NEHEMIA

1 Magi e weche mag Nehemia*+ wuod Hakalia: E dwe mar Kislev,* higa mar 20 mar loch ruoth,* ne an Shushan*+ dala mochiel motegno.* 2 Kindeno e ma Hanani+ owadwa ne obiroe gi jomamoko ka giwuok Juda, kendo ne apenjogi wach Jo-Yahudi modong’ ma ne ok oter e tuech+ kod wach Jerusalem. 3 Ne giwachona kama: “Jo ma odong’ e dala ma ne ok oter e tuech ni marach kendo gin gi wich-kuot.+ Ohinga mag Jerusalem omukore marach+ kendo rangeyene owang’ gi mach.”+

4 Ka ne awinjo wechego, ne abet piny ma aywak kuom ndalo mang’eny ka atueyo chiemo+ kendo alamo Nyasaye manie polo. 5 Nawacho niya: “A Jehova, Nyasach polo, Nyasaye maduong’ kendo malich ma rito singruokne kendo ma kinde duto ohero jo ma ohere kendo ma rito chikene,+ 6 yie ichik iti mondo iwinj kendo iket wang’i kuoma, winj kwayona ma aketo e nyimi kawuono. Odiechieng’ gotieno alamo+ ne nyithind Israel ka ahulo richo ma Jo-Israel osetimo e nyimi. Wasetimo richo, an kaachiel gi od wuora.+ 7 Wasetimo marach e nyimi+ nikech ok wasemako chikeni kod bucheni ma ne imiyo Musa jatichni.+

8 “Yie ipar siem ma ne imiyo Musa jatichni niya: ‘Ka utimo marach, to abiro keyou e kind ogendni,+ 9 to ka uduogo ira kendo umako chikena, kata obedo ni jou okere nyaka e tung’ piny, abiro chokogi+ kuondego mi akelgi ka ma ne ayiero mondo nyinga obedie.’+ 10 Gin jotichni kendo jogi ma ne ireso gi tekoni mang’eny kod lweti man gi teko.+ 11 A Jehova, yie ichik iti ne lamona kendo iwinj lamo mar jotichni mohero miyo nyingi duong’. Yie iguedha kawuono kendo imi jalni onyisa ng’wono.”+

Gie kindeno, an e ma ne an jatend jolos divai ne ruoth.+

2 E dwe mar Nisan,* e higa mar 20+ mar loch Artashasta,+ divai ne oket e nyime, kendo kaka pile ne akawo divai mi amiyo ruoth.+ Kata kamano, ne pok akuyoga kamano e nyim ruoth. 2 Omiyo, ruoth nopenja kama: “Ang’o momiyo ikuyo kama to ok ituo? Nyaka bed ni nitie gima chando chunyi.” Ka ne awinjo kamano, ne abedo maluor ahinya.

3 Nawacho ne ruoth niya: “Ruoth odag aming’a! Dabed mamor nade to dala ma oyikie kwerena omukore mokethore kendo rangeyene owang’ gi mach?”+ 4 Ruoth nopenja niya: “Koro idwaro ni atimni ang’o?” Kanyo gi kanyo, ne alamo Nyasach polo.+ 5 Eka ne awacho ne ruoth niya: “Ka ruoth oneno ni ber kendo ka ayudo ng’wono e wang’i, to yiena adhi Juda, dala ma noyikie kwerena mondo agere kendo.”+ 6 Eka ruoth nopenja ka chiege obet bute niya: “Wuodhno biro kawi ndalo adi, to ibiro duogo karang’o?” Kuom mano, ruoth ne oyiena mondo adhi,+ kendo ne anyise chieng’ ma aduogoe.+

7 Kae to nanyiso ruoth kama: “Kineno ni ber, to yie mondo omiya barupe ma adhi miyo gavana mag alwora man Loka Aora,*+ mondo giyiena akal e pinjegi nyaka achop Juda, 8 yie mondo omiya bende barua ma atero ne Asaf jarit Bungu mar Ruoth mondo omiya bepe ma idhi gergo rangeye mag Ohinga+ mar Hekalu kod ohinga mag dala,+ kaachiel gi mag ot ma adhi dakie.” Omiyo, ruoth nomiyagi+ nimar lwedo maber mar Nyasacha ne ni koda.+

9 Ka ne achopo ir gavana mag alwora man Loka Aora, ne amiyogi barupe ma ruoth nomiya. Ruoth nomiya bende jotend lweny kod joidh farese. 10 Ka ne Sanbalat+ Ja-Horon gi Tobia+ jatich ma Ja-Amon+ owinjo wachno, ne giwinjo marach ahinya ni ng’ato obiro timo gima ber ne Jo-Israel.

11 Gikone, ne achopo Jerusalem mi abet kuro kuom ndalo adek. 12 An kaachiel gi ji manok ma ne an-go, ne wachiewo gotieno, to ne ok anyiso ng’ato ang’ata gima Nyasaye ne oketo e chunya mondo atim ne Jerusalem. Ne waonge gi le moro amora mak mana punda ma ne aidho. 13 Ne awuok gotieno ka aluwo Ranga Hoho.+ Ne akalo nyim Soko mar Thuol Maduong’ mi adhi nyaka Ranga Pidhe mag Buru.*+ Ne anono ohinga mag Jerusalem ma nosegore piny kod rangeyene ma ne osewang’ gi mach.+ 14 Ne achomo Ranga Soko+ kod Yawo mar Ruoth, to kanyo ne diny ma le ma ne aidho ne ok nyal kalo. 15 Kata kamano, ne adhi nyime wuotho e hoho+ gotieno ka anono ohinga. Bang’ mano, ne aduogo mi adonjo gi Ranga Hoho, kae to ne adok dala.

16 Jotelo makonyo+ ne ok ong’eyo ka ma ne adhiye kod gima ne adhi timo, nimar ne pok awuoyo gi Jo-Yahudi, jodolo, jodongo, jotelo makonyo, kod jotich mamoko duto. 17 Eka ne anyisogi kama: “Uneno chandruok maduong’ ma wan-go, kaka Jerusalem omukore kendo rangeyene owang’ gi mach. Biuru mondo wager ohingni mag Jerusalem mondo watiek wich-kuot momakowani.” 18 Kae to ne anyisogi kaka lwedo maber mar Nyasacha ne ni koda+ gi weche ma ruoth nowachona.+ Ka ne giwinjo kamano, ne giwacho ni, “Wachakuru gedo.” Kuom mano, ne gitego lwetgi ne tich maberno.+

19 Ka ne Sanbalat Ja-Horon, gi Tobia+ jatich ma Ja-Amon,+ kod Geshem Ja-Arabia+ owinjo wachno, ne gichako jarowa+ kendo nyisowa achaya ka giwacho ni, “Magi to ang’o ma utimogi? Ung’anyo ne ruoth, koso?”+ 20 Kata kamano, ne adwokogi niya: “Nyasach polo e ma biro konyowa nyaka watieki.+ Wan jotichne wabiro dhi nyime gi gedo. Un to uonge pok moro amora kata gimoro amora ma usetimo ma diparugo Jerusalem.”+

3 Eliashib+ jadolo maduong’ gi owetene ma jodolo ne odhi mogero Ranga Rombe.+ Ne giwale+ kendo ne gichungo dhoutene. Ne giwale nyaka e Ohinga mar Mea,+ kendo nyaka e Ohinga mar Hananel.+ 2 Jo-Jeriko+ ne gedo e bathgi; to Zakur wuod Imri ne gedo e bath Jo-Jeriko.

3 Yawuot Hasenaa ne ogero Ranga Rech.+ Ne gigoyone bepe,+ kendo giloso dhoutene, gik mirindogigo, kod lodi mage. 4 E bathgi, Meremoth+ wuod Urija ma wuod Hakoz noloso kuonde mokethore, to e bathgi, Meshulam+ wuod Berekia ma wuod Meshezabel noloso kuonde mokethore, kendo e bathgi, Zadok wuod Baana noloso kuonde mokethore. 5 Jo-Tekoa+ ne gero kuonde mokethore e bathgi. Kata kamano, jogi ma rahuma ne odagi bolore mondo gitim tich ma jotendgi ne omiyogi.

6 Joyada wuod Pasea kod Meshulam wuod Besodeya ne oloso kuonde mokethore e Ranga Dala Machon.+ Ne gigoyone bepe kendo ne giloso dhoutene, gik mirindogigo, kod lodi mage. 7 Melatia Ja-Gibeon+ kod Jadon Ja-Meronoth noloso kuonde mokethore e bathgi. Magi ne gin Jo-Gibeon kod Jo-Mizpa+ ma ne nitie e bwo loch mar gavana mar alwora man Loka Aora.*+ 8 Uziel wuod Harhaya ma en achiel kuom jathedh dhahabu, noloso kuonde mokethore e bathgi, kendo Hanania jalos modhi ma nigi suya mamit noloso kuonde mokethore e bathe, kendo ne gipedho kite Jerusalem nyaka e Ohinga Malach.+ 9 Refaya wuod Hur ma ne en jaduong’ motelo ne nus mar dala mar Jerusalem, noloso kuonde mokethore e bathgi. 10 E bathgi, Jedaya wuod Harumaf noloso kuonde mokethore e nyim ode, to Hatush wuod Hashabnia noloso kuonde mokethore e bathe.

