Chik Iti Mondo Iyud Puonj
1. Ang’o momiyo kinda dwarore mondo wachik itwa kendo wayud puonj e chokruog-distrikt?
1 Chokruoge mag distrikt ma 2013 biro chakore machiegnini. Riwruok mar oganda Jehova oikonwa program mowinjore chuth gi gik madwarore ahinya e kindewagi. Be isetimo chenro mondo ibed e odiechienge adek duto mag chokruogno? Nikech chokruoge ma ji ng’enyie nigi gik manyalo chocho pachwa, dwarore ni watim kinda mondo mi wasik ka waketo pachwa chuth e program. Nikech program mar chokruoge mag distrikt boyoga mohingo chokruoge mag kanyakla, biro chunowa ni wachik itwa kuom kinde malach. E wi mago, wuoth ma rabora sama wadhi e chokruogno nyalo jonyo dendwa. En ang’o mwanyalo timo mondo wachik itwa kendo wayud puonj?—Rapar 31:12.
2. Ere kaka wanyalo iko chunywa ne chokruog-distrikt mabiro?
2 Kapok Chokruok Ochopo: Kodong’ jumbe moko to wadhi e chokruok, Websait marwa mar www.jw.org/luo ting’oga program ma nigi wiye mag twege duto mibiro gol e chokruog-distrikt kaachiel gi moko kuom ndiko masiro twegego. Ka wan gi yor donjo e Intanet, ng’iyo programno chon biro konyowa mondo waik chunywa ne puonj ma wabiro yudo e chokruogno. (Ezra 7:10) Donge unyalo keto thuolo moro tenge mondo uwuo e wi program mar chokruog-distrikt sama utimo Lamo mar Joot?
3. Ang’o ma dwarore ni watim mondo wachik itwa maber sama program dhi nyime?
3 Sama Program Dhi Nyime: Nyalo bedo maber ka wadhi e choo ka program pok ochakore. Ka in gi simb lwedo, lore mondo kik ochoch pachi sama chokruok dhi nyime. Kata kamano, kochuno ni nyaka iwe simbi ma ok ilore, kete e yo maok obi kiko it jomamoko kapo ni ng’ato ogochoni. Ne ni gimoro amora ma ibiro tiyogo sama chokruok dhi nyime ok choch jomamoko. Ok en gima ber chiemo kata metho sama program dhi nyime. (Ekl. 3:1) Sik king’iyo jagol-twak. Sama jagol-twak somo ndiko, in bende el Mumbi kendo iluwri kode. Ndik weche machuok.
4. Ere kaka jonyuol nyalo konyo nyithindgi mondo gichik itgi sama program dhi nyime?
4 Dwaher ni nyithindwa bende ochik itgi kendo giyud puonj. Ngeche 29:15 wacho kama: “Nyathi mowe kende timo kaka odwaro, okelo wich kuot ni min mare.” Omiyo, en gima ber bet kanyachiel kaka joot mondo jonyuol one ni nyithindgi obet mos kendo gichiko itgi sama program dhi nyime, kar weyogi gigo mbaka, gitugi, kata giring koni gi koni. Kata ka wan gi nyithindo matindo ma samoro ok nyal mako gima iwuoyoe, pod en gima ber ka wakonyogi mondo kik ginindi kata chapni sama program dhi nyime.
5. Ang’o momiyo ber nwoyo weche ma wapuonjore e chokruog-distrikt, to ere kaka wanyalo timo mano?
5 Bang’ Program Modiechieng’ Kodiechieng’: Chak nindo chon mondo iyud yueyo moromo. Nwoyo weche mag program modiechiengno biro konyi paro puonj madongo. Omiyo, ber kawo thuolo kaka joot mondo uwuo machuok e wi program modiechiengno. Kapo ni inindo e otel gi osiepeni, donge nyalo bedo maber ka uwuoyo kuom weche ma nomorou e program? Bende, nyalo bedo maber ka e Lamo mar Joot maluwo, unono kaka unyalo tiyo gi puonj ma uyudo e chokruogno. Unyalo keto thuolo moro tenge juma ka juma mondo unon buge manyien ma uago e chokruok.
