Osiepe Nyasaye Nodag e Paradis

Paradis ok nochal gi piny mawadakie sani. Nyasaye ok nodwaro ni piny opong’ kod chandruok, kuyo kod rem. Endalo mabiro, Nyasaye nolos piny obed paradis. Paradis nochal nade? We mondo wane gima Muma wacho:

Jomabeyo. Paradis nobed kar dak mag osiepe Nyasaye. Gini tim timbe mabeyo ni jowetegi. Gini dag kaluwore gi yore Nyasaye makare.​—Ngeche 2:21.

Chiemo Mang’eny. E Paradis, kech ok nobedie. Muma wacho kama: “Bel [kata, chiemo] nobedi mang’eny e piny.”​—Zaburi 72:16.

Ute mabeyo kod tije mamoro ji. Ei piny mar Paradis joot ka joot nobed gi dala margi kendgi. Ng’ato ka ng’ato noti tich makelo mor maradier.​—Isaiah 65:21-23.

Kwe e piny mangima. Ji ok nekedi kendo ji ok notho e lweny. Wach Nyasaye wacho kama: ‘Nyasaye miyo lwenje rumo.’​—Zaburi 46:8, 9.

Ngima maber. Muma singo: “Japiny [mar Paradis] ok nowachi, Atuwo.” (Isaiah 33:24) Kendo, jo mong’ol, kata mwofu, kata radin kata momo ok nobedie kendo.​—Isaiah 35:5, 6.

Giko mar rem, kuyo gi tho. Wach Nyasaye wacho: “Tho ok nobedie kendo, kata ywak, kata nduru, kata rem ok nobedie, nikech gik machon osekadho.”​—Fweny 21:4.

Jomaricho ok nobedie. Jehova singo ni: “Nogol jo maricho oko e piny, kendo jo matimo andhoga nogol oko chuth.”​—Ngeche 2:22.

Ji biro herore kendo gi biro miyore luor. Timbe ma ok kare, wuoro, kod sigu ok nochak obedie. Ji noriwre kendo nodag maber kaluwore gi yore Nyasaye makare.​—Isaiah 26:9.