11 Malkija wuod Harim+ kod Hashub wuod Pahath-moab+ noloso ka machielo ma ne okethore kod kuonde ma ne okethore e Ohinga mar Kendo.+ 12 To Shalum wuod Halohesh ma ne en jaduong’ motelo ne nus mar dala mar Jerusalem kaachiel gi nyige, noloso kuonde mokethore e bathgi.

13 Hanun gi Jo-Zanoa+ noloso kuonde mokethore e Ranga Hoho.+ Ne ogere kae to ne oloso dhoutene, gik mirindogigo, kod lodi mage. Ne giloso ka ma romo bede 1,000* e ohinga nyaka e Ranga Pidhe mag Buru.*+ 14 Malkija wuod Rekab ma jaduong’ Beth-hakerem+ noloso kuonde mokethore e Ranga Pidhe mag Buru.* Ne ogere, kae to ne oloso dhoutene, gik mirindogigo, kod lodi mage.

15 Shalun wuod Kolhoze ma jaduong’ Mizpa+ noloso kuonde mokethore e Ranga Soko.+ Ne ogere kaachiel gi tate, moloso dhoutene, gik mirindogigo, kod lodi mage, bende ne oloso kuonde mokethore e ohinga mar Yawo+ mar Shela man e bath Puoth Ruoth,+ kendo nolose nyaka e Ngas+ milorgo e Dala Daudi.+

16 E bathe ne nitie Nehemia wuod Azbuk ma ne en jaduong’ motelo ne nus gweng’ mar Beth-zur.+ Ne oloso kuonde mokethore e nyim Kuonde Yiko mar Daudi+ nyaka e yawo+ ma ne oger, kendo nyaka e Od Jo-Mathuondi.

17 Jo-Lawi ne ogero kuonde mokethore e bathe. Ne gin Rehum wuod Bani; e bathe ne nitie Hashabia ma ne en jaduong’ motelo ne nus gweng’ mar Keila.+ Ne oloso kuonde mokethore e gweng’gi. 18 Owetene ne oloso kuonde mokethore e bathe. Bavai wuod Henadad ma ne en jaduong’ motelo ne nus gweng’ mar Keila noloso kuonde mokethorego.

19 E bathe ne nitie Ezer wuod Jeshua+ ma ne en jaduong’ piny Mizpa. Ne oloso ka machielo ma ne okethore e nyim ka miidhogo Od Kano Gige Lweny man but Siro Mamako Ohinga.+

20 E bathe ne nitie Baruk wuod Zabai.+ Notiyo gi kinda kendo ne oloso ka machielo ma ne okethore chakre e Siro Mamako Ohinga nyaka ka ma idonjogo e od Eliashib+ jadolo maduong’.

21 E bathe ne nitie Meremoth+ wuod Urija ma wuod Hakoz. Ne oloso ka machielo mokethore chakre e dhood Eliashib nyaka e giko mar odno.

22 Jodolo mowuok e gwenge mag Jordan*+ noloso kuonde mokethore e bathe. 23 E bathgi ne nitie Benjamin kod Hashub. Ne giloso kuonde mokethore e nyim odgi. E bathgi ne nitie Azaria wuod Maaseya ma wuod Anania. Ne oloso kuonde mokethore machiegni gi ode. 24 E bathe ne nitie Binui wuod Henadad. Ne oloso ka machielo mokethore chakre od Azaria nyaka e Siro Mamako Ohinga+ kendo nyaka e kona.

25 E bathe ne nitie Palal wuod Uzai. Ne oloso kuonde mokethore e nyim Siro Mamako Ohinga kod e ohinga mochakore e Od Ruoth,+ ohinga ma malo mogeng’o Laru mar Jarit.+ E bathe ne nitie Pedaya wuod Parosh.+

26 Jo ma ne tiyo e hekalu*+ ma nodak Ofel+ noloso kuonde mokethore ma gichopo nyaka dho Ranga Pi+ gi yo wuok chieng’ kod ohinga mowuok oko.

27 E bathgi ne nitie Jo-Tekoa.+ Ne giloso ka machielo mokethore e nyim ohinga maduong’ mowuok oko nyaka e ohinga mar Ofel.

28 Jodolo ne oloso kuonde mokethore e wi Ranga Farese.+ Ng’ato ka ng’ato ne oloso kuonde mokethore momanyore gi ode.

29 E bathgi ne nitie Zadok+ wuod Imer. Noloso kuonde mokethore momanyore gi ode.

E bathe ne nitie Shemaya wuod Shekania ma ne en jarit Ranga Wuok Chieng’.+ Noloso kuonde mokethore.

30 E bathe ne nitie Hanania wuod Shelemia kod Hanun wuod Zalaf mar auchiel. Ne giloso ka machielo mokethore.

E bathgi ne nitie Meshulam+ wuod Berekia. Ne oloso ka momanyore gi ode.

31 E bathe ne nitie Malkija, ma ne en achiel kuom jothedh dhahabu. Noloso kuonde mokethore nyaka e od jo ma tiyo e hekalu*+ kod jolok ohala manie Ranga Nono kendo nyaka e ot ma malo manie kona.

32 Jothedh dhahabu kod jolok ohala ne oloso kuonde mokethore chakre ot ma malo manie kona nyaka Ranga Rombe.+

4 Ka ne Sanbalat+ owinjo awinja ni wagero kuonde mokethore e ohinga, iye ne owang’ kendo ne okecho ahinya, mi nosiko kojaro Jo-Yahudi. 2 Nowuoyo gi owetene kaachiel gi jolweny mag Samaria, kowacho kama: “Jo-Yahudi ma yom yomgi timo ang’o? Be ginyalo tiyo tijni kendgi? Be ginyalo chiwo misengni? Be ginyalo tieko tijni gi odiechieng’ achiel? Be ginyalo chiero kite mowang’ manie pidhe?”+

3 Eka Tobia+ Ja-Amon+ ma nochung’ e bathe nowacho niya: “Kata ka bwe e ma oidho e wi ohinga ma gigerono, to ohingano nyalo lwar.”

4 Yaye Nyasachwa, yie iwinj kaka ijarowa+ kendo yie idwok ayany ma giyanyowago e wigi giwegi,+ kendo we mondo oyakgi mi tergi e tuech. 5 Kik iwenegi kethogi, kendo kik iruch richogi e nyimi+ nikech giseyanyo jogedo.

6 Omiyo, ne wadhi nyime gero ohinga, kendo ne wariwo ohinga duto mi ne wagere nyaka nusne kadhi malo, kendo oganda ne odhi nyime keto chunygi e tich.

7 Koro ka ne Sanbalat, Tobia,+ Jo-Arabia,+ Jo-Amon, kod Jo-Ashdod+ owinjo ni tij gero ohinga mar Jerusalem ne dhi nyime, kendo ni ne idino kuonde ma nomukore, igi ne owang’ matek. 8 Ne gichano mondo gibi giked gi Jerusalem, kendo mondo gikel tungni e dala. 9 To ne walamo ka wakwayo Nyasachwa, kae to ne waketo jorit mondo orit dala odiechieng’ gotieno.

10 Kata kamano, Jo-Juda ne wacho kama: “Jotich koro oseol to pidhe mag gik momukore pod ng’eny. Omiyo, ok wabi tieko gero ohinga.”

11 To jowasikwa ne siko wacho kama: “Wabiro poyogi, kendo wabiro negogi mi wachung tijno.”

12 Sa asaya ma Jo-Yahudi ma ne odak machiegni kodgi obiro, ne gisiko giwachonwa kama: “Gibiro tuch gi kuonde duto mi gimonjowa.”

13 Omiyo, ne aketo chwo kuonde man piny kendo ma ok ogeng’ore e tok ohinga kaluwore gi anyuolagi, kendo ng’ato ka ng’ato noting’o liganglane, tonge, kod atung’ mare. 14 Ka ne aneno kaka ne giluor, ne awuok mapiyo mi anyiso jodongo,+ jotelo makonyo, kod oganda duto niya: “Kik uluorgi.+ Paruru Jehova ma en Nyasaye maduong’ kendo malich.+ Keduru ne oweteu, ne yawuotu, ne nyiu, ne mondeu, kendo ne miechu.”

15 Bang’ ka jowasikwa nowinjo ni waseng’eyo gima gitemo timo, kendo ni Nyasaye madier ne oseketho paro ma ne gin-go, waduto ne wadok e tij gero ohinga. 16 Chakre chieng’no, naketo nus mag joga mondo oti+ to nus machielo mondo oting’ tonge, okumbni, kod atung’, kendo ne girwako law akor. To Jodongo+ ne oriwo lwedo Jo-Juda duto 17 ma ne gero ohinga. Joting’ gik moko ne tiyo gi lwedo achiel to lwetgi machielo ne giting’ogo gir lweny. 18 Jogedo notweyo ligangla e nungogi ka gigedo, to ng’at ma ne onego okudh tung’+ nochung’ e batha.

