Thuolo Makende mar Wuoyo gi Jehova e Lamo

1, 2. Ang’o momiyo wanyalo wacho ni lamo en mich makende, to ang’o momiyo onego wang’e gima Muma puonjo e wi wach lamo?

JEHOVA NYASAYE ma nochueyo polo gi piny, neno ogendni mag dhano kaka ton mar pi achiel ei ndo. (Zaburi 115:15; Isaya 40:15) Dhano en chuech matin ahinya e wang’ Nyasaye, kata kamano, Zaburi 145:18, 19 wacho niya: “Jehova chiegni gi ji duto ma luonge, ochiegni gi ji duto ma luonge gadiera. Ochopo dwaro mag jo moluore; owinjo ywakgi kendo oresogi.” Donge mano en gueth maduong’? Jehova, Jachuech Manyalo Duto, dwaro bedo machiegni kodwa kendo odwaro winjo lamowa. Lamo en mich maber ahinya ma Jehova omiyowa waduto.

² Jehova nyalo winjowa mana ka wawuoyo kode e yo moyiego. Wanyalo timo kamano nade? We wane ane gima Muma wacho e wi lamo.

GIMOMIYO LAMOWA ONEGO ODHI NE JEHOVA

3. Ang’o momiyo onego iwuo gi Jehova?

³ Jehova dwaro ni wawuo kode e lamo. Ere kaka wanyalo timo mano? Som Jo-Filipi 4:6, 7. Par ane yo mang’won ma Ndikono jiwowago. Jachuech polo gi piny dwaro ahinya ni inyise kaka iwinjo kendo inyise chandruoge ma in-go.

4. Ere kaka lemo pile ka pile miyo wabedo gi winjruok motegno gi Jehova?

⁴ Lamo miyo wabedo osiepe Jehova mati mata. Ka osiepe wuoyo kinde ka kinde e wi gik ma giparo, gik ma chandogi, kod kaka giwinjo, mano miyo osiep manie kindgi medo bedo motegno. Mano e gima timore sama wawuoyo gi Jehova. Kokalo kuom Muma, Jehova osenyisi gik ma oparo kod gik ma obiro timo e kinde mabiro. In bende inyalo wuoyo kode pile kendo nyise gik moko duto manie chunyi. Sama itimo kamano winjruok manie kindi gi Jehova biro medo bedo motegno.​—Jakobo 4:8.

ANG’O MA NYAKA WATIM MONDO NYASAYE OWINJ LAMOWA?

5. Wang’eyo nade ni Jehova ok winj lamo duto?

⁵ Be Jehova winjo lamo duto? Ooyo, ok owinj lamo duto. E kinde janabi Isaya, Jehova nonyiso Jo-Israel kama: “Kata ka ulemo ding’eny, to ok anawinju; lweteu omienore gi remo.” (Isaya 1:15) Omiyo, ka ok watang’ wanyalo timo gik ma Jehova osin-go, to mano nyalo miyo otamre winjo lamowa.

6. Ang’o momiyo bedo gi yie en gima dwarore ahinya? Wanyalo nyiso nade ni wan gi yie?

⁶ Ka wadwaro ni Jehova owinj lamowa nyaka wabed gi yie kuome. (Mariko 11:24) Jaote Paulo nolero niya: “Ka ng’ato onge gi yie, ok onyal moro Nyasaye e yo malong’o, nimar ng’at ma sudo ir Nyasaye nyaka bed gi yie ni entiere, kendo ni en jachiw-mich ne jo ma manye gi kinda.” (Jo-Hibrania 11:6) Wacho awacha ni wan gi yie ok oromo. Onego wanyis ni wan gi yie kuom luwo chike Jehova pile ka pile.​—Som Jakobo 2:26.

7. (a) Ang’o momiyo onego wabolre kendo wanyis luor sama wawuoyo gi Jehova? (b) Wanyalo nyiso nade ni walemo koa e chunywa?

⁷ Onego wabolre kendo wanyis luor sama wawuoyo gi Jehova. Nikech ang’o? Ka inyalo miwa thuolo mar wuoyo gi ruoth kata president moro, donge wabiro wuoyo kode e yo ma miye luor? Jehova en Nyasaye Manyalo Duto, omiyo, onego wamiye luor kendo wabolrene ahinya sama wawuoyo kode. (Chakruok 17:1; Zaburi 138:6) Bende, onego wanyis Jehova gik manie chunywa gadier, to ok nwoyo mana weche ka watiyo gi dhok ma wakia kata wacho weche mondik e buk moro.​—Mathayo 6:7, 8.

8. En ang’o machielo monego watim bang’ kwayo Nyasaye gimoro?

⁸ Bende, ka wakwayo Nyasaye gimoro, timbewa nyaka luwre gi lamowa. Kuom ranyisi, ka wakwayo Jehova mondo omiwa gik mochuno e ngima, ok wanyal bet abeta ma ok wati ka wageno ni Jehova biro miyowa gigo. Nyaka wati matek kendo kik wayier tich. (Mathayo 6:11; 2 Jo-Thesalonika 3:10) Ka wakwayo Jehova mondo okonywa wawe tim moro marach, nyaka watang’ ahinya gi gimoro amora ma nyalo rwakowa e tem mar timo gino. (Jo-Kolosai 3:5) We wanon ane moko kuom penjo ma ji nyalo penjore e wi lamo.

