TIM JO-LAWI
1 Jehova noluongo Musa mowuoyo kode e hema mar romo+ kowachone niya: 2 “Nyis Jo-Israel ni, ‘Sa ma ng’ato ang’ata e kindu dwaro chiwo ne Jehova misango kowuok kuom le mopidho, onego ochiw dhiang’, rombo, kata diel.+
3 “‘Ka ng’ato dwaro golo dhiang’ mondo obed misango miwang’o, onego ochiw nyaruath ma onge mbala.+ Onego ochiwe gi chuny man thuolo,+ kendo enochiwe ne Jehova e dho hema mar romo. 4 Obiro keto lwete e wi ruadhno, kendo Nyasaye biro yie gi misangono kaka chiwo miweyonego richone.
5 “‘Eka ibiro yang’ nyaruadhno e nyim Jehova, kendo jodolo+ ma yawuot Harun nokaw rembe mi ginikir e bethe kendo duto+ man e dho hema mar romo. 6 Koseyang’e, ibiro poge lemo lemo.+ 7 Yawuot Harun nomok mach e kendo mar misango+ kendo giniketie yien. 8 Kae to gibiro chano lemogo+ kaachiel gi wich kod boche mag nyarogno e mach manie kendono. 9 Ibiro lwok nyimbiyene gi tiendene e pi, eka jadolo nowang’gi duto e kendo mar misango mondo gigol yiro. Mano en misango miwang’o ne Jehova mondo ogolne suya mamit.+
10 “‘Ka ng’ato dwaro golo rombo kata diel+ mondo obed misango miwang’o, onego ochiw nyayim kata nyanyuok ma onge mbala.+ 11 Ibiro yang’e e nyim Jehova e bath kendo mar misango ka mochomo yo nyandwat, kendo jodolo ma yawuot Harun biro kiro rembe e bethe kendono duto.+ 12 Ibiro poge lemo lemo, kae to ichano lemogo gi wich kod boche mag nyarogno e mach manie kendono. 13 Ibiro lwok nyimbiyene gi tiendene e pi, eka jadolo nowang’gi giduto e kendo mar misango mondo gigol yiro. Mano en misango miwang’o ne Jehova mondo ogolne suya mamit.
14 “‘Kata kamano, ka ng’ato dwaro golo winy mondo obed misango miwang’o ne Jehova, obiro golo akuche madongo kata akuche matindo.+ 15 Jadolo biro chiwe e kendo mar misango, kendo obiro ng’ado ng’ute ma ok ochode chuth, kae to owang’e mondo ogol yiro. Rembe to obiro chuero e bath kendono. 16 Obiro golo oswakone kendo obiro lunye mi owit gigo e bath kendo ka ma ochomo yo wuok chieng’, ka ma ipukoe buru.+ 17 Obiro bare gie buombe ma ok opoge diriyo. Kae to jadolo nowang’e e kendo mar misango mondo ogol yiro. Mano en misango miwang’o ne Jehova mondo ogolne suya mamit.
2 “‘Ka ng’ato dwaro golo chiwo mar cham+ ne Jehova, onego okaw mogo mayom, oolie mo, kendo oluow ubani e wi mogono.+ 2 Eka notere ne jodolo ma yawuot Harun, kae to jadolo biro juko mogo moruw gi mo lwedo achiel mi okaw ubani duto mokelego mondo owang’gi e kendo kaka misango mar rapar+ mondo ogol ne Jehova suya mamit. 3 To chiwo mar cham modong’ nobed mar Harun gi yawuote+ kaka gima ler moloyo,+ nimar ogole kuom misengni miwang’o ne Jehova.
4 “‘Ka ng’ato dwaro chiwo gima otedi mondo obed chiwo mar cham, to nyaka obed makate molworore ma nigi bur e diere modwal gi mo kata makate mopamore mowirie mo.+ Enolosgi gi mogo mayom ma ok oketie thowi.
5 “‘Ka ng’ato dwaro golo chiwo mar cham moted e tawo,+ obiro tiyo gi mogo mayom moruw gi mo to ok oketie thowi. 6 Obiro poge matindo tindo mi oolie mo.+ Mano en chiwo mar cham.
7 “‘Ka ng’ato dwaro golo chiwo mar cham moted e pan, onego oti gi mogo mayom moruw gi mo. 8 Obiro tero ne Jehova chiwo moseikono, kendo jadolo biro tero chiwono but kendo mar misango. 9 Eka jadolono biro kawo moko kuom chiwono mi owang’gi kaka misango mar rapar.+ Mano en misango miwang’o ne Jehova mondo ogolne suya mamit.+ 10 Cham modong’ nobed mar Harun gi yawuote. En gima ler ahinya nimar ogole kuom misengni miwang’o ne Jehova.+
11 “‘Sa ma ugolo ne Jehova chiwo mar cham, kik ugolne gimoro amora ma oketie thowi.+ Chiwo moro amora miwang’o ne Jehova ok onego oketie thowi kata mor kich.
12 “‘Unyalo golo gigo ne Jehova kaka chiwo mag cham mokwongo nyak,+ to kik kelgi e kendo mar misango ni gibed misengni miwang’o ma golo suya mamit.
13 “‘Nyaka uket chumbi e chiwo duto mag cham mugolo. Chumbino e ma biro paronu singruoku gi Nyasaye. Kinde moro amora mukelo chiwo, nyaka ukel chumbi bende.+
14 “‘Ka ng’ato dwaro golo ne Jehova chiwo mar cham ma okwongo kayo, nyaka ochiw cham manyien+ mobul kae to oyoki. 15 Nyaka oolie mo kae to oketie ubani. En chiwo mar cham. 16 Jadolo biro wang’o moko kuom cham moyoki moseolie mo kaachiel gi ubani te kaka misango mar rapar.+ En misango miwang’o ne Jehova.
3 “‘Ka ng’ato dwaro chiwo ne Jehova ruath kata dwasi mondo otimgo misango mar kuwe,+ onego ochiw mana dhiang’ ma onge mbala. 2 Ng’atno biro keto lwete e wi dheno, kae to ibiro yang’e e dho hema mar romo. Yawuot Harun ma jodolo biro kawo remb dheno mi gikire e bethe kendo mar misango duto. 3 Sa ma ng’atno otero misango mar kuwe ne Jehova, jadolo biro kawo lemo moko mondo owang’ e mach.+ Enokaw boche+ mag nyimbich, gi boche duto molworo nyimbich, 4 gi nyiroke ariyo gi bochegi man but oguro. Bende, enokaw boche man e chuny gi nyiroke.+ 5 Yawuot Harun nowang’gi e kendo mar misango. Giniluowgi e wi misango miwang’o manie wi yien manie kendo.+ Mano en misango miwang’o ne Jehova mondo ogolne suya mamit.+
6 “‘Ka ng’ato dwaro chiwo ne Jehova rombo mondo otimgo misango mar kuwe, onyalo chiwo rombo ma dichwo kata ma dhako, to obed ma onge mbala.+ 7 Ka nyayim e ma otimogo misango, nyaka okele e nyim Jehova. 8 Ng’atno biro keto lwete e wi nyayimno, kendo ibiro yang’e e dho hema mar romo. Yawuot Harun biro kawo remb nyayimno mi gikire e bethe kendo mar misango duto. 9 Ng’atno biro chiwo ne Jehova boche mitimogo misango mar kuwe mondo jadolo owang’gi e mach.+ Obiro chiwo boche duto gi sembe man but lihumbru, gi boche mag nyimbich, gi boche duto molworo nyimbich, 10 gi nyiroke ariyo gi bochegi man but oguro. Bende, enogol boche man e chuny gi nyiroke.+ 11 Jadolo nowang’ gigo duto e kendo mar misango kaka chiemo* michiwo ne Jehova.+
12 “‘Ka ng’ato dwaro chiwo diel, obiro kele e nyim Jehova. 13 Obiro keto lwete e wi diendno, kae to ibiro yang’e e dho hema mar romo. Yawuot Harun biro kawo remb diendno mi gikire e bethe kendo mar misango duto. 14 Gik ma ng’atno biro chiwo ne Jehova mondo owang’ e mach gin boche mag nyimbich, gi boche duto molworo nyimbich,+ 15 gi nyiroke ariyo gi bochegi man but oguro. Bende, enochiw boche manie chuny gi nyiroke. 16 Jadolo nowang’ gigo duto e kendo mar misango kaka chiemo* michiwo, mondo ogol suya mamit. Boche duto gin mag Jehova.+
17 “‘Kik ucham bor kata remo.+ Mani nobed chik mochwere kuom tiengeu duto kamoro amora mudakie.’”
4 Jehova nomedo wacho ne Musa niya: 2 “Nyis Jo-Israel ni, ‘Ma e kaka ng’at motimo richo kuom ketho chik Jehova kobothne+ biro timo:
3 “‘Ka jadolo mowir+ e ma otimo richo+ mi mano omiyo oganda duto obedo joketho, nyaka ochiw ne Jehova nyaruath ma onge mbala mondo otimgo misango mar richo.+ 4 Enokel ne Jehova nyaruadhno e dho hema mar romo,+ mi noket lwete e wiye kae to oyang’e e nyim Jehova.+ 5 Eka jadolo mowirno+ nokaw moko kuom remb nyaruadhno mi okel e hema mar romo. 6 Enolut lith lwete e remono+ kae to okire e nyim Jehova nyadibiriyo.+ Notim kamano e nyim pasia mar ka maler. 7 Bang’ mano, obiro mieno remo moko e tunge kendo miwang’oe ubani+ manie hema mar romo e nyim Jehova. To remo duto modong’ obiro puko e tiend kendo mar misango+ manie dho hemb romo.
8 “‘Eka nogol boche duto kuom nyaruath mitimogo misango mar richo. Enogol boche mag nyimbich, gi boche duto molworo nyimbich, 9 kendo enogol nyiroke ariyo gi bochegi man but oguro. Bende, enogol boche man e chuny gi nyiroke.+ 10 Enogol mana gik migologa e nyaruath mitimogo misango mar kuwe,+ mi nowang’gi e kendo mar wang’o misengni.
11 “‘To pien nyaruadhno gi ringe duto, gi wiye kod tiendene, kaachiel gi nyimbiyene kod owuoche,+ 12 ma tiende ni gik modong’ duto, ibiro ter oko mar kambi e ka maler ma ipukoe buch kendo mar misango, mi nowang’gi te e mach mar yien+ kuno.
13 “‘Ka oganda Israel duto oketho chik moro nikech ok ging’eyo+ ni en wach ma Jehova nosekwero,+ 14 kae to bang’e gifwenyo ni gitimo richo, nyaka gichiw nyaruath mondo otimgo misango mar richo. Ginikel nyaruadhno e nyim hema mar romo, 15 kendo jodong oganda noket lwetegi e wiye e nyim Jehova mi giniyang’e e nyim Jehova.
16 “‘Jadolo mowir nokaw moko kuom remb nyaruadhno mi okel e hema mar romo. 17 Jadolono nolut lith lwete e remono kae to nokire e nyim Jehova nyadibiriyo. Notim kamano e nyim pasia.+ 18 Bang’ mano, obiro mieno remo moko e tunge kendo+ manie nyim Jehova e hema mar romo. To remo duto modong’ obiro puko e tiend kendo mar misango manie dho hemb romo.+ 19 Eka nokaw boche duto mag nyaruadhno mi nowang’gi e kendo mar misango.+ 20 Notim ne nyaruadhno mana kaka notimo ne nyaruath ma nochiwo kaka misango mar richo. Kamano e kaka jadolo nopwodhnegi kethogi,+ kendo ibiro wenegi. 21 Enogol nyaruadhno oko mar kambi kendo enowang’e mana kaka ne owang’o ruath mokwongocha.+ Mano en misango mar richo michiwo ne oganda.+
22 “‘Ka jaduong’ moro motelo ne oganda+ oboth moketho chik moro amora mar Jehova Nyasache, mi odoko jaketho, 23 kata ka onyise ni oseketho chik moro, nyaka ochiw nyanyuok ma onge mbala mondo otimgo misango mar richone. 24 Enoket lwete e wi nyuogno kendo noyang’e e nyim Jehova ka ma iyang’oe jamni mitimogo misango.+ En misango mar richo. 25 Jadolo biro kawo moko kuom remb nyuogno gi lith lwete kae to omieno e tunge+ kendo mar wang’o misengni. To remo duto modong’ obiro puko e tiend kendono.+ 26 Enowang’ boche duto e kendo mar misango mana kaka iwang’o boche mag misengni mag kuwe.+ Kamano e kaka jadolo biro pwodho ketho mar jatelono, mi nowene richone.
27 “‘Ka ng’ato ang’ata e kindu oboth moketho chik moro amora mar Jehova,+ mi odoko jaketho, 28 kata ka onyise ni oseketho chik moro, nyaka ochiw nyadiel ma dhako ma onge mbala nikech richo ma osetimo. 29 Enoket lwete e wi diendno kendo noyang’e ka ma iyang’oe jamni michiwo kaka misengni miwang’o.+ 30 Jadolo biro kawo moko kuom remb diendno gi lith lwete kae to omieno e tunge kendo mar wang’o misengni. To remo duto modong’ obiro puko e tiend kendono.+ 31 Enogol bochene duto+ mana kaka itimo gi misango mar kuwe.+ Kendo jadolo biro wang’ogi e kendo mar misango mondo ogol ne Jehova suya mamit. Kamano e kaka jadolo biro pwodho ketho mar ng’atno, mi nowene richone.
32 “‘To ka ng’atno ochiwo nyarombo mondo otimgo misango mar richone, nyaka obed rombo ma dhako ma onge mbala. 33 Enoket lwete e wi rombono kendo noyang’e mondo otimgo misango mar richo ka ma iyang’oe jamni michiwo kaka misengni miwang’o.+ 34 Jadolo biro kawo moko kuom remb rombono gi lith lwete kae to omieno e tunge kendo mar wang’o misengni.+ To remo duto modong’ obiro puko e tiend kendono. 35 Enogol bochene duto mana kaka igolo boche mag nyayim mitimogo misango mar kuwe. Kendo jadolo biro wang’ogi e kendo mar misango e wi misango miwang’o ne Jehova e mach.+ Kamano e kaka jadolo biro pwodho ketho mar ng’atno, mi nowene richone.+
5 “‘Ka ng’ato owinjo kilando* ni ng’ato odhi ochiw neno+ e wi gimoro ma noneno, kata ma nowinjo, kata mong’eyo, to otamore hulo, mano en richo kendo ibiro kume.
2 “‘Kata ka ng’ato omulo gimoro amora ma ok ler mosetho, bed ni en le mar bungu, le mipidho, kata le mamol kanyakla,+ ng’atno ok ler, kendo ojaketho kata obedo ni notimo kamano ka ok ong’eyo. 3 Kata komulo dhano ma ok ler+ kata gimoro amora ma ok ler ka ok ong’eyo, mi ofwenyo achien, obedo jaketho.
4 “‘Kata ka ng’ato okuong’ore timo gimoro ma ok oparo malong’o, bed ni en gima ber kata gima rach, kae to ofwenyo achien ni ne orikni kuong’ore, obedo jaketho.*+
5 “‘Ka ng’ato obedo jaketho nikech otimo achiel kuom wechego, nyaka ohul+ richoneno. 6 Bende, enokel ne Jehova misango mar ketho motimono.+ Enokel nyarombo kata nyadiel ma dhako kaka misango mar richo. Kae to jadolo biro pwodhone richone.
7 “‘Ka ng’ato odhier ma ok onyal kelo nyarombo, onego okel ne Jehova akuche ariyo madongo kata akuche ariyo matindo+ mondo obedne misango mar ketho. Akuru achiel notimgo misango mar richo, to machielo notimgo misango miwang’o.+ 8 Enokelgi ne jadolo, kendo jadolono nochiw winyo mokwongo kaka misango mar richo. Obiro ng’ado ng’ute to ok obi chode chuth. 9 Jadolono biro kiro moko kuom remb winyono e bath kendo mar misango, to modong’ obiro chuero e tiend kendono.+ Mano en misango mar richo. 10 Winyo machielo notimgo misango miwang’o koluwo kaka chik dwaro.+ Kamano e kaka jadolo biro chiwo misangono mondo opwodhnego richone, kendo ibiro wene richone.+
11 “‘Ka ng’ato ok nyal chiwo akuche ariyo madongo kata akuche ariyo matindo to onego ochiw efa*+ achiel kuom apar mar mogo mayom, mondo otimnego misango mar richo. Kata kamano, kik oolie mo kendo kik oketie ubani nikech en misango mar richo. 12 Enotere ne jadolo, eka jadolo nojuk mogo lwedo achiel mi enowang’e e kendo mar misango kaka misango mar rapar mondo Nyasaye oyie gi chiwono duto. Enoluowe e wi misango miwang’o ne Jehova. Mano en misango mar richo. 13 Mano e kaka jadolo biro chiwo misango mondo opwodhgo richo mar ng’at moketho chik moro amora kuom chikego, kendo ibiro we ne ng’atno richone.+ To chiwo modong’ nobed mar jadolo,+ mana kaka itimo gi chiwo mar cham.’”+
14 Jehova nomedo wacho ne Musa kama: 15 “Ka ng’ato oboth moketho chik moro amora mar gik maler mag Jehova,+ nyaka okel ne Jehova yim ma onge mbala mondo otimnego misango mar ketho.+ Nengone kaluwore gi shekel* mag fedha onego opim kitiyo gi rapim mar shekel man ka maler.+ 16 Bende, nyaka omed achiel kuom abich+ mar nengo mar yim mochiwono nikech oseketho chik mar gik maler. Enomigi jadolo, kendo jadolo biro kawo yimno mondo otimgo misango mar ketho ne ng’atno,+ mi nowene richone.+
17 “Ka ng’ato oketho achiel kuom chike mag Jehova, kata ka otimo kamano ka ok ong’eyo, enobed jaketho, kendo nyaka kume.+ 18 Enokel ne jadolo yim ma onge mbala ma nengone romre gi fedha ma jadolono biro nyise, mondo otimgo misango mar ketho+ ma ng’atno notimo ka kia, kendo ibiro wene richone. 19 Ma en misango mar ketho. Ng’atno oseketho ne Jehova.”