19 Eka ne awacho ne jodongo, jotelo makonyo, kod oganda duto kama: “Tich pod ng’eny monego otim, to wakelore wakelore ka wagedo. 20 Kuom mano, kuwinjo ka tung’ oywak, biuru uchokru ka ma wantie. Nyasachwa biro kedonwa.”+

21 Kuom mano, ne wadhi nyime gi gedo ka nus mar jomamoko oting’o tonge, chakre kogwen nyaka sa ma sulwe chako rieny. 22 Kindeno ne anyiso oganda niya: “Chwo duto gi jotichgi onind Jerusalem, kendo gibiro bedonwa jorit gotieno to godiechieng’ gitiyo.” 23 Omiyo, an kaachiel gi owetena, gi jotichna,+ kod jorit ma ne ni koda ne ok walonyo lepwa, kendo kinde duto ng’ato ka ng’ato kuomwa ne oting’o gire mar lweny e lwete ma korachwich.

5 Kata kamano, ji gi mondegi ne ywagore ahinya nikech gik ma owetegi ma Jo-Yahudi ne timonegi.+ 2 Jomoko ne wacho niya: “Wan gi yawuoyi kod nyiri mang’eny. Wadwaro cham ma wanyalo chamo mondo kik watho.” 3 Moko to ne wacho kama: “Wasingo lopewa, puothewa mag mzabibu, kod utewa mondo wayud cham e kinde ma chiemo nokieni.” 4 Moko to ne wacho niya: “Wasingo lopewa kod puothewa mag mzabibu mondo wayud pesa ma wachulogo osuru mar ruoth.+ 5 Donge wan gi owetewa wan joka ng’ato,* kendo nyithindwa gi nyithindgi chalre achala koso? To e ma nyaka wachiw yawuotwa kod nyiwa mondo obed wasumbni, kata sani nyiwa moko osedoko wasumbni.+ To onge gima dwatim mondo wageng’ gima kama nikech lopewa kod puothewa mag mzabibu gin mag jomoko.”

6 Ka ne awinjo ywakgi kod weche ma ne giwacho, iya nowang’ ahinya. 7 Naparo matut e wi wechego, kendo ne awuoyo gi jodongo kod jotelo makonyo, mi awachonegi kama: “Ng’ato ka ng’ato kuomu chuno owadgi mondo omiye ohala kuom gik ma ohole.”+

E wi mano, ne atimo chenro mondo otim chokruok maduong’ nikech gin. 8 Ne awachonegi kama: “Wasetimo duto ma wanyalo mondo wadwok owetewa ma Jo-Yahudi ma ne ous ne ogendni mamoko. To un koro uuso oweteu uwegi?+ Udwaro ni wang’iewgi kendo?” Dhogi ne omoko kendo ne onge gima ne ginyalo wacho. 9 Eka ne awachonegi kama: “Gima utimoni ok ber. Donge owinjore uwuoth kuluoro Nyasachwa+ mondo ogendni mamoko ma wasikwa kik yanywa? 10 E wi mano, an gi owetena kod jotichna wahologi pesa kod cham. Waweuru hologi gik moko mondo wayud ohala.+ 11 Kawuononi, akwayou ni udwoknegi lopegi,+ puothegi mag mzabibu, puothegi mag zeituni, kod utegi kaachiel gi ohala* mag pesa, gi mag cham, gi mag divai manyien, kod mag mo musebedo ka ukawo kuomgi.”

12 Ne giwacho kama: “Wabiro dwokonegi gigo duto kendo ok wabi kwayo gimoro amora kuomgi kendo. Wabiro timo mana kaka iwacho.” Omiyo, ne aluongo jodolo kendo ne anyisogi mondo gikuong’re ni gibiro timo kaka gisingono. 13 Bende, ne ateng’o lawa mi awacho niya: “Ng’ato ang’ata ma ok rit singruogni, Nyasaye madier mondo oteng’e oko oa e ode kendo oa e mwandune, kendo kamano e kaka ibiro teng’e mi odong’ nono.” Eka oganda ma ne ochokore ne owacho niya: “Amin!”* Ne gipako Jehova, kendo oganda notimo kaka ne gisingore.

14 To bende, kuom higni 12 ma ruoth ne oketa gavana+ e piny Juda, kochakre higa mar 20+ mar Ruoth Artashasta+ nyaka higa mar 32+ mar lochne, an kod owetena ne ok wayie kawo chiemo ma ne owinjore omi gavana.+ 15 Kata kamano, gavana duto ma ne otelona noketo ne oganda ting’ mapek ahinya nikech ne gikawo shekel* 40 mag fedha mondo ging’iewgo chiemo kod divai pile ka pile. Jotichgi bende ne sando oganda. To an ok natimo kamano+ nikech ne aluoro Nyasaye.+

16 E wi mano, nariwo lwedo tij gero ohingani, kendo ne ok wakawo lop ng’ato ang’ata.+ Jotichna duto ne ochokore mondo giti kanyo. 17 Jo-Yahudi 150 kod jotelo makonyo ne chiemo e mesana kaachiel gi jomamoko ma ne owuok e pinje mamoko. 18 Pile ka pile ne iyang’ona ruath achiel, rombe auchiel machwe, kod winy. Bang’ ndalo apar ka ndalo apar ne wamadho divai mogundho mopogore opogore. Kata obedo ni ne wachamo gigo duto, ne ok akawo chiemo ma ne oyie ne gavana kawo kuom oganda, nikech oganda ne nigi ting’ mapek monego giting’. 19 A Nyasacha, par gik moko duto ma asetimo ne ogandani, kendo itimna maber.+

6 Ka ne onyis Sanbalat, Tobia,+ Geshem Ja-Arabia,+ kod wasikwa mamoko ni wasetieko gero ohinga+ kendo ni osedin kuonde duto (kata obedo ni nyaka chop kanyo ne pok aloso dho rangeye),+ 2 mapiyo, Sanbalat kod Geshem ne oorona wach niya: “Bi mondo warom e mier manie Paw Ono.”+ Kata kamano, ne gidwaro mana hinya. 3 Ne aoronegi joote mondo owachnegi kama: “An-gi tich maduong’ ahinya monego atim, omiyo ok anyal lor iru. Ere kaka dawe tich ochung’ mondo abi iru?” 4 Ne giorona ote achiel achielno nyading’wen, to kindego duto ne adwokogi mana gi dwoko achielno.

5 To mar abich, Sanbalat ne ooro jatije gi wach achiel achielno, kendo ne omiye barua ma ok odin. 6 Ne ondike kama: “Wach oselandore ne ogendni duto, kendo Geshem+ bende wacho ni in kaachiel gi Jo-Yahudi uchano ng’anyo.+ Mano e momiyo ugero ohinga, kendo wachore ni in e ma idhi bedo ruodhgi. 7 Bende, iseketo jonabi mondo oland wachni e Jerusalem duto niya: ‘Koro wan gi ruoth e piny Juda!’ Wechegi biro chopo e it ruoth. Omiyo, koro bi mondo walos wachni.”

8 Kata kamano, ne adwoke kama: “Gik miwachogo duto pok otimore. Gin mana gik miparo apara.” 9 Nimar jogo duto ne temo bwogowa ka giwacho niya: “Chunygi biro jok kendo tich biro chung’.”+ Koro akwayi, teg lwetena.+

10 Eka ne adhi e od Shemaya wuod Delaya ma wuod Mehetabel ka ma ne otueye. Ne owachona kama: “Wadhi e od Nyasaye madier, mondo wadonj e hekalu kendo walorre e iye kuno, nimar jogo biro mondo ginegi. Gibiro mondo ginegi gotieno.” 11 To ne awachone kama: “Be daring adier? Be dadonj e hekalu mondo ares ngimana?+ Ok abi dhi!” 12 Bang’e nafwenyo ni Nyasaye ne ok oore, to Tobia gi Sanbalat+ e ma ne ochule mondo okor weche marichogo kuoma. 13 Ne osechule mondo obwoga kendo omi atim richo, mondo giketh nyinga kendo giyud gima ginyalo yanyago.

14 A Nyasacha, par gik ma Tobia+ gi Sanbalat notimo, kaachiel gi Noadia janabi ma dhako kod jonabi mamoko duto ma ne dwaro miya luoro.

15 Kuom mano, notiek gero ohinga tarik 25 e dwe mar Elul.* Tijno ne okawo ndalo 52.

16 Ka ne wasikwa duto owinjo wachno kendo ka pinje duto ma ne olworowa noneno ohinga, wich-kuot maduong’ ne omakogi,+ kendo ne gifwenyo ni Nyasachwa e ma nokonyowa tieko tijno. 17 E kindego, jodong+ Juda ne oro barupe mang’eny ne Tobia, to Tobia ne dwokogi. 18 Ji mathoth e Juda ne okuong’ore ni gibiro makore kode, nimar ne en or Shekania wuod Ara,+ kendo Jehohanan wuode ne okendo nyar Meshulam+ wuod Berekia. 19 Bende, ne gisiko gipakonago kae to gidhi nyise gik ma awacho. Eka Tobia ne orona barupe mondo obwogago.+

7 Ka ne osetiek ger kuonde mokethore e ohinga,+ naloso dho rangeye,+ kae to noket jorit rangeye,+ jower,+ kod Jo-Lawi+ e tijegi. 2 Bende, naketo Hanani+ owadwa mondo obed jatelo Jerusalem, en kaachiel gi Hanania jatend Ohinga,+ nimar ne en ng’at mogen ahinya kendo moluoro Nyasaye+ moloyo ji mang’eny. 3 Ne anyisogi kama: “Kik yaw rangeye mag Jerusalem nyaka chieng’ tegno, kendo sa ma jorit nie e tich, onego gilorgi motegno mi girindgi. Bende, keturu jo ma odak Jerusalem mondo orit gotieno, ka ng’ato ka ng’ato rito ka ma oketee kendo ng’ato ka ng’ato e dho ode owuon.” 4 Koro dala ne duong’ kendo lach, ji ne tin e iye,+ to kata mana udi bende ne pok oger e iye.