6. Be chopo achopa e chokruog-distrikt oromo? Ler ane.
6 Nyasi mag gago bedoga maber mana ka joma obiroe ochamo chiemo motedi. Kamano bende, chokruogewa mag distrikt biro kelonwa ber mana ka wachamo chiemb chuny ma oiknwa. Wang’aduru mar bedo e odiechienge duto mag chokruogno, wachik itwa maber, kendo wati gi puonj mabeyo ma wabiro yudo.
[Sanduku e ite mar 2]
Weche Miparonwa Kuom Chokruog-Distrikt ma 2013
◼ Seche mag Program: Ibiro yaw rangeye sa 2:00 okinyi. Thum biro chakore sa 3:20 okinyi e odiechienge adekgo duto. Sama thum chakore onego oyud ka waduto wasebet mondo omi program ochakre e yo manyiso luor. Wer mogik ma iluwo gi lamo biro chakore sa 10:50 odhiambo chieng’ Tich Abich kod Ngeso, to chieng’ Jumapil wer mogik biro chakore sa 9:35 odhiambo.
◼ Kuonde Chungo Mtokni: E kuonde duto ma ibiro timie chokruog-distrikt to nigi kuonde ma oyienwa chungoe mtokni, ji biro keto mtoknigi maok gichulo, ka joma okwongo chopo ema imiyo thuolo mokwongo. Nikech kuonde chungo mtoknigo kinde mang’eny ok lach, kar mondo ng’ato ka ng’ato ma nigi mtoka obi gi mare, nyalo bedo maber ka jomoko otimo chenro mar riwore e mtoka achiel.
◼ Mako Kom: Inyalo mako kombe mana ne joma uidhogo mtoka achiel, joma idakgo, kod joma ipuonjorigo Muma. Nikech kuonde bet moyang ne joma hikgi oniang’ kata matuwore ok lach, samoro ok bi nyalore mondo joutegi duto obed butgi. Nyalo bedo maber ka waweyo kuondego ne jogo kod joma konyogi kende.—1 Kor. 13:5.
◼ Chiemb Odiechieng’: Ting’uru chiemo kar wuok e seche mag yueyo ni udhi manyo chiemo. Ng’ato nyalo tiyo gi gir ting’o chiemo manyalo romo e bwo kombe. Ok oyie ne ng’ato ang’ata ting’o chiemo e gik madongo dongo kata gik molos gi glas.
◼ Chiwo: Achiel kuom yore mwanyalo nyisogo ni wagoyo erokamano en golo chiwo mar siro tij piny mangima sama wan e chokruog-distrikt. Chiwo mitimo gi chek onego oketie nying mar International Bible Students Association kata nying machielo ma Joneno tiyogo e pinyu.
◼ Aksident kod Gik Matimore Apoya: Ka nitie gima otimore apoya madwaro ni mondo ng’ato oyud thieth mapiyo ka en e chokruog-distrikt, nyisuru achiel kuom jorwak welo man machiegni mondo oter wach sano sano ne joma ochung’ ne chiwo Kony Mokwongo, mondo gine gima inyalo tim. Luwo chenroni biro miyo joma owinjore ema okaw okang’ madwarore.
◼ Yedhe: Ka nitie yedhe mitiyogo mag thieth, ne ni ibiro gi moromo nikech ok gibi yudore e kar chokruok. Joma nigi tuwo sukari ma seche moko chuno ni nyaka ting’ sindan mar thieth ok onego owit sindenego kama iketoe yugi e chokruog-distrikt kata e otel. Kar mano, onego giwitgi mana kuonde moyangi ne wito gik ma kamago.