6 Jehova nomedo wacho ne Musa kama: 2 “Ka ng’ato otimo richo ne Jehova+ kuom riambo e wi gima nomiye mondo okan, kata ma ne osingne,+ kata kuom kwalo wadgi, kata kuom timone mibadhi, 3 kata kuom kwanyo gimoro to oriamboe, kendo okuong’ore ni ok otimo moro amora kuom richogo,+ magi e chike ma nyaka oluw: 4 Ka oyud ni otimo richo kendo bura oloye, nyaka oduok gima ne okwalo, kata gima ne oyudo e yor mibadhi, kata gima nomiye mondo okan, kata gima ne okwanyo, 5 kata gimoro amora ma ne okawo to okuong’ore ni ok okawo. Enoduok gino+ momed achiel kuom abich mar nengo gino. Enochul wuon-go gigo chieng’ ma ong’adnee bura. 6 Bende, enokel ne jadolo yim ma onge mbala ma nengone romre gi gima jadolo biro wacho, mondo otimgo ne Jehova misango mar ketho.+ 7 Jadolo biro chiwo misangono e nyim Jehova ne ng’atno, mi nowene ketho ma notimono.”+
8 Jehova nomedo wacho ne Musa niya: 9 “Nyis Harun gi yawuote kama, ‘Ma e chik monego oluw sa mitimo misango miwang’o:+ Misango miwang’o nyaka bed e mach manie kendo otieno mangima nyaka piny ru, to majno nyaka sik ka liel. 10 Jadolo norwak law kitani mar dolo+ kod onyasa+ mar kitani mondo ogeng’go duge. Eka nogol buch misango+ e kendo mi noketgi e bath kendono. 11 Bang’e, nolok lepe+ kae to nogol burugo kanyo motergi ka maler moyangi, oko mar kambi.+ 12 Mach manie kendono nyaka sik ka liel. Ok onego otho. Okinyi kokinyi, jadolo nyaka ketie yien+ mondo oliel eka ochanie misango miwang’o, kendo enowang’ie boche mitimogo misengni mag kuwe.+ 13 Mach nyaka sik ka liel e kendo mar misangono. Kik otho.
14 “‘Ma e chik mar misango mar cham:+ Yawuot Harun nochiwe e nyim Jehova e dho kendo mar misango. 15 Achiel kuomgi nojuk mogo lwedo achiel moseolie mo, kendo nokaw ubani duto mokelgo mogono. Enowang’gi e kendo kaka misango mar rapar ne Jehova mondo ogolne suya mamit.+ 16 To modong’ Harun gi yawuote biro chamo.+ Ibiro chame kaka makate ma ok oketie thowi, e laru mar hema mar romo+ ma en ka maler. 17 Ok onego oted makateno gi thowi.+ Asemiyo yawuot Harun mogono mondo obed pok margi kowuok kuom misengni miwang’o gi mach.+ En gima ler moloyo,+ mana kaka misango mar richo kendo kaka misango mar ketho. 18 Joka Harun ma chwo duto nyaka chame+ nikech en pok ma asemiyogi kowuok kuom misengni miwang’o ne Jehova e mach.+ Mano en chik mochwere kuom tiengeu duto. Gimoro amora momulo misengnigo nobed maler.’”
19 Jehova nowacho ne Musa kendo niya: 20 “Chieng’ miwiroe Harun, misango mar cham ma Harun gi yawuote biro chiwo ne Jehova+ en mogo ma romo achiel kuom apar mar efa.*+ Nus mar mogono nochiw okinyi kokinyi, to nus machielo nochiw odhiambo kodhiambo.+ 21 Ibiro ruwe gi mo kae to itede e tawo.+ Eka ibiro kele ka otimo mo kendo onego opoge matindo tindo mondo otimgo misango mar cham ma golo ne Jehova suya mamit. 22 Wuod Harun moro amora+ ma biro kawo kar Harun nyaka chiwe. Mano en chik mochwere. Nochiwe ne Jehova kaka misango miwang’o. 23 Misango moro amora mar cham ma jadolo chiwo nyaka wang’ duto. Ok onego chame.”
24 Jehova nowacho ne Musa kendo niya: 25 “Nyis Harun gi yawuote ni, ‘Ma e chik mar misango mar richo:+ Misango mar richo onego oyang’+ e nyim Jehova ka ma iyang’oe misengni miwang’o. En gima ler moloyo. 26 Jadolo motimo misangono nochame.+ Ibiro cham misangono e laru mar hema mar romo+ ma en ka maler.
27 “‘Gimoro amora morere e misangono nobed maler. Kendo ka po ni remb misangono okirore e nanga ng’ato ang’ata, nyaka olwok nangano ka maler. 28 Nyaka uto agulu motedie ring’ono, to ka otede e aguch mula, nyaka urudhe mi ulawe gi pi.
29 “‘Dichwo moro amora ma jadolo biro chamo misangono.+ En gima ler moloyo.+ 30 Kata kamano, ok onego ocham misango mar richo ka po ni okel rembe e hema mar romo mondo opwodhgo richo ka maler.+ Onego owang’ misangono e mach.
7 “‘Ma e chik monego oluw sa ma itimo misango mar ketho.+ Misangono en gima ler moloyo. 2 Ibiro yang’ misango mar ketho ka ma iyang’oe misengni miwang’o, kendo nyaka kir remb misangono+ e bethe kendo mar misango duto.+ 3 Jadolo biro chiwo boche duto+ nyaka mag sembe gi mag nyimbich, 4 gi nyiroke ariyo gi bochegi man but oguro. Bende, enochiw boche man e chuny gi nyiroke.+ 5 Jadolo nowang’ gigo duto e kendo mar misango kaka misengni miwang’o ne Jehova e mach.+ En misango mar ketho. 6 Dichwo moro amora ma jadolo biro chame+ ka maler. En gima ler moloyo.+ 7 Chik mitiyogo sa ma ichiwo misango mar richo e ma ibiro tigo sa ma ichiwo misango mar ketho. Jadolo mochiwo misangono biro dong’ gi ring’o duto motigo e pwodho ketho.+
8 “‘Jadolo motimo ne ng’ato misango miwang’o e ma nokaw pien+ chiaye motimgo misangono.
9 “‘Bende, misango moro amora mar cham motedi e kendo, kata e pan, kata e tawo,+ nodong’ ne jadolo ma chiwe.+ 10 Yawuot Harun nopogre misengni mamoko duto mag cham moruw gi mo+ kata ma ok oruw gi mo.+ Ginipogre ma romre.
11 “‘Ma e chik monego oluw ka ng’ato chiwo ne Jehova misango mar kuwe:+ 12 Ka ng’ato ochiwe mondo odwokgo erokamano,+ nyaka omedie makate molworore ma nigi bur e diergi moted gi mo to ok oketie thowi, makate mopamore mowirie mo kendo ok oketie thowi, kod makate molworore ma nigi bur e diere, molos gi mogo mayom modwal gi mo. 13 E wi misango mar kuwe modwokogo erokamanono, enokel bende makate molworore ma nigi bur e diergi, kendo moketie thowi. 14 E moro ka moro kuom makatego, nokaw achiel mondo ochiw ne Jehova kaka gima ler; jadolo mokiro remb misango mar kuwe e kendo mar misango e ma nokaw+ makate mochiwogo. 15 Ring’o mitimogo misengni mag kuwe nyaka cham chieng’ mochiwee. Ok nowegi ginind nyaka okinyi.+
16 “‘Ka ng’ato ochiwo misango mar kuong’ruok+ kata ochiwo misango mana nikech ohero,+ onego cham ring’ono e odiechieng’ mochiweeno, to modong’ inyalo cham kinyne. 17 To ka ring’ono onindo nyaka odiechieng’ mar adek, nyaka wang’e pep e mach.+ 18 Ka po ni ng’ato ochamo ring misango mar kuweno chieng’ mar adek, Nyasaye ok noyie gi ng’at mochiwo misangono, kendo ok nokwan ni ogolo misango. Enobed gima kwero, kendo ng’at mochame nobed jaketho.+ 19 Ka ring’ono orere e gima ok ler, ok nochame. Nyaka wang’e e mach pep. Ring’o maler to ng’ato ang’ata maler nyalo chamo.
20 “‘To ka ng’at ma ok ler ochamo ring misango mar kuwe ma ochiw ne Jehova, nyaka nege.+ 21 Ka ng’ato omulo gimoro amora ma ok ler, bed ni omulo dhano ma ok ler+ kata le ma ok ler,+ kata omulo gimoro amora makwero,+ kae to ochamo ring misango mar kuwe mochiw ne Jehova, nyaka nege.’”
22 Jehova nomedo wacho ne Musa niya: 23 “Nyis Jo-Israel kama, ‘Kik ucham bor+ mar ruath, kata mar yim, kata mar diel. 24 Bor le moro amora muyudo kotho kata ma ondiek onego unyalo tiyogo e yore mamoko, kata kamano kik uchame.+ 25 Ng’ato ang’ata mochamo bor chiaye ma ochiwo kaka misango miwang’o ne Jehova, nyaka negi.
26 “‘Kik ucham remb gimoro amora+ ka moro amora mudakie, bed ni en mar winyo kata mar le. 27 Ng’ato ang’ata mochamo remo nyaka negi.’”+
28 Jehova nomedo wacho ne Musa niya: 29 “Nyis Jo-Israel ni, ‘Ng’ato ang’ata mokelo ne Jehova misango mar kuwe biro pogo lemo moko kuom misangoneno mondo ochiw ne Jehova.+ 30 En owuon nokel boche+ gi agoko mondo owang’ gi mach ne Jehova. Obiro fwayogi koni gi koni nimar en misango mifwayo+ e nyim Jehova. 31 Jadolo biro wang’o bochego e kendo mar misango,+ to agoko nodong’ ne Harun gi yawuote.+
32 “‘Em ma korachwich mar chiaye motimgo misango mar kuwe nomi jadolo kaka pokne.+ 33 Em ma korachwichno nobed mar wuod Harun+ ma ochiwo remo kod boche mag misengni mag kuwe. 34 Asemiyo Harun jadolo kod yawuote agoko kod em mag chiaye ma Jo-Israel timogo misengni mag kuwe mondo obed pokgi ma Jo-Israel biro miyogi nyaka chieng’.+
35 “‘Mano en pok ma Jehova omiyo Harun gi yawuote kuom misengni miwang’o, chakre chieng’ ma ne oketgie jodolo mag Jehova.+ 36 Chieng’ ma ne owirgieno, Jehova nochiko Jo-Israel mondo omi jodolo lemogo obed pok margi.+ Mano chik momako Jo-Israel nyaka chieng’.’”
37 Mago e chike mag misengni miwang’o,+ chiwo mag cham,+ misengni mag richo,+ misengni mag ketho,+ misengni michiwo kiwalogo jodolo,+ kod misengni mag kuwe.+ 38 Jehova nomiyo Musa chikego e Got Sinai+ chieng’ ma ne ochikoe Jo-Israel e thim mar Sinai mondo gikel chiwo+ maggi ne Jehova.
8 Jehova nomedo wacho ne Musa niya: 2 “Kaw Harun gi yawuote+ kaachiel gi lep dolo,+ gi mor wir,+ gi ruath mitimogo misango mar richo, gi yimbe ariyo, kod okapu moting’o makate ma ok oketie thowi,+ 3 kae to ichok oganda Jo-Israel duto e dho hema mar romo.”
4 Musa notimo kaka Jehova nochike, mi Jo-Israel nochokore e dho hema mar romo. 5 Musa nonyiso ji niya: “Ma e kaka Jehova osechikowa ni watim.” 6 Omiyo, Musa nokelo Harun gi yawuote ire mi olwokogi gi pi.+ 7 Bang’ mano, norwako ne Harun kandho+ mi otueyone msip+ e nungone, kendo norwakone kandho ma onge bade,+ gi efod*+ motueyone msip+ mar efod. 8 Notueyone ofuko mar akor,+ moketo Urim gi Thumim+ e iye. 9 Eka ne otueyo ne Harun kilemba+ e wiye, kendo norwakone osimbo maler mopamore ma nyilni molos gi dhahabu ma ne nyiso ni owale ne tij Nyasaye.+ Musa notimo mana kaka Jehova nosechike.
10 Musa nokawo mo mi opwodhogo hema mar lamo Nyasaye kaachiel gi gik moko duto ma ne ni e iye.+ 11 Bang’ mano, nokiro moko dibiriyo e kendo mar misango mopwodhe kaachiel gi gigene duto kod besen mar lwok gi gima ichungee. 12 Gikone, nokawo moko moolo e wi Harun mondo opwodhego ne tij dolo.+
13 Musa nokelo yawuot Harun ire morwakonegi kendhe, motweyonegi msibe kae to otweyonegi kilemba e wigi+ mana kaka Jehova nosechike.
14 Bang’ mano, Musa nokelo ruath ma ne idhi timgo misango mar richo mi Harun gi yawuote noketo lwetegi e wiye.+ 15 Eka Musa noyang’o ruadhno mokawo rembe+ gi lith lwete momieno e wi tunge kendo mar misango mondo opwodhego. Kae to nopuko remo modong’ e tiend kendono kopwodhego mondo obed maler minyalo golie misango. 16 Bang’e, nokawo boche mag nyimbich, gi boche mag chuny, kod nyiroke ariyo gi bochegi, mi nowang’ogi e kendo mar misango.+ 17 Kae to Musa nowacho ni ogol ruadhno oko mar kambi mondo owang’e te kaachiel gi piene, gi ringe, kod owuoche,+ mana kaka Jehova nosechike ni otim.
18 Eka Musa nokelo yim ma ne idhi timgo misango miwang’o, kendo Harun gi yawuote noketo lwetegi e wi yimno.+ 19 Kae to Musa noyang’o yimno mokawo remo kendo okiro e bethe kendo mar misango duto. 20 Nopoge lemo lemo, mokawo wiye, gi lemogo, kod boche mag nyarogno mowang’ogi e mach. 21 Eka nolwoko nyimbiyene gi tiendene e pi, kae to nowang’ogi duto e kendo mar misango. Mano ne en misango miwang’o mondo ogol suya mamit. Ne en misango miwang’o ne Jehova e mach, mana kaka Jehova nosechiko Musa.
22 Bang’ mano, Musa nokelo yim machielo mar walo jodolo,+ kendo Harun gi yawuote noketo lwetegi e wiye.+ 23 Eka Musa noyang’e mokawo remo momieno e it Harun ma korachwich, kendo e lith lwete mathuon ma korachwich, kod e lith tiende mathuon ma korachwich. 24 Kae to Musa nokelo yawuot Harun momieno remo e itgi ma korachwich, gi lith lwetegi mathuon ma korachwich, kod lith tiendegi mathuon ma korachwich, kendo Musa nokiro remo modong’ e bethe kendo mar misango duto.+
25 Eka nokawo boche duto kaka sembe, boche mag nyimbich, gi boche mag chuny, gi nyiroke ariyo gi bochegi, kod em ma korachwich.+ 26 Nokawo makate e okapu ma ne nie nyim Jehova. Nokawo makate achiel molworore ma nigi bur e diere kendo+ ma ok oketie thowi, makate achiel molworore moted gi mo,+ kod makate mopamore mowirie mo. Nolwowogi e wi boche kod em ma korachwich ma ne nie kendono. 27 Bang’ mano, noketo gigo duto e lwet Harun gi yawuote kae to nochako fwayogi koni gi koni kaka chiwo mifwayo e nyim Jehova. 28 Kae to nochako okawogi e lwetegi mi oketogi e wi misango miwang’o ma ne nie kendo, mowang’ogi. Mano ne en misango ma golo suya mamit miwalogo jodolo. Ne en misango miwang’o ne Jehova e mach.
29 Musa nokawo agoko mofwaye koni gi koni kaka chiwo mifwayo e nyim Jehova.+ Mano ne pok ma ne okawo kuom yim ma ne iwalogo jodolo, mana kaka Jehova nosechike.+
30 Musa nokawo mo moko+ gi remo moko ma ne nie wi kendo mar misango, mokiro kuom Harun gi lepe mag dolo kendo kuom yawuote kod lepgi mag dolo. Mano e kaka nopwodho Harun gi yawuote+ kaachiel gi lepgi mag dolo.+
31 Musa nowacho ne Harun gi yawuote niya: “Teduru+ ring yimno e dho hema mar romo mondo uchame gi makate manie okapu moting’o gik miwalogo jodolo. Nimar nochika ni, ‘Harun gi yawuote nyaka chamgi.’+ 32 To ring’o kod makate modong’ unuwang’ e mach.+ 33 Kik uwuog e dho ranga hema mar romo nyaka ndalo abiriyo rum, nimar walou ne tij dolo biro kawo ndalo abiriyo.+ 34 Kaka osepwodhu+ kawuononi e kaka Jehova nochiko ni mondo otim. 35 Bed ni en odiechieng’ kata otieno, kik uwuog e dho ranga hema mar romo nyaka ndalo abiriyo rum.+ Timuru kaka Jehova osechikou+ mondo kik utho, nikech mano e kaka osechika.”
36 Harun gi yawuote notimo gik moko duto ma Jehova nochiko Musa ni gitim.
9 E odiechieng’ mar aboro,+ Musa noluongo Harun gi yawuote kod jodong Israel. 2 Nowacho ne Harun niya: “Kaw nyaroya mitimogo misango mar richo+ kod yim mitimogo misango miwang’o mondo ikelgi e nyim Jehova. Nyaka gibed ma onge mbala. 3 To inyis Jo-Israel ni, ‘Kawuru nyuok mibiro timgo misango mar richo, kod nyaroya gi nyayim ma onge mbala ma hikgi achiel-achiel mibiro timgo misango miwang’o, 4 kendo kawuru ruath gi yim mibiro timgo misengni mag kuwe+ mondo uchiwgi duto e nyim Jehova, kaachiel gi chiwo mar cham+ moruw gi mo, nimar Jehova biro fwenyorenu kawuono.’”+
5 Ne gikelo gik ma Musa nochikogi e nyim hema mar romo. Eka oganda duto nosudo mochung’ e nyim Jehova. 6 Musa nowachonegi niya: “Ma e gima Jehova osechikou ni utim mondo duong’ mar Jehova ofwenyrenu.”+ 7 Musa nomedo wacho ne Harun niya: “Sud but kendo mar misango mondo itim misango mar richo+ kod misango miwang’o mondo ipwodhrigo+ kendo ipwodhgo joodi. Bang’e, ikaw jamni ma oganda ochiwo+ mondo itimgo misango mipwodhogigo+ mana kaka Jehova osechiko.”
