Isaya
27 Chieng’no, Jehova biro kawo liganglane mabith, maduong’, kendo motegno,+
Nokumgo Levayathan,* thuol ma ringo gi ng’wech,
Ee, Levayathan thuol ma ringo ka gondore,
Enoneg le maduong’ manie nam.
2 Chieng’no ibiro wero ne dhakono* niya:
“Puoth mzabibu ma divaine golo buoyo!+
3 An Jehova, an e ma arite.+
Aolonega pi kinde duto.+
Arite odiechieng’ gotieno,
Mondo ng’ato kik hinye.+
4 Aonge gi mirima.+
Ng’ano ma biro kedo koda gi yiend kuthe kod buya?
Abiro nyonogi mi awang’gi e mach.
5 Kata kamano, pod onyalo maka mondo oyud konyruok.
We mondo olos kuwe koda;
Ee, obi olos kuwe koda.”
6 E ndalo ma biro, tiend Jakobo nogurre motegno,
Israel biro dongo kendo nothiew,+
Gibiro pong’o piny gi olembgi.+
7 Be ochuno ni nyaka goye kaka ne ogo ng’at ma ne ogoye?
Koso nyaka nege kaka ne oneg joge?
8 Ibiro ywak gi dwol ma bwogo ji sa ma ikedo kode kiriembe.
Obiro riembe gi yambe mager chieng’ ma yamb yo wuok chieng’ okutho.+
9 Omiyo, kamano e kaka ibiro pwodh richo mar Jakobo,+
Kendo ma e gima obiro timo ka osegolne richone:
Obiro rego kite duto mag kendo mar misango
Obiro regogi mi gibed ka choka molokore buru,
Kendo onge sirni mag yien* kata gige wang’o ubani mibiro we kochung’.+
10 Nimar dala mochiel motegno biro dong’ nono;
Kuonde ma nigi lum mang’ich ibiro jwang’ mana ka thim.+
Kuondego e ma roya biro kwayoe ka nindoe,
Kendo enocham bede yiendene.+
11 Ka bede yiendene otwo,
Mon biro modogi
Kendo gibiro chwekogo.
Nimar ogandani onge gi rieko,+
Mano e momiyo Jachuechgi ok bi kechogi,
Kendo Ng’at ma nochueyogi ok bi dewogi.+
12 Mana kaka ng’ato yiengo yath kae to ochoko olembene achiel-achiel, e kaka Jehova biro chokou chieng’no un Jo-Israel,+ kochakore e Aora* nyaka e Hoho mar Misri.+ 13 Tung’ maduong’ biro ywak+ chieng’no, kendo jogo machiegni tho e piny Asuria,+ kaachiel gi jogo ma oke e piny Misri+ nobi, kendo ginikulre e nyim Jehova e got maler man Jerusalem.+