Wach ma Noum ma Morowa

Be ng’ato oseganyisie wach moro ma ji ok ong’eyo?—a Muma wuoyo kuom wach moro makende miluongo ni “wach maler moum.” Iluonge ni wach moum nikech en wach ma ji ne ok ong’eyo. Kata mana malaike ne gombo ng’eyo wachno. Be diher ngeyo ni wach ma ne oumno en wach mane?—

Chon ahinya, Nyasaye nochweyo dichwo gi dhako mokwongo. Ne iluongogi ni Adam gi Hawa. Nyasaye noketogi kama ber ma niluongo ni puodho mar Eden. Ka di ne Adam gi Hawa owinjo Nyasaye, gin kaachiel gi nyithindgi di ne giloso piny duto obedo paradis mana kaka puodho mar Eden ne chalo. Kendo di ne gidak e Paradisno nyaka chieng’. Kata kamano, be iparo gima Adam gi Hawa notimo?—

Adam gi Hawa ne ok owinjo Nyasaye kendo mano ema omiyo sani piny mwadakieni ok en paradis. Kata kamano, Nyasaye nowacho ni obiro loso piny mangima obed kama jaber, kendo kama ji duto biro dakie nyaka chieng’ gi mor. Ere kaka Nyasaye ne dhi timo mano? Kuom higni mang’eny ji ne ok ong’eyo kaka mano ne dhi timore. Ne en wach moum.

Kane Yesu obiro e piny, noelo ne ji weche moko e wi wach ma noumno. Nowacho ni wach ma ne oumno ne otudore gi Pinyruodh Nyasaye. Yesu nonyiso ji mondo olem ka gikwayo mondo Pinyruodhno obi. Pinyruodhno biro miyo piny duto obed paradis ma jaber.

Be ng’eyo wach moumno mori?— Ng’e ni joma winjo Jehova ema biro dak e Paradis. Muma oting’o sigendni mang’eny mag chwo gi mon ma nowinjo Jehova. Be diher ng’eyogi?— We wawuo ane e wi moko kuomgi kendo wane kaka wanyalo luwo ranyisigi.