Nonro mag Chenro mar Chokruok mar Ngimawa kod Tijwa
DESEMBA 7-13
MWANDU MA YUDORE E WACH NYASAYE | TIM JO-LAWI 10-11
“Onego Waher Jehova Moloyo Kaka Wahero Joodwa”
it-1-E 1174
Gima Wendo
Mach ma Wendo kod Ubani ma Wendo. Wach molok e Tim Jo-Lawi 10:1 ni, “mach mawendo,” e dho Hibrania en zar (dhako, za·rahʹ, gima wendo) mitiyogo kiwuoyo kuom mach ma yawuot Harun miluongo ni Nadab gi Abihu ne ogolo e nyim Nyasaye kata obedo ni Nyasaye ne ok ochikogi mondo gigol. Timno nomiyo Jehova onegogi. (Lawi 10:2; Kwan 3:4; 26:61) Mano nomiyo Jehova onyiso Harun kama: “In gi yawuoti, kik umadh divai kata gimoro amora ma mero ji sa ma udhi e hema mar romo, nono to ubiro tho. Ma en chik momako tiengeu duto nyaka chieng’. Chikno nokonyu pogo gik mowal gi gik ma ok owal kod gik maler gi gik ma ok ler, kendo nokonyu puonjo Jo-Israel chike ma ne Jehova omiyogi kokalo kuom Musa.” (Lawi 10:8-11) Mano nyiso ni nyaka bed ni Nadab gi Abihu ne omer ka ne gigolo mach ma Nyasaye ne ok ochikogi. Nenore ni mach ma kamano ne en mach ma wendo nikech kama ne ogolee, yo ma ne ogolego, kod sa ma ne ogolee ne ok owinjore. Kata samoro nyalo bedo ni ne ok giluwo yo ma kare mar loso ubani kaka oler e Wuok 30:34, 35. Ne ok nyal ng’wonnegi richogi kata obedo ni ne gimer.
Be Isedonjo e Yueyo mar Nyasaye?
16 Harun owadgi Musa ne obedo e chal moro matek kuom wach yawuote moko ariyo. Par ane kaka nyaka bed ni Harun nowinjo lit kane yawuote miluongo ni Nadab gi Abihu nochiwo mach mawendo e nyim Jehova, mi Jehova ne onegogi. En adier ni tho mar yawuowigo nomiyo koro ne ok ginyal tudore gi jonyuolgi. Kata kamano, nitie weche mamoko momedore. Jehova nochiko Harun gi yawuote ma ne ochung’ motegno niya: “Kik ugol gi moumo wiu, kata kik uyiech lepu [e yor ywak]; mondo kik utho, kendo mondo kik [Jehova] okechi gi oganda duto.” (Lawi 10:1-6) Puonj mwayudo kanyo nenore maler. Hera mwaherogo Jehova nyaka bed motegno moloyo hera mwaherogo joodwa moseketho ne Jehova.
Nono Puonj Manie Wach Nyasaye
Nyaka Wabed Maler e Timbewa Duto
18 Mondo wasik ka waler, nyaka wasik ka wanono Ndiko adimba kendo timo gik ma Nyasaye dwaro ni mondo watim. We wapar ane kendo gima notimore ne yawuot Harun ma gin Nadab gi Abihu. Ne githo nikech ne gichiwo ne Jehova “mach mawendo,” samoro nikech ne gimer. (Lawi 10:1, 2) Ne ane gima Nyasaye nonyiso Harun. (Som Tim Jo-Lawi 10:8-11.) Be Ndikono nyiso ni ok onego wamadh gimoro amora ma nigi kong’o kapok wadhi e chokruoge mag Jokristo? Par ane wechegi: Ok wan e bwo Chike Musa. (Rumi 10:4) E pinje moko, sama ji chiemo nitiega kong’o bende. Omiyo sama owetewa manie pinjego chiemo, gibilo kong’o matin kapok giwuok gidhi e chokruoge. Chieng’ Pasaka ne oti gi okombe ang’wen moting’o divai. Kane Yesu chako Rapar mar thone, noyie ne jootene mondo omadh divai ma nochung’ ne rembe. (Math. 26:27) Muma kwedo ratiro madho kong’o mokalo tong’ kod mer. (1 Kor. 6:10; 1 Tim. 3:8) Kendo Jokristo mang’eny chunygi ok nyal yienegi chuth bilo kong’o ka gidwaro timo tije Nyasaye. Kata kamano, chal mar piny ka piny opogore, kendo gima duong’ ne Jokristo en ng’eyo “pogo kind gik mabeyo kod gik maricho” mondo gisik ka giler e nyim Nyasaye.