5 To Nyasacha nomiya paro mar choko jodongo kod jotelo makonyo, kaachiel gi oganda mondo andik nyingegi kaluwore gi anyuolagi.+ Eka ne ayudo buk mondikie nyinge mag anyuola mag jo ma ne okwongo duogo Jerusalem, kendo gik ma ne ondik e iye e magi:

6 To magi e jo pinyno ma noduogo Jerusalem kod Juda ka gia e tuech, ka ma Nebukadnezar+ ruodh Babulon noterogie.+ Ng’ato ka ng’ato nodok e gweng’gi.+ 7 Ne giduogo kaachiel gi Zerubabel,+ Jeshua,+ Nehemia, Azaria, Raamia, Nahamani, Mordekai, Bilshan, Mispereth, Bigvai, Nehum, gi Baana.

Jo-Israel ma chwo ne gin:+ 8 yawuot Parosh, 2,172; 9 yawuot Shefatia, 372; 10 yawuot Ara,+ 652; 11 yawuot Pahath-moab,+ ma joka Jeshua gi Joab,+ 2,818; 12 yawuot Elam,+ 1,254; 13 yawuot Zatu, 845; 14 yawuot Zakai, 760; 15 yawuot Binui, 648; 16 yawuot Bebai, 628; 17 yawuot Azgad, 2,322; 18 yawuot Adonikam, 667; 19 yawuot Bigvai, 2,067; 20 yawuot Adin, 655; 21 yawuot Ater, ma joka Hezekia, 98; 22 yawuot Hashum, 328; 23 yawuot Bezai, 324; 24 yawuot Harif, 112; 25 yawuot Gibeon,+ 95; 26 chwo mag Bethlehem kod mag Netofa, 188; 27 chwo mag Anathoth,+ 128; 28 chwo mag Beth-azmaveth,* 42; 29 chwo mag Kiriath-jearim,+ Kefira, kod Beeroth,+ 743; 30 chwo mag Rama kod Geba,+ 621; 31 chwo mag Mikmas,+ 122; 32 chwo mag Bethel+ kod Ai,+ 123; 33 chwo mag Nebo machielo, 52; 34 yawuot Elam machielo, 1,254; 35 yawuot Harim, 320; 36 yawuot Jeriko, 345; 37 yawuot Lod, Hadid, gi Ono,+ 721; 38 yawuot Senaa, 3,930.

39 Jodolo ne gin:+ yawuot Jedaya, ma joka Jeshua, 973; 40 yawuot Imer, 1,052; 41 yawuot Pashur,+ 1,247; 42 yawuot Harim,+ 1,017.

43 Jo-Lawi+ ne gin: yawuot Jeshua, ma joka Kadmiel,+ ma yawuot Hodeva, 74. 44 Jower+ ne gin: yawuot Asaf,+ 148. 45 Jorit rangeye+ ne gin: yawuot Shalum, yawuot Ater, yawuot Talmon, yawuot Akub,+ yawuot Hatita, yawuot Shobai, 138.

46 Jo ma ne tiyo e hekalu*+ ne gin: yawuot Ziha, yawuot Hasufa, yawuot Tabaoth, 47 yawuot Keros, yawuot Sia, yawuot Padon, 48 yawuot Lebana, yawuot Hagaba, yawuot Salmai, 49 yawuot Hanan, yawuot Gidel, yawuot Gahar, 50 yawuot Reaya, yawuot Rezin, yawuot Nekoda, 51 yawuot Gazam, yawuot Uza, yawuot Pasea, 52 yawuot Besai, yawuot Meunim, yawuot Nefishesim, 53 yawuot Bakbuk, yawuot Hakufa, yawuot Harhur, 54 yawuot Bazlith, yawuot Mehida, yawuot Harsha, 55 yawuot Barkos, yawuot Sisera, yawuot Tema, 56 yawuot Nezia, kod yawuot Hatifa.

57 Yawuot jotich Solomon+ ne gin: yawuot Sotai, yawuot Sofereth, yawuot Perida, 58 yawuot Jaala, yawuot Darkon, yawuot Gidel, 59 yawuot Shefatia, yawuot Hatil, yawuot Pokereth-hazebaim, kod yawuot Amon. 60 Ji duto ma ne tiyo e hekalu*+ kod yawuot jotich Solomon ne gin ji 392.61 Magi e jo ma ne owuok Tel-mela, Tel-harsha, Kerub, Adon, kod Imer, to ne ok ginyal chiwo gima nyiso ayanga dhoudi ma ne giaye, kata ka be anyuolagi ne en mar Israel:+ 62 yawuot Delaya, yawuot Tobia, yawuot Nekoda, 642. 63 To kuom jodolo: yawuot Habaya, yawuot Hakoz,+ yawuot Barzilai, ma nokendo achiel kuom nyi Barzilai+ Ja-Gilead kendo noluongore gi nyinggi. 64 Jogi nomanyo nyingegi e buge ma nondikie nyinge anyuola, to ne ok giyudogi. Kuom mano, ne ogolgi e tij dolo.+ 65 Gavana*+ ne onyisogi ni ne ok onego gicham gik maler moloyo+ nyaka jadolo bedie ma nyalo penjo wach kuom Urim gi Thumim.+

66 Oganda duto ma nochokore kanyakla ne romo ji 42,360,+ 67 ka ok okwan wasumbni ma chwo gi ma mon+ ma kwan-gi ne romo 7,337; bende, ne gin gi jower ma chwo gi ma mon ma romo 245.+ 68 Ne gin gi farese 736, nyumbu* 245, 69 ngamia 435, kod punde 6,720.

70 Moko kuom jodong dhoudi nogolo chiwo mondo gisirgo tich ma ne dhi nyime.+ Gavana* bende nogolo drakma* 1,000 mag dhahabu, bakunde 50, kod kandho 530 mag jodolo.+ 71 To moko kuom jodong dhoudi nogolo chiwo mondo gisirgo tich. Ne gigolo drakma 20,000 mag dhahabu kod fedha 2,200 mag mina.* 72 Jomamoko duto ne ochiwo drakma 20,000 mag dhahabu, fedha 2,000 mag mina, kod kandho 67 mag jodolo.

73 Jodolo, Jo-Lawi, jorit rangeye, jower,+ jomamoko, jo ma tiyo e hekalu,* kaachiel gi Jo-Israel duto nochako dak e miechgi.+ To ka nochopo dwe mar abiriyo,+ noyudo ka Jo-Israel ni e miechgi.+

8 Ji duto ne ochokore gi paro achiel e laru manie e nyim Ranga Pi,+ mi giwacho ne Ezra+ jandiko mondo okel bug Chik Musa,+ ma Jehova nochiko Jo-Israel mondo oluw.+ 2 Kuom mano Ezra jadolo nokelo bug Chik e nyim chokruok+ mar chwo, mon, gi ji duto ma ne nyalo winjo tiend gik miwacho, e odiechieng’ mokwongo mar dwe mar abiriyo.+ 3 Eka ne osome gi dwol maduong’+ e laru ma ne nie nyim Ranga Pi, chakre okinyi mang’ich nyaka odiechieng’ tir. Ne osome ne chwo, mon, kod ji duto ma ne nyalo winjo tiend gik miwacho. Ogandano nochiko itgi adimba+ sa ma ne isomo bug Chik. 4 Ezra jandiko nochung e wi ndiri mar bao ma ne olos mondo otigo e odiechieng’no. Jo ma ne ochung’ e bade ma korachwich ne gin Matithia, Shema, Anaya, Uria, Hilkia, kod Maaseya. To jo ma ne ochung’ e bade koracham ne gin Pedaya, Mishael, Malkija,+ Hashum, Hash-badana, Zekaria, kod Meshulam.

