Be Joneno mag Jehova Pogoga Joot?

Kaka Joneno mag Jehova, watimoga kinda mondo wadag gi kuwe kaka joot kendo watemo konyo jomamoko mondo gin bende gibed gi ngima ma kamano. Wamiyo Nyasaye luor, nikech en e ma nochako ngima mar joot. (Chakruok 2:21-24; Jo-Efeso 3:14, 15) E Muma, Nyasaye chiwo puonj ma osekonyo ji e piny mangima mondo gibed gi ngima maber kendo gibed gi winjruok motegno kaka joot.

Kaka Joneno mag Jehova Konyo Joot Mondo Gidag gi Kuwe

Watemoga matek mondo waluw puonj manie Muma nikech mano konyowa bedo chwo mabeyo, mon mabeyo, kendo jonyuol mabeyo. (Ngeche 31:10-31; Jo-Efeso 5:22–6:4; 1 Timotheo 5:8) Rieko ma yudore e Muma konyo nyaka joot manie dinde mopogore opogore. (1 Petro 3:1, 2) Ne ane weche moko ma nowach gi joma chwogi kata mondegi noduogo obedo Joneno mag Jehova:

• “Higni auchiel mokwongo mag kend marwa nopong’ mana gi gwandruok mang’eny. To ka Ivete nobedo Janeno mar Jehova, nomedo nyiso hera kendo nohore. Lokruoge ma notimogo noreso kend marwa.”​—Clauir, ma wuok Brazil.

• “Ka ne Chansa ochako puonjore Muma gi Joneno mag Jehova, natamora wachno nikech naparo ni Joneno kethoga kend mag ji. Chakre kindeno, naduogo afwenyo ni kare Muma e ma nokonyo kend marwa.”​—Agness, ma wuok Zambia.

Sama wan e tij lendo, wanyisoga jomamoko kaka puonj mag Muma nyalo konyogi

• Yiero ng’at mowinjore ma ginyalo kendorego

• Nyagore maber gi pek ma bedoe e higa mokwongo mar kend

• Dak gi kuwe gi wedegi

• Tiyo maber gi pesa

• Weyo ywaruok

• Ng’eyo kaka ginyalo weyo ne jowetegi kethogi

• Tiego nyithindo

Be loko din ma alemee nyalo kelo ywaruok e kend?

En adier ni samoro mano keloga ywaruok. Kuom ranyisi, e higa mar 1998 kambi mar Sofres notimo nonro moro e wi kend ma achiel kuom joma nie kendno en Janeno. Ne gifwenyo ni e kend 20 ma kamano, kend achiel kende e ma ne nigi gwandruok mang’eny.

Yesu nokoro ni joma luwo chikene samoro ne nyalo yudo akwede koa kuom joodgi. (Mathayo 10:32-36) Jahistori moro miluongo ni Will Durant wacho ni e kinde loch mar Rumi, “ne idonjonega Jokristo kuom pogo joot,”a kendo ni e kindegi moko kuom Joneno mag Jehova bende idonjonegi gi wach achiel achielno. Be mano nyiso ni koro Joneno e ma pogoga joot?

Ka ne European Court of Human Rights ng’ado kes ma nodonjnego Joneno mag Jehova ni gipogoga joot, ne giwacho ni joodgi ma ok gin Joneno e ma keloga ywaruok, nikech gitamorega “yie kendo chiwo luor ne ratiro ma ng’ato nigo mar bedo e din moyiero kendo timo gik motudore gi din-no.” Ne gimedo niya: “Mano en gima timorega ne kend duto ma nigi joma nie dinde mopogore opogore, to ok Joneno mag Jehova kende.”b Kata obedo ni Joneno mag Jehova yudorega e chal ma kamano, gitemoga matek mondo giluw puonj ma wacho ni: “Kik uchul richo kar richo . . . . Ka nyalore, to temuru matek mondo udag gi kuwe gi ji duto.”​—Jo-Rumi 12:17, 18.

Gimomiyo Joneno mag Jehova kendore mana gi Joneno wetegi

Joneno luwo puonj manie Muma ma wacho ni ji onego okendre “mana kuom Ruoth,” tiende ni, kendo ng’at ma un-go e yie achiel. (1 Jo-Korintho 7:39) Puonj manie Mumano konyo ahinya. Kuom ranyisi, e higa mar 2010 sula moro ma yudore e bug Journal of Marriage and Family nowacho ni “joma okendore manie yie achiel kata din achiel bedoga gi winjruok motegno ahinya.c

Kata kamano, Joneno mag Jehova ok jiwga Joneno wetegi mondo giwere gi joutegi ma ok gin Joneno. Muma wacho niya: “Ka nitie owadwa moro ma chiege ok ni e yie, to chiegeno oyie dak kode, kik oweye; to ka nitie dhako moro ma chwore ok ni e yie, to chworeno oyie dak kode, kik oweye.” (1 Jo-Korintho 7:12, 13) Joneno mag Jehova luwo chikno.