Ere Kaka Weche Miwacho Nyalo Moro Jehova?

Ka ne Jehova ochueyowa, nomiyowa mich maber ma en nyalo mar wuoyo. Be odewo kaka watiyo gi michno? Ee! (Som Jakobo 1:26.) Omiyo, ere kaka wanyalo tiyo gi michno e yo ma moro Jehova?

1. Ere kaka wanyalo tiyo gi mich mar wuoyo e yo maber?

Muma jiwowa ni ‘wadhi nyime jiwore kendo gerore.’ (1 Jo-Thesalonika 5:11) Be inyalo paro moko kuom joma dwaro ni ojiwgi? Ang’o minyalo timo mondo ijiwgi? Nyisgi ni igenogi kendo idewogi ahinya. Samoro inyalo nyisogi gik ma ihero kuomgi. Be inyalo paro ndiko moro ma nyalo jiwo ng’at moro ming’eyo? Nitie ndiko mang’eny minyalo tiyogo. Bende, ng’e ni weche miwacho kod yo miwachogigo nyalo jiwo jomamoko ahinya. Omiyo, tem matek mondo iwuo e yo mamuol kinde duto.​—Ngeche 15:1.

2. Gin weche kaka mage ma ok onego wawach?

Muma wacho niya: “Kik uwe wach moro amora motop oa e dhou.” (Som Jo-Efeso 4:29.) Mano nyiso ni ok onego wati gi weche maricho ma nyalo chwanyo ng’ato. Bende, ok onego wakuodh jomoko kata ketho nyinggi.​—Som Ngeche 16:28.

3. Ang’o ma nyalo konyowa mondo wawach weche ma jiwo jomamoko?

Kinde mang’eny wawachoga weche manie chunywa kod pachwa. (Luka 6:45) Omiyo, onego waket pachwa e gik moko duto makare, maler, ma jiwo hera, kendo mipwoyo. (Jo-Filipi 4:8) Mondo watim kamano, nyaka wayier osiepe mabeyo kod yore mag manyo mor mowinjore. (Ngeche 13:20) Bende, ka pok iwacho gimoro, onego ipar matut. Non kaka weche midwaro wacho biro mulo jomamoko. Muma wacho niya: “Weche ma imuomruokgo chuoyo chuny ka ligangla, to lew ng’at mariek chango chuny.”​—Ngeche 12:18.

TIM NONRO

4. Tang’ gi weche miwacho

Nitie seche moko ma waywagoga ang’e nikech weche ma ne wawacho. (Jakobo 3:2) Som Jo-Galatia 5:22, 23, kae to uwuo e wi penjo ma luwogi:

• E kido miwuoye ndikono, gin mage ma diher kwayo Nyasaye ni ibedgo mondo okonyi e rito lewi? Ere kaka kidogi nyalo konyi?

Som 1 Jo-Korintho 15:33, kae to uwuo e wi penjo ma luwoni:

• Osiepeni kod yore mag manyo mor mihero nyalo miyo iwach weche ma chalo nade?

Som Eklesiastes 3:1, 7, kae to uwuo e wi penjo ma luwoni:

• Gin kinde mage ma nyalo bedo maber ka iling’ kata rito mondo iwuo e kinde mowinjore?

5. Wach gik mabeyo e wi jomamoko

VIDIO: ‘Wach Weche ma Gero Jomamoko’ (4:07)

• Ang’o momiyo owadwano ne dwaro loko yo ma owuoyogo e wi jomamoko?

• Ang’o ma nokonye timo lokruok?

Som Eklesiastes 7:16, kae to uwuo e wi penjo ma luwoni:

• Ang’o monego wapar sama wadwaro wuoyo marach e wi ng’at machielo?

Som Eklesiastes 7:21, 22, kae to uwuo e wi penjo ma luwoni:

• Ere kaka ndikoni nyalo konyi mondo iyi kik wang’ ahinya sama ng’ato owuoyo kuomi marach?

6. Bed mang’won sama iwuoyo gi joodu

VIDIO: Hera kod Luor Miyo Joot Bedo gi Winjruok Maber (3:08)

• En ang’o ma nyalo konyi mondo iwuo gi joodu e yo mang’won?

Som Jo-Efeso 4:31, 32, kae to uwuo e wi penjo ma luwoni:

• Gin weche mage ma nyalo konyo joot kendo gerogi?

Jehova nonyiso Yesu kaka nohere. Som Mathayo 17:5, kae to uwuo e wi penjo ma luwoni:

• Ere kaka inyalo luwo ranyisi mar Jehova sama iwuoyo gi joodu?

PUONJ MADUONG’

Wechewa nyalo konyo kata hinyo jomamoko. Mano e momiyo onego wapar matut gik ma wawacho, sama wawachogi, kod yo ma wawachogigo.

Ang’o ma ipuonjori?

• Moko kuom yore minyalo tiyogo gi wecheni e konyo jomamoko gin mage?

• Gin weche kaka mage ma ok onego iwach?

• Ang’o ma nyalo konyowa mondo wawach weche ma jiwo jomamoko kinde duto?

MED TIMO NONRO

Ang’o ma nyalo konyowa wacho weche ma jiwo jomamoko?

Bed gi Lew Ng’at Mariek (8:04)

Non ane gik ma nyalo konyi mondo kik iwach weche maricho.

“Be Yanyo Ng’ato En Gima Rach Adier?” (Sula ma yudore e jw.org)

Ne ane kaka inyalo tang’ mondo kik idonj e kuoth.

Ere Kaka Anyalo Tamora Kuoth? (2:36)

Ne ane kaka Jehova nokonyo dichwo moro mondo owe tiyo gi weche maricho.

“Ne Achako Paro Matut Kama Ngimana Nochomo” (Ohinga mar Jarito, Agost 1, 2013)