it-1-E 111 ¶5
Le
Chik ma ne kwero ni kik cham le moko ne omi mana Jo-Israel kende ma ne ni e bwo chike Musa. Mano ne en ka luwore gi Tim Jo-Lawi 11:8 ma wacho ni: “Gin le ma ok ler.” Kata kamano, tho mar Kristo Yesu ne ochopo Chik Musa to mano notieko chik ma ne kwero chamo le moko kendo noyawo ne ji duto thuolo mar tiyo gi chik ma Jehova ne omiyo Noa bang’ ataro.—Kol. 2:13-17; Cha. 9:3, 4.
DESEMBA 14-20
MWANDU MA YUDORE E WACH NYASAYE | TIM JO-LAWI 12-13
“Chike ma Jehova Nochiwo e Wi Dhoho Puonjowa Ang’o?”
Be Muma Pod Konyo e Kindegi Koso Oting’o Puonj ma Tinde Ok Kony?
• Keto jotuo kar kendgi.
Chike Musa ne wacho ni joma nigi tuo mar dhoho oket kar kendgi. Lakteche nochako luwo chikno higni 700 mosekalo kendo chikno pod tiyo nyaka e kindewagi.—Tim Jo-Lawi sula mar 13 kod 14.
Be Ing’eyo?
E kinde ma ne indiko Muma, Jo-Yahudi ne oluoro ahinya tuo mar dhoho. Tuo malichno ne nyalo ketho dend ng’ato kendo ne nyalo kelone ng’ol mosiko. Tuo mar dhoho ne onge gi yadhe e kindego. Mano ne miyo joma nigi tuwono ne iketo mondo odag kar kendgi kendo ne dwarore ni gigo koko ne jomamoko mondo mi kik sud butgi.—Tim Jo-Lawi 13:45, 46.
it-2-E 238 ¶3
Dhoho
Momako law kata ot. Dhoho ne nyalo mako law, yie rombo kata law kitani, kata gimoro amora molos gi pien. Dhohono ne nyalo rumo ka olwok lawno kendo okete tenge. Kata kamano, ka ma ne pod osiko ka ratong’ kata kwarkwar ne nyiso ni ne en dhoho ma landore, kendo koro ne iwang’o gino. (Lawi 13:47-59) Ka buche ma ratong’ kata ma kwarkwar osieko e kor ot, jadolo ne golo chik mondo kik ng’ato odag e odno kuom kinde. Samoro ne chuno ni mondo ogol kite ma tuono nitie kendo ne ichwero kor odno duto gi iye kae to burugo ne iwito ka moro ma ok ler, oko mar dala. Ka dhohono oduogo kendo, jadolo ne wacho ni odno ok ler, kendo ne imuke mi kaw gik mogerego kae to itero kamoro ma ok ler oko mar dala. Kata kamano, ot ma ne owach ni ler to ne ilosone chenro mar pwodho. (Lawi 14:33-57) Jomoko wacho ni dhoho ma mako lewni kata udi en gimoro machal gi gik ma poth-poth ma yudorega kama pi osikoe. Kata kamano, adiera mar wachgino pok oyudi.
Nono Puonj Manie Wach Nyasaye
w04-SW 5/15 23 ¶2
Puonj ma Wanyalo Yudo e Bug Tim Jo-Lawi
12:2, 5—Ang’o momiyo nyuol ne miyo dhako “bedo ma ok ler”? Fuonni mag nyuol ne ochue mondo dhano onyuolgo nyithindo makare. Kata kamano, nikech richo, dhano koro ne nyuolo mana nyithindo ma ok kare. Bedo ma ok ler kuom kinde bang’ nyuol, kata kuom weche mamoko kaka dhi e dwe kod nyodo mag dichwo ne paro ne Jo-Israel richo ma ne giyudo koa kuom Adam. (Tim Jo-Lawi 15:16-24; Zaburi 51:5; Jo-Rumi 5:12) Chike ma ne dwaro ni ng’ato obed maler ne paro ne Jo-Israel gimomiyo ne nyaka chiw misango ma ne nyalo waro dhano e richo kendo odwok dhano obed makare kendo. Omiyo, chik nobedonegi kaka ‘jarit ma tayo nyaka ir Kristo.’—Jo-Galatia 3:24.