8 Kamano, Harun nosudo mapiyo but kendo mar misango mi oyang’o nyaroya mitimogo misango mar richo.+ 9 Yawuote nomiye remb+ nyaroyano mi olutoe lith lwete, kendo nomieno tunge kendo mar misango gi remono. To remo modong’ nopuko e tiend kendo.+ 10 Nokawo boche gi nyiroke kod boche mag chuny mag chiaye ma ne otimgo misango mar richo mowang’ogi e kendo mar misango mana kaka Jehova nosechiko Musa.+ 11 To notero ring’o gi pien oko mar kambi, mowang’ogi.+
12 Bang’ mano, Harun noyang’o chiaye mitimogo misango miwang’o, kendo yawuote nomiye remb chiayeno mokiro remono e bethe kendo mar misango.+ 13 Ne gimiye lemo mag chiayeno kaachiel gi wich, mowang’ogi e kendo mar misango. 14 Kae to nolwoko nyimbiyene kod tiendene mi nowang’ogi e wi misango miwang’o ma ne nie kendo.
15 Eka nokelo gik ma ne ji ochiwo, mokawo nyuok michiwo kaka misango mar richo ne oganda. Noyang’e mopwodhogo richogi kaka ne osetimo gi chiaye mokwongocha. 16 Bang’ mano, nokelo chiaye motimogo misango miwang’o koluwo kaka chik ne dwaro.+
17 Eka nokelo chiwo mar cham+ mojuko lwedo achiel mi owang’o e kendo mar misango kaachiel gi misango miwang’o okinyi.+
18 Bang’e, Harun noyang’o ruath kod yim mitimogo misango mar kuwe ne oganda, kendo yawuote nomiye remb jamnigo mi okiro remono e bethe kendo mar misango.+ 19 Ne gikawo boche mag ruath,+ sembe yim, boche mag nyimbiyegi, nyirokegi, kod boche mag chuny,+ 20 mi gilwowogi e wi agoko mag jamnigo kendo ne giwang’ogi e kendo mar misango.+ 21 Harun nokawo agoko kod em ma korachwich mofwayogi koni gi koni kaka chiwo mifwayo e nyim Jehova mana kaka Musa nochiko.+
22 Koro, Harun noting’o bedene moguedho oganda,+ kendo nolor moa ka ma notimoe misengni mag richo, gi misengni miwang’o, kod misengni mag kuwe. 23 Gikone, Musa gi Harun nodonjo e hema mar romo kendo ne giwuok oko mi giguedho oganda.+
Eka duong’ mar Jehova nofwenyore ne oganda duto,+ 24 mi mach nowuok e nyim Jehova+ mowang’o misango miwang’o kaachiel gi boche ma ne nie kendo mar misango. Ka ne ji duto oneno kamano, ne gichako kok matek kendo ne gipodho piny auma.+
10 Bang’e, Nadab gi Abihu+ ma yawuot Harun nokawo gigegi mag ting’o mach, mi giketo mach e igi kae to giketoe ubani.+ Ne gidonjo e nyim Jehova mi gichako golone mach mawendo+ ma ne ok ochikogi. 2 Mach nowuok e nyim Jehova motiekogi pep.+ Omiyo, ne githo e nyim Jehova.+ 3 Eka Musa nowacho ne Harun niya: “Ma e gima Jehova owacho, ‘Ng’at ma sudo buta nyaka ng’e ni an ng’a maler+ kendo nyaka omiya duong’ e nyim ji duto.’” Harun noling’ aling’a thi ka dhoge omoko.
4 Musa noluongo Mishael gi Elizafan ma yawuot Uziel+ ma owadgi wuon Harun, mowachonegi niya: “Biuru uting’ ringre oweteu, ugolgi ka maler mondo utergi oko mar kambi.” 5 Omiyo, ne gidhi mi giting’ogi ka pod gin gi lepgi mi giterogi oko mar kambi mana kaka Musa nosechikogi.
6 Musa nowacho ne Harun kod yawuote ma Eleazar gi Ithamar niya: “Kik uwe yie wiu koyugno kendo kik uyiech lepu,+ mondo kik utho kendo kik Nyasaye bed gi mirima gi oganda duto. Joweteu ma Jo-Israel to biro ywago jo ma Jehova osenego gi mach. 7 To un kik ua e dho hema mar romo, nono to ubiro tho, nimar osewiru gi mo mar Jehova.”+ Omiyo, ne gitimo kaka Musa nowacho.
8 Jehova nonyiso Harun kama: 9 “In gi yawuoti, kik umadh divai kata gimoro amora ma mero ji sa ma udhi e hema mar romo,+ nono to ubiro tho. Ma en chik momako tiengeu duto nyaka chieng’. 10 Chikno nokonyu pogo gik mowal gi gik ma ok owal kod gik maler gi gik ma ok ler,+ 11 kendo nokonyu puonjo Jo-Israel chike ma ne Jehova omiyogi kokalo kuom Musa.”+
12 Musa nowacho ne Harun gi yawuote ma Eleazar gi Ithamar niya: “Kawuru chiwo mar cham modong’ kuom misango miwang’o ne Jehova mondo ulosgo makate ma ok oketie thowi kae to uchame but kendo mar misango+ nikech en gima ler moloyo.+ 13 Nyaka uchame ka maler,+ nimar en pokni kaachiel gi yawuoti. En pok mogol kuom misengni miwang’o ne Jehova nikech kamano e kaka nosechika. 14 Un gi yawuotu gi nyiu+ unucham agoko gi em mar chiwo mifwayo ne Nyasaye.+ Unuchamgi ka un kamoro amora mowal ne Nyasaye, nikech gin pok mosemiu koa kuom misengni mag kuwe ma Jo-Israel chiwo. 15 Ginikel em kod agoko mar chiwo mifwayo kaachiel gi boche mag misengni miwang’o, mondo ofwagi koni gi koni e nyim Jehova. Em gi agoko nobed pok maru gi yawuotu+ nyaka chieng’, mana kaka Jehova nosechiko.”
16 Musa ne odwaro gi kinda kama diel ma ne onego otimgo misango mar richo nitie,+ mofwenyo ni osewang’e. Omiyo, iye nowang’ gi Eleazar kod Ithamar ma yawuot Harun mopenjogi niya: 17 “Ang’o momiyo ne ok uchamo misango mar richo ka maler+ to en misango maler moloyo? Donge ne omiugo mondo ugolgo richo mag oganda Jo-Israel kupwodhogi kuom richogi e nyim Jehova? 18 To kata mana rembe e ma pok ukelo ka maler!+ Ne dwarore ni uchame e i ka maler kaka ne ochika.” 19 Harun nodwoko Musa niya: “Kawuono yawuota osechiwo misengni mag richo kod miwang’o ne Jehova.+ Kata kamano, ne ane gima osetimorena. To koro ka dacham misango mar richo kawuono, be datimo maber e nyim Jehova?” 20 Ka ne Musa owinjo weche ma Harun nonyise, noyie kode.
11 Jehova nowacho ne Musa gi Harun niya: 2 “Nyisuru Jo-Israel kama, ‘Magi e kit le munyalo chamo:+ 3 Le moro amora ma ombong’ne opogore ariyo kendo ma nyamo kambula unyalo chamo.
4 “‘To nitie le ma nyamo kambula kata ma ombong’gi opogore ariyo ma ok onego ucham. Ngamia ombong’ne ok opogore ariyo to onyamo kambula. Omiyo, ok oler.+ 5 Apwoch-lwanda+ ombong’ne ok opogore ariyo to onyamo kambula. Omiyo, ok oler. 6 Apwoyo ombong’ne ok opogore ariyo to onyamo kambula. Omiyo, ok oler. 7 Anguro+ ok nyam kambula to ombong’ne opogore ariyo. Omiyo, ok oler. 8 Kik uchamgi kendo kik umul ringregi ka gisetho. Gin le ma ok ler.+
9 “‘Gik modak e pi munyalo chamo e magi: Gimoro amora man gi thuoke kod kalagakla, bed ni odak e nam kata e aora.+ 10 To kik ucham gimoro amora manie pi ma onge gi thuoke kod kalagakla, nimar ok oler. 11 Gigo ok ler, omiyo kik uchamgi,+ kendo ginibednu ma ok ler kata ka gisetho. 12 Gimoro amora modak e pi ma onge thuoke kod kalagakla nobednu ma ok ler.
13 “‘Gik ma fuyo ma ok onego ucham gin magi: otenga,+ koga, achuth ma rateng’,+ 14 otenga makwar kod kit otenga duto ma rotenge, 15 kit agak duto, 16 udo, tula, nyatawo, kit olith duto, 17 tula matin, osou, tula ma ite dongo, 18 oyoch nam, mbusi, achuth, 19 ogungo, gi ng’ang’a, gi cherwa, gi oliktiga.* 20 Bende, kik ucham gik ma fuyo kanyakla kendo ma wuotho gi tiendegi ang’wen.
21 “‘To kuom gik ma fuyo kanyakla to wuotho gi tiende ang’wen, unyalo chamo mana mago ma tiendegi ariyo ma chien ma gichikorego boyo moloyo ma nyime. 22 Kuom gik ma kamago unyalo chamo det bonyo, dede mamoko michamo,+ onjiri, kod ongogo. 23 To gik modong’ duto ma fuyo kanyakla ma nigi tiende ang’wen nobednu gik ma ok ler. 24 Gik ma kamago biro miyo ubed ma ok ler. Ng’ato ang’ata momulogi ka gisetho biro bedo ma ok ler nyaka odhiambo.+ 25 Ng’ato ang’ata moting’ogi ka gisetho nyaka lwok lepe+ kendo nosik ka ok oler nyaka odhiambo.
26 “‘Le moro amora ma ombong’ne opogore ariyo to ok nyam kambula ok ler. Ng’ato ang’ata momulogi biro bedo ma ok ler.+ 27 Bende, le duto ma tiendegi ang’wen nigi kogno ok ler. Ng’ato ang’ata momulo ringregi ka gisetho biro bedo ma ok ler nyaka odhiambo. 28 Ng’at moting’o ringregi ka gisetho nyaka lwok lepe,+ kendo nosik ka ok oler nyaka odhiambo.+ Lego nobednu ma ok ler.
29 “‘Gik mamol ma ok ler e magi: fuko, oyieyo,+ kod kit ogweyo duto, 30 obongobongo, ng’ech, olele, ogwech-kwoyo, kod ong’ongruok.* 31 Gik ma kamago nobednu ma ok ler.+ Ng’ato ang’ata momulogi ka gisetho biro bedo ma ok ler nyaka odhiambo.+
32 “‘Ka achiel kuomgi otho molwar kuom gimoro, gima olwarieno nobed ma ok ler. Enonyum gima olwarieno e pi, kendo gino nosik ka ok ler nyaka odhiambo, bed ni en law, pien, ogunia, kata gima olos gi bao mitiyogo e chiemo, kata gimoro amora ma itiyogo pile. Bang’ mano, gino nobed maler. 33 Ka achiel kuom gigo olwar e agulu, gik moko duto e aguluno nobed ma ok ler,+ kendo nyaka toye. 34 Chiemo moro amora ma pi aguluno ooye, nobed ma ok ler. Kendo gimoro amora minyalo madhi manie aguluno nobed ma ok ler. 35 Ka achiel kuom gigo otho, mi olwar kuom gimoro amora, to gima olwarieno nobed ma ok ler. Kolwar e kendo, kendono nyaka kethi, nimar kendono ok ler, kendo nosik kamano. 36 To kolwar e soko kata e bugo, soko gi bugono nosik ka ler, to ng’at mogolo gima othono e ma nobed ma ok ler. 37 Ka achiel kuom gigo otho molwar e kodhi midwaro pidhi, kodhigo nosik ka ler. 38 To ka kodhigo osebud e pi kendo achiel kuom gigo otho molwar e kodhigo, ginibednu ma ok ler.
39 “‘Ka le moro amora michamo otho, ng’ato ang’ata momule nobed ma ok ler nyaka odhiambo.+ 40 Ng’ato ang’ata mochame nyaka lwok lepe, kendo nosik ka ok oler nyaka odhiambo.+ Bende, ng’ato ang’ata moting’o leno nyaka lwok lepe, to nosik ka ok oler nyaka odhiambo. 41 Gik moko duto mamol kanyakla gin gik ma ok ler.+ Omiyo, kik uchamgi. 42 Kik ucham gik ma lak gi bund igi, kata ma wuotho gi tiende ang’wen, kata ma nigi tielo mang’eny, nimar gin gik ma ok ler.+ 43 Kik uchidru gi gimoro amora mamol e lowo, kendo kik uduwru, nono to ubedo jo ma ok ler.+ 44 An Jehova Nyasachu.+ Omiyo, pwodhreuru mondo ubed jo maler+ nikech an aler.+ Kik uchidru gi gimoro amora mamol e lowo. 45 An Jehova Nyasachu ma ne ogolou e piny Misri mondo abed Nyasachu.+ Omiyo, nyaka ubed maler+ nikech aler.+
46 “‘Mago e chike mag le, gi mag gik ma fuyo, gi mag gimoro amora modak e pi, kaachiel gi mag gimoro amora mamol e lowo, 47 chikego oket mondo opog gik maler kod gik ma ok ler, kendo mondo opog gik minyalo cham kod ma ok onego cham.’”+
12 Jehova nomedo wacho ne Musa niya: 2 “Nyis Jo-Israel ni, ‘Ka dhako omako ich mi onyuolo wuoyi, enobed ma ok ler kuom ndalo abiriyo mana kaka obedo ma ok ler kinde ma odhi e dwe.+ 3 E odiechieng’ mar aboro ibiro ter nyathino nyangu.+ 4 Kae to dhakono biro dhi nyime pwodhore kuom ndalo 33 nikech rembe ma nochuer. Ok onego omul gimoro amora mowal ne Nyasaye kendo kik odonj ka maler nyaka ndalone mag pwodhruok rum.
5 “‘To ka onyuolo nyako, obiro bedo ma ok ler kuom ndalo 14 mana kaka obedo ma ok ler kinde ma odhi e dwe. Kae to obiro dhi nyime pwodhore kuom ndalo 66 nikech rembe ma nochuer. 6 Ka kindene mar pwodhruok orumo, bed ni onyuolo nyathi ma wuoyi kata ma nyako, enokel nyayim ma jahiga achiel mondo otimnego misango miwang’o+ kod akuru maduong’ kata akuru matin mondo otimnego misango mar richo. Enotergi ir jadolo e dho hema mar romo. 7 Jadolo nochiwgi e nyim Jehova mondo opwodhego, mi dhako ma rembe nochuerno nobed maler. Chikno biro mako dhako monyuolo nyathi ma wuoyi kata ma nyako. 8 Ka dhakono odhier ma ok onyal yudo nyayim, nokel akuche ariyo madongo kata akuche ariyo matindo.+ Achiel notimnego misango miwang’o to machielo notimnego misango mar richo. Jadolo notim misengnigo mondo opwodhego, mi dhakono nobed maler.’”
13 Jehova nomedo wacho ne Musa gi Harun niya: 2 “Ka ng’ato nigi kamoro mokuot e dende, kata motimo odeyo, kata moruodho, kendo kanyo chalo dhoho,*+ nyaka tere ir Harun jadolo kata ir achiel kuom yawuote ma jodolo.+ 3 Jadolo biro ng’iyo ka ma litno. Ka oyudo ni yier man kanyo olokore rachar kendo nenore ni tuono odonjo mokalo pien, mano nyiso ni ng’atno nigi dhoho. Ka jadolo oseng’iye kamano, eka nowach ni ng’atno ok ler. 4 To ka po ni ka moruodhono olokore rachar kendo nenore ni ok okalo pien modonjo iye, to yier man kanyo bende ok olokore rachar, jadolo noket jatuono kar kende kuom ndalo abiriyo.+ 5 Jadolo nong’iye kendo chieng’ mar abiriyo, to koyudo ni ka malitno pod osiko mana kaka chon kendo ok olandore, obiro keto ng’atno kar kende kuom ndalo abiriyo mamoko.
6 “Jadolo biro ng’iye kendo chieng’ mar abiriyo, to koyudo ni ka malitno osechako chango kendo ok olandore, mano nyiso ni ne en mana odeyo. Jadolo nong’ad ni ng’atno ler.+ Omiyo, ng’atno nolwok lepe kendo nobed maler. 7 Kata kamano, ka ka ma nolokore odeyono ochako landore e dend ng’atno, nyaka odog ir jadolo. 8 Jadolo biro ng’iye kendo, to koyudo ni odeyono olandore e dende, jadolo nong’ad ni ng’atno ok ler nikech en gi dhoho.+
9 “Ka tuo mar dhoho omako ng’ato, nyaka tere ir jadolo, 10 mondo jadolo ong’iye.+ To ka po ni nitie ka ma okuot ma rachar kendo yier man kanyo oselokore rachar mi kanyo otimo adhola,+ 11 mano nyiso ni en dhoho ma kore tek. Omiyo, jadolo biro ng’ado ni ng’atno ok ler. Onge tiende kete kar kende,+ nikech ok oler. 12 To ka po ni ng’ato nigi dhoho kendo dhohono olandore e dende duto chakre wiye nyaka tiende ma kata jadolo owuon nyalo neno, 13 kae to jadolo oyudo ni dhohono olandore e dende duto, nong’ad ni ng’atno ler.* Nikech dende duto oselokore ma rachar, ng’atno ler. 14 To po nono adhola moro owuok e dend ng’atno, nobed ma ok ler. 15 Ka jadolo oneno adholano, nong’ad ni ng’atno ok ler.+ Adholano ok ler nimar en dhoho.+ 16 To ka adholano olokore ma rachar, ng’atno nyaka dog ir jadolo. 17 Jadolo nyaka ng’iye,+ to koyudo ni ka malitno olokore rachar, obiro ng’ado ni ng’atno ler.
