Muma Wacho Ang’o e Wi Nego Ng’at ma Tuo Ahinya Mondo Kik Odhi Nyime Sandore?

Dwoko ma Muma chiwo

Muma ok wuo achiel kachiel e wi nego ng’at ma tuo ahinya mondo kik odhi nyime sandore.a Kata kamano, onyisowa paro makare monego wabedgo e wi ngima kod tho. Nego ng’ato ok en gima owinjore kata matin, kata kamano, onge chik moro amora moketi ma ng’ato onego oluw sama odwaro ni ores ngimane mondo kik otho mapiyo kata obedo ni thone osechopo.

Muma wacho ni Nyasaye e Jachuechwa kendo ni en e “soko mar ngima.” (Zaburi 36:9; Tich Joote 17:28) Nyasaye neno ngima kaka gima duong’ ahinya. Nikech mano, Nyasaye osin gi tim mar nego ng’ato kaachiel gi deruok. (Wuok 20:13; 1 Johana 3:15) E wi mano, Muma wacho ni onego wakaw okenge ma dwarore mondo warit ngimawa kaachiel gi ngima jomamoko. (Rapar mar Chik 22: 8) Nenore maler ni Nyasaye dwaro ni wami ngima luor.

To nade ka ng’ato tuo ahinya?

Muma ok oyienwa nego ng’ato kata mana ka wang’eyo ni ng’atno chiegni tho. Ranyisi mar Saulo, ruodh Israel konyowa neno mano. Ka ne ohinye marach e lweny, nokwayo jatije mondo otiek ngimane. (1 Samuel 31:3, 4) Jatijeno notamore nege. To bang’e, ng’at moro machielo nowuondo Daudi ni ne onego Saulo mana kaka Saulo ne dwaro. Nikech Daudi ne nigi paro kaka mar Jehova, nowacho ni ng’atno ne nigi buch remo.​—2 Samuel 1:6-16.

Be ochuno ni watim duto ma wanyalo mondo wachwal ngima ng’ato kata weche tek manade?

Sama tho ochomo ng’ato, Muma ok wach ni watem chwalo ngima ng’atno. Kar mano, ochiwo paro makare e wi wachno. Tho en jasikwa maduong’, kendo en misach richo. (Jo-Rumi 5:12; 1 Jo-Korintho 15:26) Kata obedo ni ok wagomb tho, ok onego waluor tho nikech Nyasaye singo ni obiro chiero jomotho. (Johana 6:39, 40) Ng’at ma omiyo ngima luor biro timo duto monyalo mondo omany thieth ma dwarore. To mano ok nyis ni koro onego wayier kit thieth ma chwalo ndalo mag ng’ato to thone osechopo.

Be deruok en richo ma ok nyal wene ng’ato?

Ooyo, Muma ok kwan deruok kaka achiel kuom richo ma ok nyal wene ng’ato. Kata obedo ni deruok en richo maduong’,b Nyasaye ong’eyo ni gik moko kaka tuoche mag obwongo kata parruok mokalo tong’ nyalo miyo ng’ato odere. (Zaburi 103:13, 14) Jehova tiyo gi Muma e hoyo joma chunygi onyosore. E wi mano, Muma wacho ni “chier nobedie mar jo ma kare gi jo ma ok kare.” (Tich Joote 24:15) Mano nyiso ni nitie geno mar chier ne joma notimo richo moko madongo kaka deruok.