Be Muma Pod Konyo e Kindegi Koso Oting’o Puonj ma Tinde Ok Kony?
• Kinde mowinjore mar tero joma chwo nyange.
Chik Nyasaye ne dwaro ni nyathi ma wuoyi oter nyange e odiechieng’ mar aboro bang’ kosenyuole. (Tim Jo-Lawi 12:3) Remb nyithindo ma eka oa nyuol niga gi nyalo mar weyo chuer ka gimoro ong’adogi mana bang’ juma achiel. E kinde machon ka ne weche mag thieth pok ochopo e okang’ mamalo, Muma ne osewacho chon ni nyathi ma eka oa nyuol onego oter nyange mana bang’ juma achiel nikech timo kamano ne konyo.
DESEMBA 21-27
MWANDU MA YUDORE E WACH NYASAYE | TIM JO-LAWI 14-15
“Nyaka Wabed Joma Ler Eka Wasik e Lamo Madier”
it-1-E 263
Lwokruok
Ne nitie gik mang’eny ma ne miyo Jo-Israel pwodhore ka gilwokore. Ng’ato ang’ata ma ne tuo mar dhoho omako mi ochango, kata ma ne omulo gimoro amora ma “ng’at ma duong’ne chuer” osetiyogo, kata ma pi nyote ochuer, kata dhako ma oa e dwe kata ma rembe chuer, kata ng’ato ang’ato ma nonindo gi dichwo kata dhako ne “bedo ma ok ler” kendo ne nyaka olwokre. (Lawi 14:8, 9; 15:4-27) Ng’ato ang’ata ma nomulo ringre ng’at motho bende ne bedo ma ok ler kendo nyaka ne pwodhe gi pi mapwodho richo. Ng’ato ang’ata ma ne otamore luwo chikni, ne ‘inego, nimar nosechido ka maler mar Jehova.’ (Kwan 19:20) Mano e momiyo itiyo gi lwokruok e yor ranyisi e nyiso ni ng’ato nigi winjruok maber gi Jehova. (Zab. 26:6; 73:13; Isa. 1:16; Eze. 16:9) Lwokruok gi wach Jehova moting’o adiera nigi teko mar miyo ng’ato obed maler.—Efe. 5:26.
it-2-E 372 ¶2
Dhi e Dwe
Dhako bende ne bedo ma ok ler ka rembe ochuer kuom ndalo mogwaro to ok en kinde modhi e dwe, kata ka “ka po ni odhi e dwe to rembe ochuer aming’a mokalo kaka pile.” Mano ne en kinde ma otanda ma onindoe kata gimoro amora mobetie bedo ma ok ler. To joma nomulo gigo bende ne bedo ma ok ler. Kata kamano, ka remb dhakono nowe chuer, nokwano ndalo abiriyo eka obedo maler. Chieng’ mar aboro, dhakono ne kawo akuche ariyo madongo kata akuche ariyo matindo kae to otero ne jadolo e dho hema mar romo. Jadolo ne kawo akuru achiel kae to otimogo misango mar richo to machielo notimogo misango miwang’o. E yo ma kamano, jadolo ne pwodho dhakono e nyim Jehova nikech chuerneno.—Lawi 15:19-30; som CLEAN, CLEANNESS.
