Picha mar miyo moro ma nosetho kod gima okanie buch ringrene

Ang’o ma Muma Wacho e Wi Wang’o Ng’at Motho?

Dwoko ma Muma chiwo

Muma ok wuo achiel kachiel e wi wang’o ng’at motho. Onge chik moro amora ma Muma oketo e wi yiko jomotho kata wang’ogi.

Muma nyisowa ni nitie jotich Jehova ma ne oyiko joggi ma notho. Kuom ranyisi, Ibrahim notimo kinda mondo oyud kama nonyalo yike jaode ma Sara.—Chakruok 23:2-20; 49:29-32.

Bende, Muma wuoyo kuom jotich Jehova moko ma nowang’o ringre joma notho. Kuom ranyisi, ka ne oneg Saulo, Ruodh Israel kod yawuote adek e lweny, ringregi nodong’ e alwora mar jowasikgi kendo ne giguro ringrego e ohinga moro. Bang’ winjo wachno, Jo-lweny mag Israel nokawo ringre Saulo gi yawuote, ma giwang’ogi, kae to giiko chokegi. (1 Samuel 31:8-13) Muma nyisowa ni gima ne gitimono ne en gima kare.—2 Samuel 2:4-6.

Miriambo ma ji ohero wacho e wi wang’o jomotho

Miriambo: Wang’o ng’at motho en tim ma ok nyis luor ne ng’at mothono.

Adiera: Muma wacho ni jomotho dok e lowo, to mano e gima timorega sama ringre ng’ato osetop. (Chakruok 3:19) Wang’o ng’at motho miyo ng’atno lokore lowo, kata buru mapiyo.

Miriambo: E kinde Muma, ne iwang’o mana joma Nyasaye ok dwar.

Adiera: Ne owang’ ringre mag jomoko ma ne ok oluoro Nyasaye, kaka Akan gi joode. (Joshua 7:25) Kata kamano, mano ne ok en chik. (Rapar mar Chik 21:22, 23) Mana kaka waseneno, ne owang’ nyaka ringre jotich Nyasaye ma nomakore kode kaka, Jonathan wuod Ruoth Saulo.

Miriambo: Wang’o jomotho mono Nyasaye chierogi.

Adiera: Nyasaye nyalo chiero ng’ato ang’ata, bed ni noyike, nowang’e, nolal e nam, kata le moro nochame. (Fweny 20:13) Nyasaye Manyalo Duto nyalo chueyo ne ng’ato del manyien kendo.—1 Jo-Korintho 15:35, 38.

Gik Manyalo Konyi Timo Yiero mar Yiko Kata Wang’o Ng’at Motho

Sama idwaro timo yiero ka be ibiro wang’o kata yiko ng’at motho, non weche maluwogi:

Dwaro mag ng’at mothono. Muma wuoyo kuom joma ne ochiko joodgi e wi gima ne onego otim ne ringregi bang’ ka gisetho.—Chakruok 50:4, 5; Wuok 13:19.
Chike mag anyuola. Kinde mang’eny, chikego e ma ji luwoga sama giyiko ng’ato. (Johana 19:40) Kuom ranyisi, e kinde Muma, ji ne yiko joggi kaluwore gi kaka anyuolagi ne yiko. (Chakruok 49:31; 1 Samuel 28:3) E kindegi bende, ng’ato nyalo yiero yiko ng’ate motho kaluwore gi chikegi mag anyuola, tek mana ni chikego ok kwed puonj mag Muma.
Chike mag piny. Muma jiwowa ni wachiw luor ne joloch. (Jo-Rumi 13:1) E pinje moko, nitie chike ma tayo gima onego otim ne ringre ng’at motho. Kuom ranyisi, nitie kuonde moko ma joloch e ma chiko kama onego opukie buru mar ringre mosewang’.
Paro ma jomoko nigo. Muma jiwowa ni onego wang’i gik ma kelo ber ne jomoko. (Jo-Filipi 2:4) Sama wang’ado paro ka be wabiro wang’o kata yiko ng’ato, wanyalo nono penjo maluwogi: Joodwa mamoko nigi paro mane e wi yiko kata wang’o ng’at mosetho? Anyuola kata jogweng’ nigi paro mane e wachno?