18 “Ka bur omako ng’ato mi ochango, 19 kae to kanyo okuot ma rachar kata ma kwarkwar, ng’atno nyaka dhi ir jadolo mondo otang’ne ka malitno. 20 Jadolo biro ng’iyo kanyo,+ to ka nenore ni ka mokuotno okalo pien modonjo iye kendo yier ma ne ni kanyo olokore ma rachar, mano nyiso ni dhoho otuch ka ma bur ne nitiereno, kendo jadolo biro ng’ado ni ng’atno ok ler. 21 To ka jadolo ong’iye moneno ni yier man kanyo ok olokore rachar kendo ka mokuotno ok okalo pien modonjo iye to osechako chango, jadolo biro keto ng’atno kar kende kuom ndalo abiriyo.+ 22 Bang’ mano, ka gino okuodo dende duto, mano nyiso ni en dhoho. Omiyo, jadolo nong’ad ni ng’atno ok ler. 23 To ka ka ma ne okuotno odong’ adong’a mana kaka ne en kendo ok olandore, mano nyiso ni en mana mbala mar bur. Omiyo, jadolo nyaka ng’ad ni ng’atno ler.+
24 “Ka mach owang’o ng’ato to bang’e ka ma nowang’no olokore ma rachar kata ma kwarkwar, 25 jadolo nong’i ka malitno. To koyudo ni yier man kanyo olokore rachar kendo ka malitno okalo pien modonjo iye, mano nyiso ni dhoho otuch ka ma nowang’no. Omiyo, jadolo nong’ad ni ng’atno ok ler, nimar en tuo mar dhoho. 26 To ka jadolo ong’iyo ka malitno moyudo ni yier man kanyo ok rachar kendo ni ok okalo pien modonjo iye to osechako chango, jadolo biro keto ng’atno kar kende kuom ndalo abiriyo.+ 27 Jadolo biro ng’iye kendo chieng’ mar abiriyo, ka oyudo ni ka malitno olandore, jadolo biro ng’ado ni ng’atno ok ler, nimar tuono en dhoho. 28 To ka po ni ka malitno ok olandore kendo osechako chango, mano nyiso ni mbala mar ka ma nowang’no nokuot akuota. Omiyo, jadolo biro ng’ado ni ng’atno ler.
29 “Ka tuo moro omako ng’at ma dichwo kata ma dhako e wiye kata e tike, 30 jadolo biro ng’iyo ka ma tuo omakono.+ Koyudo ni tuono okalo pien modonjo iye kendo yier man kanyo olokore ratong’ kendo okelore okelore, jadolo biro ng’ado ni ng’atno ok ler, nimar tuono en kit dhoho ma mako wich kata tik. 31 To ka jadolo ong’iyo kanyo moneno ni tuono ok okalo pien modonjo iye kendo onge yier ma rateng’ kanyo, obiro keto ng’at ma tuono kar kende kuom ndalo abiriyo.+ 32 Jadolo biro ng’iyo kanyo chieng’ mar abiriyo, to ka oyudo ni tuono ok olandore kendo ni yier man kanyo ok olokore ma ratong’ kendo tuono ok okalo pien modonjo iye, 33 onego oliele, kata kamano, kik liel ka ma tuono omako. Kae to jadolo nokete kar kende kuom ndalo abiriyo mamoko.
34 “Jadolo nong’i kendo ka ma tuo nomakono chieng’ mar abiriyo, to koyudo ni tuo ma ne omako wi ng’atno kata tike ok olandore kendo ok okalo pien modonjo iye, obiro ng’ado ni ng’atno ler. Ng’atno nyaka lwok lepe mondo obed maler. 35 To ka po ni tuono olandore bang’ kosepwodh ng’atno, 36 jadolo biro ng’iye, to ka oyudo ni tuono oselandore, onge tiende ng’iyo ka be kanyo nigi yier ma ratong’. Ng’atno ok ler. 37 To ka jadolo ong’iye moneno ni tuono ok olandore kendo yier ma rateng’ otwi ka ma yande tuo omako, mano nyiso ni kanyo osechango. Ng’atno koro ler kendo jadolo nong’ad ni oler.+
38 “Ka dend dichwo moro kata dhako moro oruodho ma rachar, 39 jadolo biro ng’iye.+ Ka oyudo ni kuonde moruodho ma rocherego osechako chango, mano nyiso ni dende ne oruodho aruodha. Ng’atno ler.
40 “Ka yie wi ng’ato oluny ma obedo rabondo, oler. 41 Bende, ka wi ng’ato oluny gi ka nyime ma obedo rabondo, oler. 42 To ka adhola moro ma kwarkwar omako bondono, mano nyiso ni dhoho e ma otuch kanyo. 43 Jadolo biro ng’iyo adhola manie bondono, to ka adholano kwarkwar ma chalo gi dhoho ma tuch e del, 44 mano nyiso ni ng’atno nigi tuo mar dhoho, kendo ok oler. Jadolo biro ng’ado ni ok oler nikech tuo momako wiyeno. 45 Ng’at ma nigi tuo mar dhoho norwak lewni moyiech kendo onego owe yie wiye kojany, bende noum dhoge kendo nowach gi dwol maduong’ ni, ‘Ok aler, ok aler!’ 46 Ng’atno nobed ma ok ler kuom kinde duto ma en gi dhoho. To nikech ok oler, obiro dak kar kende. Nodag oko mar kambi.+
47 “Ka po ni tuo mar dhoho omako law yie rombo kata law kitani, 48 bed ni omako usi molosgo law kitanino, kata molosgo law yie rombono, kata omako pien, kata gimoro amora molos gi pien, 49 mi lawno, kata usino, kata pienno, kata gimoro amora molos gi pien, olokore ma ratong’ kata ma kwarkwar, nyaka tere ir jadolo nimar dhoho osemake. 50 Jadolo biro ng’iyo tuono, eka nokete kar kende kuom ndalo abiriyo.+ 51 To chieng’ mar abiriyo, kobiro ng’iyo tuono kendo, moyudo ka oselandore e lawno, e usi molosgo lawno, kata e pienno (bed ni pienno itiyogo e tije mage), mano nyiso ni en dhoho ma landore, omiyo gino ok ler.+ 52 Nyaka owang’ lawno kata usino bed ni en mar yie rombo kata mar kitani kata gimoro amora molos gi pien, nikech gino nigi dhoho ma landore. Nyaka wang’ gino gi mach.
53 “To ka jadolo oneno ni tuono ok olandore e lawno kata e usi molosego, kata e gimoro amora molos gi pien, 54 jadolono nogol chik mondo olwoke, eka nokete kar kende kuom ndalo abiriyo mamoko. 55 Bang’ koselwoke maler, jadolono biro ng’iye kendo. To koyudo ni ka ma ne nigi tuono odong’ kaka ne en, kata ni tuono ok olandore e lawno, mano nyiso ni lawno ok ler. Omiyo, ibiro wang’e gi mach bed ni tuono nigi yo ka iye kata gi yo ka oko.
56 “To ka jadolo ong’iyo moyudo ni ka ma tuo nomakono mirimiri bang’ koselwoke maber, obiro ng’ado kanyo oko, bed ni ka ma mirimirino nie law, kata usi, kata pien. 57 Ka tuono ochako omako ka machielo e lawno, e usi molosego, kata e gima olos gi pien, mano nyiso ni tuono landore, omiyo, nyaka wang’e e mach.+ 58 Kata kamano, ka po ni tuono olal e lawno, e usi molosego kata e gima olos gi pien bang’ ka uselwoke, ibiro lwoke kendo, eka enobed maler.
59 “Mano e chik mibiro luw sa ma ing’iyo dhoho man kuom law molos gi yie rombo, kata mar kitani, kata man kuom usi, kata man kuom gimoro amora molos gi pien mondo ong’ad ka be gino ler kata ok oler.”
14 Jehova nomedo wacho ne Musa niya: 2 “Ma e chik monego oluw e odiechieng’ mokelie jadhoho ir jadolo mondo opwodhe.+ 3 Jadolo biro wuok oko mar kambi mondo odhi ong’i jadhohono. To koyudo ni tuoneno osechango, 4 jadolo biro chike mondo okel winy ariyo mangima michamo, kaachiel gi yiend sida, gi kitamba makwar, kod hisobu mondo opwodhego.+ 5 Jadolo nogol chik mondo oneg winyo achiel e i agulu moting’o pi aora. 6 Bang’ mano, obiro kawo winyo mangima, gi yiend sida, gi kitamba makwar, kod hisobu, mi nolutgi e remb winyo moa negi. 7 Kae to nokir remono nyadibiriyo kuom ng’at mipwodhono, eka nong’ad ni ng’atno ler, kendo nowe winyo mangimacha odhi e thim.+
8 “Ng’at mipwodhono nolwok lepe kendo noliel yie wiye kod yier manie dende duto mi nolwokre gi pi eka nobed maler. Bang’ mano onyalo donjo e kambi, kata kamano, ok obi donjo e hema mare nyaka ndalo abiriyo rum. 9 Chieng’ mar abiriyo, nochak oliel yie wiye duto gi yie tike kod yie wang’e. Bang’ lielo yier duto manie dende, obiro lwoko lepe, to en bende nolwokre gi pi eka nobed maler.
10 “Chieng’ mar aboro, obiro kelo nyiyimbe ariyo kod nyarombo+ ma hike achiel. Jamnigo duto nyaka bed ma onge mbala. Bende, nokel mogo mayom moruw gi mo mondo obed chiwo mar cham.+ Mogono onego obed adek kuom apar mar efa.* Kendo nokel mo ma romo adek kuom apar mar lita.*+ 11 Jadolo ma pwodho ng’atno nokele kaachiel gi chiwone e nyim Jehova e dho hema mar romo. 12 Jadolono nokaw yim achiel gi morno mondo otimgo misango mar ketho.+ Obiro fwayogi koni gi koni kaka chiwo mifwayo e nyim Jehova.+ 13 Kae to jadolono biro yang’o yimbno ka maler miyang’oe jamni mitimogo misengni mag richo kod misengni miwang’o.+ Misango mar ketho biro bedo pok mar jadolo+ mana kaka misango mar richo bende bedo pokne. En gima ler moloyo.+
14 “Jadolo nokaw remo moko mag misango mar ketho mi nomien e it ng’at mipwodhono ma korachwich, kendo e lith lwete mathuon ma korachwich, kendo e lith tiende mathuon ma korachwich. 15 Bang’ mano, jadolo nokaw mo moko+ mi nool e lwete ma koracham. 16 Eka jadolo nolut lith lwete ma korachwich e mo manie lwete ma koracham kendo nokire nyadibiriyo e nyim Jehova. 17 Kae to nokaw mo moko manie lwete mi nowirgo kuonde ma ne osewiroe remb misango mar ketho, tiende ni e it ma korachwich mar ng’at mipwodhono, kendo e lith lwete mathuon ma korachwich, kendo e lith tiende mathuon ma korachwich. 18 Bang’ timo kamano, mo modong’ e lwete nowir e wi ng’at mipwodhono, kendo nopwodhe e nyim Jehova.+
19 “Bang’e, jadolo nochiw misango mar richo+ mondo opwodhgo ng’at ma ne ok lerno, kae to noyang’ chiaye mitimogo misango miwang’o. 20 Jadolo nochiw misango miwang’o kod misango mar cham+ e kendo mar misango mondo opwodhgo ng’atno+ obed maler.+
21 “To ka po ni ng’atno jachan ma ok doyud gigo, enokel nyayim mitimogo misango mar ketho mondo obed chiwo mifwayo koni gi koni, bende nokel mogo mayom moruw gi mo kaka chiwo mar cham. Mogono nobed achiel kuom apar mar efa,* kendo nokel mo ma romo adek kuom apar mar lita,* 22 kod akuche ariyo madongo kata akuche ariyo matindo, kaka nyalone obet. Winyo achiel ibiro timgo misango mar richo, to machielo ibiro timgo misango miwang’o.+ 23 Chieng’ mar aboro,+ ng’atno biro kelo gigo ne jadolo e dho hema mar romo e nyim Jehova mondo opwodhego.+
24 “Jadolo nokaw nyayim mibiro timgo misango mar ketho+ kaachiel gi mo ma ng’atno okelono, mi nofwagi koni gi koni kaka chiwo mifwayo e nyim Jehova.+ 25 Eka noyang’ nyayim michiwo kaka misango mar ketho mi okaw rembe moko momien e it ng’at mipwodhono ma korachwich, kendo omien e lith lwete mathuon ma korachwich, kendo e lith tiende mathuon ma korachwich.+ 26 Jadolo biro olo mo moko e lwete ma koracham,+ 27 kae to nolut lith lwete ma korachwich e mo manie lwete ma korachamno kendo nokire nyadibiriyo e nyim Jehova. 28 Kae to nokaw mo moko manie lwete mi nowirgo kuonde ma ne osewiroe remb misango mar ketho, tiende ni e it ma korachwich mar ng’at mipwodhono, kendo e lith lwete mathuon ma korachwich, kendo e lith tiende mathuon ma korachwich. 29 To mo modong’ e lwete obiro wiro e wi ng’at mipwodhono, kendo nopwodhe e nyim Jehova.
30 “Kaluwore gi kaka nyalo mar ng’at mipwodhono obet,+ jadolo biro kawo achiel kuom akuche ma ng’atno nokelo, bed ni nokelo akuche madongo kata matindo, 31 mondo otim misango mar richo. To obiro kawo akuru machielo mondo otimgo misango miwang’o.+ Nochiw bende chiwo mar cham; kendo jadolo biro chiwo misangogo mondo opwodhgo ng’atno e nyim Jehova.+
32 “Mano e chik moket ne jadhoho modhier ma ok nyal yudo chiwo mitimogo misengni mipwodhego.”
33 Jehova nowacho ne Musa gi Harun niya: 34 “Ka usedonjo e piny Kanaan+ ma abiro miyou mondo udagie,+ kae to akelo tuo mar dhoho e kor ot moro,+ 35 wuon odno nyaka dhi ir jadolo mondo onyise ni nitie tuo moro momako kor ode. 36 Jadolo biro golo chik mondo ogol gik moko duto manie odno oko ka pok odhi ng’iye, mondo kochopo to kik ong’ad ni gigo duto ok ler. Kosegol gik moko duto oko, jadolo biro donjo e odno mondo ong’iye. 37 Koyudo ni kuonde ma tuono nitie olokore ratong’ kata ma kwarkwar, kendo nenore ni tuono osekunyo kor ot, 38 jadolo biro wuok oko kendo nolor odno kuom ndalo abiriyo.+
39 “Kae to jadolo biro duogo chieng’ mar abiriyo mondo ong’i odno kendo. Ka oyudo ka tuono olandore e kor odno, 40 obiro golo chik mondo ogol kite ma tuono nitie kendo owitgi ka moro ma ok ler, oko mar dala maduong’. 41 Bang’ mano, enogol chik mondo ochwer kor odno duto gi yo ka iye, kendo gipuk lowo ma gichwerogo ka moro ma ok ler, oko mar dala maduong’. 42 Eka giniket kite manyien kuonde ma gisegoloe kite mokoka mi ginimuon odno gi lowo manyien.
43 “To ka osegol kite mi ochwer kor odno, kendo omuone manyien kae to tuono ochako otuch kendo, 44 jadolo biro duogo mondo ong’i odno, to koyudo ni tuono olandore, mano nyiso ni en dhoho ma landore,+ omiyo odno ok ler. 45 Obiro golo chik mondo omuk odno, mi kaw kite odno, gi yiendene, kod lope ma ter kamoro ma ok ler oko mar dala.+ 46 Ng’ato ang’ata modonjo e odno e kinde ma jadolo oloreno+ nobed ma ok ler nyaka odhiambo,+ 47 kendo ng’ato ang’ata monindo e odno kata mochiemo e odno, nyaka lwok lepe.
48 “Kata kamano, ka jadolo odhi mong’iyo odno kendo oyudo ni tuono ok olandore bang’ ka nosemuone, obiro ng’ado ni odno ler nikech tuono oserumo. 49 Jadolo biro kawo winy ariyo, kaachiel gi yiend sida, gi kitamba makwar, kod hisobu mondo opwodhgo odno.+ 50 Obiro nego winyo achiel e i agulu moting’o pi aora. 51 Eka obiro kawo yiend sida, hisobu, kitamba makwar, kod winyo mangima mi nolutgi e remb winyo moneg e i agulu moting’o pi aora, kendo nokir remono nyadibiriyo e odno.+ 52 Obiro pwodho odno kotiyo gi remb winyo, pi aora, winyo mangima, yiend sida, hisobu, kod kitamba makwar. 53 Kae to obiro weyo winyo mangimano odhi e thim. Kamano, odno nobed maler nikech osepwodhe.
54 “Ma e chik monego oluw kuom wach tuo dhoho, kuom wach tuo ma mako wich kata tik,+ 55 dhoho ma mako law+ kata ot,+ 56 del mokuot, ka malit mochako two, kata del moruodho,+ 57 mondo ong’ego ka be gimoro ler kata ok ler.+ Ma e chik mar tuo dhoho.”+
15 Jehova nomedo wacho ne Musa gi Harun niya: 2 “Nyis Jo-Israel ni, ‘Ka ng’ato nigi tuo moro ma miyo duong’ne chuer, nobed ma ok ler nikech chuerneno.+ 3 Ng’atno nobed ma ok ler bed ni tuono miyo duong’ne chuer kata odino duong’ne.