it-1-E 1133
Ka Maler
2. Hema mar lamo, kae to bang’e, hekalu. Laru mar hema mar lamo kod laru mag hekalu ne ineno kaka kuonde maler. (Wuok 38:24; 2 We. 29:5; Tich 21:28) Kendo mar misango miwang’o kod besen mar mula e gik madongo ma ne oket e laru. Ne gin gik maler. Mana joma ne osepwodhore kende e ma ne oyienegi donjo e laru mar hema mar lamo; e yo ma kamano, onge ng’at ma ne oyiene donjo e laru mag hekalu ka ne ok oler. Kuom ranyisi, dhako ma ne ok ler ne ok oyiene mulo gik maler kata donjo ka maler. (Lawi 12:2-4) Nenore maler ni kata mana ka Jo-Israel ne odhi nyime bedo ma ok ler kuom kinde, mano ne ikawo mana ka gima ne gidwanyo hema mar lamo. (Lawi 15:31) Joma nokelo misango mar pwodhruok bang’ chango kuom tuo mar dhoho ne nyalo chopo mana e dho laru. (Lawi 14:11) Onge ng’ato ang’ata ma ok ler ma ne nyalo chamo misango mar kuwe e hema mar lamo, kata mana e hekalu nikech ne inyalo nege.—Lawi 7:20, 21.
Nono Puonj Manie Wach Nyasaye
it-1-E 665 ¶5
It
Ka ne okwong walo jodolo e piny Israel, ne ochik Musa mondo okaw remb yim kendo omien e it Harun ma korachwich, kendo e lith lwete mathuon ma korachwich, kod e lith tiende mathuon ma korachwich. Notimo kamano ne yawuot Harun bende. Mano ne nyiso gik moko duto ma ne giwinjo, tich ma ne gitiyo, kod ngimagi duto ne nyaka luwre gi kaka ngima jadolo nonego obedi. (Lawi 8:22-24) E yo ma kamano, ka ne jadolo pwodho ng’at ma ne ochango kuom tuo mar dhoho, ne oketo remo moko mag yim mar misango mar ketho kod mo moko e it ng’at mipwodhono ma korachwich. (Lawi 14:14, 17, 25, 28) Gima kamano bende ne itimo ne ng’at ma ne oyie dhi nyime bedo misumba ruodhe kuom ngimane duto. E chal ma kamano, misumbano ne itero e frem mar dhoot kendo ruodhe ne tucho ite gi riwi. Kido ma ne nenore malerno ne iketo e it ng’ato mondo onyis ni misumba noyie dhi nyime tiyo ne ruodhe e ngimane duto.—Wuok 21:5, 6.
g-SW 1/06 14, sanduku
Ber Otuodo kod Rachne!
E KINDE MUMA?
Muma wacho ni “tuo mar dhoho” ne nyalo mako ot, tiende ni kor ot. (Tim Jo-Lawi 14:34-48) Jomoko wacho ni “dhoho ma landore,” en gimoro machal gi gik ma poth-poth ma yudorega kama pi osikoe. Kata kamano, adiera mar wachgino pok oyudi. Bed ni en kamano kata ooyo, Chik Nyasaye to ne dwaro ni ogol kite ma tuono nitie kendo ochwer kor udi duto gi iye kae to burugo owit “kamoro ma ok ler” oko mar dala. Ka dhohono noduogo kendo, ne imuko odno mi kaw gik mogerego kae iwito.” Chikno ne nyiso hera matut ma Jehova noherogo joge kendo kaka nodewo ngimagi ahinya.
DESEMBA 28–JANUAR 3
MWANDU MA YUDORE E WACH NYASAYE | TIM JO-LAWI 16-17
“Ang’o ma Wanyalo Puonjore e Wi Odiechieng Pwodho Ji?”
Puonj ma Wanyalo Yudo e Bug Tim Jo-Lawi
4 Som Tim Jo-Lawi 16:12, 13. Tem ane paro gik ma ne timore e Odiechieng Pwodhruok: Jadolo maduong’ donjo e tabenakel. Mae e donjone kanyo mokwongo e odiechieng’no; bang’ mano, obiro donjo kendo diriyo. E lwete achiel, en gi gir ting’o ma nigi ubani e iye, to e lwete machielo en gi gir ting’o molos gi dhahabu to chuk mach ni e iye. Ochung’ matin e nyim pasia mogeng’go Kama Ler Moloyo. Kae to odonjo e i Kama Ler Moloyo konyiso luor matut, kendo ochung’ e nyim sandug singruok. E yor ranyisi, ochung’ e nyim Jehova Nyasaye achiel kachiel! Kae to jadolono olo ubani e wi chuk mach, kendo i Kama Ler Moloyo pong’ gi suya mamit. Bang’e obiro donjo iye kanyo kendo koting’o remb le motimgo misango. Ne ni jadolono wang’o ubani ka pok ochiwo remb le motimgo misango.
