Be Lweny mar Piny Ngima Biro Timore Machiegni?—Ang’o ma Muma Wacho?

Kuom higni 30 mokalo, ng’eny ji ne neno ni winjruok mantiere e kind pinje ne otegno kendo ne medo bedo maber. Kata kamano, gik ma timore sani nyiso maler ni ji ma wuok e pinje mopogore opogore onge gi winjruok e kindgi.

“Ji nigi luoro ni lweny ma timore Gaza biro kelo hinyruok ne pinje molwore nikech Israel gi Hezbollah gore e boda mar Lebanon.”—Reuters, Januar 6, 2024.
“Grube moko ma wuok e piny Iran osebedo ka monjo kuonde mopogore opogore. Bende, Iran osechako loso gige lweny mag nyuklia kendo. Sani, piny Russia kod China riwo Iran lwedo. To mano osemiyo pinje mag Ulaya obedo gi luoro moro.”—The New York Times, Januar 7, 2024.
“Lweny ma dhi nyime e kind Russia kod Ukraine osekelo kethruok mang’eny ahinya ne piny Ukraine.”—UN News, Januar 11, 2024.
“China osetimo dongruok e weche mag yuto kod gike mag lweny, Taiwan bende osegombo bedo gi loch ma mare owuon, kendo nitie winjruok marach e kind China gi Amerka. Weche adekgo nyalo miyo lweny omuoj sa asaya.”—The Japan Times, Januar 9, 2024.

Be Muma wuoyo e wi tungni ma waneno ka nitiere e piny sani? Be tungnigo biro kelo lweny mar piny ngima?

Muma nokoro gik ma timore e piny sani

Muma ne ok okoro ni nitiere lweny moro sie ma ne dhi timore e kindewagi. Kata kamano, nokoro ni lwenje ne dhi betie moro bang’ machielo, kendo lwenjego ne dhi “golo kuwe oa e piny.”—Fweny 6:4.

Bug Daniel nokoro ni “e kinde giko,” pinje ma nigi teko ne dhi yware kata piem nikech gidwaro bedo gi loch e wi pinje mamoko. Ywaruokgino ne dhi miyo giti gi pesa mang’eny ahinya, kendo gitim gik ma nyiso ni gin gi jolweny motieg maber.—Daniel 11:40, 42, 43.

Lweny mokayo machiegni

Muma wacho ni weche biro bedo marach ahinya e piny, e ka bang’e weche nobed maber. Yesu nokoro ni “masira maduong’ nobedie ma pok ne otimore a chakruok piny nyaka sani.” (Mathayo 24:21) “Masira maduong’” biro tugo lweny miluongo ni Har-Magedon, ma en “lweny mar odiechieng’ maduong’ mar Nyasaye Manyalo Duto.”—Fweny 16:14, 16.

Kata kamano, Har-Magedon biro reso dhano, to ok tiekogi. Nyasaye biro tiyo gi lwenyno e tieko sirkende mag dhano ma osemiyo lwenje mang’eny obetie. Mondo ing’e kaka Har-Magedon biro kelo kuwe ma nyaka chieng’, som sula ma wiye wacho ni:

“Har-Magedon En Ang’o?”
“Har–Magedon En Gima Ber!”