyi?
2 Nimar sadha nego ng’at mofuwo,
Kendo nyiego kelo tho ne ng’at ma onge rieko.
3 An awuon aseneno ka ngima ng’at mofuwo dhi maber,
Kata kamano, apoya nono ikuong’o ka modakie.
4 Nyithinde ok dag gi kuwe,
Ichandogi e dho ranga dala,+ kendo onge ng’at ma resogi.
5 Jo ma kech kayo chamo gik ma ng’at mofuwono okayo,
Gimaye chiembego kata ka gin e dier kuthe,
Mwandune chalo mana gik ma omoko e obadho.
6 Nimar sand ok wuogga e buch lowo,
Chandruok bende ok nyal twi e lowo.
7 Mana kaka pilni mach nyaka dum ka dhi malo,
E kaka dhano bende nyaka chandre. 8 Omiyo, ka da bed ni an in,
Datero wachna ir Nyasaye,
9 Datero wachna ir Nyasaye ma timo gik madongo kendo gik modhiero dhano ng’eyo,
Ma timo honni madongo mokalo akwana.
10 Okelo koth e piny
Kendo omiyo puothe bedo mang’ich.
11 Oting’o jo modhier malo,
Kendo oting’o jochan malo mondo giyud resruok.
12 Oketho chenro mag jo ma rieknigi richo,
Mondo tijegi kik dhi maber.
13 Omako jorieko gi riekogi giwegi,+
Kendo mano miyo chenrogi duto kethore.
14 Piny othonegi mudho godiechieng’,
Kata mana e chuny odiechieng’ tir, gimulo amula ka gima en otieno.
15 Nyasaye reso jo ma gichuoyo gi wechegi ma chal gi ligangla,
Mores jo modhier e lwet joteko,
16 Mondo jochan obed gi geno,
To dho jo ma timgi ok ni kare odin.
17 Ne! Ng’at mamor en ng’at ma Nyasaye rieyo;
Omiyo, kik itamri rwako kum mar Ng’at Manyalo Duto!
18 Nimar ochwadi, kae to ochango ka mohinyoreno;
Ohinyo gi lwete, kendo othiedho gi lwete owuon.
19 Obiro resi e masira nyadiuchiel,
Kata mana masira mar abiriyo ok bi hinyi.
20 Kinde kech, obiro resi kik itho,
To e kinde lweny, obiro resi e dho ligangla.
21 Noresi kuom jo ma lewgi bith,+
Kendo ok ibi luor sa ma masira obironi.
22 Ka masira kata kech obiro, ininyier anyiera,
Kendo ok ibi luoro ondiegi manie piny.
23 Kite manie pap ok nohinyi,
Kendo ondiegi ok nomonji.
24 Iniyud ni hembi nigi kuwe,
Kendo sa midhi nono jambi, iniyud ni onge molal.
25 Ibiro nyuolo nyithindo mang’eny,
Kendo nyikwayi nobed mang’eny ka lum me piny.
26 Initho ka pod itegno,
Kendo inibed kaka cham mochiek maber moseka.
27 Ne! Wasenono wechegi kendo wayudo ni gin adier.
Omiyo, chik iti kendo ipuonjri kuomgi.”