Nyasaye Dwaro ni Atim Ang’o e Ngimana?

Dwoko ma Muma chiwo

Nyasaye dwaro ni ing’eye, isud machiegni kode, ihere, kendo itine gi chunyi duto. (Mathayo 22:37, 38; Jakobo 4:8) Inyalo puonjori gima Nyasaye dwaro ni itim e ngimani ka inono ngima Yesu kod weche ma ne opuonjo. (Johana 7:16, 17) Yesu ne ok wuo awuoya e wi dwach Nyasaye to oweyo gi kanyo, kar mano, ne otimo dwach Nyasaye. Kuom ranyisi, Yesu nowacho ni gimaduong’ e ngimane en ‘timo dwach ng’at ma noore, to ok dwache owuon.’​—Johana 6:38.

Be ochuno ni Nyasaye omiya fweny moro kata omiya luong makende eka ang’e gima odwaro ni atim e ngimana?

Ooyo. Mano en nikech Muma oting’o wach Nyasaye momiyo dhano. Oting’o weche duto ma nyalo konyi bedo “moromo chuth, moikore maber ne tije mabeyo duto.” (2 Timotheo 3:16, 17) Nyasaye dwaro ni iti gi Muma kaachiel gi ‘nyaloni mar paro’ mondo ing’e gima odwaro ni itim e ngimani.​—Jo-Rumi 12:1, 2; Jo-Efeso 5:17.

Be anyalo timo dwach Nyasaye?

Ee. Mano en gima nyalore nikech Muma wacho niya: “Chikene ok tek luwo.” (1 Johana 5:3) Mano koro ok nyis ni luwo chike Nyasaye en gima yot kinde duto. Kata kamano, ber ma ibiro yudo ng’eny moloyo kinda moro amora ma ibiro timo. Yesu owuon nowacho niya: “Jo mamor gin jogo ma winjo wach Nyasaye kendo timo!”​—Luka 11:28.