4 “‘Otanda moro amora ma ng’at ma duong’ne chuer onindoe, kata gimoro amora mobetie biro bedo ma ok ler. 5 Ng’ato ang’ata momulo otanda ma ng’atno onindoe nyaka lwok lepe mi olwokre, to nobed ma ok ler nyaka odhiambo.+ 6 Bende, ng’ato ang’ata mobet ka ma ng’at ma duong’ne chuer obetie nyaka lwok lepe mi olwokre, to nobed ma ok ler nyaka odhiambo. 7 Ng’ato ang’ata momulo ng’at ma chuerno nyaka lwok lepe mi olwokre, to nobed ma ok ler nyaka odhiambo. 8 Ka ng’at ma duong’ne chuer ong’ulo olaw kuom ng’at maler, ng’at mong’ul olaw kuomeno nyaka lwok lepe kendo olwokre, to nobed ma ok ler nyaka odhiambo. 9 Gimoro amora ma ng’at ma duong’ne chuer opedho kuom le moidho bende nobed ma ok ler. 10 Ng’ato ang’ata momulo gik ma ng’atno obetie nobed ma ok ler nyaka odhiambo, kendo ng’ato ang’ata moting’o gik ma kamago nyaka lwok lepe mi olwokre, to nobed ma ok ler nyaka odhiambo. 11 Ka ng’at ma duong’ne chuer+ omulo ng’ato to pok ologo, ng’at momulono nyaka lwok lepe mi olwokre, to nobed ma ok ler nyaka odhiambo. 12 Ubiro toyo gimoro amora mochue gi lowo ma ng’at ma duong’ne chuer omulo, to ka en gima olos gi bao, ubiro lwoke gi pi.+
13 “‘Ka ng’at ma duong’ne chuerno ochango, nyaka opwodhre kuom ndalo abiriyo. Bang’ mano, obiro lwoko lepe kendo nolwokre gi pi aora, eka nobed maler.+ 14 Chieng’ mar aboro, nokaw akuche ariyo madongo kata akuche ariyo matindo+ mi nobi kodgi e nyim Jehova e dho hema mar romo, kendo nomigi jadolo. 15 Jadolo nokaw akuru achiel mi notimgo misango mar richo to machielo notimgo misango miwang’o. Mano e kaka jadolo nopwodh ng’atno e nyim Jehova nikech chuerneno.
16 “‘Ka pi nyodo mar ng’ato ochuer, nyaka olwok dende duto gi pi, to nobed ma ok ler nyaka odhiambo.+ 17 Law moro amora kata pien moro amora ma nyodo otonie nyaka lwoki. Lawno kata pienno nobed ma ok ler nyaka odhiambo.
18 “‘Ka ng’ato onindo gi dhako mi pi nyote ochuer, giduto ji ariyo nyaka gilwokre kendo gibiro bedo ma ok ler nyaka odhiambo.+
19 “‘Ka dhako odhi e dwe, nobed ma ok ler kuom ndalo abiriyo.+ Ng’ato ang’ata momule nobed ma ok ler nyaka odhiambo.+ 20 Gimoro amora monindoe kata mobetie e kinde ma odhi e dwe nobed ma ok ler.+ 21 Ng’ato ang’ata momulo otanda dhakono biro lwoko lepe mi olwokre, to nobed ma ok ler nyaka odhiambo. 22 Ng’ato ang’ata momulo gimoro amora ma dhakono obetie biro lwoko lepe mi olwokre, kendo nobed ma ok ler nyaka odhiambo. 23 Ka dhakono obet e otanda kata e gimoro amora, ng’at momulo gigo nobed ma ok ler nyaka odhiambo.+ 24 To ka ng’ato onindo gi dhako ma odhi e dwe kendo remb dhakono omienore kuome,+ ng’atno nobed ma ok ler kuom ndalo abiriyo, kendo otanda moro amora monindoe bende nobed ma ok ler.
25 “‘Ka remb dhako ochuer kuom ndalo mogwaro+ to ok en kinde modhi e dwe,+ kata ka po ni odhi e dwe to rembe ochuer aming’a mokalo kaka pile, nobed ma ok ler kinde duto ma rembe chuerieno mana kaka obedoga ma ok ler ndalo ma odhi e dwe. 26 Otanda moro amora monindoe e kinde ma ochuerieno nobed ma ok ler mana kaka otanda monindoe e kinde modhi e dwe bedoga,+ kendo gimoro amora mobetie biro bedo ma ok ler mana kaka e kinde modhi e dwe. 27 Ng’ato ang’ata momulo gigo nobed ma ok ler, kendo obiro lwoko lepe mi olwokre, to nobed ma ok ler nyaka odhiambo.+
28 “‘Kata kamano, ka dhakono owe chuer, obiro kwano ndalo abiriyo eka nobed maler.+ 29 To chieng’ mar aboro, dhakono biro kawo akuche ariyo madongo kata akuche ariyo matindo+ mondo oter ne jadolo e dho hema mar romo.+ 30 Jadolo nokaw akuru achiel mi notimgo misango mar richo to machielo notimgo misango miwang’o. E yo ma kamano, jadolo nopwodh dhakono e nyim Jehova nikech chuerneno.+
31 “‘Kutimo kamano, ubiro konyo Jo-Israel kik tim gik ma biro miyo gibed ma ok ler, mondo kik githo nikech dwanyo hemba manie diergi.+
32 “‘Mano en chik momako dichwo ma duong’ne chuer, kata ma ok ler nikech pi nyote ochuer,+ 33 kata dhako ma dhi e dwe,+ kata ng’at ma duong’ne chuer, obed dichwo kata dhako,+ kata dichwo monindo gi dhako ma ok ler.’”
16 Bang’ ka yawuot Harun ariyo nosetho nikech ne gidhi e nyim Jehova, Jehova nowuoyo gi Musa.+ 2 Ma e kaka Jehova nowacho ne Musa: “Nyis Harun owadu ni kik othor donjo adonja ka maler+ e tok pasia+ e nyim raum Sandug Singruok. Kotimo kamano to obiro tho+ nikech abiroga fwenyora gie bor polo+ manie wi raumno.+
3 “Kinde duto ma Harun donjo ka maler, enokel nyaruath mitimogo misango mar richo,+ kod yim mitimogo misango miwang’o.+ 4 Enorwak kandho mar dolo,+ gi onyasa+ mogeng’ogo duge, enotwe msip+ e nungone, kendo enorwak kilemba+ e wiye. Gigo duto nobed mag law kitani. Gin lep dolo mowal.+ Harun biro lwokore gi pi,+ eka orwakgi.
5 “Enokaw nyinyuogi ariyo kuom oganda Jo-Israel+ mondo otimgo misango mar richo kod yim achiel mondo otimgo misango miwang’o.
6 “Harun biro kawo ruath mitimogo misango mar richo mondo opwodhrego+ kaachiel gi joode.
7 “Bang’ mano, nokaw nyinyuogi ariyoka, kendo nokelgi e nyim Jehova e dho hema mar romo. 8 Harun biro goyo ombulu kuom nyuogi ariyogo mondo nyuok achiel obed mar Jehova to machielo obed mar Azazel.* 9 Harun biro kawo nyuok ma ombulu mar Jehova olwar kuome+ mi notimgo misango mar richo. 10 To nyuok ma ombuch Azazel olwar kuome nokel e nyim Jehova mondo opwodhgo richo, eka noriembe odhi e thim ne Azazel.+
11 “Harun biro kelo ruath mitimogo misango mar richo mondo opwodhgo richone gi mag joode, bang’e obiro yang’o ruadhno.+
12 “Bang’ mano, obiro kwanyo mach e kendo mar misango+ manie nyim Jehova mi opong’go gir ting’o mach.+ Bende, obiro kawo lwedo ariyo mar ubani ma dum suya mamit,+ kendo nokelgi e tok pasia.+ 13 Eka noket ubani e wi majno e nyim Jehova+ mondo yiro ma wuok e ubanino oim raum+ mar Sandug Singruok,*+ nono to obiro tho.
14 “Enokaw moko kuom remb ruadhcha+ mi nokir remono gi lith lwete e bath raum ka ma ochomo yo wuok chieng’, kendo nokir remo moko gi lith lwete e nyim raum nyadibiriyo.+
15 “Bang’ mano, noyang’ nyuok mitimogo misango mar richo ne oganda,+ mi noter rembe e tok pasia+ kae to nokir remono e wi raum, kendo nokire e nyim raum mana kaka nosetimo gi remb ruath.+
16 “Obiro pwodho ka maler kuom timbe ma ok ler mag Jo-Israel, kendo kuom kethogi kod richogi.+ Kamano e kaka nopwodh hema mar romo manie diergi ka ma giseduwo gi timbegi ma ok ler.
17 “Ng’ato ang’ata kik bed e i hema mar romo chakre sa ma Harun donjo e i ka maler nyaka sa mowuok kosetieko pwodhore owuon, pwodho joode,+ kendo pwodho oganda Jo-Israel duto.+
18 “Bang’ mano, obiro dhi e kendo mar misango+ manie nyim Jehova mondo opwodh kendono. Obiro kawo moko kuom remb ruath gi remb nyuok mi nomien e tunge kendo mar misangono duto. 19 Bende, nokir moko kuom remogo gi lith lwete e kendono nyadibiriyo mondo opwodhe kuom timbe ma ok ler mag Jo-Israel.
20 “To ka Harun osetieko pwodho+ ka maler, gi hema mar romo, kod kendo mar misango,+ obiro kelo nyuok mangimacha e nyim oganda.+ 21 Harun biro keto lwetene duto e wi nyuogno kohulo ketho duto mag Jo-Israel gi richogi duto mondo oketgi e wi nyuogno,+ kae to obiro kete e lwet ng’at moseyier mondo otere e thim. 22 Nyuogno noting’ richo mag ji duto+ mi odhigo e thim,+ kae to ng’atno noweye kuno mondo odhi adhiya.+
23 “Bang’ mano, Harun nodonj e hema mar romo mi nolony lep kitani ma ne orwako kodonjo ka maler, kendo nowegi kanyo. 24 Eka nolwokre gi pi+ ka maler moyangi ma orwak lepe mag dolo.+ Kae to nowuog oko mondo otim misango mare miwang’o+ kaachiel gi mar oganda+ mondo opwodhre kendo opwodh ji duto.+ 25 Obiro wang’o boche chiaye mag misango mar richo e kendo mar misango.
26 “Ng’at ma ne oriembo nyuog Azazel+ onego olwok lepe kendo olwokre ka pok odonjo e kambi.
27 “Bang’ kosetim misengni mag richo gi ruath kod nyuok moter rembgi ka maler moloyo mondo opwodhgo richo, ibiro ter piendegi, ringgi, kod owuochgi oko mar kambi mi wang’gi e mach.+ 28 Ng’at ma owang’ogi nyaka lwok lepe mi olwokre, eka bang’e onyalo donjo e kambi.
29 “Tarik apar e dwe mar abiriyo, onego unyis ni ukuyo nikech richou kendo ng’ato ang’ata kuomu kik ti tich moro amora,+ bed ni en Ja-Israel kata wendo. Mano en chik momakou nyaka chieng’. 30 Chieng’no e ma ibiro pwodhue+ mondo ong’ad ni uler. Ibiro golnu richou duto kendo unubed maler e nyim Jehova.+ 31 Chieng’no en sabato mar yueyo, kendo monego unyisie ni ukuyo nikech richou.+ En chik momakou nyaka chieng’.
32 “Jadolo mowir+ kendo moket kar wuon mare+ ne tij dolo+ e ma biro chiwo misango mag pwodho richo, kendo norwak lep dolo+ mag kitani.+ 33 Obiro pwodho ka maler moloyo,+ gi hema mar romo,+ kod kendo mar misango.+ Bende, enopwodh jodolo kod oganda duto.+ 34 Mano nobednu chik mosiko+ sa mipwodho Jo-Israel kuom richogi duto dichiel e higa.”+
Omiyo, Harun notimo mana kaka Jehova nosechiko Musa.
17 Jehova nowacho ne Musa niya: 2 “Nyis Harun gi yawuote kaachiel gi Jo-Israel duto ni, ‘Jehova ochiko kama:
3 “‘“Ka Ja-Israel oyang’o chiaye, bed ni oyang’o dhiang’, kata rombo, kata diel e kambi kata oko mar kambi, 4 kar yang’e e dho hema mar romo mondo otimnego Jehova misango e nyim hema mar Jehova, ibiro kwane ka ng’at moneko. Osechuero remo, omiyo nyaka nege. 5 Chikni oket mondo jamni ma Jo-Israel osebedo ka nego oko koro gikel ne Jehova e dho hema mar romo. Ginikelgi ne jadolo mondo otimnegigo misengni mag kuwe ne Jehova.+ 6 Jadolo biro kiro remo e kendo mar misango mar Jehova manie dho hema mar romo, kendo nowang’ boche mondo ogol ne Jehova suya mamit.+ 7 Kuom mano, Jo-Israel ok nodhi nyime chiwo misengni ne jochiende*+ ma gilamo.*+ Mano nobed chik momakogi kaachiel gi nyikwagi nyaka chieng’.”’
8 “Nyis Jo-Israel niya, ‘Ka Ja-Israel kata wendo moro amora otimo misango miwang’o kata misango moro amora 9 to ok okele e dho hema mar romo mondo otimnego Jehova misango, ibiro nege.+
10 “‘Ka Ja-Israel kata wendo moro amora ochamo remb gimoro amora,+ abiro bedo jasike kendo ananege. 11 Nikech ngima mar gimoro nie rembe,+ kendo asechiwo remo mondo otimgo misango e kendo mar misango+ mondo upwodhrugo, nimar remo e ma ipwodhogo richo+ nikech ngima nie remo. 12 Mano e momiyo asekwero Jo-Israel niya: “Ng’ato ang’ata kuomu kik cham remo, kata mana wendo manie kindu+ kik cham remo.”+
13 “‘Ka Ja-Israel kata wendo manie kindu odhi dwar momako le kata winyo minyalo cham, nyaka ool rembe piny+ kendo oyike gi lowo. 14 Nimar ngima gimoro amora nie rembe. Mano e momiyo nawacho ne Jo-Israel niya: “Kik ucham remb gimoro amora nikech ngima gimoro amora nie rembe. Ng’ato ang’ata mochamo remo ibiro negi.”+ 15 Ka Ja-Israel kata wendo moro amora ochamo le motho athoya kende kata ma ondiek onego,+ ng’atno nyaka lwok lepe mi olwokre, to nobed ma ok ler nyaka odhiambo.+ 16 To ka ok olwoko lepe kendo ok olwokore, noyud kum nikech kethone.’”+
18 Jehova nowacho ne Musa kendo niya: 2 “Wach ne Jo-Israel ni, ‘An e Jehova Nyasachu.+ 3 Kik utim timbe Jo-Misri ma ne udak e pinygi, kata kik uluw timbe Jo-Kanaan ma aterou e pinygi.+ Kik uluw chikegi. 4 To luwuru yorena kendo urit chikena.+ An Jehova Nyasachu. 5 Nyaka umak chikena kendo uluw yorena, nimar ng’at motimo kamano biro rito ngimane.+ An Jehova.
6 “‘Ng’ato ang’ata kuomu kik terre gi watne.+ An Jehova. 7 Kik iterri gi wuonu kata minu. Kik iterri gi minu nikech en mamani.
8 “‘Kik iterri gi chi wuonu+ nikech kitimo kamano to ikuodo wi wuonu.
9 “‘Kik iterri gi nyaminu sie, bende kik iterri gi nyaminu ma wuonu onyuolo gi dhako machielo kata ma minu onyuolo gi dichwo machielo, bed ni onyuole e dalau kata ka machielo.+
10 “‘Kik iterri gi nyakwari ma ka wuodi kata ma ka nyari, nikech gin dugi iwuon.
11 “‘Kik iterri gi nyaminu ma bathe ma wuonu onyuolo, nikech mano nyaminu.
12 “‘Kik iterri gi wayu, nikech en wat wuonu.+
13 “‘Kik iterri gi nyamin minu nikech en wat minu.
14 “‘Kik iterri gi chi owadgi wuonu nikech kitimo kamano to ikuodo wi wuonuno. Mano en minu.+
15 “‘Kik iterri gi dhako ma wuodi okendo.+ Mano chi wuodi, omiyo kik iterri kode.
16 “‘Kik iterri gi chi owadu,+ nikech kitimo kamano to ikuodo wi owaduno.
17 “‘Kik iterri gi dhako kod nyare.+ Bende, kik iterri gi nyar wuode kata nyar nyare. Gin remb dhakono. Mano en richo maduong’.
18 “‘Kik ikend nyamin chiegi mondo obed nyieke+ ka nyamin-gino pod ngima.
19 “‘Kik inind gi dhako kinde modhi e dwe.+
20 “‘Kik iterri gi chi ng’ato, mano biro miyo ibed ma ok ler.+
21 “‘Kik ichiw nyathini moro amora ne nyasaye miluongo ni Molek.+ Kitimo kamano, idwanyo nying Nyasachi.+ An Jehova.
22 “‘Kik inind gi dichwo kaka dinind gi dhako.+ Mano dwanyruok.
23 “‘Dichwo kik terre gi le nikech mano en richo maduong’. Dhako bende kik terre gi le.+ Mano tim makwero.
24 “‘Kik udwanyru kuom timo timbe ma kamago, nikech timbe ma kamago e ma ogendni ma ariembo oa e nyimu osedwanyorego.+ 25 Mano e momiyo pinygino ok ler, kendo abiro kumo jo ma odak kuno nikech richogi, mi pinygino nong’oggi oko.+ 26 Un to nyaka uluw chikena kendo urit buchena,+ kendo kik ng’ato kuomu tim tim moro amora kuom timbe modwanyorego, bed ni en Ja-Israel kata wendo.+ 27 Nikech weg pinyno notimo timbe modwanyorego,+ e momiyo koro pinyno ok ler. 28 Un to ka ok udwanyo pinyno ok obi ng’ogou kaka obiro ng’ogo jopinyno. 29 Ng’ato ang’ata motimo kata achiel kuom timbe modwanyorego, ibiro negi. 30 Nyaka utim kaka achikou kendo kik uluw timbe modwanyore ma ne weg pinyno timo ka ne pok ubiro,+ mondo kik timbegigo ochidu. An Jehova Nyasachu.’”
19 Jehova nomedo wacho ne Musa kama: 2 “Nyis oganda Jo-Israel duto niya: ‘Nyaka ubed jo maler nikech an Jehova Nyasachu aler.+
3 “‘Ng’ato ka ng’ato kuomu nyaka luor min-gi gi wuon-gi,+ kendo nyaka urit sabato maga.+ An Jehova Nyasachu. 4 Kik ulam nyiseche manono+ kendo kik uthedh nyiseche mag nyinyo.+ An Jehova Nyasachu.