5 Ezra noelo bugno e nyim oganda duto, nimar ne ochung’ ka ma oting’ore. Ka ne oyawe, ji duto ne oa malo. 6 Eka Ezra nopako Jehova Nyasaye madier kendo Nyasaye Maduong’, to ji duto ne owacho ni, “Amin!* Amin!”+ ka giting’o bedegi malo. Ne gigoyo chonggi piny kendo gikulore ne Jehova nyaka e lowo. 7 Jeshua, Bani, Sherebia,+ Jamin, Akub, Shabethai, Hodia, Maaseya, Kelita, Azaria, Jozabad,+ Hanan, kod Pelaya, ma ne gin Jo-Lawi ne lero tiend Chik ka oganda+ ochung’. 8 Ne gidhi nyime somo bugno gi dwol maduong’, ne gisomo Chik Nyasaye madier, ka gilero tiende maber. Omiyo, ne gikonyo ji winjo tiend gima isomo.+

9 Nehemia ma ne en gavana,* gi Ezra+ jadolo kendo jandiko, kod Jo-Lawi ma ne puonjo oganda, ne owacho ne ji niya: “Ma en odiechieng’ maler mowal ne Jehova Nyasachu.+ Kuom mano, kik uku kendo kik uywagi.” Nimar ji ne ywak ka ne giwinjo weche mag Chik. 10 Ne owachonegi kama: “Dhi ucham gik mabeyo kendo umadh gik mamit, kendo uor chiemo+ ne jogo ma onge gimoro. Nimar ma en odiechieng’ maler mowal ne Ruodhwa. Kik uku, nikech mor mar Jehova e tekou.” 11 Jo-Lawi ne hoyo ji duto ka giwachonegi niya: “Weuru ywak! Nimar kawuono en odiechieng’ maler, kendo weuru kuyo.” 12 Kuom mano, ji duto ne odhi mi gichiemo kendo gimetho, mi ne gioro chiemo kendo ne gibedo mamor ahinya,+ nimar ne giwinjo tiend weche ma ne olernegi.+

13 E odiechieng’ mar ariyo, jodong dhoudi mag oganda duto, jodolo, kod Jo-Lawi, ne ochokore e nyim Ezra jandiko mondo ging’e matut tiend weche manie bug Chik. 14 Eka ne giyudo kondik e bug Chik ma Jehova nomiyo Musa ni Jo-Israel onego odag e kiche e ndalo sawo mitimo e dwe mar abiriyo,+ 15 kendo onego giland+ e miechgi duto kendo e Jerusalem duto niya: “Dhiuru e piny gode mondo ukel bede yiend zeituni, obudo, murtel, othidhe, kod bede yien mamoko mondo olosgo kiche mana kaka ondiki.”

16 Ji nowuok modhi kelo bede yien-go mondo gilosgo kiru, ng’ato ka ng’ato ne oloso kiru e tat ode kod laru mare. Bende, ne giloso kiru e laru mar od Nyasaye madier,+ gi laru manie Ranga Pi,+ kod laru manie Ranga Efraim.+ 17 Omiyo, ji duto ma ne oduogo kowuok e tuech, ne ogero kiche kendo ne gidak e kichego nikech Jo-Israel ne pok otimo kamano chakre ndalo Joshua+ wuod Nun nyaka ndalono, omiyo ne gin gi mor maduong’ ahinya.+ 18 Pile ka pile ne isomo bug Chik mar Nyasaye madier.+ Ne gitimo kamano chakre odiechieng’ mokwongo nyaka odiechieng’ mogik. Ne gitimo sawono kuom ndalo abiriyo, to e odiechieng’ mar aboro ne gitimo chokruok mowal mana kaka chik ne dwaro.+

9 E odiechieng’ mar 24 mar dweni, Jo-Israel nochokore. Ne gitueyo chiemo ka girwako lep gunia kendo ne gibukore gi buru.+ 2 Jo-Israel ne opogore oa kuom jodak duto+ kendo ne gichung’ mi gihulo richogi kod ketho mag wuonegi.+ 3 Ne gidhi nyime chung’ mi gisomo bug Chik+ mar Jehova Nyasachgi gi dwol maduong’ kuom seche adek, kendo kuom seche adek mamoko ne gihulo richogi ka gikulore e nyim Jehova Nyasachgi.

4 Jeshua, Bani, Kadmiel, Shebania, Buni, Sherebia,+ Bani, kod Kenani nochung’ e ndiri+ mar Jo-Lawi, mi ne giywak matek ne Jehova Nyasachgi. 5 Kendo Jeshua, Kadmiel, Bani, Hashabneya, Sherebia, Hodia, Shebania, kod Pethahia ma ne gin Jo-Lawi nowacho kama: “Chung’uru mondo upak Jehova Nyasachu nyaka chieng’.+ A Nyasachwa, yie mondo gipak nyingi maduong’, nying maduong’ moloyo gueth kod pak duto ma dhano nyalo miyi.

6 “In kendi e Jehova.+ Ne ichueyo polo, ee mana polo man malo moloyo kod ogandane mar lweny duto, kod piny gi gik moko duto man e iye, kaachiel gi nembe kod gik moko duto manie igi. Irito ngimagi giduto, kendo oganda lweny duto manie polo kuloreni. 7 In e Jehova Nyasaye madier, Nyasaye ma ne oyiero Abram,+ kendo ne igole Ur+ ma en dala Jo-Kaldea, miloko nyinge ni Ibrahim.+ 8 Ne ineno ka chunye long’o+ mitimo kode singruok ni ibiro miye piny Jo-Kanaan, gi Jo-Hiti, gi Jo-Amor, gi Jo-Perizi, gi Jo-Jebus, kod Jo-Girgash, mondo obed mare gi kothe.+ Kendo ne itimo kaka ne isingone nikech in ng’at makare.

9 “Ne ineno kaka kwerewa ne sandore e piny Misri,+ kendo ne iwinjo ywakgi e Nam Makwar. 10 Eka ne itimo ranyisi gi honni mondo isandgo Farao, gi jotichne duto, kod pinye duto,+ nimar ne ing’eyo ni gitimo marach+ ne kwerewa. Kamano ne imiyo nyingi obedo gi huma mosiko nyaka kawuononi.+ 11 Ne ibaro nam e nyimgi kendo ne gikalo ka ma otwo e dier nam,+ mi ne inyumo wasikgi e dier pi mana ka kidi mobol e pi motimo apaka.+ 12 Ne itelonegi godiechieng’ kitiyo gi siro mar bor polo, to gotieno ne itelonegi gi siro mar mach mondo omenynegi yo monego giluw.+ 13 Ne ibiro e wi Got Sinai+ miwuoyo kodgi ka in e polo,+ kendo ne imiyogi bucheni makare, kod chikeni madiera kendo mabeyo.+ 14 Ne ipuonjogi rito Sabato mari maler,+ kendo ne imiyogi chikeni kod weche miseng’ado kitiyo gi Musa jatichni. 15 Ka ne kech kayogi, ne imiyogi chiemo kowuok e polo,+ to ka ne riyo oloyogi, ne imiyogi pi kowuok e lwanda,+ kendo ne inyisogi ni gidonj mondo gikaw piny ma ne isingo ni ibiro miyogi.

16 “Kata kamano, kwerewa nobedo gi sunga+ kendo wigi nobedo matek,+ mi ne gitamore luwo chikeni. 17 Ne gitamore winji+ kendo wigi ne owil gi honni madongo ma ne itimonegi, to ne gibedo gi wich teko mi giyiero ng’ato mondo oduokgi e tuech e piny Misri.+ Kata kamano, in Nyasaye moikore weyo ne ji kethogi, ing’won kendo ikecho ji, iyi ok wang’ piyo, kendo igundho gi hera mosiko,+ mano e momiyo ne ok ijwang’ogi.+ 18 Kata ka ne githedho nyaroya mar chuma kendo giwacho ni, ‘Ma e Nyasachu ma ne ogolou e piny Misri,’+ mi gitimo timbe malich mag achaya, 19 to e ma pod kuom ng’wononi mogundho ne ok ijwang’ogi e thim.+ Siro mar bor polo ne ok oweyo telonegi godiechieng’, to siro mar mach ne ok oweyo menyonegi yo gotieno.+ 20 Ne imiyogi rohoni maber mondo omigi rieko,+ ne ok itwonogi manna,+ kendo ne imiyogi pi ka ne gin gi riyo.+ 21 Kuom higni 40 ne imiyogi chiemo e thim.+ Onge gima ne giremo. Lepgi ne ok oti+ kendo tiendegi ne ok okuot.

22 “Ne imiyogi pinjeruodhi kod ogendni, kimiyogi pinjego mos mos+ nyaka ne gikawo piny Sihon,+ ma tiende ni, piny ruodh Heshbon,+ kaachiel gi piny Og+ ruodh Bashan. 23 Ne iguedhogi gi nyithindo mang’eny ka sulwe manie polo.+ Kendo ne ikelogi e piny ma ne isingo ne kweregi ni gibiro kawo.+ 24 Omiyo, nyithindgi ne odonjo mokawo pinyno,+ kendo ne iloyonegi Jo-Kanaan+ ma ne weg pinyno, miketo ruodhigi kod jo ma ne odak e pinyno e lwetgi mondo gitim kodgi kaka gidwaro. 25 Ne gikawo mier mochiel motegno+ kod piny ma nyago chiemo.+ Ne gikawo ute mopong’ gi gik mabeyo mopogore opogore, gi sokni mosekuny, gi puothe mzabibu, gi puothe zeituni,+ kod yiende mang’eny mag olembe. Omiyo, ne gichiemo mi giyieng’, kendo gibedo machwe mi gibedo mamor nikech ber mari mogundho.