PENJO MA JI NYALO PENJORE E WI LAMO

9. Onego wawuo gi ng’a e lamo? Johana 14:6 puonjowa ang’o e wi lamo?

⁹ Onego wawuo gi ng’a e lamo? Yesu nopuonjo jolupne mondo owuo gi “Wuonwa manie polo.” (Mathayo 6:9) Nowacho bende kama: “An e yo, kendo an e adiera, kendo an e ngima. Onge ng’at ma biro ir Wuora mak mana kokalo kuoma.” (Johana 14:6) Omiyo, onego wawuo gi Jehova kende kokalo kuom Yesu. Lemo kokalo kuom Yesu tiende en ang’o? Mondo Jehova oyie gi lamowa, nyaka wachiw luor ne migawo makende ma osemiyo Yesu. Mana kaka wasepuonjore, Yesu nobiro e piny ka mondo owarwa e richo gi tho. (Johana 3:16; Jo-Rumi 5:12) Jehova oseyiero Yesu mondo obed Jadolo Maduong’ kendo Jang’ad-Bura.​—Johana 5:22; Jo-Hibrania 6:20.

10. Be onego wabed e yo moro makende sama walemo? Ler ane.

¹⁰ Be onego wabed e yo moro makende sama walemo? Ooyo, Jehova ok nyiswa ni wago chongwa piny, wabed, kata wachung’ sama walemo. Muma nyisowa ni wanyalo wuoyo gi Jehova e yo moro amora ma nyiso ni wamiye luor. (1 Weche mag Ndalo 17:16; Nehemia 8:6; Daniel 6:10; Mariko 11:25) Gima duong’ e wang’ Jehova en ni wawuo kode ka wanyise luor kendo wawachne gik mowuok e chunywa. Wanyalo lemo gi dwol kata gi chunywa sa asaya, kendo wanyalo timo kamano kamoro amora ma wantie. Wan gadier ni Jehova biro winjo kata mana lamo ma wawacho gi chunywa.​—Nehemia 2:1-6.

11. Gik gik mage ma wanyalo nyiso Jehova e lamo?

¹¹ Gin gik mage ma wanyalo kwayo e lamo? Wanyalo kwayo gimoro amora ma Jehova oyiego. Muma wacho kama: “Gimoro amora ma wakwaye kaluwore gi dwache, owinjowa.” (1 Johana 5:14) Be wanyalo kwayo gik ma wadwaro konyorego wawegi? Ee. Onego wawuo gi Jehova mana kaka wawuoyoga gi osiepwa mwahero ahinya. Wanyalo nyiso Jehova gimoro amora manie pachwa gi chunywa. (Zaburi 62:8) Wanyalo kwaye rohone maler mondo okonywa timo gik ma kare. (Luka 11:13) Bende, wanyalo kwaye mondo omiwa rieko mar timo yiero mabeyo kendo omiwa teko mar nano e chandruoge. (Jakobo 1:5) Onego wanyis Jehova mondo owenwa richowa. (Jo-Efeso 1:3, 7) Onego walem ne jomoko kaka joodwa kod Jokristo wetewa.​—Tich Joote 12:5; Jo-Kolosai 4:12.

12. En ang’o monego waket mokwongo e lamowa?

¹² Ang’o monego waket mokwongo e lamowa? Jehova gi dwache. Onego wago ne Jehova erokamano gi chunywa duto kuom gik mosetimonwa. (1 Weche mag Ndalo 29:10-13) Wang’eyo mano nikech ka ne Yesu nie piny ka, nopuonjo jopuonjrene kaka onego gilem. (Som Mathayo 6:9-13.) Nonyisogi ni gima onego gikwa mokwongo en mondo nying Nyasaye obed maler. Kae to Yesu nowacho ni onego wakwa mondo Pinyruodh Nyasaye obi kendo wakwa ni dwaro mar Jehova otimre e piny mangima. Yesu nowacho ni bang’ kwayo weche madongogo e ka wanyalo kwayo gik ma wadwaro. Ka waketo Jehova kod dwache mokwongo e lamowa, mano nyiso gik ma waketo mokwongo e ngimawa.

13. Lamowa onego obed mabor maromo nade?

¹³ Lamowa onego obed mabor maromo nade? Muma ok nyiswa. Lamowa nyalo bedo machiek kata mabor kaluwore gima wadwaro wacho ne Nyasaye. Kuom ranyisi, wanyalo wacho lamo machuok ka wadwaro chiemo, kata wanyalo wacho lamo mabor ka wagoyo ne Jehova erokamano kata ka wanyise gik ma chandowa. (1 Samuel 1:12, 15) Ok dwaher wacho lamo mabor mana ni mondo wamor jomoko, mana kaka jomoko notimo e kinde ma Yesu ne nie piny ka. (Luka 20:46, 47) Jehova ok mor gi lamo kaka mago. Gima duong’ ma Jehova dwaro en ni wawach gik mowuok e chunywa sama walemo.

