Loko Twege mag Chokruok Maduong’ ma 2020 ma Wiye Wacho ni ‘Beduru Mamor Kinde Duto’! e Dhok Mang’eny

E dweche mag Julai kod Agost 2020, owetewa gi nyiminewa e piny mangima biro neno chokruok maduong’ e kinde machal. Wang’ni e ka gima kamano ohango timore. Mondo mano onyalre, ne dwarore ni olok twege duto mag chokruogno e dhok mokalo 500. Chano tich ma kamano kendo tieke thothne nyaloga kawo higa achiel kata mokalo kanyo. To nikech pek ma tuo mar coronavirus nokelo, owete gi nyimine ma ne timo tij loko twege mag chokruok maduong’ ma 2020 e dhok mang’enygo, ne nyaka tiek tijno mana gi dweche ma ok rom ang’wen.

Migawo Mochung’ ne Tij Loko Dhok kod Migawo mar Ng’iepo e Piny Mangima ma nitie e Ofis Maduong’ mar Joneno mag Jehova nokonyo kama duong’ ahinya. Migawo Mochung’ ne Tij Loko Dhok nofwenyo ni ofise mang’eny mag loko dhok ne onego oyud gige tich momedore mondo ginyal tijno, to ahinya-ahinya maikrofon mabeyo. Migawo mar Ng’iepo e Piny Mangima nochano mondo ng’iew maikrofon 1,000 kendo kowogi kuonde ma hawo 200 e piny ngima.

Mondo ne kung pesa, nong’iew maikrofon mang’eny dichiel, notergi kamoro achiel mondo obogi maber, kae to nokowgi ne jolok-dhok kuonde mopogore opogore e piny ngima. Nikech ne ong’iew maikrofon mang’eny dichiel kamano, mano nomiyo nengo mar maikrofon achiel kod kowe kama idhi tiye kode obedo mana dola 170 kama, ma Amerka (siling’ 17,000 ma Kenya). Ka dine ng’iew maikrofon ka maikrofon yore, pesa ma dine watiyogo dohingo mano gi pasent 20.

Migawo mar Ng’iepo e Piny Mangima ne nyaka ng’iew gik ma ne dwarorego kendo kowogi e kind April gi Mei 2020, ma en kinde ma ohelni mang’eny ne tiyo mana matin nikech coronavirus. To e ma chop giko Mei, gigo nosechopo e thoth ofise mag loko dhok, bede ofise, kod kuonde mamoko milokoe dhok!

Jay Swinney ma tayo Migawo mar Ng’iepo e Piny Mangima wacho kama: “E tijno duto te, ne nitie tudruok maber ahinya e kind joma ni e migepe mopogore opogore e Bethel kaachiel gi jo ohelni ma ne wang’iepo kuomgi kod ma nokowonwa gigo. Timo mago duto e wang’ sa kendo kungo chiwo ma owete gi nyimine golo nonyalore mana nikech roho maler mar Jehova.”

Nicholas Ahladis ma ni e Migawo Mochung’ ne Tij Loko Dhok wacho kama: “Jolok dhok ma ne ni e lockdown ne mor ahinya ka ne giyudo gige tich ma nokownegigo. Kata obedo ni koro ne ok ginyal tiyo kamoro achiel gi jowetegi ma gin-go e team, pod ne gibedo gi tudruok maber ma giloko twege, drama, kod wende e dhok mokalo 500.”

Mae ok e tich kende ma notim mondo owetewa e piny ngima oyud chokruok maduong’ ma 2020; nitie tije mamoko mang’eny motudore gi iko chokruogno ma bende ne otim. Chiwo ma ugolo kokalo kuom websaitwa mar donate.jw.org kata yore mamoko e ma nomiyo wang’iewo gik ma ne dwarore ahinyago.