SULA MAR 52

Gimomiyo Onego Wanon Yo ma Warwakorego Kendo ma Wabidhorego

Makala Iliyochapishwa

Waduto wan-ga gi yiero mopogore opogore e yo ma warwakorego kod kaka wabidhore. Ka waluwo puonj mag Muma, wanyalo timo yiero mabeyo kendo ma moro Jehova. We wane ane moko kuom puonjgo.

1. Gin puonj mage ma nyalo konyowa yiero gik ma wadwaro rwako kod ma wabidhorego?

Onego wayier ‘lewni mowinjore, ma ok kal tong’ kendo ma nyiso ni wan joma pachgi long’o.’ Bende, nyaka wabed maler ka wanyiso ni ‘waluoro Nyasaye.’ (1 Timotheo 2:9, 10) We wanon ane puonj ang’wen miwuoyoe e ndikono: (1) Onego warwakre e yo “mowinjore.” Mana kaka iseneno e chokruogewa, jo Jehova rwako lewni mopogore opogore, kata kamano, lepwa kod yo ma walosogo yie wiwa nyiso ni waluoro Nyasaye ma walamo. (2) Rwakruok ‘e yo ma ok kal tong’’ nyiso ni ok wabi rwakore e yo ma nyalo chiero gombo mag nindruok kuom jomamoko, kata miyo ji oket pachgi kuomwa e yo ma ok owinjore. (3) Rwakruok e yo ma nyiso ni ‘pachwa long’o’ nyiso ni ok wabi donjore adonja e fason manyien mana nikech ji ohere. (4) Yo ma wabidhorego onego onyis ni ‘waluoro Nyasaye’ ma joma nenowa nyalo fwenyo e yo mayot ni walamo Nyasaye madier.—1 Jo-Korintho 10:31.

2. Ang’o momiyo onego wapar owetewa gi nyiminewa sama wayiero gima wadwaro rwako?

Kata obedo ni wan e ma wan gi ratiro mar yiero kaka warwakore, onego wanon ka be yo ma warwakorego biro chwanyo jomamoko. Watemo matek mondo kik watim gik ma nyalo chwanyo jowetewa, kar mano, watimo ‘gik ma morogi kendo gerogi.’—Som Jo-Rumi 15:1, 2.

3. Ere kaka yo ma warwakorego nyalo jiwo jomamoko mondo gidwar ng’eyo Jehova?

Kata obedo ni watemoga rwakore maber kinde duto, wanonoga ahinya yo ma warwakorego sama wadhi e tij lendo kod e chokruogewa. Ok wadwar ni rwakruokwa ochoch ji sama wadhi landonegi wach maber. Yo ma warwakorego nyalo miyo ji oher adiera, ‘kendo bidho puonj mar Jawarwa.’—Tito 2:10.

TIM NONRO

Non ane kaka yo ma warwakorego kata ma wabidhorego nyalo konyo ji ng’eyo ni wan Jokristo.

Chwo moko ariyo mochung’ e nyim jang’ad bura. Achiel kuomgi orwako sut to machielo orwako law moyiech oyiech kendo orwako ogudu. — Yo ma warwakorego nyalo nyiso ka be wamiyo joma ni e loch luor kata ooyo. Kata obedo ni Jehova neno gima ni e chunywa, yo ma warwakorego onego onyis ni wamiye luor

4. Wamiyo Jehova luor sama warwakore e yo maber

Gima duong’ momiyo warwakore e yo maber en mane? Som Zaburi 47:2, kae to uwuo e wi penjo ma luwogi:

Ng’eyo ni watiyo ne Jehova onego mi warwakre nade?
Be iparo ni en gima owinjore mondo wang’i yo ma warwakorego sama wadhi e chokruok kata sama wadhi e tij lendo? Ang’o momiyo iwacho kamano?

5. Kaka wanyalo rwakore kendo bidhore e yo maber

Tug VIDIO.

VIDIO: “Timuru Gik Moko Duto ne Duong’ mar Nyasaye” (10:18)

Kata bed ni warwako lewni ma nengogi tek kata ma nengogi yot, nyaka gibed maler kendo mowinjore gi kama wantie. Som 1 Jo-Korintho 10:24 kod 1 Timotheo 2:9, 10, kae to uwuo e wi gimomiyo ok onego warwak lewni . . .

mochido kendo ma ok owinjore.
ma omakowa ahinya, ma nyiso dendwa, kata ma chiero gombo mag nindruok.

Kata obedo ni ok wan e bwo Chik Musa, chikego pod nyalo konyowa ng’eyo paro ma Jehova nigo e wi gik moko. Som Rapar mar Chik 22:5, kae to uwuo e wi penjo ma luwoni:

Ang’o momiyo ok onego warwak lewni ma miyo joma mon nenore ka joma chwo to joma chwo nenore ka joma mon?

Som 1 Jo-Korintho 10:32, 33, kod 1 Johana 2:15, 16, kae to uwuo e wi penjo ma luwogi:

Ang’o momiyo onego wanon ka be yo ma warwakorego chwanyo jomoko e alworawa kata e kanyakla?
Ji oheroga rwakore nade e alwora midakie?
Be iparo ni moko kuom yore ma girwakorego ok owinjore gi Jakristo? Ang’o momiyo iwacho kamano?