Be Jokristo Onego Odonj e Lweny?—Gima Muma Wacho

Mana kaka lweny ma dhi nyime e piny Ukraine osenyiso, jotend dinde ma luongore ni Jokristo riwo lweny lwedo. Ne ane kaka gisenyiso mano:

• “Un jolwenjwa ma Ukraine ma kedo gi jowasikwa, wamor kodu kendo wagoyonu erokamano ahinya. . . . Ng’euru ni waherou, walamonu, kendo wariwou lwedo kinde duto.”​—Weche ma Metropolitan Epiphanius I of Kyiv nowacho e The Jerusalem Post, Mach 16, 2022.

• “Jatend kanisa mar Othodoks ma Russia nobago lamo ne jolwenj Russia chieng’ Jumapil, kendo nonyisogi ni giked ne pinygi gi chunygi duto e lweny ma Ukraine mondo ginyis ni gin Jo-Russia adier.”​—Reuters, April 3, 2022.

Be Jokristo onego odonj e lweny? Ang’o ma Muma wacho?

Gima Muma wacho

Muma wacho ni jolup Yesu Kristo madier ok onego odonj e lweny.

• “Duok liganglani kare, nimar jogo duto ma tiyo gi ligangla notho tho ligangla.”​—Mathayo 26:52.

  Be ng’at ma dhi e lweny kata ma riwo lweny lwedo luwo weche ma Yesu nowachogo adier?

• “Amiyou chik manyien, ni ubed gi hera e kindu; mana kaka aseherou, un bende herreuru e kindu. Ma e ma nomi ji duto ong’e ni un jopuonjrena ka un gi hera e kindu uwegi.”​—Johana 13:34, 35.

  Be ng’at ma riwo lweny lwedo nyiso ni en gi hera ma Yesu nowacho ni ne idhi fwenygo jopuonjrene kata jolupne?

Mondo iyud weche momedore, som sula ma wacho ni, “Je, Ukristo Unaunga Mkono Vita?”

Paro ma Jokristo ma kindegi onego obedgo e wi lweny

Be en gima nyalore mondo Jokristo kik donj e lweny e kindegi? Ee, nyalore. Muma nokoro ni e kindewagi, ma bende iluongo ni “ndalo mag giko,” nitie joma ne dhi wuok e ogendni mopogore opogore ma ne ok dhi ‘puonjore lweny,’ nikech ne gidhi luwo puonj mag Yesu.​—Isaya 2:2, 4.

• Mondo iyud weche momedore, som sula ma yudore e Ohinga mar Jarito ma wiye wacho ni, “Nyasaye Neno Nade Lweny?”

Machiegnini, Jehovaa ma en “Nyasach kuwe,” biro tiyo gi lochne man e polo mondo ogol ne ji “gik ma diyogi kaachiel gi timbe mahundu.”​—Jo-Filipi 4:9; Zaburi 72:14.

• Mondo ing’e kaka obiro timo mano, ne vidio ma wiye wacho ni Pinyruodh Nyasaye En Ang’o?