Gik Minyalo Timo Mondo Idag e Piny Manyien

Sula duto ma wasenono chop kae nyiso maler ni machiegnini Nyasaye biro tieko gik maricho duto kaachiel gi joma richo bende. Wanyalo bedo gadier chuth ni mano biro timore. Nikech ang’o? En nikech Muma ma en Wach Nyasaye singo niya:

“Piny kadho gi gombone.”—1 JOHANA 2:17.

Wanyalo bedo gadier ni sama mano biro timore nitie joma biro tony, nikech ndikono singo bende kama:

“Ng’at ma timo dwach Nyasaye siko nyaka chieng’.”

Kuom mano, ka wadwaro ni wabi watony e giko pinyni, nyaka watim dwach Nyasaye. To mondo wang’e dwach Nyasaye, nyaka wakwong wang’e Nyasaye owuon.

‘NG’E NYASAYE’ MONDO IBI ITONY

Pichni: 1. Nas moro obet e dier ot e osiptal nikech ool. 2. Sama odhi yueyo matin e otel, oneno ka nas wadgi moro somo gaset moro komor. 3. Nas wadgino somone ndiko moro e Muma, kendo miye kad mar jw.org.

Yesu nowacho kama: “Ka ng’ato ong’eyi, in Nyasaye makende mar adier . . . to en gi ngima ma nyaka chieng’.” (Johana 17:3) Mondo watony chieng’ giko mi wadag nyaka chieng’, nyaka wang’e Nyasaye. Mano ok en mana ng’eyo ang’eya ni Nyasaye nitie, kata ng’eyo weche manok kuome. Dwarore ni wabed osiepene. To mondo osiep me kindwa kode obed motegno, nyaka wati gi thuolo moromo e gero osiepno, mana kaka watimoga gi osiepewa mamoko. Ne ane adiera moko madongo ma wapuonjore e Muma, ma konyowa loso osiep gi Nyasaye kendo rito osiepno.

Adiera ma Wapuonjore e Muma

Wapuonjore ni chakre chon, Nyasaye ne dwaro ni wadag e Paradiso.

Nochueyo Adam gi Hawa moketogi e puodho ma jaber miluongo ni Eden. Ne gionge gi richo kata rem moro amora, kendo Nyasaye nomiyogi gimoro amora ma ne dwarore mondo gibed mamor. Di ne gidak nyaka chieng’. Ka di ne gidhi nyime bedo osiepe Nyasaye, di ne ok githo. Kata kamano, ne giyiero mar tamore luwo chik achiel mayot ma ne Nyasaye omiyogi.

Wapuonjore gimomiyo sani wachandore.

Ka ne Adam dhano mokwongo otamore winjo Nyasaye, nolalo thuolo mar dak nyaka chieng’, ok mana ne en kende, to ne oganda dhano duto. Muma lero wachno kama: “Richo nodonjo e piny kokalo kuom ng’ato achiel, kendo tho nobiro kokalo kuom richo, tho nolandore kuom ji duto nikech giduto ne gisetimo richo.” (Jo-Rumi 5:12) Mana kaka ng’ato nyalo yudo tuo moro mar kodhi kuom jonyuolne, e kaka nyithind Adam duto noyudo richo kuom Adam. Mano e momiyo wabedo moti kendo watho.

Wapuonjore gima Nyasaye osetimo mondo oreswa.

Muma wacho kama: “Nyasaye nohero piny ahinya mi nochiwo Wuode ma miderma, mondo ng’at ma nyiso yie kuome kik kethi, to obed gi ngima ma nyaka chieng’.” (Johana 3:16) Nyasaye nooro Yesu e piny kae mondo othonwa. Dichwo moro ma jahigni 86 ma Ja-India, ma nyinge Prabhakar nowacho kama: “Gima Jehovaa notimono nyiso okang’ moherago. Heraneno osemiya geno mar dak nyaka chieng’.”

Wapuonjore yore ma wanyalo nyisogo Nyasaye ni wamor gi gima osetimonwa.

Muma wacho ni wanyalo nyiso Nyasaye ni wamor gi gima osetimonwa kuom ‘mako chikene.’ (1 Johana 2:3) Nikech hera ma Jehova oherowago, osenyisowa gik mwanyalo timo mondo wadag maber kata mana sani. (Isaya 48:17, 18) Nyasaye ok dwar ni wachandre. Osingonwa ni ka waluwo chikene, wabiro dak maber sani kendo nyaka chieng’.

SOM MUMA MA EN WACH NYASAYE PILE

Nasno rango polo bang’ somo Muma ka en e lanj. — Inyalo tony e giko pinyni kuom lemo kikwayo Nyasaye mondo okonyi, kendo timo dwache

E ngima ma pile, mondo wabed mangima nyaka wachiem. Kata kamano, Yesu nowacho niya: “Dhano ok bed mangima mana kuom chiemo kende, to kuom weche duto ma wuok e dho Jehova.”—Mathayo 4:4.

E kindewagi wayudo weche Jehova e Muma. Kipuonjori Muma ibiro fwenyo adiera moko madongo ma konyowa ng’eyo gik ma Nyasaye osetimo ne dhano e kinde mokalo, motimo sani, kod mobiro timo e kinde ma biro.

LAM NYASAYE KIKWAYE MONDO OKONYI

Ang’o minyalo timo ka po ni igombo luwo chike Nyasaye to iyudo ka pod tekni weyo gik mokwero? Ng’eyo Nyasaye nyalo konyi e yo makende ahinya.

Ne ane ranyisi mar nyako moro ma wabiro luongo ni Sakura, ma ne jachode ahinya. Ka nochako puonjore Muma, nofwenyo ni Nyasaye chiko joge kama: “Ringuru terruok!” (1 Jo-Korintho 6:18) Sakura nolamo Nyasaye mondo omiye teko, kendo gikone noweyo chode. To mano ok nyis ni koro onge tembe moromogo. Owacho kama: “Sama achako paro gik mochido, akwayoga Jehova mondo okonya nikech ang’eyo ni ok anyal kedo kenda. Lamo osekonya sudo machiegni ahinya gi Jehova.” Mana kaka Sakura, nitie ji tara gi tara moseng’eyo Nyasaye. Nyasaye miyogi teko mar timo lokruoge ma dwarore e ngimagi mondo gidag e yo ma more.—Jo-Filipi 4:13.

Kaka imedo ng’eyo Nyasaye, e kaka en bende obiro medo ng’eyi kaka osiepne mogeno. (Jo-Galatia 4:9; Zaburi 25:14) Kae to ibiro tony midonj e piny manyien ma Nyasaye osingonwa. To piny manyienno biro chalo nade? Sula ma luwo biro lero.

a Jehova en nying Nyasaye madier kaka inyisowa e Muma.