SIKURU KA UNENO!

Tim mar Goyo Ji gi Bunde Sani Okwako Piny Ngima—Ang’o ma Muma Wacho?

WECHE MOMEDI: April 27, 2023

Tim mar goyo ji gi bunde sani medore ameda e piny ngima. Ne ane moko kuom gik ma notimore machiegnini.

“Kwan mar joma inegoga gi bunde e rumbi medorega higa ka higa e piny Amerka. Nek ma kamago timorega chiegni dichiel juma ka juma e pinyno.”—April 21, 2023, The Guardian.
“E ot moro ma nonegie ji mang’eny gi bunde e piny South Africa, joot achiel nolalo joggi apar, moriwo joma mon abiriyo kod wuoyi achiel ma jahigni 13.”—April 21, 2023, AP News.
“Ng’at moro nonego ji auchiel gi bunde e Od Romo mar Joneno mag Jehova ma ni Hamburg e piny Germany, kae to en be onegore.”—Mach 10, 2023, Reuters.

Muma chiwo hoch ne joma yudo masiche kaka mago. Ne ane achiel kuom joma noyudo hoch ma kamano e vidio ma wiye wacho ni, DeJanerio Brown: Chunye Nonyosore, To Ne Ok Ojok.

Muma konyowa bende ng’eyo gimomiyo masichego timore. Mondo in be ing’e wachno, ne vidio ma wiye wacho ni, Ang’o Momiyo Nyasaye Oweyo Chandruok Mondo Obedie?

E dwe mar Julai 2022, nitie ji mang’eny ma nogo gi bunde e piny ngima:

“Nek mar jasiasa ma rahuma e piny Japan [Shinzo Abe ma chon ne en Prime Minister] nobwogo ji e pinyno, kendo piny ngima nohum ahinya, nikech timbe mahundu ok ng’eny ruok e piny Japan, kendo gin gi chike moridore ma miyo ok yot mondo ji oti gi bunde ao yaye.”—Julai 10, 2022, The Japan Times.
“Ji nohum nono e piny Denmark bang’ ng’at moro nego ji adek gi bunde e duka moro maduong’ ma ni Copenhagen.”—Julai 4, 2022, Reuters.
“South Africa: Ji 15 notho bang’ ka jo njore nogoyo ji gi bunde e ba moro e taon mar Soweto.”—Julai 10, 2022, The Guardian.
“Ji mokalo 220 nogo gi bunde monegi e piny Amerka e holiday ma Julai 4.”—Julai 5, 2022, CBS News.

Be nitie geno moro amora ni timbe njore kaka mago chieng’ norum? Ang’o ma Muma wacho?

Mahundu kod Njore Biro Rumo

Muma luongo kinde ma wadakiegi ni “ndalo mag giko,” ma gin kinde ma ji ne dhi bedo mager kendo timo gik ma hinyo jowetegi. (2 Timotheo 3:1, 3) Timbe kaka mago miyo ji dak gi luoro. (Luka 21:11) Kata kamano, Muma singo ni kinde biro ma mahundu kod njore norum, kendo ji “nodag e piny mokuwe, kendo ginidag gi mor ma onge koko.” (Isaya 32:18) Ere kaka mano biro timore?

Nyasaye biro tieko joma richo duto kendo ketho gige lweny duto.

“Joricho ibiro gol oko e piny.”—Ngeche 2:22.
“[Nyasaye tieko] lwenje e piny duto. Oturo atunge kod tonge; owang’o geche lweny gi mach.”—Zaburi 46:9.

Nyasaye biro puonjo ji dak gi kuwe, to mano biro miyo ji ogol timbe mahundu kod njore e chunygi chuth.

“Ok ginikel hinyruok moro amora kata ketho goda maler, nimar ng’eyo mar Jehova nopong’ piny duto mana kaka pige pong’o nam.”—Isaya 11:9.
Kata mana e kindewagi, Nyasaye dhi nyime puonjo ji e piny ngima mondo ‘githedh ligengnigi obed kwer, kendo tongegi obed pand keyo,’ tiende ni giwe timbe gero kaachiel gi ligengni.—Mika 4:3.

Mondo ing’e weche momedore e wi piny ma onge luoro mosingnwa e Muma, som sula ma wacho ni, “Je, Inawezekana Kuishi Bila Woga?”

Mondo ing’e weche momedore e wi kaka ibiro tiek timbe gero chuth, som sula ma wacho ni, “Hatimaye Amani Duniani!”