26 “Kata kamano, ne gibedo gi wich teko kendo ne ging’anyo+ mi gitamore luwo Chikni. Ne ginego jonabi magi ma ne siemogi mondo giduog iri, kendo ne gitimo timbe malich mag achaya.+ 27 Nikech mano, ne ijwang’ogi e lwet wasikgi+ ma ne siko sandogi.+ Kata kamano, ne giywakni e chandruokgi kendo ne iwinjogi ka in e polo, to nikech ng’wononi mogundho, ne isiko ioronegi jo ma ne resogi e lwet wasikgi.+

28 “Kata kamano, ka ne giseyudo yueyo matin, ne gidok e timbegi maricho+ kendo ne ijwang’ogi e lwet wasikgi ma ne sandogi.+ Eka ne giduogo iri mondo ikonygi.+ Ne iwinjogi ka in e polo kendo ne isiko iresogi nikech ng’wononi mogundho.+ 29 Kata obedo ni ne isiemogi mondo gichak giluw chikeni, ne gibedo gi sunga kendo ne gitamore luwo chikeni.+ Ne giketho chikeni ma ka ng’ato oluwo to obedo mangima.+ To ne gibedo gi wich teko mi gilokoni ng’egi kendo tokgi nobedo matek mi gitamore winji. 30 Ne ihori kodgi+ kuom higni mang’eny kisiko imiyo jonabini rohoni mondo osiemgi, to ne gitamore winjo. Gikone, ne iketogi e lwet ogendni mamoko.+ 31 To nikech ng’wononi mogundho, ne ok ikethogi+ kendo ne ok ijwang’ogi, nimar in Nyasaye mang’won kendo ma kecho ji.+

32 “To koro, A Nyasachwa, in Nyasaye maduong’, man gi teko, kendo malich. In Nyasaye ma rito singruokni kendo inyiso hera mosiko,+ kik wiyi wil gi chandruok duto moseyudowa gi ruodhiwa, jodongwa,+ jodolowa,+ jonabiwa,+ kwerewa, kod jowa duto, chakre kinde mag ruodhi mag Asuria+ nyaka kawuononi. 33 Isetimonwa makare kuom gik moko duto moseyudowa, isebedonwa ja adiera. To wan e ma wasetimo marach.+ 34 Ruodhiwa, gi jodongwa, gi jodolowa, kod kwerewa ok osemako Chikni, kata chiko itgi mondo giwinj chikeni, kata siem ma ne imiyogi. 35 Kata ka ne gin e bwo lochgi kendo ne giyudo ber mang’eny moa kuomi, kendo ne gidak e piny malach ma ne imiyogi ma nyago chiemo maber, ne ok gitiyoni+ kendo ne ok giweyo timbegi maricho. 36 Koro kawuono wan wasumbni+ e piny ma ne imiyo kwerewa mondo odagie, kendo ocham gik ma nyakie kod gik mabeyo manie iye. 37 Gik mang’eny ma nyakie gin mag ruodhi miketo e wiwa nikech richowa.+ Gilocho e wiwa* kendo e wi jambwa mana kaka gidwaro, kendo wan gi chandruok maduong’.

38 “Nikech mago duto, wasetimo singruok+ kendo wandike piny mi jodongwa, Jo-Lawi magwa, kod jodolo magwa, oketoe muhuri margi.”+

10 Jo ma ne oketo muhuri maggi+ ne gin:

Nehemia ma gavana,* ma wuod Hakalia,

Kod Zedekia, 2 Seraya, Azaria, Jeremia, 3 Pashur, Amaria, Malkija, 4 Hatush, Shebania, Maluk, 5 Harim,+ Meremoth, Obadia, 6 Daniel,+ Ginethon, Baruk, 7 Meshulam, Abija, Mijamin, 8 Maazia, Bilgai, kod Shemaya; magi ne gin jodolo.

9 Jo-Lawi bende ne gin: Jeshua wuod Azania, Binui achiel kuom yawuot Henadad, Kadmiel,+ 10 gi owetegi ma Shebania, Hodia, Kelita, Pelaya, Hanan, 11 Mika, Rehob, Hashabia, 12 Zakur, Sherebia,+ Shebania, 13 Hodia, Bani, kod Beninu.

14 Jodong oganda ne gin: Parosh, Pahath-moab,+ Elam, Zatu, Bani, 15 Buni, Azgad, Bebai, 16 Adonija, Bigvai, Adin, 17 Ater, Hezekia, Azur, 18 Hodia, Hashum, Bezai, 19 Harif, Anathoth, Nebai, 20 Magpiash, Meshulam, Hezir, 21 Meshezabel, Zadok, Jadua, 22 Pelatia, Hanan, Anaya, 23 Hoshea, Hanania, Hashub, 24 Halohesh, Pilha, Shobek, 25 Rehum, Hashabna, Maaseya, 26 Ahija, Hanan, Anan, 27 Maluk, Harim, kod Baana.

28 Jomamoko, tiende ni jodolo, Jo-Lawi, jorit rangeye, jower, jo ma tiyo e hekalu,* kod ji duto ma ne opogore gi jo pinje mamoko mondo giluw Chik Nyasaye madier,+ kaachiel gi mondegi, yawuotgi, nyigi, kod ji duto mariek kendo ma nigi ng’eyo,* 29 noriwore gi owetegi, ma gin jo ma nigi huma, kendo ne gikuong’ore mi giramo ni gibiro luwo chike Nyasaye madier, ma nochiwo gi lwet Musa jatichne, kendo ni gibiro luwo adimba chike duto kod buche mag Jehova Ruodhwa. 30 Ok wabi chiwo nyiwa ne pinje mamoko mondo okendi, to wan bende ok wabi nyuomo nyigi ne yawuotwa.+

31 Ka jo pinje mamoko okelo mwandugi kod chambgi mopogore opogore chieng’ Sabato, ok wabi ng’iewo gimoro amora chieng’ Sabato+ kata odiechieng’ machielo maler.+ E higa mar abiriyo,+ ok wabi keyo, kendo wabiro weyo ne ji gopegi duto.+

32 Bende, waduto wasemire ting’ ni wabiro chiwo achiel kuom adek mag shekel* higa ka higa mondo osir tije mag od Nyasachwa,+ 33 mondo ong’iewgo makate miketo e nyim Nyasaye,+ gi chiwo mag cham ma pile,+ gi misango miwang’o chieng’ Sabato ka Sabato,+ gi kinde dwe manyien,+ gi kinde mag sewni mamoko,+ gi gik maler, gi misengni mag richo+ mipwodhogo Jo-Israel, kod tije duto mitimo e od Nyasachwa.

34 Bende, ne wagoyo ombulu mondo wang’e yien ma jodolo, Jo-Lawi, kod jomamoko onego okel e od Nyasachwa kaluwore gi anyuolagi, e kinde moketnegi higa ka higa mondo owang’ e kendo mar Jehova Nyasachwa kaluwore gi kaka ondik e Chik.+ 35 Bende, wabiro kelo e od Jehova gik mokwongo nyak e puothewa, kod kit olembe duto mopogore opogore mokwongo nyak, higa ka higa,+ 36 kaachiel gi yawuotwa makayo kod jambwa+—kaluwore gi gima ondik e bug Chik—kod nyithindo mokwongo ma rombewa kod dhowa onyuolo. Wabiro kelogi e od Nyasachwa ne jodolo ma tiyo e od Nyasachwa.+ 37 Bende, wabiro chiwo chambwa ma wakwongo kayo,+ chiwo magwa, olembe mokwongo nyak,+ divai manyien, kod mo.+ Wabiro terogi ne jodolo man kar keno* e od Nyasachwa,+ kaachiel gi achiel kuom apar mag puothewa ma wabiro miyo Jo-Lawi,+ nimar Jo-Lawi e ma onego okaw achiel kuom apar mag puothewa.

38 Jadolo ma wuod Harun nyaka bed gi Jo-Lawi sa ma Jo-Lawi choko achiel kuom apar. Jo-Lawi bende onego ochiw ne od Nyasachwa+ achiel kuom apar mag achiel kuom apar momigi, mondo okan e ute keno.* 39 Nikech ute mag keno* e ma Jo-Israel kod Jo-Lawi onego okelie chiwogi+ mag cham, divai manyien, kod mo,+ kendo kanyo e ka ma gik moko duto mag hekalu nitieree, kaachiel gi jodolo ma tiyo kuno, jorit rangeye, kod jower. Ok wabi jwang’o od Nyasachwa.+

11 Jodong oganda ne odak Jerusalem.+ Kata kamano, jomamoko ne ogoyo ombulu+ mondo kuom udi apar apar okel ot achiel mondo obi odag Jerusalem dala maler, to udi ochiko modong’ odag e miechgi. 2 E wi mano, oganda noguedho ji duto ma ne ochiwore mondo odhi odag Jerusalem.

3 Magi e jotend gweng’ ma ne odak Jerusalem. (Jo-Israel mamoko, jodolo, Jo-Lawi, jo ma tiyo e hekalu,*+ kod yawuot jotich Solomon,+ ne odak e mier mamoko mag Juda, ng’ato ka ng’ato ne odak e lope e gweng’gi.+

4 Bende, ne nitie Jo-Juda kod Jo-Benjamin moko ma ne odak Jerusalem.) Kuom Jo-Juda ne nitie Athaya wuod Uzia ma wuod Zekaria ma wuod Amaria ma wuod Shefatia ma wuod Mahalalel ma ja dhood Perez,+ 5 kod Maaseya wuod Baruk ma wuod Kolhoze ma wuod Hazaya ma wuod Adaya ma wuod Joyarib ma wuod Zekaria ma ja dhood Shela. 6 Yawuot Perez duto ma ne odak Jerusalem ne gin ji 468 ma roteke.

7 Magi e Jo-Benjamin: Salu+ wuod Meshulam ma wuod Joed ma wuod Pedaya ma wuod Kolaya ma wuod Maaseya ma wuod Ithiel ma wuod Jeshaya, 8 kaachiel gi owetene Gabai kod Salai, ne gin ji 928; 9 to Joel wuod Zikri ne en jatendgi, kendo Juda wuod Hasenua ne en jalupne e dalano.