◼ Wuoche: Higa ka higa, ji mang’eny hinyore nikech kit wuoch ma girwako, to moloyo wuoch ma ofunjgi kata ombong’gi boyo. Ber rwako wuoche modimbore, moromi kendo mibiro wuothogo maber kuonde miidho, kata e seche mireto, kod kinde mamoko.
◼ Modhi ma Nigi Suya Mager: Nitie chokruoge moko mag distrikt mitimo kuonde mogeng’ore. Kuom mano, en gima nyiso hera ka ok watiyo gi modhi ma nigi suya mager ahinya manyalo chando jogo ma nigi tuoche mag kor.—1 Kor. 10:24.
◼ Fom mag Tafadhali Fuatia Upendezi (S-43): Onego oti gi fomgo e chiwo weche kuom ng’at moro amora ma olendne e kinde chokruog-distrikt to orwako wach. Inyalo chiwo fom ma isepong’o maber ne Migawo mar Buge kata inyalo miyo jagoro ka idok e kanyaklau.
◼ Kuonde Chiemo: Mi nying Jehova duong’ kuom bedo gi timbe mabeyo seche ma in e kuonde chiemo. Rwakri ka Jakristo. Kapo ni e alworau ji joweyo gimoro matin ne joma tiyo kuonde michieme, inyalo timo kamano.
◼ Otende:
(1) Kik imak kuonde nindo mokalo mibiro tiyogo, kendo kik iwe ji mokalo kwan moketi onind e odno.
(2) Ka isemako kar nindo e otel, kik ilok chenrono mak mana ka nitie wach mowuok apoya, to sama mano otimore, ne ni inyiso weg otendno mapiyo kaka nyalore mondo jomamoko manyalo dwaro kuonde nindo oti gi thuolo ma iweyono. (Math. 5:37) Ka iloko chenro kamano, ne ni weg otendno omiyi namba kata kalatas ma nyiso ni iloko chenro. Kuonde mang’eny, ka iloko chenro e dakika mogik, tiende ni ka odong’ seche ma tin ne 48 to ichako tiyo gi odno, ok bi dwokni pesa misechulo.
(3) Kapo ni itiyo gi kad mar chulo pesa e otel, ket e paro ni nitie kwan moro mar pesa ma weg otel makoga mondo gichulgo gik mitiyogo kaachiel gi gimoro amora manyalo kethoreni e otendno. Ok ibi tiyo gi pesa momakgo kuom kinde nyaka bang’ ndalo matin ka giseng’ado pesagi.
(4) Kaw gir dhiro osike ei otendno mana ka iikori mar tiyo kode, kendo idwoke mapiyo mondo jomamoko bende oti kode.
(5) Ne ni iweyo gimoro matin ne jal makonyi ting’o gigi kod jal ma lwokoni ot kapo ni mano owinjore gi alworau.
(6) Kik ited e ot ma ok oyienie timo kamano.
(7) Kik ikaw chiemo mohingo ma weg otel ochano ne welo mabiro bedo e otendno, obed chiemb okinyi kata mamoko.
(8) Kinde duto, nyis nyak mar roho sama itudori gi jotich manie otendno. Jotijego rito welo mang’eny kendo gimor kodwa ka wang’won, wahore, kendo wawinjo wach.
(9) Jonyuol onego ong’e gima nyithindgi timo kata tuke ma gitugo seche duto ma gin e otendno.
(10) Ka wach moro marach oneno e ot ma omiyino, ne ni inyiso owete matiyo e Migawo mar Kar Nindo sama in e chokruok.
◼ Chiwruok: Ng’at ma diher chiwore onego odhi e Migawo mar Chiwruok mayudore e chokruogni. Nyithindo ma johigini 16 kadok piny nyalo konyo ahinya kapo ni gitiyo e bwo jonyuolgi kata jal machielo ma jonyuolgi oyiene ritogi.