SIKURU KA UNENO!
Ang’o ma Muma Wacho e Wi Yo ma Din Donjorego e Lweny ma Gore Ukraine?
Ne ane moko kuom weche miwacho e wi jotend din kod lweny ma gore Ukraine:
“Jatend din mar Kanisa mar Orthodox e piny Russia, Patriarch Kirill, pok owacho gimoro amora e wi monj ma jo Russia omonjogo Ukraine. . . . Miriambo ma jo kanisane osebedo ka wacho e wi Ukraine, e ma Putin bende osebedo ka tiyogo e siro lweny ma dhi nyimeno.”—EUobserver, Mach 7, 2022.
“Patriarch Kirill . . . siro matek ahinya lweny ma Russia goyogo Ukraine, kowacho ni mano en achiel kuom yore mikedogo mondo otiek richo.”—AP News, Mach 8, 2022.
“Jatend din mar Kanisa mar Orthodox e piny Ukraine, Metropolitan Epiphanius I ma wuok Kyiv, chieng’ Wuok Tich, noguedho joge mondo odhi ‘oked gi Jo-Russia ma nomonjogi’ . . . kendo nowacho ni nego jolweny ma Russia ok en richo.”—Jerusalem Post, Mach 16, 2022.
“Wan [the Ukrainian Council of Churches and Religious Organizations (UCCRO)] wariwo lwedo jolweny mag Ukraine kod joma kedonwa. Waguedho kinda ma giketo e kedo ne Ukraine kendo walemonegi.”—UCCROa Statement, Februar 24, 2022.
Ineno nade? Be jotend din ma wacho ni luwo Kristo, onego ojiw jolembgi mondo odonj e weche mag lweny? Ang’o ma Muma wacho e wi wachno?
Kaka dinde osebedo ka donjore e weche mag lwenje
Chakre chon, dinde osebedo ka jiwo lweny kendo yie gi lweny ka konchiel to giwacho ni gimanyo kue. Kuom higni mang’eny, Joneno mag Jehova osebedo ka elo timgi marachno. Ne ane moko kuom ranyisi mosebed kigoyo e bugewa.
Sula moro ma wiye wacho ni “Zile Krusedi—‘Uwongo Wenye Msiba’” wacho kaka kanisa mar Roman Catholic nodonjore e nek malich ka giwacho ni gitimo kamano nikech nying Nyasaye kod nying Yesu.
Sula mar “Kanisa Katoliki Katika Afrika” bende lero achiel kuom lwenje moko mag dho udi ma dinde ne ok otimoe gimoro mondo gitieki, moriwo nyaka lwenje ma notieko dhoudi moko pep.
Sula mar “Je, Dini Inapaswa Kulaumiwa?,” “Fungu la Dini Katika Vita vya Binadamu,” kod sula ma wacho ni “Dini Yajiunga” nolero kaka jotend dinde mag kanisni mag Katholik, Orthodox, kod Protestant osebedo ka riwo lwedo lwenje mang’eny.
Be Jokristo onego oriw lwedo lwenje?
Gima Yesu nopuonjo: “Nyaka iher wadu kaka iherori iwuon.” (Mathayo 22:39) “Dhiuru nyime hero jowasiku.”—Mathayo 5:44-47.
Par ane wachni: Be din nyalo wacho ni giluwo chik Yesu mar hero jowetegi ka konchiel to gijiwo jolembgi mondo oneg jomamoko e lweny? Mondo iyud dwoko mar penjono, som sula ma wacho ni, “Wakristo wa Kweli na Vita” kod ma wacho ni “Je, Inawezekana Kuwapenda Adui Zako?”
Gima Yesu nowacho: “Pinyruodha ok en mar pinyni. Ka da bed ni Pinyruodha en mar pinyni, joga dine okedo mondo kik chiwa e lwet [jowasika].” (Johana 18:36) “Jogo duto ma tiyo gi ligangla notho tho ligangla.”—Mathayo 26:47-52.
Par ane wachni: Ka Jokristo ne ok onego oked e lweny kata mondo gires Yesu, be koro Jokristo me kindewagi onego oked e lweny nikech wach moro amora? Som sula ma wacho ni “Tiend Weyo Riwo Lwedo Weche mag Piny?” mondo ine kaka Jokristo mokwongo noluwo ranyisi mar Yesu kod puonj mage.
Ang’o ma biro timore ne dinde ma riwo lwedo lwenje?
Muma puonjo ni Nyasaye kwedo dinde ma luongore ni Jokristo to ok luw puonj mag Yesu.—Mathayo 7:21-23; Tito 1:16.
Bug Fweny lero ni Nyasaye neno ni dinde kaka mago nigi ketho mar nek “mag ji duto ma ne oneg e piny.” (Fweny 18:21, 24) Mondo ipuonjri weche momedore, som sula ma wiye wacho ni “Babilon Maduong’ En Ang’o?”
Yesu nowacho ni dinde duto ma kwedo Nyasaye ibiro kethi nikech timbegi maricho, mana kaka yien marach ma nyago olemo motop “ing’ado kendo iwito e mach.” (Mathayo 7:15-20) Mondo ing’e kaka mano biro timore, som sula ma wacho ni “Kaka Dinde mag Miriambo Ketho Nying Nyasaye.”
Photo credits, left to right: Photo by Sefa Karacan/Anadolu Agency/Getty Images; Maxym Marusenko/NurPhoto via Getty Images
a Riwruok mar UCCRO, kata Ukrainian Council of Churches and Religious Organizations, oting’o kanisni mopogore opogore 15 moriwo kanisni mag Orthodox, Katholik, Protestant, kod mag Evangelist kaachiel gi kanisni mag Jo-Yahudi kod Jo-Islam.