Puonj ma Wanyalo Yudo e Bug Tim Jo-Lawi
5 Ubani ma nitiyogo e Odiechieng Pwodhruok puonjowa ang’o? Muma wacho ni sama jotich Jehova wuoyo kode e lamo, gichalo joma otero ubani e nyime. (Zab. 141:2; Fwe. 5:8) Par ni jadolo maduong’ ne tero ubani e nyim Jehova konyiso luor matut. E yo ma kamano, sama walemo, wanyiso luor matut e nyim Jehova. Wamor ahinya ni Jachuech mar polo gi piny oyienwa mondo wadhi e nyime kendo wasud machiegni kode, mana kaka nyathi matin dhiga ir wuon mare. (Jak. 4:8) Ee, oyienwa bedo osiepene! (Zab. 25:14) Waneno ni Jehova odhialowa ahinya ma ok dwaher timo gimoro amora ma nyalo chwanye.
Puonj ma Wanyalo Yudo e Bug Tim Jo-Lawi
6 Par ni jadolo maduong’ ne nyaka wang’ ubani ka pok ochiwo remb le motimgo misango. Kuom timo kamano, nodwaro ni okwong obed gadier ni Nyasaye oyie kode e ka ochiw misango. En puonj mane ma wanyalo yudo kanyo? Ka ne Yesu ni e piny, nitie gimoro maduong’ ahinya ma ne nyaka otim ka pok ochiwo ngimane kaka misango. Ne en gima duong’ moloyo kata mana reso oganda dhano. Ne en ang’ono? Ne nyaka owinj Jehova e ngimane duto e piny mondo Jehova obi oyie gi misangone. Kuom timo kamano, nodhi nyiso ni timo gik moko kaka Jehova dwaro e gima berie mogik. Nodhi nyiso ma onge kiawa kata matin ni Jehova kende e ma nigi ratiro mar bedo jaloch e piny gi polo.
Nono Puonj Manie Wach Nyasaye
it-1-E 226 ¶3
Azazel
Mana kaka jaote Paulo nolero, ka ne Yesu otho, ne ochiwo misango makare chuth ma golo richo mag dhano. Misangono nochopo gima duong’ moloyo ma “remb ruedhi kod mag diek” ne nyalo timo. (Hib. 10:4, 11, 12) Omiyo, ne ochiwore mondo ‘oting’ tuochewa,’ kendo ne “ochuoye nikech richowa.” (Isa. 53:4, 5; Mat. 8:17; 1 Pet 2:24) Ne oting’o tuoche duto mag joma nyiso yie kuom misango mane ochiwo. Ne onyiso ni Nyasaye nyalo weyo richo mag dhano chuth chuth. E yo ma kamano, diel ma ne ichiwo kaka Azazel nonyiso maler misango ma Yesu Kristo ne dhi golo bang’e.
Gimomiyo Nyaka Wabed Maler
10 Som Tim Jo-Lawi 17:10. Jehova nochiko Jo-Israel ni kik cham “remb gimoro.” Jokristo bende ne omi chik ni kik gicham remo kata tiyo gi remb le kata dhano e yo moro amora. (Tich 15:28, 29) En gima lit ahinya paro ni wanyalo timo gimoro ma miyo Nyasaye obed ‘mamon’ kodwa kendo inyalo golwa e kanyakla. Wahere kendo wadwaro luwo chikene. Kata ka ngimawa ni e kind akuru kod asumbi, tiende ni wachiegni gi tho, wang’ado e chunywa mar chung’ motegno kata bed ni jogo ma kia Jehova kendo maok dew chikene yondhowa mondo watim dwachgi. Wang’eyo ni ji biro jarowa kapo ni watamore ni kik medwa remo. Kata kamano, wayiero mar luwo chike Nyasaye. (Juda 17, 18) Ang’o mabiro jiwowa mondo ‘wane ni ok wachamo remo’ kendo ok wayie mondo omedwago?—Rap. 12:23.