Weche mag Ndalo Mokwongo
21 Satan* ne dwaro hinyo Jo-Israel mi nomiyo Daudi okwano Jo-Israel.+ 2 Omiyo, ruoth nonyiso Joab+ kod jotend oganda niya: “Dhiuru ukwan Jo-Israel chakre Beer-sheba nyaka Dan+ mondo unyisa kar rombgi.” 3 To Joab nodwoko ruoth kama: “Jehova mondo omedni ji nyadi 100. Ruodha, donge giduto gin jotichni? Koro ang’o momiyo idwaro timo gima kama? Ang’o momiyo idwaro timo gima nyalo miyo Jo-Israel obed joketho.”
4 Kata kamano, wach ruoth noloyo mar Joab mi Joab ne owuotho e piny Israel duto kokwano ji. Bang’e, nodok Jerusalem.+ 5 Joab nonyiso Daudi kwan mar ji. Jolweny duto mag Jo-Israel ne gin 1,100,000 to mag Juda ne gin 470,000.+ 6 Kata kamano, Jo-Lawi kod Jo-Benjamin to ne ok okwan+ nikech Joab ne ok mor gi wach ruoth.+
7 Nyasaye madier nosin ahinya gi wachno, omiyo ne okumo Jo-Israel. 8 Daudi noywak ne Nyasaye madier niya: “Asetimo richo+ maduong’. Asayi, wena richona+ nikech asetimo tim mofuwo ahinya.”+ 9 Eka wach Jehova nobiro ne Gad,+ ma ne en jakor wach ne Daudi niya: 10 “Dhi inyis Daudi ni Jehova owacho kama: ‘Aketo gik moko adek e nyimi. Yier achiel kuom gima onego atimni.’” 11 Omiyo, Gad nodhi ir Daudi mowachone niya: “Ma e gima Jehova owacho, ‘Yier gima diher ni otimreni. 12 Diher ni kech omak piny kuom higni adek?+ Koso wasiki onegi kaachiel gi jogi kuom dweche adek?+ Koso diher ni Jehova okumi kuom ndalo adek gi liganglane, kokelo tuo e piny+ kendo malaika mar Jehova nego ji+ e Israel duto? Koro par maber mondo inyisa gima dadwok Jal ma oora.” 13 Omiyo, Daudi nodwoko Gad kama: “Wachni chanda ahinya. Ber mondo alwar e lwet Jehova nikech ng’wonone ogundho ahinya.+ To kik alwar e lwet dhano.”+
14 Kuom mano, Jehova nokelo tuo+ monego Jo-Israel 70,000.+ 15 E wi mano, Nyasaye madier ne ooro malaikane mondo oketh Jerusalem, to ka ne ochiegni kethe, Jehova noloko pache+ mi onyiso malaikano niya: “Oromo!+ Koro dwok lweti.” Malaika mar Jehova ne ni machiegni gi kar dino mar Ornan+ Ja-Jebus.+
16 Ka ne Daudi oting’o wang’e, noneno malaika mar Jehova e kor polo korieyo ligangla+ kochomo Jerusalem. Daudi gi jodongo ne opodho piny auma+ ka girwako lep ogunia.+ 17 Daudi nowacho ne Nyasaye madier niya: “Donge an e ma ne achiko mondo okwan ji? An e ma aseketho kendo an e ma asetimo marach;+ to ok rombegi—ere rach ma gisetimo? A Jehova Nyasacha, akwayi ni an e ma mondo ikuma kod jood wuora, to kik ikel masira ne jogi.”+
18 Malaika mar Jehova ne onyiso Gad+ mondo odhi owach ne Daudi ni odhi kar dino mar Ornan Ja-Jebus mondo oger ne Jehova kendo mar misango kuno.+ 19 Kamano, Daudi nodhi mana kaka Jehova nochiko Gad mondo owachne. 20 Gie kindeno, Ornan nolokore moneno malaika, to yawuote ang’wen ma ne ni kode nopondo. Noyudo Ornan dino ngano. 21 Ka ne Daudi biro, Ornan ne onene mi nowuok mapiyo kar dino kendo nodhi mi ogoyo chonge piny e nyim Daudi mokulore nyaka e lowo. 22 Daudi nonyiso Ornan niya: “Usna kari mar dino mondo agernie Jehova kendo mar misango. Usnago gi nengo mowinjore kode, di po ka masira ma omako oganda orumo.”+ 23 To Ornan nowacho ne Daudi niya: “Kawe akawa mondo itimgo gima idwaro. Dhok eki ma inyalo timogo misango. Kaw bende gir dino+ kod jok mar dhok mondo obedni yien. Asemiyigi giduto.”
24 Kata kamano, Ruoth Daudi nonyiso Ornan niya: “Ooyo, nyaka achuli nengo mowinjore kode nikech ok anyal kawo mwanduni nono mondo achiw ne Jehova. Bende, ok anyal chiwo misengni miwang’o ma ayudo nono.”+ 25 Omiyo, Daudi nochulo Ornan shekel* 600 mag dhahabu kong’iewogo kar dino. 26 Daudi nogero ne Jehova kendo mar misango+ kanyo mi ochiwoe misengini miwang’o kod misengni mag kuwe. Nolamo Jehova mi nowinjo kwayone, kendo mach+ noa e polo molwar e kendo mar misango. 27 Eka Jehova nochiko malaika+ mondo oduok ligangla e ode.* 28 Ka ne Daudi oneno ni Jehova odwoko lamone ka en kar dino mar Ornan Ja-Jebus, nodhi nyime golo misengni kanyo. 29 Kata kamano, kindeno hema mar Jehova ma Musa noloso e thim kod kendo mar misango ne ni kar lamo moting’ore man Gibeon.+ 30 To Daudi ne pok odhi kanyo mondo openj Nyasaye wach nikech noluoro ligangla mar malaika mar Jehova.