Nyako moro wacho ne nyawadgi weche ma chwoyo chuny

PENJO MA ROWERE OHERO PENJORE

Nade ka Osiepna Ochwanya?

Gima onego ing’e

Onge osiepe ma ok chwanyrega. Nikech wan dhano morem, kata osiepni migeno nyalo wacho kata timo gima chwanyi. Ber keto e paro ni in bende ok in ng’at makare. Be inyalo paro kinde ma ne ichwanyoe ng’ato?—Jakobo 3:2.
Yot mondo ichwanyri gi osiepni nikech gik mineno ka oketo e intanet. Kuom ranyisi, rawera moro ma nyinge David wacho kama: “Sama ineno ka osiepni moro oketo pichni e intanet ka gin e nyasi kata e budho moro ma ne iongee, inyalo chako penjori gimomiyo ne ok ogweli. Mano nyalo miyo iwinj ni ondhogi kendo ibed mokuyo.”
Inyalo puonjori loyo pekno.

Gima inyalo timo

Nonri. Muma wacho kama: “Kik ibed ng’at ma chwanyore piyo, mano en tim mifwenyogo ng’at mofuwo.”—Eklesiastes 7:9, weche moler piny.

“Seche moko inyalo fwenyo bang’e ni gima ne ochwanyi ne en mana gimoro matin.”—Alyssa.

Wach monego ipar: Be ichwanyoriga piyo? Koso inyalo nano gi nyawo mag joweteni?—Eklesiastes 7:21, 22.

Par ber ma nyalo betie kiweyo ne ng’ato kethone. Muma wacho kama: “Ng’ato [yudo] duong’ koweyo ne ng’at mokethone.”—Ngeche 19:11.

“Ka po ni ng’ato ochwanyi, ber mondo iwene gi chuny man thuolo, kendo kik isik kiparone gima rach ma notimonino ma biro miyo okwayi ng’wono sa asaya miwuoyo e wi wachno. Ka iseweyone, to weri gi wachno chuth.”—Mallory.

Wach monego ipar: Be wachno lich ahinya mochuno ni nyaka iwuoye? Koso inyalo ng’wono ne ng’at mochwanyino mondo kuwe obedie?—Jo-Kolosai 3:13.

Weyo koyo odonj e ot mosebedo gi liet — Siko ka iwuoyo e wi gima nochwanyou chalo gi yawo dhoot mondo koyo odonj e ot mosebedo gi liet

Dew ng’at mochwanyino. Muma wacho kama: “Kik ung’i mana gik ma kelonu ber un uwegi, to ung’i bende gik ma kelo ber ne jomamoko.”—Jo-Filipi 2:4.

“Ka osiepe oherore kendo omiyore luor, gibiro timo kinda mondo gilos weche sama gichwanyore mapiyo nikech ok de giher ni gimoro amora oketh osiep manie kindgino. Usetimo duto munyalo mondo ulos osiepno kendo ok duher ni okethre.”—Nicole.

Wach monego ipar: Donge inyalo temo fwenyo gimoro maber kuom nyawaduno sama owuoyo kodi?—Jo-Filipi 2:3.

Wach maduong’ en ma: Ber ng’eyo gima inyalo timo sama ochwanyi, mano biro konyi kata kibedo ng’at maduong’. Donge inyalo chako puonjori timo kamano sani?