Tim Gik Moko e Wang’ Sa!
1. Jehova ketonwa ranyisi mane maber kodok korka timo gik moko e wang’ sa?
1 Kinde duto, Jehova timoga gik moko e wang’ sa. Kuom ranyisi, okonyoga jotichne “e kinde mowinjore.” (Hib. 4:16) Ochiwo chiemb chuny bende “e kinde makare” kata mowinjore. (Math. 24:45) Mano e momiyo wan gadier chuth ni odiechieng’ moketo mar tieko jomaricho ok bi deko. (Hab. 2:3) Bedo ni Jehova timo gik moko e wang’ sa kelonwa ber mathoth. (Zab. 70:5) Nikech wan dhano morem, to dich be wadich, timo gik moko e wang’ sa seche moko ok yot ruok. Kata kamano, ang’o momiyo onego watem matek mondo wabed joma timo gik moko e wang’ sa?
2. Ang’o momiyo timo gik moko e wang’ sa kelo ne Jehova duong’ kod pak?
2 E kinde mag gikogi ma ji oherore giwegi kendo onge ritruok, timo gik moko e wang’ sa en gima ji mang’eny neno ni ok ochuno ahinya. (2 Tim. 3:1-3) Omiyo, sama Jokristo dhi e tich e wang’ sa, kendo girito sa ka gitimo chenro gi jomamoko, kaachiel gi dhi e chokruogegi e wang’ sa, jomamoko bende nyalo neno mano, kendo mano kelo duong’ gi pak ne Jehova Nyasachwa. (1 Pet. 2:12) Be dibed ni samoro wanwang’o ni kodok korka tijewa mag yuto wachakoga tich e wang’ sa, to e weche mag lamo to wadekoga? Ber mondo wapar kinde duto ni sama wachopo e chokruogewa e wang’ sa ma wariwre gi jowetewa e wer kod lamo michakogo, wanyiso ni wadwaro luwo ranyisi maber mar Wuonwa manie polo, ma en Nyasaye mochanore.—1 Kor. 14:33, 40.
3. Timo gik moko e wang’ sa nyiso nade ni wadewo jomamoko?
3 Timo gik moko e wang’ sa bende nyiso ni wadewo jomamoko. (Fili. 2:3, 4) Kuom ranyisi, sama wachopo chon e chokruogewa mag Jokristo kod romo mag dhi lendo, ok wachoch owetewa gi nyiminewa. To ka wang’ere kaka joma dekoga ne gimoro amora, wachalo joma nyiso jowetewa ni wan wadich moloyogi. Sama wang’ere kaka joma timoga gik moko e wang’ sa, wanyiso ni wan joma inyalo gen kendo ni wan jokinda, to mano biro moro joma wajotudorego pile.
4. Ka kinde mang’eny wayudo ka ok watim gik moko e wang’ sa, ang’o ma nyalo konyowa timo lokruok?
4 Ka kinde mang’eny iyudo ni ok itim gik moko e wang’ sa, nonri mondo ifweny gimomiyo. Los chenro maber ma biro konyi timo gik moko e sa mowinjore. (Ekl. 3:1; Fili. 1:10, NW) Kwa Jehova mondo okonyi. (1 Joh. 5:14) Kuom adier, sama watimo kinda mondo watim gik moko e wang’ sa, wanyiso ni wahero Jehova Nyasaye kod jowetewa bende.—Math. 22:37-39.