5 “‘Ka utimo ne Jehova misango mar kuwe,+ onego uchiwe kaka chik dwaro mondo Nyasaye oyie kodu.+ 6 Onego ochame e odiechieng’ mochiweeno, to kodong’ inyalo chame kinyne. Ka po ni onindo nyaka odiechieng’ mar adek, nyaka wang’e pep e mach.+ 7 To kochame e odiechieng’ mar adek, nobed gima onjawore ma Nyasaye ok bi yiego. 8 Ng’ato ang’ata mochame ibiro negi nikech osenjawo gima ler mar Jehova.
9 “‘Sa mukayo cham e puotheu kik uka cham manie tong’ mag puotheu, kata kik uhul cham modong’.+ 10 Bende, kik upon olembeu mag mzabibu mutiek te, kendo kik ukwany molwar piny. Onego uwegi ne jo ma odhier+ kod jodak. An Jehova Nyasachu.
11 “‘Kik ikwel,+ kik iwuond wadu,+ kendo kik ima wadu gimoro e yor mibadhi. 12 Kik iwuond ng’ato ka ikuong’ori gi nyinga,+ nimar kitimo kamano to ichido nying Nyasachi. An Jehova. 13 Kik ima wadu gire e yor wuond,+ kendo kik ikwel.+ Bende, kik inind gi osach ng’at ma tiyoni.+
14 “‘Kik iyany ng’at ma ite odino, kata kik iket gimoro e nyim muofu+ mondo ochwanyree. Nyaka iluor Nyasachi.+ An Jehova.
15 “‘Kik ing’ad bura e yo ma ok kare. Kik idog ne jachan e bura mana nikech ojachan, kata dok ne jamwandu mana nikech ojamwandu.+ Ng’ad ne wadu bura kare kichung’ e adiera.
16 “‘Kik iwuoth koni gi koni kiketho nying ng’ato.+ Kik ihang ne wadu wach kidwaro ni onege.+ An Jehova.
17 “‘Kik isin gi owadu e chunyi.+ Kendo ka wadu otimo marach, kik iwe ma ok ikwere,+ nono to ibiro kwani e kethoneno.
18 “‘Kik ichul kuor+ kendo kik imak sadha gi nyawadu. Nyaka iher wadu kaka iherori iwuon.+ An Jehova.
19 “‘Nyaka urit chikena. Kik uwe chiaye onyuol gi kit chiaye mopogore. Kik uchuo kodhi ariyo mopogore e puotheu.+ Bende, kik urwak lewni molos gi usi ariyo mopogore.+
20 “‘Ka dichwo moro oterore gi misumba ma nyako monego okend gi dichwo machielo to pok owar nyakono, onego okum nyakono kaachiel gi dichwo moterore kodeno. Kata kamano, ok bi neggi nikech ne pok owar nyakono mobedo thuolo. 21 Ng’atno nyaka kel ne Jehova yim e dho hema mar romo mondo obed misango mar ketho.+ 22 Jadolo biro chiwo yimbno e nyim Jehova mondo obedne misango mar ketho, kendo ibiro we ne ng’atno richone.
23 “‘Ka udonjo e piny moro mi upidho yath moro amora minyalo cham olembe, ubiro kwano olemogo ka gik ma ok ler. Ok noyienu chamogi nyaka higni adek rum. 24 E higa mar ang’wen, olembego duto nobed gik maler. Ubiro chiwogi ne Jehova ka umor.+ 25 To e higa mar abich unyalo chamo olembego, kendo gik mukayo nomedre. An Jehova Nyasachu.
26 “‘Kik ucham gimoro amora gi rembe.+
“‘Kik umany wach kuom ajuoke, kendo kik udonj e timbe mag juok.+
27 “‘Kik utit* wiu kata yie tiku.+
28 “‘Kik usar dendu kuywago ng’at motho,+ kata kik usar kido moro amora e dendu. An Jehova.
29 “‘Kik ukuod wi nyiu kuom lokogi jochode.+ Kutimo kamano, pinyu biro dwanyore kendo pong’ gi chode.+
30 “‘Nyaka urit sabato maga,+ kendo uluor ka maler mara. An Jehova.
31 “‘Kik udhi ir jo ma tudore gi jochiende,+ kendo kik upenj wach kuom ajuoke+ di po ka ubedo ma ok ler. An Jehova Nyasachu.
32 “‘Chung’uru ne ng’at ma wiye otimo lwar,+ kendo umi ng’at ma oti luor,+ nimar nyaka uluora.+ An Jehova Nyasachu.
33 “‘Kik itim marach ne wendo moro amora modak e pinyu.+ 34 Dag kode kaka owadu,+ kendo here kaka iherori iwuon, nikech un bende ne un jodak e piny Misri.+ An Jehova Nyasachu.
35 “‘Kik uketh chik sa mupimo bor mar gimoro, kata pek mar gimoro, kata sa mupimo ng’eny mar gimoro amora.+ 36 Nyaka uti gi ratil mowinjore, okebe mowinjore,* kod chupa mowinjore.*+ An Jehova Nyasachu ma nogolou e piny Misri. 37 Omiyo, makuru chikena duto gi buchena duto.+ An Jehova.’”
20 Jehova nowuoyo gi Musa kendo konyise niya: 2 “Nyis Jo-Israel ni, ‘Ka Ja-Israel moro amora kata wendo manie kindgi ochiwo nyathine ne Molek, nyaka neg ng’atno.+ Jo-Israel duto biro chiele gi kite motho. 3 An awuon nabed jasik ng’atno kendo nang’ad kare oko kuom ogandagi nikech osechiwo nyathine ne Molek, modwanyogo kara maler+ kendo osechayo nyinga maler. 4 Ka ji oneno ka ng’ato ochiwo nyathine ne Molek to gifwayo wachno ma ok ginego ng’atno,+ 5 an awuon nabed jasik ng’atno kaachiel gi joode duto.+ Ananege kaachiel gi jogo duto moriwore kode e dwanyruok mar lamo Molek.
6 “‘Ng’at moweya ma odwanyo lamo maler kuom tudore gi jochiende+ kod ajuoke ma koro wach,+ nabed jasike kendo nang’ade oko oa e ogandagi.+
7 “‘Pwodhreuru ubed maler+ nikech an Jehova Nyasachu. 8 Nyaka urit chikena kendo uluwgi+ nikech an Jehova, an e ma apwodhou.+
9 “‘Ka ng’ato oyanyo wuon-gi kata min-gi, nyaka nege.+ Rembe nobed e wiye nikech oseyanyo wuon-gi kata min-gi.
10 “‘Ka ng’ato oterore gi chi wadgi, timuru kama: Nyaka uneg ng’atno kaachiel gi dhakono.+ 11 Ng’at ma oterore gi chi wuon-gi oelo dug wuon mare.+ Giduto ji ariyo nyaka neggi. Rembgi nobed e wigi. 12 Ka ng’ato oterore gi chi wuode, nyaka neggi giduto ji ariyogo. Gisetimo gima kwero. Rembgi nobed e wigi.+
13 “‘Ka ng’ato onindo gi dichwo wadgi kaka donind gi dhako, gitimo gima kwero.+ Nyaka neggi kendo rembgi nobed e wigi.
14 “‘Ka ng’ato okendo nyako moro kae to oterore bende gi min nyakono, mano tim dwanyruok.+ Nyaka wang’gi gi mach giduto,+ mondo dwanyruok ma kamano kik bed e kindu.
15 “‘Ka ng’ato oterore gi chiaye, nyaka nege, kendo nyaka neg chiayeno.+ 16 Ka dhako odhi ir chiaye moro mondo oterre kode,+ nyaka neg dhakono gi chiayeno. Noneggi giduto kendo rembgi nobed e wigi.
17 “‘Ka ng’ato oterore gi nyamin-gi, bed ni en nyar wuon-gi kata nyar min-gi, mano tim wich-kuot nikech oseneno dug nyamin-gi to nyamin-gi bende oseneno duge.+ Nyaka neggi ka ji duto neno. Ng’atno osekuodo wi nyamin-gi. Omiyo, nyaka kume.
18 “‘Ka ng’ato onindo gi dhako manie dwe, nyaka neg ng’atno kaachiel gi dhakono, nimar ok gimiyo remo luor.+
19 “‘Kik iterri gi nyamin minu kata gi wayu, nikech kitimo kamano to ikuodo wi watnino.+ Nyaka kum jo ma otimo kamano. 20 Ng’at moterore gi chi owadgi wuon-gi osekuodo wi wuon-gino.+ Omiyo, giniyud kum. Noneggi. Ok ginibed gi nyithindo. 21 Ka ng’ato oterore gi chi owadgi, otimo tim modwanyore+ kendo osekuodo wi owadgino. Ok ginibed gi nyithindo.
22 “‘Nyaka uluw chikena kod buchena duto,+ kendo nyaka uritgi,+ mondo piny ma akelou ni udagie kik ng’ogu oko.+ 23 Kik uluw timbe ogendni ma ariembo mondo owenu thuolo,+ nimar gisetimo gigi duto kendo chunya ojok kodgi.+ 24 Mano e momiyo nawachonu niya: “Ubiro kawo pinygi, kendo abiro miyougo mondo obed maru. En piny mopong’ gi chak kod mor kich.+ An Jehova Nyasachu mosepogou gi ogendni mamoko.”+ 25 Omiyo, nyaka upog le maler gi le ma ok ler, kod winy michamo gi ma ok cham,+ mondo kik unjawru gi le kata winyo kata gimoro amora mamol ma asenyisou ni ok ler.+ 26 Unubedna oganda maler nikech an Jehova aler.+ Asepogou gi ogendni mamoko mondo ubed joga.+
27 “‘Ng’ato ang’ata ma dichwo kata ma dhako ma tudore gi jochiende kata ma en ajuoga, nyaka negi.+ Ibiro chiele gi kite motho. Rembe nobed e wiye owuon.’”
21 Jehova nomedo wacho ne Musa niya: “Nyis jodolo ma joka Harun ni sa ma ja dhoodgi moro otho, ng’ato ang’ata kuomgi kik mul ng’atno kata ywage, nono to obiro bedo ma ok ler.+ 2 Kata kamano, onyalo mulo kata ywago ng’at mothono ka po ni ng’atno en watne sie, kaka min-gi, kata wuon-gi, kata wuode, kata nyare, kata owadgi, 3 kata nyamin-gi ma silili ma pok okendi kata kamano, nobed ma ok ler. 4 To kik omul kata kik oywag dhako moro amora mokend gi ja dhoodgi. 5 Jodolo kik liel wigi mapoth,+ bende kik gitit yie tikgi, kendo kik gisar dendgi.+ 6 Nyaka gibed jo maler e wang’ Nyasachgi,+ kendo kik giketh nying Nyasachgi,+ nimar gin e ma gitimo ne Jehova misengni miwang’o e mach. Misengnigo gin chiemo michiwo ne Nyasachgi, kendo jodolo nyaka bed maler.+ 7 Jadolo kik kend ochot,+ kata dhako ma ok silili, kata dhako ma chwore oriembo chuth,+ nimar en ng’at maler mowal ne Nyasaye. 8 Nyaka upwodhe+ nikech en e ma ochiwo chiemb Nyasachu. Nyaka obednu ng’at maler nikech an Jehova ma pwodhou, aler.+
9 “Ka nyar jadolo olokore ochot, odwanyo nying wuon mare. Nyaka neg nyakono mi wang’e gi mach.+
10 “Jadolo maduong’ ma oseolne mo e wiye,+ kendo mowal e kind owetene mondo orwak lep dolo,+ ok onego owe yie wiye koyugno kendo kik oyiech lepe.+ 11 Ok onego odonj ka ma ng’at motho nitie,+ di po kobedo ma ok ler, bed ni ng’atno en wuon-gi kata min-gi. 12 Kik owuog oa ka maler kendo kik odwany ka maler mar Nyasache,+ nimar osewale gi mor wir mar Nyasache,+ an Jehova.
13 “Jadolo maduong’ nyaka kend mana nyako ma silili.+ 14 Kik okend chi liel, kata dhako ma chwore oriembo chuth, kata nyako ma ok silili, kata ochot. Nyaka okend mana nyako ma silili moa e dhoodgi. 15 Kik odwany kothe,+ nikech an Jehova, an e ma apwodho jadolo maduong’.”
16 Jehova nowacho kendo ne Musa niya: 17 “Nyis Harun ni, ‘Kuom tiengeu duto, ng’at ma ong’ol e yo moro amora kik chiw ne Nyasaye chiemo. 18 Ng’at ma muofu, kata ma rang’ol, kata ng’at ma ume olirore, kata ma tiende kata lwete oyombore, kik sud machiegni gi ka maler. 19 Bende, ng’at ma tiende kata lwete otur, 20 kata ma rakuom, kata ng’at mothirno,* kata ma wang’e ong’ol, kata ng’at ma dende nigi gwonyo kata siling’, kod ng’at ma mendene otore kik sud machiegni gi ka maler.+ 21 Koth Harun ma ong’ol e yo moro amora ok nosud machiegni mondo otim ne Jehova misango miwang’o. Nikech ong’ol, ok obi sudo machiegni mondo ochiw chiemb Nyasaye. 22 Onyalo chamo chiemb Nyasaye moa kuom gik maler,+ kata kuom gik maler moloyo.+ 23 Kata kamano, kik osud machiegni gi pasia+ kata gi kendo mar misango,+ nimar orang’ol. Kik omi kara maler obed modwanyore.+ An Jehova, an e ma pwodhou.’”+
24 Omiyo, Musa nowacho ne Harun gi yawuote kaachiel gi Jo-Israel duto wechego.
22 Jehova nomedo wacho ne Musa niya: 2 “Nyis Harun gi yawuote ni nyaka gitang’ ahinya mondo kik gicha nyinga maler+ sa ma gitiyo gi chiwo maler ma Jo-Israel okelona.+ An Jehova. 3 Wachnegi ni, ‘E tiengeu duto, ng’ato ang’ata ma ok ler mosudo machiegni gi chiwo maler ma Jo-Israel owalo ne Jehova, ibiro negi.+ An Jehova. 4 Koth Harun moro amora ma nigi tuo mar dhoho,+ kata ma duong’ne chuer,+ kata ma pi nyote chuer,+ kata momulo ng’at momako jal motho,+ kik cham chiwo maler ka pok opwodhore.+ 5 Bende, koth Harun moro amora momulo le mamol ma ok ler,+ kata momulo ng’at ma ok ler e yo moro amora,+ kik cham chiwo maler. 6 Ng’ato ang’ata momulo achiel kuom gik ma kamago nolwokre gi pi,+ kendo nobed ma ok ler nyaka odhiambo, bende ok nocham chiwo maler e kindeno. 7 Ka chieng’ osepodho, nobed maler kae to bang’ mano nocham chiwo malergo nikech mago gin pokne.+ 8 Bende, kik ocham le motho athoya kende kata chiaye ma ondiek onego, nikech kotimo kamano to obedo ma ok ler.+ An Jehova.
9 “‘Jodolo nyaka rit chikna mondo kik gibed joketho mi githo nikech gidwanyo chiwo maler. An Jehova, an e ma apwodhogi.
10 “‘Ng’ato ang’ata ma ok owinjore ocham chiwo maler kik tim kamano.+ Wendo molimo jadolo kata jatichne mondik bende kik cham chiwo moro amora maler. 11 To ka jadolo ong’iewo misumba gi pesa, misumbano nyalo chamo chiemogo. Wasumbni monyuol e dala jadolo bende nyalo chamo chiembego.+ 12 Ka nyar jadolo okend gi ng’at ma ok jadolo, nyakono ok nocham chiemo mogol kuom chiwo maler. 13 To ka nyar jadolo obedo chi liel, kata ka chwore oriembe chuth to oonge nyathi, mi odok dak e od wuon-gi kaka chon ka ne pok okende, oyiene chamo chiemb wuon mare.+ To ng’at ma ok owinjore, kik cham chiemo malerno.
14 “‘Ka ng’ato ochamo chiwo maler kokia, enochul jadolo nengo gino komedoe achiel kuom abich e wiye.+ 15 Kamano, jodolo ok nodwany gik maler ma Jo-Israel chiwo ne Jehova+ 16 kuom yie ne Jo-Israel chamo gima dimi gibed joketho mi giyud kum. An Jehova, an e ma apwodhogi.’”
17 Jehova nomedo wacho ne Musa kama: 18 “Nyis Harun gi yawuote kod Jo-Israel duto ni, ‘Ka Ja-Israel kata jadak okelo misango miwang’o+ ne Jehova, bed ni chiwono en mar chopo singruokne kata okele kuom herone owuon,+ 19 onego okel ruath kata nyayim kata diel ma ok ong’ol e yo moro amora,+ eka Nyasaye biro yie kode. 20 Kik uchiw chiaye ma ong’ol+ nikech Nyasaye ok bi yie kode.
21 “‘Ka ng’ato kelo misango mar kuwe+ ne Jehova mondo ochopgo singruokne, kata kokelo chiwono kuom herone owuon, onego okel chiaye ma ok ong’ol e yo moro amora, eka Nyasaye biro yie kode. 22 Kik uchiw chiaye moro amora ma muofu, kata motur, kata ma gimoro ong’ado, kata ma nigi puch, kata ma nigi kalanga, kata ma nigi aluny. Kik ukel ne Jehova gik ma kamago kendo kik uwang’gi ne Jehova e kendo mar misango. 23 Ruath kata rombo ma tiendene oyombore unyalo golo kaka chiwo ma ng’ato golo kohero, kata kamano Nyasaye ok bi yie gi chiwo ma kamano ka ogole mondo obed chiwo michopogo singruok. 24 Kik uchiw ne Jehova chiaye ma mendene otore kata ma oro, kendo kik uchiw chiaye ma kamago e pinyu. 25 Bende, kata ka wendo e mokelo chiaye ma kamano mondo obed chiemb Nyasachu, kik ukawe nikech ong’ol kendo en gi mbala. Nyasaye ok bi yie gi chiwo ma kamago.’”
