Weche mag Ndalo Mokwongo

20 E chak higa,* e kinde ma ruodhi ne thoro dhi e lweny, Joab+ gi jolweny mage nodhi moketho piny Jo-Amon. Ne gilworo dala mar Raba+ ka Daudi to ne odong’ Jerusalem.+ Joab nomonjo Raba mokethe.+ 2 Bang’e, Daudi nogolo osimbo e wi Malkam. Pek mar osimbono ne en talanta* achiel mar dhahabu kendo ne en gi kite mabeyo ma nengogi tek. Ne osidh ne Daudi osimbono. Bende, noyako gik mang’eny miwuoro e dalano.+ 3 Nokawo ji duto ma ne ni e dalano moketogi e tich.+ Ne gipayo kite kendo ne gitiyo gi le kod gige tich mabith molos gi nyinyo. Kamano e kaka Daudi notimo e miech Jo-Amon duto. Gikone, nodok Jerusalem gi jolwenje duto.

4 Bang’e, lweny nomuoch Gezer e kindgi gi Jo-Filistia. Gie kindeno, Sibekai+ Ja-Husha nonego Sipai Ja-Refaim+ mi giloyo Jo-Filistia.

5 Lweny nomuoch kendo e kind Jo-Israel gi Jo-Filistia mi Elhanan wuod Jair ne onego Lami owadgi Goliath+ Ja-Giti ma ludh tonge ne romre gi ludh jotweng’o.+

6 Lweny nomuoch kendo Gath+ ka ma ne nitie ng’at ma rabet+ ma nigi lith lwedo 6 gi lith tielo 6. Lith lwetene gi mag tiendene duto ne gin 24. En bende ne en Ja-Refaim.+ 7 Ne osiko oyanyo+ Jo-Israel mi Jonathan wuod Shimea+ owadgi Daudi ne onege.

8 Jogo ne gin Jo-Refaim+ ma Gath,+ kendo Daudi gi joge nonegogi.