Joshua
14 Koro ma e piny ma ne Jo-Israel okawo e piny Kanaan. En e piny ma Eleazar jadolo kod Joshua wuod Nun kaachiel gi jotend dhout Israel ne opogonegi.+ 2 Mana kaka Jehova nosechiko Musa, ne opog lowo ne dhoudi ochiko gi nus+ kitiyo gi ombulu.+ 3 Dhoudi ariyo gi nus to Musa ne osepogonegi lowo loka Aora Jordan.+ Jo-Lawi to ne ok opogonegi lowo.+ 4 Manase gi Efraim+ ma ne gin yawuot Josef ne ikwano kaka dhoudi ariyo.+ Omiyo, ne ok opog ne Jo-Lawi lowo, kata kamano, ne omigi mier+ ma ne ginyalo dakie kod kuonde ma ne ginyalo kwayoe jambgi.+ 5 Kuom mano, Jo-Israel ne opogore lowo mana kaka Jehova nosechiko Musa.
6 Koro Jo-Juda ne odhi ir Joshua ka gin Gilgal,+ mi Kaleb+ wuod Jefune ma Ja-Keniz nonyise niya: “Ing’eyo maber gima Jehova nowacho+ ne Musa jatich Nyasaye madier+ kuoma kodi ka ne wan Kadesh-barnea.+ 7 Ne an jahigni 40 ka ne Musa jatich Jehova oora mondo awuog Kadesh-barnea adhi anon piny,+ kendo ne aduogo gi ripot makare.+ 8 Kata obedo ni owete ma ne wadhi nonogo piny ne oduogo gi ripot ma nyoso chuny ji, an to ne aluwo Jehova Nyasacha gi chunya duto+ ma atimo kaka ne odwaro. 9 Chieng’no, Musa nokuong’ore niya: ‘Piny ma tiendeni ne onyonono biro bedo mari kaachiel gi nyithindi nyaka chieng’, nimar iseluwo Jehova Nyasacha gi chunyi duto.’+ 10 To koro higni 45 osekadho nyaka ne Jehova singre+ ne Musa kamano e kinde ma Jo-Israel ne nie thim.+ Jehova oserita+ nyaka kawuononi mi koro sani an jahigni 85. 11 Pod aratego mana kaka kinde ma Musa ne oora, kendo pod anyalo kedo ma atim gik mamoko bende. 12 Koro miya piny motimo godeni kaka Jehova nosingo e odiechieng’no. Kata obedo ni niwinjo ni Jo-Anakim+ odak kuno e taonde mochiel motegno,+ ang’eyo ni Jehova ni koda+ kendo abiro loyogi mana kaka Jehova nosewacho.”+
13 Omiyo, Joshua ne oguedho Kaleb wuod Jefune ma omiye piny Hebron.+ 14 Mano e momiyo Hebron en piny Kaleb wuod Jefune ma Ja-Keniz nyaka kawuononi. Pinyno nobedo mare nikech ne oluwo Jehova Nyasach Israel gi chunye duto.+ 15 Chon ne iluongo Hebron ni Kiriath-arba+ (Arba ne en jatend Jo-Anakim). Kamano, piny nobedo gi kuwe ma onge lweny.+