26 Jehova nomedo nyiso Musa niya: 27 “Ka onyuol nyaruath, kata nyarombo, kata nyadiel, kik poge gi min nyaka ndalo abiriyo rum.+ Kata kamano, chakre odiechieng’ mar aboro ka dhi nyime, inyalo chiwe ne Jehova mondo otimnego misango miwang’o. 28 Kik uneg dhiang’ gi nyathine kata rombo gi nyathine e odiechieng’ achiel.+
29 “Ka uchiwo ne Jehova misango mar goyo erokamano,+ to chiweuru kaka chik dwaro mondo Nyasaye oyie kodu. 30 Onego ochame te e odiechieng’no. Kik onind nyaka okinyi.+ An Jehova.
31 “Nyaka urit chikena kendo uluwgi.+ An Jehova. 32 Kik udwany nyinga maler.+ Nyaka umi nyinga duong’ e kind Jo-Israel.+ An Jehova, an e ma apwodhou,+ 33 kendo an e ma agolou e piny Misri mondo abed Nyasachu.+ An Jehova.”
23 Jehova nowacho ne Musa kendo niya: 2 “Nyis Jo-Israel ni, ‘Sewni+ ma Jehova dwaro ni utim gin odiechienge maler monego ji duto ochokree. Gouru milome+ ne sewnigo.
3 “‘Unuti tijeu kuom ndalo auchiel, to chieng’ mar abiriyo en sabato mar yueyo,+ ma en chieng’ chokruok maler. Kik uti tich moro amora chieng’no. Obiro bedonu sabato mar Jehova kuonde duto mudakie.+
4 “‘Magi e sewni ma Jehova dwaro ni utim, kendo gin chokruoge maler ma nyaka ugonegi milome ka kindegi ochopo. 5 Tarik 14 dwe mokwongo,+ unutim Pasaka+ mar Jehova godhiambo.*
6 “‘Chakre tarik 15 mar dweno, unutim ne Jehova Sawo mar Makate ma Ok Oketie Thowi.+ Unucham makate ma ok oketie thowi kuom ndalo abiriyo.+ 7 Chieng’ mokwongo mar jumano unubed gi chokruok maler.+ Kik uti tich moro amora matek chieng’no. 8 Kuom ndalo abiriyo, unuchiw ne Jehova misengni miwang’o e mach. To e odiechieng’ mar abiriyo, unutim chokruok maler. Kik uti tich moro amora matek chieng’no.’”
9 Jehova nowacho ne Musa kendo niya: 10 “Nyis Jo-Israel ni, ‘Ka usechopo e piny ma abiro miyou, sa asaya mukayo cham, nyaka ukel ne jadolo+ bat achiel mar cham mukwongo kayo.+ 11 Jadolo biro fwayo bat achielno koni gi koni e nyim Jehova mondo oyie kodu. Jadolo onego otim kamano odiechieng’ ma luwo Sabato. 12 Kendo chieng’ muchiwoe michno, nyaka uchiw ne Jehova nyayim ma hike achiel kendo ma ok ong’ol e yo moro amora mondo otimgo misango miwang’o. 13 Misango mar cham michiwo gi yimbno nobed mogo mayom moruw gi mo. Mogono nobed efa* ariyo kuom apar. Misangono nyaka wang’ mondo ogol ne Jehova suya mamit. To misango miolo mibiro kelego nobed divai akwota mar hin.* 14 Kik ucham cham manyien ka pok uchiwo ne Nyasachu michne, bed ni en cham mobul kata molosgo makate. Mano en chik momakou gi nyikwau nyaka chieng’ kamoro amora mudakie.
15 “‘Bang’ Sabato muteroe cham mar mich mifwayo koni gi koni, unukwan sabato abiriyo.+ Ginibed jumbe abiriyo. 16 To chieng’ ma luwo Sabato mar abiriyo, ma en chieng’ mar 50,+ unuchiw ne Jehova misango mar cham manyien.+ 17 Unukel makate ariyo mugolo e miechu mondo obed chiwo mifwayo koni gi koni. Unulosgi gi mogo mayom ma romo efa* ariyo kuom apar. Ginibed makate molos gi thowi+ kendo ginibed kaka cham mokwongo chiek michiwo ne Jehova.+ 18 Onego uchiw makatego kaachiel gi nyirombe abiriyo ma hikgi achiel-achiel kendo ma ok ong’ol e yo moro amora kaachiel gi nyaruath achiel, gi yimbe ariyo.+ Ginibed misango miwang’o ne Jehova. Unuchiwgi kaachiel gi chiwo mar cham kod chiwo miolo mokelgigo mondo gigol ne Jehova suya mamit. 19 Nyaka uchiw nyadiel achiel mitimogo misango mar richo,+ kod yimbe ariyo ma hikgi achiel-achiel mitimogo misango mar kuwe.+ 20 Jadolo biro kawo makate molos gi cham ma ukwongo kayo kaachiel gi yimbe ariyogo, mondo ofwagi koni gi koni e nyim Jehova kaka chiwo mifwayo. Ginibed chiwo maler mag Jehova ma imiyo jadolo.+ 21 Odiechieng’no unugo milome+ mar chokruok maler. Kik uti tich moro matek chieng’no. Ma en chik momako nyikwau nyaka chieng’ kamoro amora mudakie.
22 “‘Sa ma ukayo cham e puotheu, kik uka cham manie tong’ mag puotheu, kata kik uhul cham modong’.+ Onego uwegi ne jo modhier+ kod jodak.+ An Jehova Nyasachu.’”
23 Jehova nomedo wacho ne Musa niya: 24 “Nyis Jo-Israel ni, ‘Tarik achiel dwe mar abiriyo nobednu chieng’ yueyo makende. Chieng’no nobed chieng’ chokruok maler ma unugone milome gi turmbeta.+ 25 Kik uti tich moro amora matek, to chiwuru ne Jehova misango miwang’o e mach.’”
26 Jehova nomedo wacho ne Musa niya: 27 “Tarik apar dwe mar abiriyono nobednu Odiechieng Pwodhruok.+ Unutim chokruok maler, kendo onego unyis ni ukuyo nikech richou.+ Unuchiw ne Jehova misango miwang’o e mach. 28 Chieng’no kik uti tich moro amora nikech en chieng’ mipwodhoe richou+ e nyim Jehova Nyasachu. 29 Ng’ato ang’ata ma ok okuyo* nikech richone e odiechieng’no ibiro negi.+ 30 Kendo abiro nego ng’ato ang’ata motiyo tich moro amora chieng’no. 31 Omiyo, kik uti tich moro amora. Mano en chik momakou gi nyikwau nyaka chieng’ kamoro amora mudakie. 32 Chieng’no en sabato mar yueyo, kendo ununyis ni ukuyo nikech richou,+ chakre odhiambo mar tarik ochiko mar dweno nyaka kinyne godhiambo.”
33 Jehova nowacho ne Musa kendo niya: 34 “Nyis Jo-Israel ni, ‘Chakre tarik 15 mar dwe mar abiriyono unutim ne Jehova Sap Kiche kuom ndalo abiriyo.+ 35 Chieng’ mokwongo nutim chokruok maler, kendo kik uti tich moro amora matek. 36 Kuom ndalo abiriyogo nuchiw ne Jehova misengni miwang’o e mach. E odiechieng’ mar aboro nutim chokruok maler,+ bende nuchiw ne Jehova misango miwang’o e mach. En chokruok mowal, omiyo, kik uti tich moro amora matek.
37 “‘Mago e sewni+ ma Jehova oketo monego ugonegi milome kaka chokruoge maler+ michiwoe ne Jehova misengni miwang’o e mach ma gin: misango miwang’o+ pep gi chiwo mar cham+ kaachiel gi chiwo miolo+ mokelego. Nochiwgi odiechieng’ kodiechieng’ kaluwore gi chenro moketi. 38 E wi chiwo mugolo e sabato mag Jehova,+ unuchiw bende mich magu,+ chiwo muchopogo singruok,+ kod chiwo mugolo ka uhero+ monego uchiw ne Jehova. 39 To chakre tarik 15 dwe mar abiriyo bang’ kusekeyo, timuru ne Jehova sawo kuom ndalo abiriyo.+ Chieng’ mokwongo nobed chieng’ yueyo makende, kendo chieng’ mar aboro bende kamano.+ 40 Chieng’ mokwongono, unukaw olembe mag yien mabeyo, gi bede othidhe,+ gi bede yien ma nigi oboke mang’eny, kaachiel gi bede yien ma twi e tiend aora, mi unubed mamor+ e nyim Jehova Nyasachu kuom ndalo abiriyo.+ 41 Kendo unutim sawono ne Jehova ndalo abiriyo higa ka higa.+ Nobed chik ma nyaka chieng’ kuom tiengeu duto. Unutim sawono e dwe mar abiriyo. 42 Jo-Israel duto nyaka dag e kiche kuom ndalo abiriyo,+ 43 mondo tiengeu ma biro ong’e+ ni namiyo Jo-Israel odak e kiche ka ne agologi e piny Misri.+ An Jehova Nyasachu.’”
44 Mano e kaka Musa nonyiso Jo-Israel sewni ma Jehova noketonegi.
24 Jehova nomedo wacho ne Musa niya: 2 “Chik Jo-Israel mondo okelni mo maler mar zeituni miolo e teyini mondo teyinigo osik ka liel.+ 3 Pile ka pile godhiambo, Harun biro neno ni omok teyini manie nyim pasia machiegni gi Sandug Singruok man e hema mar romo, mondo giliel nyaka okinyi e nyim Jehova. Mano en chik momakou nyaka chieng’ kuom tiengeu duto. 4 Kinde duto, onego ochan teyinigo e gir chungo taya+ mar dhahabu lilo manie nyim Jehova.
5 “Ubiro kawo mogo mayom mondo utedgo makate 12 molworore ma nigi bur e diergi. Moro ka moro noted gi mogo ma romo efa* ariyo kuom apar. 6 Unulwowgi auchiel auchiel+ e mesa mar dhahabu lilo manie nyim Jehova.+ 7 Unuket ubani maler e wi makatego koni gi koni, mondo makatego obed misango mar rapar+ miwang’o ne Jehova. 8 Ibiro chan makatego e nyim Jehova chieng’ Sabato ka Sabato.+ Mano en singruok mosiko e kinda gi Jo-Israel. 9 Makatego nobed pok mar Harun gi yawuote,+ kendo ginichamgi ka maler+ nimar gin gik maler moloyo, kendo gia e misengni miwang’o ne Jehova e mach. Mano en chik mosiko.”
10 Ne nitie ng’at moro e kambi mar Jo-Israel ma min mare ne nyar Israel to wuon mare ne Ja-Misri.+ Ng’atno ne ogore gi Ja-Israel moro e kambi. 11 Wuod nyar Israelno nochayo kendo yanyo Nying Maler.*+ Omiyo, ne gikelo ng’atno ir Musa.+ Min mare ne en Shelomith nyar Dibri ma ja dhood Dan. 12 Ne gikete e od tuech ka girito gima Jehova biro nyisogi.+
13 Kae to Jehova nowacho ne Musa niya: 14 “Gol ng’at ma ne oyenyono e kambi mondo ji duto ma ne owinje koyenyo oket lwetgi e wiye. Kae to Jo-Israel duto ogoye gi kite nyaka otho.+ 15 Wach ne Jo-Israel ni, ‘Ng’ato ang’ata moyanyo Nyasache ibiro kum nikech kethoneno. 16 Ng’at moyanyo nying Jehova nyaka negi,+ bed ni en Ja-Israel kata jadak. Oganda Jo-Israel duto nyaka goye gi kite motho nikech oyanyo Nyingno.
17 “‘Ka ng’ato onego wadgi, en bende nyaka nege.+ 18 Ka ng’ato ogoyo chiaye ma chiayeno otho, nyaka ochul chiaye kar chiaye. 19 Ka ng’ato ohinyo wadgi, notimne mana kaka osetimono.+ 20 Tur kar tur, wang’ kar wang’, lak kar lak, kendo nyaka hiny ng’atno mana kaka osehinyo wadgi.+ 21 Ng’at mogoyo chiaye ma chiayeno otho nyaka chul chiayeno,+ to ng’at mogoyo wadgi monego, nyaka negi.+
22 “‘Chik achiel noti kuom jadak gi Ja-Israel,+ nimar an Jehova Nyasachu.’”
23 Ka ne Musa osewacho ne Jo-Israel kamano, ne gigolo ng’at ma ne oyenyono e kambi mi gigoye gi kite motho.+ Kuom mano, Jo-Israel notimo mana kaka Jehova nosechiko Musa.
25 Jehova nowacho ne Musa e Got Sinai niya: 2 “Nyis Jo-Israel ni, ‘Ka usechopo e piny ma abiro miyou,+ nyaka urit sabato ma Jehova osemiyou kendo uwe pinyno oyue.+ 3 Kuom higni auchiel unyalo komo, unyalo lwero yiendu mag mzabibu, kendo unyalo kayo puotheu.+ 4 To higa mar abiriyo en sabato ma piny yueyoe, sabato mar Jehova. E higano, kik ukom kata kik ulwer yiendu mag mzabibu. 5 Ka nitie gik monyak bang’ ka ne usekayo puodho moro, kik ukagi. Bende, kik upon mzabibu monyak kendgi. Higano en higa makende ma piny yueyoe. 6 Kata kamano, chiemo modiechieng’ kodiechieng’ to unyalo kawo kuom gik mochiek kendgi e higa mar sabato. Unyalo chamogi kaachiel gi wasumbniu ma chwo gi ma mon gi jotich mundiko, kod jodak, 7 kendo ginibed chiemb jambu gi le mag bungu manie pinyu. Gik moko duto ma piny ochiego nobed chiembu.
8 “‘Higa mar abiriyo ka higa mar abiriyo nobednu sabato. Unukwan sabatogo nyadibiriyo nyaka uchop higa mar 49. 9 Tarik apar dwe mar abiriyo e higano, ma en Odiechieng Pwodhruok,+ unugo tung’ e pinyu duto. 10 Kamano unuwal higa mar 50 kugoyo milome mondo obed higa miweyoe jopinyu duto thuolo.+ Higano nobed higa ma ng’ato ka ng’ato nodog e lope kendo ir joodgi.+ 11 Higa mar piero abichno nobednu higa ma iweyoe gik moko obed thuolo. Kik ukom kendo kik uka cham modongo kendgi e puodho ma oseka, kendo kik upon mzabibu monyak anyaka kendgi e yien ma ne ok ulwero.+ 12 En higa mar 50, omiyo, nyaka uwal higano ne Nyasaye. Gimoro amora ma lowo onyago owuon to unucham.+
13 “‘E higa mar piero abichno, ng’ato ka ng’ato kuomu nodog e lope.+ 14 Ka iuso ne ng’ato gimoro amora kata ing’iewo gimoro kuome, kik imaye.+ 15 Kidwaro ng’iewo puodho kuom wadu, kwan higni mosekalo chakre higa mar 50, nikech obiro goyoni nengo kaluwore gi higni mag keyo modong’.+ 16 Ka higni modong’ ng’eny to nichul nengo ma malo, to ka ginok nichul nengo ma piny, nikech ousoni cham ma di ne okayo. 17 Ng’ato ang’ata kuomu kik ma wadgi gimoro,+ to luoruru Nyasachu,+ nikech an Jehova Nyasachu.+ 18 Ka uluwo chikena kendo rito buchena, unudag gi kuwe e piny.+ 19 Lowo nochieg cham,+ mi unuchiem muyieng’, kendo unudag gi kuwe.+
20 “‘To ka po ni chunyu ochako chandore ni, “Ang’o ma wabiro chamo ka ok wakomo kata ka ok wakeyo e higa mar abiriyo?”+ 21 Kik uluor nikech abiro guedhou e higa mar auchiel mi piny nochieg cham moromou chamo kuom higni adek.+ 22 Kae to ubiro komo e higa mar aboro ka pod uchamo chambu machon nyaka e higa mar ochiko. Mago e cham ma ubiro chamo nyaka uka cham manyien.
23 “‘Ng’ato ang’ata ok onego ous ne nyawadgi lowo chuth,+ nikech an e wuon lowo,+ to anenou mana ka jodak.+ 24 Onego uyie mondo owar puodho moro amora moseus e pinyu.
25 “‘Ka wadu moro odoko modhier mi ouso puothe moro, watne machiegni nowar puodhono.+ 26 To ka ng’atno onge gi watne ma nyalo waro puodhono, to bang’e obedo jamwandu mi oyudo pesa monyalo warogo puodhono, 27 onego okwan kar romb pesa ma ng’at ma ne ousone puodhono oseloso, kae to ogol pesano e nengo ma ne ng’atno ochule. Pesa modong’ e ma nochul ng’atno mondo puodhono obed mare kendo.+
28 “‘To ka ok onyal ware to puodhono nodong’ e lwet ng’at ma ne ong’iewecha nyaka chop higa mar 50.+ E higano, puodhono nodog ne wuon-go, mi nobed mare kendo.+
29 “‘Ka ng’ato ouso ode manie dala mochiel gi ohinga, en thuolo mar ware ka higa achiel pok orumo. En thuolo ware higano duto.+ 30 To ka higa achiel orumo ka pok oware, odno nobed mar ng’at mong’ieweno kuom tienge duto. E higa mar 50, odno ok nodog ne ng’at ma ne ouse. 31 To udi manie mier ma ok ochiel gi ohinga nokwan mana kaka ikwano lowo. Gin gik ma inyalo war kinde moro amora, to kochopo higa mar 50, ginidog ne wegi.
32 “‘Jo-Lawi to nyalo waro udi manie miechgi+ kinde moro amora. 33 Ka Ja-Lawi moro ok owaro ode manie miechgi, ibiro duokne odno e higa mar 50,+ nimar udi manie miech Jo-Lawi gin mwandugi e kind Jo-Israel.+ 34 To puothe+ molworo miechgi ok nyal us nikech gin mwandugi nyaka chieng’.
