Ezekiel
32 E odiechieng’ mokwongo mar dwe mar 12 e higa mar 12, wach Jehova nobirona kendo niya: 2 “Wuod dhano, wer ne Farao ruodh Misri wend ywagruok ka inyise kama,
Ne ichalo gi sibuor ma ratego ne ogendni,
To koro osetieki.
Ne ichalo gi ondieg nam,+ ma mwomo aochene,
Ka iduwo pi gi tiendi kendo lilo aochegi.
3 Ma e gima Jehova Wuon Loch Duto owacho:
‘Abiro tiyo gi ogendni mang’eny e yaro gogona kuomi,
Kendo giniywayi oko gi gogona.
4 Abiro boli e piny;
Abiro witi e pap.
Anami winy ma fuyo e kor polo opi kuomi,
Kendo anayieng’ le mag bungu me piny duto gi ringi.+
5 Abiro bolo ringreni e gode
Kendo anapong’ hohni gi ringreni.+
6 Abiro pong’o piny gi rembi nyaka e wi gode,
Kendo rembi nopong’ aoche matindo.’
7 ‘To ka osetieki, abiro imo polo mi sulwe ok norieny.
Abiro umo wang’ chieng’ gi boche polo,
Kendo dwe ok bi rieny.+
8 Anami gik moko duto ma golo ler e polo obed mudho nikech in,
Kendo anaum pinyi gi mudho,’ Jehova Wuon Loch Duto owacho.
9 ‘Anami chuny ji mang’eny ochandre sa ma atero jogi e tuech e pinje mamoko,
E pinje ma ok ing’eyo.+
10 Abiro miyo ji mang’eny odhier nono,
Kendo ruodhigi biro tetni gi luoro sa ma afwayo liganglana e nyimgi.
Gibiro tetni aming’a, ka giparo ni gibiro tho,
E odiechieng’ ma ibiro podhoe.’
11 Ma e gima Jehova Wuon Loch Duto owacho:
‘Ligangla mar ruodh Babulon nobini.+
12 Abiro miyo ogandani opodh nikech ligangla mar jolweny ma thuondi,
Giduto gikwiny moloyo oganda moro amora.+
Gibiro tieko sunga mar Jo-Misri, kendo nego ogandane duto.+
13 Abiro tieko jambe duto modak but pigene mang’eny,+
Kendo tiend dhano kata tiend jamni, ok bi duwo pigego kendo.’+
14 ‘E kindeno, abiro miyo pigegi obed maliw,
Kendo anami aochegi omol mana ka mo,’ Jehova Wuon Loch Duto owacho.
15 ‘Chieng’ ma abiro ketho Misri mi obed piny mojwang’, ma onge gimoro amora,+
Kendo nego jo ma odak e iye duto,
Gibiro ng’eyo ni an Jehova.+
16 Ma en wend ywagruok, kendo ji biro were;
Nyi ogendni biro were.
Gibiro were ka giywago Misri kod ogandane duto,’ Jehova Wuon Loch Duto owacho.”
17 To e odiechieng’ mar 15 e higa mar 12, wach Jehova nobirona niya: 18 “Wuod dhano, ywag Jo-Misri kendo ilorgi e piny ma mwalo, en kaachiel gi nyi ogendni ma roteke, kod jo ma lor e liel.
19 “‘En ng’ano ma iloyo gi ber? Lor piny mondo inind kaachiel gi jo ma ok oter nyangu!’
20 “Gibiro podho e kind jo ma oneg gi ligangla.+ Osechiwe ne ligangla; ywayeuru ugole oko kaachiel gi joge.
21 “‘Thuondi ma roteke kaachiel gi jo ma ne konye biro wuoyo kode ka gin e Liel.* Ginilor piny kendo gininind mana ka jo ma ok oter nyangu, moneg gi ligangla. 22 Asuria ni kuno kaachiel gi ogandane duto. Lietegi olwore koni gi koni, giduto ne oneggi gi ligangla.+ 23 Lietene e ma ni kuonde ma mwalo mogik e bur, kendo ogandane olwore koni gi koni. Ka ne gingima ne gimiyo ji bedo maluor, to koro giduto gisetho gi ligangla.
24 “‘Elam+ ni kuno kaachiel gi ogandane duto kendo gilworo ka ma ne oyikee. Ka ne gingima ne gimiyo ji bedo maluor, to koro giselor e liel ka ok otergi nyangu. Gibiro yudo wich-kuot kaachiel gi jo ma oyik e liel. 25 Giselosone otanda e dier jo ma osenegi, en kaachiel gi ogandane duto. Liete mag joge olwore koni gi koni. Giduto ne oneggi gi ligangla ka ok otergi nyangu. Ka ne gingima ne gimiyo ji bedo maluor, to koro giseyudo wich-kuot kaachiel gi jo ma oyik e liel. Osepiele e kind jo ma onegi.
26 “‘Meshek gi Tubal+ ni kanyo kod ogandagi* duto. Lietegi olwore koni gi koni. Giduto gin jo ma ok oter nyangu ma ne ochwo gi ligangla, nikech ka ne gingima ne gimiyo ji bedo maluor. 27 Donge ibiro pielgi kaachiel gi thuondi ma ne ok oter nyangu ma ne otho, molor piny e Liel* gi gigegi mag lweny? Gibiro teno wigi gi liganglagi,* to richogi nobed e chokegi, nikech ka ne thuondigo ngima ne gimiyo ji bedo maluor. 28 In to ibiro toyi e kind jo ma ok oter nyangu, kendo ibiro nindo kaachiel gi jo ma ne oneg gi ligangla.
29 “‘Edom+ ni kuno kaachiel gi ruodhige kod jodongo mage duto. Kata obedo ni ne gin jo ma roteke kamano, ne opielgi e kind jo ma noneg gi ligangla. Gin bende gibiro nindo kaachiel gi jo ma ne ok oter nyangu+ kod jogo ma lor mwalo e liel.
30 “‘Kuno e ma jotelo duto mag nyandwat kaachiel gi Jo-Sidon nitie.+ Chon ne gin jo ma roteke kendo ma ne miyo ji bedo maluor to koro gisedhi e liel ka gin gi wich-kuot ka ok otergi nyangu. Ibiro pielgi kaachiel gi jo ma ne ok oter nyangu, kod jogo ma lor mwalo e liel gi wich-kuot.
31 “‘Farao biro neno mago duto kendo chunye noduog koparo gik moko duto mosetimore ne ogandane.+ Farao kod jolwenje duto biro tho gi ligangla,’ Jehova Wuon Loch Duto owacho.
32 “‘Ibiro yik Farao gi ogandane duto kaachiel gi jo ma ne ok oter nyangu, kendo ma ne oneg gi ligangla, nikech ka ne pod ongima ne omiyo ji obed maluor,’ Jehova Wuon Loch Duto owacho.”