14. Onego wawuo gi Nyasaye e lamo nyadidi, to mano puonjowa ang’o e wi Jehova?

¹⁴ Onego walem nyadidi? Jehova nyisowa ni wawuo kode nyading’eny kaka nyalore. Muma wacho ni “lamuru ma ok uwe,” kendo ni “lemuru kinde duto.” (Mathayo 26:41; Jo-Rumi 12:12; 1 Jo-Thesalonika 5:17) Kinde duto Jehova oikore winjowa sama walemo. Wanyalo goyone erokamano pile nikech hera monyisowa kendo nikech gik momiyowa nono. Bende, wanyalo kwaye mondo otawa, omiwa teko, kendo ohowa. Ka wamor gi thuolo majaber ma Jehova omiyowa mondo wawuo kode sa asaya ma wadwaro, ok wabi weyo mondo thuolono odhi nono.

15. Ang’o momiyo onego wawach ni “amin” e giko mar lamo?

¹⁵ Ang’o momiyo onego wawach ni “amin” e giko mar lamo? “Amin” tiende en ni “adier” kata ni “obed kamano.” En yo ma wanyisogo ni wan gadier gi gik ma wawacho e lamo, kendo ni wechego oa e chunywa. (Zaburi 41:13) Muma puonjowa ni wanyalo wacho “amin” e chunywa, kata wanyalo wache ma winjore e giko lamo ma ng’ato ogolo e lowa ka wanyisogo ni wayie gi weche mowachogo.​—1 Weche mag Ndalo 16:36; 1 Jo-Korintho 14:16.

KAKA NYASAYE DWOKO LAMOWA

16. Be Jehova dwokoga lamowa adier? Ler ane.

¹⁶ Be Jehova dwokoga lamowa adier? Ee, odwokoga. Muma wacho ni Nyasaye e “Jawinj lamo.” (Zaburi 65:2) Jehova winjo kendo dwoko lamo mag ji mang’eny ma lemo gi chuny makare, odwoko lamogo e yore mopogore opogore.

17. Ere kaka Jehova dwoko lamowa kotiyo gi malaikene kod jotichne manie piny?

¹⁷ Jehova dwoko lamowa kotiyo gi malaikene kod jotichne manie piny. (Jo-Hibrania 1:13, 14) Nitie ranyisi mag ji mang’eny ma osekwayo Nyasaye mondo okonygi winjo tiend weche manie Muma, to matin bang’ timo kamano, Joneno mag Jehova ne olimogi. Muma nyiso ni malaike bende konyo e tij lando “wach maber” e piny mangima. (Som Fweny 14:6.) Wan bende kinde moko wasewacho ne Jehova gimoro ma chando chunywa ma wayudo kony koa kuom owete gi nyiminewa ma Jokristo.​—Ngeche 12:25; Jakobo 2:16.

18. Ere kaka Jehova nyalo dwoko lamowa kotiyo gi rohone maler kod Muma?

¹⁸ Jehova dwoko lamowa kotiyo gi rohone maler. Sama wakwayo Nyasaye mondo okonywa loyo chandruok moro, onyalo tiyo gi rohone maler mondo otawa kendo omiwa teko. (2 Jo-Korintho 4:7) Jehova bende tiyo gi Muma e dwoko lamowa kendo mondo omiwa rieko mar timo yiero makare. Sama wasomo Muma wanyalo yudo ndiko moko ma nyalo konyowa. Jehova nyalo tiyo gi ng’ato ang’ata e kanyakla mondo ochiw paro moro e wi gima chandowa kata onyalo tiyo gi jaduong’-kanyakla mondo ojiwwa gi ndiko moro.​—Jo-Galatia 6:1.

19. Ang’o momiyo seche moko wanyalo paro ni Jehova ok dwok lamowa?

¹⁹ Seche moko wanyalo penjore niya, ‘Ang’o momiyo Jehova pok odwoko lamona nyaka sani?’ Ng’e ni Jehova ong’eyo kinde modwoke lamowa kod kaka odwokogi. Ong’eyo gik ma wadwaro gadier. Samoro nyalo dwarore ni wadhi nyime kwayo gimoro mondo wanyis ni wadwaro gino gadier kendo ni wan gi yie ni Nyasaye biro miyowago. (Luka 11:5-10) Seche moko Jehova nyalo dwoko lamowa e yo ma ok wapar ni onyalo timogo kamano. Kuom ranyisi, wanyalo nyise chandruok moro ma wan-go, to kar golonwa chandruogno, onyalo miyowa teko mar nano.​—Som Jo-Filipi 4:13.

20. Ang’o momiyo onego wawuo gi Jehova nyading’eny?

²⁰ Mano kaka wan gi thuolo makende mar wuoyo gi Jehova e lamo! Wanyalo bedo gadier ni obiro winjowa. (Zaburi 145:18) Kaka wamedo wuoyo gi Jehova koa e chunywa, e kaka osiep manie kindwa kode biro medo bedo motegno.