Tich Ang’wen, Novemba 6
Gouru erokamano kuom gik moko duto.—1 The. 5:18.
Nitie gik mang’eny ma wanyalo goyonee Jehova erokamano e lamo magwa. Wanyalo goyone erokamano kuom gik mabeyo duto ma wan-go nikech mich mabeyo duto wuokga kuome. (Jak. 1:17) Kuom ranyisi, wanyalo goyone erokamano kuom miyowa piny ma jaber kod gik mamoko ma nochueyo. Bende, wanyalo goyone erokamano kuom miyowa ngima, joodwa, osiepewa, kod geno ma jaber. Bende, wadwaro ni wago ne Jehova erokamano kuom miyowa thuolo mar bedo gi winjruok maber kode. Nyalo dwarore ni wamed timo kinda mondo wapar matut kuom gik ma Jehova osetimonwa ma wanyalo goyonee erokamano. Wadak e piny ma ji ok goga erokamano. Thoth ji ketoga pachgi mana kuom gik ma gidwaro, kar goyo erokamano kuom gik ma giseyudo. Ka warwako paro ma kamano, lamo magwa biro mana pong’ gi gik ma wakwayo. Mondo kik mano timre, dwarore ni wamed timo kinda mondo wago ne Jehova erokamano kuom gik mosetimonwa.—Luka 6:45. w23.05 4 ¶8-9
Tich Abich, Novemba 7
[Sik] ka [ikwayo] ka [in] gi yie ma ok oriw gi kiawa kata matin.—Jak. 1:6.
Nikech Jehova en Wuoro ma jahera, ok omorga sama wachandore. (Isa. 63:9) Kata kamano, ok ogeng’nwaga chandruoge ma waromogo, minyalo pim gi aoche kod mach. (Isa. 43:2) Osingo ni obiro bedo kodwa sama ‘wakalo’ e chandruogego. Bende, ok obi weyo mondo chandruogewa omonwa dhi nyime lame. Omiyowaga rohone maler mondo okonywa nano. (Luka 11:13; Fil. 4:13) Kuom mano, wanyalo bedo gadier ni kinde duto obiro miyowa gimoro amora ma wadwaro mondo okonywa nano kendo siko ka wamakore kode. Jehova dwaro ni wagen kuome. (Hib. 11:6) Nitie sama chandruogewa nyalo chalo gi gode madongo ma ok wanyal twenyo. Wanyalo kata chako bedo gi kiawa ka be Jehova biro konyowa. Kata kamano, Muma nyisowa ni teko mar Nyasaye nyalo miyo ‘wakal ohinga.’ (Zab. 18:29) Omiyo, kar chako bedo gi kiawa, onego wakwa Jehova mondo omiwa yie, kendo wagen ni obiro dwoko lamowa.—Jak. 1:6, 7. w23.11 22 ¶8-9
Ngeso, Novemba 8
[Hera bebni] ka mach ma kakni, ee, obebni ka mach mar Jah. Kata mana pi mopong’ manade ok nyal nego hera.—Wer 8:6, 7.
To mago doko weche mamit! Wechego jiwo joma okendore ni en gima nyalore mondo gisik ka giherore. Mondo hera manie kind dichwo gi dhako osiki, dwarore ni gitim kinda ahinya. Wati ane gi ranyisi mar mach e lero wachno. Mach nyalo dhi nyime liel mana ka imedone yien. To ka onge ng’ama medone yien, gikone obiro tho. E yo ma kamano, hera manie kind dichwo gi dhako nyalo siko ka bebni, to mana ka gitimo kinda e tege. Nitie kinde ma dichwo gi dhako nyalo neno ni heragi chako tho kata dok chien, to ahinya-ahinya sama nitie pek mag yuto, midekre, kod pek mag pidho nyithindo. Omiyo, mondo hera manie kind dichwo gi dhako osik ka bebni ka “mach mar Jah,” giduto nyaka gibed gi winjruok motegno gi Jehova. w23.05 20 ¶1-3