35 “‘Ka Ja-Israel wadu obedo modhier ma kata gima dokonyrego onge, nyaka ukonye+ mondo odag kodu mana kaka unyalo konyo jadak kata wendo.+ 36 Ka uhole gimoro, kik ukaw kuome ohala.+ Luoruru Nyasachu+ kendo yieuru mondo owadu odag kodu. 37 Kik uhole pesa mondo uyudie ohala,+ kata kik ukaw ohala kuom chiemo muhole. 38 An Jehova Nyasachu ma ne ogolou e piny Misri+ mondo amiu piny Kanaan kendo mondo abed Nyasachu.+
39 “‘Ka owadu obedo modhier kendo obiro iri mi ing’iewe,+ kik ikete mondo otini kaka misumba.+ 40 Onego obedni kaka jatich michulo,+ kendo kaka jadak. Enotini nyaka e higa mar 50. 41 Kae to nowe tiyoni mondo odog gi nyithinde ir joodgi, kendo e lop kwerene.+ 42 Gin wasumbni maga ma ne agolo e piny Misri.+ Omiyo, ok onego ong’iewgi kaka ing’iewo wasumbni. 43 Kik isand Ja-Israel wadu.+ Nyaka iluor Nyasachi.+ 44 Kudwaro wasumbni ma chwo kata ma mon, unyalo ng’iewogi kuom ogendni mokiewo kodu. 45 Bende, unyalo ng’iewo wasumbni kuom jodak manie kindu,+ kata kuom nyithindgi ma ginyuolo e pinyu mi gibed mwandu magu. 46 Ginyalo bedo mwandu magu mosiko munyalo weyo ne yawuotu. Unyalo loko jogo wasumbniu, kata kamano, Jo-Israel weteu to kik usandi.+
47 “‘Ka jadak kata wendo moro e kindu odoko jamoko to Ja-Israel wadu modak machiegni odoko modhier, mi odhi ir ng’atno kata ir wat ng’atno mondo ong’iewe, 48 inyalo ware. Ng’at ma nyalo ware en owadgi,+ 49 kata owadgi wuon mare, kata owadgi ma bathe, kata mana watne moro machielo. Achiel kuom jogo nyalo ware.
“‘To bende, ka odoko jamoko, onyalo warore owuon.+ 50 Mondo ong’e kwan mar pesa mowarorego, nokwan higni mosekalo chakre higa ma ne ong’iewee nyaka higa mar 50.+ Pesa ma nong’iewego onego oromre gi misara ma di ne ng’atno ondikogo jatich+ kuom hignigo.+ 51 Enowarre gi pesa ma romre gi higni modong’ to higa mar 50 chopo. Ka hignigo ng’eny to enochul pesa ma romre gi higni modong’. 52 To ka higni modong’ nok, nochul pesa matin ma romre gi hignigo. 53 Ja-Israelno nodag kode higa ka higa kaka jatich michulo. Kendo kik uyie mondo ng’at ma ne ong’ieweno osande.+ 54 To ka ok onyal warore owuon kaluwore gi chikni, obiro rito nyaka higa mar 50 ochopi,+ kae to oweye odhi gi nyithinde.
55 “‘Jo-Israel gin wasumbni maga. Gin wasumbnina ma ne agolo e piny Misri.+ An Jehova Nyasachu.
26 “‘Kik ulos kido mag nyiseche manono,+ kendo kik uchung sanamu+ kata siro mar kidi, kata kik uchung kidi moro amora+ e piny mondo ukulrune,+ nikech an Jehova Nyasachu. 2 Nyaka urit sabato maga kendo uluor kara maler. An Jehova.
3 “‘Ka udhi nyime wuotho e yorena mi urito chikena kendo uluwogi,+ 4 anakelnu koth e kinde mowinjore,+ mi pinyu nochieg cham+ kendo yiendeu nonyag olembe. 5 Unudin cham nyaka kinde miponoe mzabibu, kendo unupon mzabibu nyaka kinde michuoyoe. Unuyud chiemo moromou kendo unudag e pinyu gi kuwe.+ 6 Anakel kuwe e pinyu+ mi ununind ma onge luoro,+ kendo natiek ondiegi e pinyu kendo lweny ok nobed e pinyu. 7 Unuriemb wasiku kendo ununeggi gi ligangla. 8 Jou abich noriemb ji 100, kendo jou 100 noriemb ji 10,000, mi ununeg wasiku gi ligangla.+
9 “‘Anaguedhu mi anami unyuolru mubed mathoth,+ kendo anachop singruok ma ne atimo kodu.+ 10 Nucham cham manie decheu nyaka chop kinde ma ugologie mondo uyud ka ma ukanoe cham manyien. 11 Analos hemba e dieru,+ kendo ok anajwang’u. 12 Anawuoth e dieru kendo anabed Nyasachu,+ to un nubed joga.+ 13 An Jehova Nyasachu ma ne ogolou e piny Misri mondo uwe bedo wasumbnigi. Aseturo jok ma ne otwenu, omiyo koro uwuotho tir.
14 “‘To ka utamoru winja kendo ok urito chikegi duto,+ 15 kendo udagi yorena+ mi usin gi buchena, kendo uketho singruok ma ne atimo kodu,+ 16 ng’euru ni anatimnu kama: anagou gi masira, gi kahera, gi midhusi ma yuyo wang’ kendo ma tieko dendu. Nukom cham kayiem nono, nimar wasiku e ma nochamgi.+ 17 Anasin kodu kendo wasiku nonegu.+ Wasiku nonyonu,+ kendo unubuogru ma uring kata ka onge ng’at ma lawou.+
18 “‘Ka pod utamoru winja bang’ gigo duto, anachwadu nyadibiriyo nikech richou. 19 Anatiek sungau, kendo anami polo obednu kaka chuma,+ to piny obed kaka mula. 20 Unuketh tekreu kayiem nono nimar piny ok nonyagnu chiemo,+ kendo yiendeu ok nonyag olemo.
21 “‘To ka pod ukweda kendo utamoru winja, abiro medo chwadou kamano nyadibiriyo nikech richou. 22 Abiro oronu ondiegi+ ma nomak nyithindu+ kendo noneg jambu mi gimi udong’ manok, kendo wang’ yoreu nobed gundni ma onge ji ma wuothoe.+
23 “‘Ka gigo duto ok omiyo ulokoru,+ kendo usiko ka ukweda, 24 an bende abiro kedo kodu, kendo abiro chwadou nyadibiriyo nikech richou. 25 Anakel lweny kuomu mondo achulgo kuor nikech nuketho singruok ma ne atimo kodu.+ Kata kuringo muchokoru e miechu, anagou gi tuoche kuno,+ kendo wasiku nomaku.+ 26 Abiro ketho kuonde muketoe chiemo,+ kendo mon apar noted mana e kendo achiel. Nopimnu chiemo mana e rapim,+ kendo unuchiem to ok unuyieng’ ngang’.+
27 “‘To ka bang’ mago duto pod utamoru winja kendo udhi nyime kweda, 28 abiro medo kedo kodu+ kendo an awuon nachwadu nyadibiriyo nikech richou. 29 Kar chamo ring’o, unucham yawuotu gi nyiu.+ 30 Nikech ajok kodu,+ anaketh kuondeu mag lamo moting’ore malo+ kendo namuk kendeu mag ubani, mi nanegu ma abiw ringreu e wi sanamu magu makwero.+ 31 Abiro tieko miechu gi ligangla+ kendo naketh kuondeu mag lamo, bende misengni muchiwo mondo ogolna suya mamit ok nayiego. 32 Anaketh pinyu mi aweye gunda,+ kendo wasiku ma biro dakie nohum nono.+ 33 Anakeu e kind ogendni+ kendo nariembu gi ligangla;+ pinyu nodong’ gunda,+ kendo miechu nokethre chuth.
34 “‘E kinde duto ma pinyu nodong’ gunda ka un to udak e piny wasiku, pinyu nochul sabato ma ne ok urito. E kindeno, piny noyue nikech nyaka ochul sabato.+ 35 Piny noyue kodong’ gunda kamano nikech ne ok oyue ka ne udak kuno nimar ne ok urit sabato.
36 “‘To abiro goyo jou motony+ manie piny wasikgi gi kibaji mi kata ka giwinjo ka yamo kwadho it oboke, giniring ka jo ma ilawo gi ligangla mi gipodh piny ma onge ng’at ma lawogi.+ 37 Ginituomre ka giringo ka jo ma ilawo gi ligangla kata obedo ni onge ng’at ma lawogi. Ok gininyal kedo gi wasikgi.+ 38 Karu nolal nono e kind ogendni,+ kendo piny wasiku nomwonyu. 39 Jou manie pinje mag wasiku+ notow nikech richou. Ee, ginitow nikech richo kweregi.+ 40 Ginihul richogi+ gi richo kweregi ma ne omiyo giweya, kendo giniyie ni ne gitimo marach kuom kweda.+ 41 Kuom mano, an bende nakedo kodgi+ ma akelogi e piny wasikgi.+
“‘Natim kamano mondo omi gilok chunygi matek* kendo gibolre+ mi gichul richogi. 42 Eka napar singruok ma ne atimo gi Jakobo,+ kendo gi Isaka,+ kod Ibrahim,+ kendo napar pinygi. 43 Kinde ma ne pinygino odong’ gunda, piny ne chulo sabato.+ Ne gichulo richogi nikech ne gitamore buchena kendo ne gisin gi chikena.+ 44 Kata kamano, ka gin e piny wasikgi, ok najwang’gi mi atiekgi chuth,+ nikech ka atimo kamano to abiro ketho singruokna+ kodgi, nimar an Jehova Nyasachgi. 45 Nikech aherogi, napar singruok ma ne atimo gi kweregi+ ma ne agolo e piny Misri e nyim ogendni+ mondo abed Nyasachgi. An Jehova.’”
46 Mago e chike gi buche ma Jehova Nyasaye nomiyo Musa e Got Sinai mondo Jo-Israel oluw.+
27 Jehova nomedo wacho ne Musa niya: 2 “Nyis Jo-Israel ni, ‘Ka ng’ato otimo singruok makende+ ni obiro chiwo ne Jehova pesa ma rom gi nengo mar waro ng’ato, 3 ma e kaka obiro chulo: nengo mar ng’at ma dichwo ma hike ni e kind 20 gi 60 nobed shekel* 50 mag fedha mopim gi rapim mar ka maler. 4 Dhako to nengone nobed shekel 30. 5 To ng’at ma dichwo ma hike ni e kind higni 5 gi 20, nengone nobed shekel* 20, to ka en dhako nengone nobed shekel 10. 6 To ka en nyathi ma wuoyi ma hike pok ochopo abich to osekalo dwe achiel, nengone nobed shekel abich. To ka en nyathi ma nyako, nengone nobed shekel adek.
7 “‘Ka en dichwo ma hike 60 ka dhi nyime, nengone nobed shekel 15. To ka en dhako, shekel 10. 8 Ka ng’at mokuong’oreno odhier ahinya ma ok onyal chulo nengo moketi,+ nochung’ e nyim jadolo mi jadolo nogone nengo mowinjore gi nyalone.+
9 “‘Ka ng’ato okuong’ore ni obiro chiwo ne Jehova chiaye minyalo timgo misango, chiayeno koro nobed maler ne Jehova. 10 Ng’atno ok onego owile gi gimoro machielo, to bende ok onego owile gi chiaye moro maber kata marach. To ka po ni owilo chiayeno gi machielo, chiayego duto nobed gik maler; ma nokwongo singo kaachiel gi mowilegono. 11 Ka chiaye ma ng’ato okuong’ore ni obiro chiwo ok ler+ kendo ok dichiwe ne Jehova, ng’atno nyaka ter chiayeno e nyim jadolo. 12 To jadolo nogo nengo chiayeno kaluwore gi kaka chiayeno chalo. Nengo ma jadolo oketo e nengo ma nochul. 13 To ka po ni ng’atno dwaro waro chiayeno, nyaka omedie achiel kuom abich e wi nengo mar chiayeno.+
14 “‘Ka ng’ato owalo ode mondo obed gima ler ne Jehova, jadolo biro goyo nengo odno kaluwore gi kaka odno chalo. Nengo ma jadolo oketo e ma biro bedo nengo odno.+ 15 To ka ng’at ma ne ochiwo ot dwaro waro odeno, nyaka omedie achiel kuom abich e wi nengo odno eka ot nobed mare kendo.
16 “‘Ka ng’ato ochiwo ne Jehova lope moro, ibiro gone nengo ma romre gi kodhi mikomego. Lowo minyalo komie koth shairi homer* achiel nobed shekel 50 mag fedha. 17 Ka ng’atno ochiwo lopeno e higa mar 50,+ nengone ok bi lokore. 18 Ka ochiwe bang’ higa mar 50, jadolo nokwan higni modong’ to higa mar 50 ma luwo chopi. Kae to nogone nengo ma romre gi higni modong’go.+ 19 Ka ng’at ma ne ochiwo puothe dwaro waro puotheno, nyaka ochul nengo mogoneno, kendo enomed achiel kuom abich e wi nengono eka puodhono nobed mare kendo. 20 To ka ok owaro puotheno mi ous puodhono ne ng’at machielo, ok onyal ware ngang’. 21 Ka higa mar 50 ochopo mi owe puodhono, puodhono nobed gima ler momi Jehova chuth. Kendo puodhono nobed mwandu mar jodolo.+
22 “‘Ka ng’ato ochiwo ne Jehova puodho mong’iewo ma ok puoth anyuolagi,+ 23 jadolo nogo nengo ma romre gi higni modong’ to higa mar 50 chopo, kendo ng’atno nochul pesago mana e odiechiengno.+ En gima ler mimiyo Jehova. 24 E higa mar 50, puodhono nodog ne ng’at ma ne ouse, ma en wuon lowo sie.+
25 “‘Pesago nopim gi shekel mitiyogo ka maler. Shekel romre gi gera* 20.
26 “‘Ng’ato ang’ata kik wal chiaye makayo, nikech chiaye duto makayo gin mag Jehova.+ Bed ni gin dhok kata rombe, gin mag Jehova.+ 27 Ka en chiaye mogak mowaro gi nengo moketi, nyaka ochul achiel kuom abich e wi nengono.+ To ka ok oware, ibiro use gi nengo ma ne oketne.
28 “‘To ka ng’ato ochiwo ne Jehova gimoro chuth, ok nyal us gino, kendo ok nyal ware, bed ni en dhano, kata chiaye, kata lowo. Gimoro amora ma ng’ato ochiwo ne Nyasaye chuth bedo gima ler moloyo e wang’ Jehova.+ 29 Ng’ato ang’ata mong’adne buch tho ok nyal war.+ Nyaka nege anega.+
30 “‘Achiel kuom apar+ mag gik moko duto ma piny onyago, bed ni gin cham kata olembe, gin mag Jehova. Gin gik maler ne Jehova. 31 Ka ng’ato dwaro waro achiel kuom apar mar mwandune moro amora, nyaka ochul nengo mwanduno kendo omedie achiel kuom abich mar nengono. 32 Bende, kuom jamni duto ma ng’ato nigo, enochiw achiel kuom apar. Sa ma jakwath kwano dhok kata rombe, chiaye moro amora mar apar mokadho e bwo ludhe nobed mar Jehova. 33 Kik onon ka be chiayeno ber kata rach, bende kik owile gi machielo. To ka po ni owile gi machielo, chiaye mar aparno kaachiel gi mowilegono duto nobed gik maler.+ Kendo ok nowargi.’”
34 Mago e chike ma ne Jehova omiyo Musa e Got Sinai mondo omi Jo-Israel.+
Hibrania, “makate,” tiende ni, pok mimiyo Nyasaye kuom misango mar kuwe.
Hibrania, “makate,” tiende ni, pok mimiyo Nyasaye kuom misango mar kuwe.
Hibrania, “lendo mar kuong’.” Nyalo bedo ni mano ne en lendo mikuong’ogo jaricho moro kata janeno motamore hulo wach moro.
Samoro ng’atno ne ok ochopo singone.
Efa achiel ne en lita 22. Som Apendiks B14.
Shekel achiel ne romre gi gram 11.4. Som Apendiks B14.
Efa achiel ne en lita 22. Som Apendiks B14.
Nenore ni mae ne en law machal gi apron kama.
Ma bende iluongo ni hanyinya.
Ma bende iluongo ni haniaf.
E dho Hibrania, wach molok ni “dhoho” tiende ng’eny kendo oriwo tuoche ma landore kendo ma mako pien dend dhano. Bende, onyalo riwo kit tuoche ma mako lewni kod udi.
Kata, “dhoho mar ng’atni ok nyal landore.”
Efa achiel ne en lita 22. Som Apendiks B14.
Kata, “log achiel.” Som Apendiks B14.
Efa achiel ne en lita 22. Som Apendiks B14.
Kata, “log achiel.” Som Apendiks B14.
Tiende nyalo bedo “Diel ma Lal.”
Ma en sanduk moting’o kite ma chiwo neno.
Hibrania, “diek.”
Kata, “giterorego.”
Nenore ni ma ne en tim ogendni ma ne lamo nyiseche ma nono, to chikno ok nyis ni koro Jo-Israel ne ok nyal tito yie tikgi e yo moro amora.
Hibrania, “efa mowinjore.” Som Apendiks B14.
Hibrania, “hin mowinjore.” Som Apendiks B14.
Kata nyalo bedo, “modhero.”
Hibrania, “ka chieng’ podho to mudho pok odonjo.”
Efa achiel ne en lita 22. Som Apendiks B14.
Hin achiel ne romre gi lita 3.67. Som Apendiks B14.
Efa achiel ne en lita 22. Som Apendiks B14.
Kata nyalo bedo, “otueyo chiemo.”
Efa achiel ne en lita 22. Som Apendiks B14.
Tiende ni, nying Jehova kaka oti kode e kwan matindo 15 kod 16.
Kata, “chunygi ma ok oter nyangu.”
Shekel achiel ne romre gi gram 11.4. Som Apendiks B14.
Shekel achiel ne romre gi gram 11.4. Som Apendiks B14.
Homer achiel ne nyalo bedo kilo 130 kama. Som Apendiks B14.
Gera achiel romre gi nus gram kama. Som Apendiks B14.