Ezekiel
31 E odiechieng’ mokwongo mar dwe mar adek, e higa mar 11, wach Jehova ne obirona kendo niya: 2 “Wuod dhano nyis Farao ruodh Misri gi ogandane+ ni,
‘Ang’o ma dipim gi duong’ ma in-go?
3 Ne nitie Ja-Asuria, yadh sida e Lebanon,
Bedene ne beyo kendo notimo tipo, nobor kendo noduong’;
Wiye nochopo e boche polo.
4 Pi ne omiyo odongo, pige manie bwo lowo nomiyo odongo mobedo ma rabora.
Aoche matindo ne olwore koni gi koni;
Aochego ne keyo pi ne yiende duto manie bungu.
5 Mano e momiyo borne ne oyombo yiende duto manie bungu.
Bedene ne omedore mi giyarore
Nikech aochene matindo ne ok duon.
6 Winy duto ma fuyo e kor polo ne ogero utegi e bedene,
Le duto mag bungu ne onyuolo nyithindgi e bwoye,
Kendo ogendni madongo bende ne dak e bwo tipone.
7 Yadhno ne odongo mobedo ma jaber, kendo bedene ne oyarore,
Nimar tiendene ne ochopo e pige manie bwo lowo.
8 Onge yadh sida moro amora e puoth Nyasaye+ ma ne inyalo pim kode.
Onge yadh junipa ma ne nigi bede kaka mage,
Kendo onge yadh armon ma ne nigi bede kaka mage.
Onge yath moro amora e puoth Nyasaye ma ne jaber kaka en.
9 An e ma ne alose ma jaber kamano, kendo ne en gi oboke mang’eny,
Yien duto manie Eden, puoth Nyasaye madier, ne obedo gi nyiego kode.’
10 “Omiyo, ma e gima Jehova Wuon Loch Duto owacho: ‘Nikech ne odongo ma rabora ahinya mi wiye ochopo e boche polo, kendo borne ne omiyo chunye ochako bedo gi sunga, 11 abiro chiwe e lwet jal ma locho e wi ogendni.+ Jalo biro kume, kendo anadagi yadhno nikech richone. 12 Kendo jo pinje mamoko ma kwiny biro tong’e, mi giniwite e gode. Obokene biro lwar e hohni duto kendo bedene motur biro lwar e aoche duto matindo.+ Bende, ogendni mosebedo kodak e bwo tipone biro dar. 13 Winy duto ma fuyo e kor polo biro dak e kor yath mosepodhono, to le mag bungu biro dak e bedene.+ 14 Mano biro timore mondo yath moro amora ma dongo e but pi kik dong mi wiye chop e boche polo, kendo yath moro amora ma dongo ka ma pi ok duonie kik chopnegi. Nimar giduto gibiro tho, mi gidhi e liel, mana kaka dhano bende lor nyaka e liel.’
15 “Ma e gima Jehova Wuon Loch Duto owacho: ‘Chieng’ ma obiro lor nyaka e Liel,* ji biro ywak ahinya. Omiyo, abiro umo nam matut kendo geng’o aoche matindo mondo kik mol. Enomi akel mudho e Lebanon, kendo yiend bungu duto biro two. 16 Anami ogendni otetni nikech koko mar podhone chieng’ ma abiro wite e Liel* gi jo ma lor nyaka e liel. Kendo yiende duto manie Eden,+ yiende duto mabeyo mag Lebanon, yiende duto ma dongo ka ma pi ok duonie, noyud hoch e piny ma mwalo. 17 Giselor kode e Liel* ka ma jo ma oneg gi ligangla nitie.+ Oselor kaachiel gi jo ma ne riwe lwedo ma ne odak e tipone.’+
18 “‘Be nitie yath moro amora e Eden ma nigi duong’ kendo mipako kaka in?+ Kata kamano, ibiro lori nyaka e piny ma mwalo kaachiel gi yiende mag Eden. Ibiro nindo e kind jo ma ok oter nyangu ma ne oneg gi ligangla. Mano e gima biro timore ne Farao gi ogandane duto,’ Jehova Wuon Loch Duto owacho.”