10 Jodolo ne gin: Jedaya wuod Joyarib, Jakin,+ 11 Seraya wuod Hilkia ma wuod Meshulam ma wuod Zadok ma wuod Meraioth ma wuod Ahitub,+ ma ne en jatelo e od Nyasaye madier, 12 kod owetegi ma ne tiyo e od Nyasaye, ne gin ji 822; kod Adaya wuod Jeroham ma wuod Pelalia ma wuod Amzi ma wuod Zekaria ma wuod Pashur+ ma wuod Malkija, 13 kaachiel gi owetene ma ne gin jotend anyuolagi, ne gin ji 242; gi Amashsai wuod Azarel ma wuod Ahzai ma wuod Meshilemoth ma wuod Imer, 14 kod owetegi ma ne gin joroteke kendo jochir, ne gin ji 128; jatendgi ne en Zabdiel, ma ne wuok e ot man gi huma.

15 Jo-Lawi ne gin: Shemaya+ wuod Hashub ma wuod Azrikam ma wuod Hashabia ma wuod Buni,⁠ 16 gi Shabethai+ kod Jozabad,+ ne gin moko kuom jotend Jo-Lawi, ma ne ochung’ ne tije mamoko ma ne itimo oko mar od Nyasaye madier; 17 kod Matania+ wuod Mika ma wuod Zabdi ma wuod Asaf+ jatend wer, ma ne tayo wer seche mag lamo,+ kod Bakbukia wuoyi mar ariyo e kind owetene, kaachiel gi Abda wuod Shamua ma wuod Galal ma wuod Jeduthun.+ 18 Jo-Lawi duto ma ne odak e dala maler ne gin ji 284.

19 Jorit rangeye ne gin Akub, Talmon,+ kaachiel gi owetegi, ne gin ji 172.

20 Jo-Israel mamoko, jodolo, kod Jo-Lawi ne odak e mier mamoko duto mag Juda, ng’ato ka ng’ato ne odak e lope owuon. 21 Jo ma ne tiyo e hekalu*+ ne odak Ofel,+ to Ziha kod Gishpa ne gin jotendgi.

22 Jatend Jo-Lawi ma ne odak Jerusalem ne en Uzi wuod Bani ma wuod Hashabia ma wuod Matania+ ma wuod Mika, ma ja dhood Asaf ma jower. Ne ochung’ ne tij od Nyasaye madier. 23 Nimar ruoth nogolo chik+ mondo omi jower kony pile ka pile kaka owinjore. 24 Pethahia wuod Meshezabel ma wuok e anyuola mar Zera wuod Juda ne en jang’ad rieko ne ruoth e weche duto momako oganda.

25 To kuom mier kod pewe ma Jo-Juda moko ne odakie ne gin Kiriath-arba+ kod mier matindo molwore, Dibon kod mier matindo molwore, Jekabzeel+ kod gwenge molwore, 26 Jeshua, Molada,+ Beth-pelet,+ 27 Hazar-shual,+ Beer-sheba kod mier matindo molwore, 28 Ziklag,+ Mekona kod mier matindo molwore, 29 En-rimon,+ Zora,+ kod Jarmuth, 30 Zanoa,+ Adulam kod gwenge molworogi, Lakish+ kod mier molwore, gi Azeka+ kod mier matindo molwore. Ne gidak kochakore Beer-sheba nyaka e Hoho mar Hinom.+

31 To Jo-Benjamin nodak Geba,+ Mikmash, Aija, Bethel+ kod mier matindo molwore, 32 Anathoth,+ Nob,+ Anania, 33 Hazor, Rama,+ Gitaim, 34 Hadid, Zeboim, Nebalat, 35 Lod, kod Ono,+ hoho mar jo ma olony gi tije lwedo. 36 Grube moko mag Jo-Lawi ma Jo-Juda, noter mondo odag e piny Benjamin.

12 Magi e jodolo kod Jo-Lawi ma ne odhi gi Zerubabel+ wuod Shealtiel,+ kod Jeshua:+ Seraya, Jeremia, Ezra, 2 Amaria, Maluk, Hatush, 3 Shekania, Rehum, Meremoth, 4 Ido, Ginethoi, Abija, 5 Mijamin, Maadia, Bilga, 6 Shemaya, Joyarib, Jedaya, 7 Salu, Amok, Hilkia, kod Jedaya. Magi ne gin jotend jodolo kod owetegi e ndalo mag Jeshua.

8 Jo-Lawi ne gin Jeshua, Binui, Kadmiel,+ Sherebia, Juda, kod Matania+ ma ne tayo wende mag erokamano kaachiel gi owetegi. 9 To Bakbukia kod Uni owetegi ne ochung’ ka momanyore kodgi ka gitiyo tij rito.* 10 Jeshua nonyuolo Joyakim, to Joyakim nonyuolo Eliashib, to Eliashib+ nonyuolo Joyada.+ 11 Joyada nonyuolo Jonathan, to Jonathan nonyuolo Jadua.

12 E ndalo Joyakim, jodolo ma ne gin jotelo e anyuolagi ne gin: Meraya nochung’ ne joka Seraya;+ Hanania nochung’ ne joka Jeremia; 13 Meshulam nochung’ ne joka Ezra;+ Jehohanan nochung’ ne joka Amaria; 14 Jonathan nochung’ ne joka Maluki; Josef nochung’ ne joka Shebania; 15 Adna nochung’ ne joka Harim;+ Helkai nochung’ ne joka Meraioth; 16 Zekaria nochung’ ne joka Ido; Meshulam nochung’ ne joka Ginethon; 17 Zikri nochung’ ne joka Abija;+ . . .* nochung’ ne joka Miniamin; Piltai nochung’ ne joka Moadia; 18 Shamua nochung’ ne joka Bilga;+ Jehonathan nochung’ ne joka Shemaya; 19 Matenai nochung’ ne joka Joyarib; Uzi nochung’ ne joka Jedaya;+ 20 Kalai nochung’ ne joka Salai; Eber nochung’ ne joka Amok; 21 Hashabia nochung’ ne joka Hilkia; Nethanel nochung’ ne joka Jedaya.

22 Ne ondik nyinge jotelo mag anyuola Jo-Lawi kod anyuola jodolo e ndalo Eliashib, gi Joyada,+ gi Johanan, kod Jadua nyaka e kinde loch Darius Ja-Persia.

23 Ne ondik nyinge Jo-Lawi ma ne gin jotelo mag anyuolagi e bug weche mag ndalo, nyaka e ndalo Johanan wuod Eliashib. 24 Jotend Jo-Lawi ne gin Hashabia, Sherebia, kod Jeshua+ wuod Kadmiel,+ to owetegi ne ochung’ komanyore kodgi sa ma ne giwero wende pak kod erokamano mana kaka Daudi+ ng’at Nyasaye madier ne ochiko. Noket grup achiel mar jorit machiegni gi grup machielo. 25 Matania,+ Bakbukia, Obadia, Meshulam, Talmon, kod Akub+ ne gin jorit mag rangeye,+ kendo ne girito ute mag keno man but rangeye. 26 Ne gin jorit e ndalo Joyakim wuod Jeshua+ ma wuod Jozadak, kod e ndalo mag Nehemia ma ne en gavana kod Ezra+ jadolo kendo jandiko.

27 E kinde ma ne iwalo ohinga mar Jerusalem, ne gigolo Jo-Lawi kuonde duto ma ne gidakie mondo gibi Jerusalem e nyasino, kendo gitime gi mor, ka giwero wende mag erokamano,+ ka gigoyo nyidwonge, gi gige thum man gi tonde, kod nyatiti. 28 Yawuot jower ma nochokore ne owuok e alwora mar Jordan, Jerusalem duto, gwenge mag Jo-Netofa,+ 29 Beth-gilgal,+ gi pewe mag Geba+ kod Azmaveth,*+ nimar noyudo jower osegero miechgi molworo Jerusalem. 30 Jodolo gi Jo-Lawi nopwodhore giwegi, bende ne gipwodho oganda,+ rangeye,+ kod ohinga.+

31 Eka ne atero jodong Juda e wi ohinga. Bende, ne aketo grube ariyo madongo mag jower ma goyo erokamano, kaachiel gi ji mathoth ma luwogi. Grup achiel noluwo korachwich e wi ohinga ka gichomo Ranga Pidhe mag Buru.*+ 32 Hoshaya gi nus mar jodong Juda ne wuotho e tokgi, 33 kaachiel gi Azaria, Ezra, Meshulam, 34 Juda, Benjamin, Shemaya, kod Jeremia. 35 Yawuot jodolo moko ma ne ni kodgi kendo ma ne nigi turmbeta+ ne gin: Zekaria wuod Jonathan ma wuod Shemaya ma wuod Matania ma wuod Mikaya ma wuod Zakur ma wuod Asaf,+ 36 kaachiel gi owetene ma Shemaya, Azarel, Milalai, Gilalai, Maai, Nethanel, Juda, kod Hanani. Ne gin gi gige thum mag Daudi+ ng’at Nyasaye madier; Ezra+ jandiko ne otelo e nyimgi. 37 Ka ne gichopo e Ranga Soko,+ ne gidhi tir ka giidho Raidhi+ mar Dala Daudi+ ka giluwo ka ma ohinga oting’orego e wi Od Daudi nyaka e Ranga Pi+ man yo wuok chieng’.

38 Grup machielo mar jower ne wuotho ka gichomo koracham,* kendo ne aluwogi ka an gi nus mar oganda, ne aluwogi e wi ohinga mi wakalo Ohinga mar Kendo,+ kendo ne wakalo Ohinga Malach+ 39 mi waidho nyaka e Ranga Efraim+ gi Ranga Dala Machon,+ gi Ranga Rech,+ Ohinga mar Hananel,+ Ohinga mar Mea, kod Ranga Rombe.+ Ne gichung’ e Ranga Jarito.

40 Gikone grube ariyo mag jowergo ne ochopo e nyim od Nyasaye madier. An bende ne achopo kanyo gi nus mar jotelo makonyo, 41 kod jodolo ma gin Eliakim, Maaseya, Miniamin, Mikaya, Elioenai, Zekaria, kod Hanania, ka gin gi turmbeta, 42 kaachiel gi Maaseya, Shemaya, Eleazar, Uzi, Jehohanan, Malkija, Elam, kod Ezer. Kendo jower nower gi dwol maduong’ ka itayogi gi Izrahia.

43 Chieng’no ne gichiwo misengni mang’eny ka gimor ahinya,+ nimar Nyasaye madier ne omiyogi mor maduong’. Mon gi nyithindo bende ne mor ahinya,+ mi koko kod mor ma ne ni Jerusalem nowinjore gi ka mabor.+

44 Chieng’no ne oyier chwo mondo orit ute mikanoe+ chiwo,+ gik monyak mokwongo,+ kod achiel kuom apar.+ Ne onego gikan cham mowuok e puothe kaluwore gi chik+ moket ne jodolo kod Jo-Lawi,+ nimar ne nitie mor maduong’ e Juda nikech jodolo kod Jo-Lawi ma ne tiyo. 45 Ne gichako tiyo tije mag Nyasachgi kendo ne gichako luwo chik mar pwodhruok. Jower kod jorit rangeye bende ne otimo kamano kaluwore gi chik Daudi kod Solomon wuode. 46 Nimar e ndalo Daudi kod Asaf, ne nitie jo ma ne tayo jower ka giwero wende mag pak kod mag goyo erokamano ne Nyasaye.+ 47 Kendo e ndalo mag Zerubabel+ kod Nehemia, Jo-Israel duto nochiwo pok ne jower+ kod jorit rangeye+ kaluwore gi dwarogi mapile. Bende, ne gichiwo pok ne Jo-Lawi,+ to Jo-Lawi bende ne ochiwo pok ne nyikwa Harun.

13 E odiechieng’no ne osom bug Musa e nyim oganda,+ kendo ne oyud ka ma ondik ni Ja-Amon kata Ja-Moab+ ok onego odonj e kanyakla mar Nyasaye madier,+ 2 nikech ne ok giromo ne Jo-Israel gi chiemo kod pi, kar mano ne ging’iewo Balaam mondo okuong’gi.+ Kata kamano, Nyasachwa noloko kuong’neno mobedo gueth.+ 3 Ka ne Jo-Israel owinjo Chikno, ne gigolo ji duto ma ne oa e ogendni mamoko e kindgi.+

4 Ka ne mago pok otimore, Eliashib+ ma ne en wat Tobia,+ e ma ne en jadolo mochung’ ne ute keno* mag od Nyasachwa.+ 5 Noyudo omiye od keno* moro maduong’ mondo odagie. Odno e ma ne gikanoe chiwo mag cham, ubani, gik mitiyogo e hekalu, achiel kuom apar mag cham, divai manyien, kod mo,+ ma ne ochik mondo omi Jo-Lawi,+ jower, kod jorit rangeye, kaachiel gi chiwo mag jodolo.+

6 Kindeno duto ne aonge Jerusalem, nikech ne adok ir ruoth e higa mar 32+ mar loch Artashasta+ ruodh Babulon. Kendo bang’ kinde ne akwayo ruoth mondo omiya rusa. 7 Eka ne aduogo Jerusalem mi aneno gima rach ma Eliashib+ ne otimo ka ne omiyo Tobia+ ot e laru mar od Nyasaye madier. 8 Wachno ne rachna ahinya, omiyo ne agolo gik ot mag Tobia e od keno* mi awitogi oko. 9 Bang’ mano ne agolo chik mi gipwodho udi mag keno,* kendo ne adwoko gik mitiyogo e od Nyasaye madier kuondego,+ kaachiel gi chiwo mag cham kod ubani.+

10 Nayudo bende ni ne ok miga+ Jo-Lawi+ pokgi, omiyo Jo-Lawi gi jower ma ne tiyo e od Nyasaye ne odok e miechgi.+ 11 Kuom mano ne adhawo ne jotelo makonyo+ ka apenjogi niya: “Ang’o momiyo ojwang’ od Nyasaye madier kama?”+ Eka ne achokogi mi aduokogi e tijegi. 12 Jo-Juda duto ne okelo achiel kuom apar+ mar cham, divai manyien, kod mo e ute keno.+ 13 Eka naketo Shelemia jadolo, Zadok jandiko, kod Pedaya Ja-Lawi mondo ochung’ ne ute keno, kendo Hanan wuod Zakur ma wuod Matania ne en jakonygi, nimar ne gin jo ma ogen. Tijgi ne en pogo ne jowetegi gik mokel.

14 A Nyasacha, yie ipara+ nikech gik masetimogi, kik wiyi wil gi gik mabeyo ma asetimo nikech ahero odi kod tije mitimo kuno.+

15 E ndalogo ne aneno ji e Juda ka biyo divai chieng’ Sabato,+ kendo gikelo cham modhuro Jerusalem ka giting’ogi e punde. Bende, ne gikelo divai, mzabibu, olemb ng’owo, kod kit gik moko duto chieng’ Sabato.+ Omiyo, ne akwerogi ni kik gius gik moko chieng’no.* 16 Jo-Turo ma ne odak e dala ne kelo rech kod gik ohala mopogore opogore, kendo ne giusogi ne jo ma odak Juda kod Jerusalem chieng’ Sabato.+ 17 Omiyo, ne adhawo ne jodong Juda ka apenjogi kama: “Utimo gima rach manade, uchido nyaka odiechieng’ Sabato? 18 Donge ma e gima kwereu notimo mi Nyasachwa nokelo masiragi duto kuomwa kendo ne dalani? Koro umedo mirima mager ma en-go gi Israel kuchido Sabato.”+

19 Kuom mano, nachiko mondo olor rangeye mag Jerusalem ka pok mudho odonjo, tiende ni ka pok Sabato ochakore. Bende, nawacho ni oyaw rangeyego mana bang’ Sabato, kendo ne aketo moko kuom joritna e rangeyego mondo kik rwak osigo moro amora iye chieng’ Sabato. 20 Omiyo, jolok ohala kod jo ma ne uso gik mopogore opogore ne onindo oko mar Jerusalem dichiel kata diriyo. 21 Kae to ne asiemogi ka awachonegi niya: “Ang’o momiyo unindo e nyim ohinga? Ka utimo kamano kendo, to ubiro neno.” Chakre chieng’no, ne ok gibiro chieng’ Sabato.

22 Ne anyiso Jo-Lawi ni onego gipwodhre kinde ka kinde kendo girit rangeye mondo Sabato osik ka ler.+ A Nyasacha, par gima ne atimono bende, kendo inyisa ng’wono nikech herani mogundho.+

23 E ndalogo bende ne aneno Jo-Yahudi ma ne okendo nyi Ashdod,+ nyi Amon, kod nyi Moab.+ 24 Nus mar yawuotgi ne wacho dho Ashdod to mamoko ne wacho dho ogendni mopogore opogore, to onge kata mana achiel kuomgi ma ne ong’eyo wacho dho Jo-Yahudi. 25 Kuom mano ne adhawonegi mi akwerogi matek kendo ne agoyo moko kuomgi+ mi apudho yie wigi kendo aketogi mondo gikuong’re gi nying Nyasaye ka awachonegi kama: “Kik ukend nyigi, kik uchiw nyiu ne yawuotgi, kendo kik uyie yawuotu okend nyigi.+ 26 Donge ma e gima nomiyo Ruoth Solomon otimo richo? E piny duto ne onge ruoth minyalo pim kode,+ kendo Nyasache ne ohere+ mi okete ruoth e wi Israel duto. Kata kamano, mondene ma wuok e pinje mamoko ne omiyo en bende odonjo e richo.+ 27 Donge en gima lich miwuoro ni utimo richo maduong’ kama ne Nyasachu kuom kendo nyi pinje mamoko?”+

28 Noyudo achiel kuom yawuot Joyada+ wuod Eliashib+ ma jadolo maduong’, okendo nyar Sanbalat+ Ja-Horon. Omiyo, ne ariembe mondo oa e nyima.

29 A Nyasacha, yie ipargi, nimar gisechido tij dolo kod singruok mar jodolo+ kod Jo-Lawi.+

30 Ne apwodhogi kuom chilo duto ma ne oa e pinje mamoko, kendo ne aketo jodolo gi Jo-Lawi e tijegi, ng’ato ka ng’ato gi tichne.+ 31 Bende, ne aketo chenro mondo okel yien+ e kinde moketi, kod olemo mokwongo nyak.

A Nyasacha, yie ipara kendo itimna maber.+